Lajmet

​Përplasen Gërvalla e Tahiri, ministren e quan përfaqësuese të Serbisë në Kosovë

Published

5 years ago

on

Ministrja e Punëve të Jashtme dhe Diasporës, Donika Gërvalla, duke iu drejtuar deputetëve të Partisë Demokratike të Kosovës, tha se korrupsioni nuk është narrativë e Serbisë, por është realitet i hidhur i qytetarëve të Kosovës. Ajo të njëjtit i ka bërë përgjegjës edhe për krijimin e Gjykatës Speciale, e kjo ka ngjallur reagimin e shefit të Grupit Parlamentar të PDK-së Abelard Tahiri, i cili e ka quajtur ministren Gërvalla përfaqësuese të Serbisë në Kosovë.

Gërvalla tha se Qeveria Kurti është zgjedhur me mandatin për ta luftuar krimin dhe korrupsionin që është instaluar nga Partia Demokratike e Kosovës.

“Po ju drejtohem juve deputetëve të PDK-së, se korrupsioni nuk është shpikje jona, korrupsioni nuk është narrativë e Serbisë, por është realitet i hidhur i qytetarëve të Republikës së Kosovës dhe ky realitet i hidhur ka kërkuar zgjidhjen e tij në rezultatin e 14 shkurtit. Qeveria është zgjedhur me mandatin për të luftuar krimin dhe korrupsionin e instaluar më së shumti nga ju në këtë vend, edhe nga të tjerët, por më së shumti nga ju Partia Demokratike e Kosovës. Kjo është narrativa juaj, ju jeni përgjegjës për instalimin e korrupsionit dhe është narrativa jonë luftimi i këtij korrupsioni dhe sigurimi i barazisë, i vendeve të punës për qytetarët e Republikës së Kosovës. E vërteta i bën mirë gjithkujt, e vërteta është e domosdoshme për të dalë nga gropa në të cilën keni hyrë”, tha ajo.

Në vazhdim të fjalës së saj, ministrja Gërvalla tha se Gjykata Speciale nuk është instaluar nga Serbia, por nga vetë deputetët e PDK-së, teksa shtoi se janë pikërisht ata përgjegjësit që prijësit e tyre ndodhen sot në Hagë.

“Gjykata Speciale nuk është e instaluar nga Serbia, Gjykata Speciale në Hagë është e instaluar nga ju. Pse është e instaluar nga ju, sepse ju jo vetëm që nuk e keni luftuar, nuk keni ndërmarrë asgjë për dënimin dhe gjykimin e krimeve të pasluftës, jo vetëm që asgjë nuk keni ndërmarrë për gjykimin dhe dënimin e krimeve pas luftës, por ju jeni munduar kështu që ta evitoni gjykimin e krimeve në Kosovë. Ju jeni ata që në këtë formë e keni bërë të mundur Gjykatën Speciale, të mos flasim për pjesën e asaj që ju e keni votuar Gjykatën Speciale, Gjykata Speciale nuk ka pikuar nga qielli, mos ju ka kapur amnezia dhe të mos bëhemi qesharak, ju e dini shumë mirë se si është krijuar Gjykata Speciale. Ky koalicion qeveritar nuk e ka krijuar Gjykatën Speciale, atë e keni krijuar ju dhe tani jeni në nevojë për të sqaruar pse e keni bërë një gjë të tillë dhe prandaj merreni çdo ditë me sajime, me gënjeshtra edhe absolutisht, ju siguroj që nuk është kjo forma të cilën ju do të mund t’ia shpjegoni veprimet tuaja të së kaluarës përkrahësve tuaj, duhet të gjeni një zgjidhje tjetër. Ju, pikërisht ju jeni përgjegjës që prijësit tuaj ndodhen në Hagë”, tha ajo.

Ndaj deklaratave të ministres Gërvalla ka reaguar shefi i Grupit Parlamentar të PDK-së Abelard Tahiri, i cili e ka quajtur përfaqësuese të Serbisë në Kosovë.

“E nderuara ministre, sot na e dëshmove që Republika e Serbisë nuk ka nevojë më të merret me Republikën e Kosovës, sepse të ka ty përfaqësuese në Kosovë. Ti je turpi i diplomacisë së Kosovës. Të dilet sot dhe të thuhet që nuk është bërë prej Serbisë Gjykata Speciale është turpi më i madh për qytetarët e Republikës së Kosovës. Prandaj, sot dil dhe kërkoju falje qytetarëve të Republikës së Kosovës, sepse ajo Gjykatë është bërë me faktet e rrejshme të ofruara nga qeveria serbe, me fakte të sajuara nga qeveria serbe, dil kërkoju falje qytetarëve dhe atyre që janë atje të akuzuar, sepse kjo gjykatë është bërë prej njerëzve sikur ju, me dëshmi sikur ju. Prandaj, sot nuk ka nevojë Daçiqi të flasë, sepse është Donika Schwarz, se atë mbiemrin tjetër po më vjen marre me ta përmend me dal me fol për krimet që janë bërë në Kosovë”, tha ai.

Ai ka kërkuar nga kryeministri Kurti të shkarkojë ministren Gërvalla, pasi ajo sipas tij nuk e përfaqëson qytetarin e Kosovës.

“Pra, ti sot në vend që me i përmend viktimat, civilët, dhunimin që ka ndodhur në Kosovë, por ti del fletë me sajime të Beogradit, pra ti sot më shumë ngjason me përfaqësuesen e Republikës së Serbisë në Kosovë sesa me ministren e Punëve të Jashtme. Vërtet ndihem keq, nuk më intereson a jam pozitë apo opozitë, por si qytetarë i Kosovës me dëgjua një fjalë të tillë prej ministres së Punëve të Jashtme është mjerim për këtë vend, është turp i madh për këtë vend. Prandaj, dil kërkoju falje, dil kërko që gjenocidi serb duhet të dënohet. Kjo është turp për ty, është marre, ti je përfaqësuese e Serbisë në Kosovë, ti nuk më përfaqëson mua, ti je turpi më i madh, sot nëse do të kishte një kryeministër të përgjegjshëm sot do të duhej me të shkarkua, asnjë edhe minutë ti nuk mundesh me qenë ministre e Punëve të Jashtme, ky është turpi më i madh që ndodh në këtë vend. Prandaj, i bëjmë thirrje kryeministrit që ti nuk mund të qëndrosh në këtë sallë, ti duhet me ecë, ti nuk e përfaqëson qytetarin e Kosovës”, tha ai. 

Related Topics:
Continue Reading

Lajmet

Prokuroria Themelore në Prishtinë jep detaje për përleshjen e armatosur në Podujevë

Published

4 hours ago

on

July 2, 2026

By

Prokuroria Themelore në Prishtinë ka dhënë detaje lidhur me përleshjen e armatosur që ka ndodhur sot rreth orës 13:40 në sheshin “Bulevardi i Dëshmorëve” në Podujevë.

Sipas njoftimit zyrtar, në ngjarje janë përfshirë tre persona, ndërsa si pasojë e të shtënave me armë zjarri janë plagosur tre prej tyre dhe një kalimtar i rastit.

Dyshohet se personat e përfshirë kanë lidhje familjare (nip dhe dajë), ndërsa motivi paraprak lidhet me një mosmarrëveshje mes tyre.

Menjëherë pas pranimit të informatës, prokurori kujdestar ka dalë në vendin e ngjarjes së bashku me Policinë e Kosovës, ku janë ndërmarrë veprimet e para hetimore për zbardhjen e rrethanave.

Të dyshuarit po hetohen për veprën penale “Vrasja e rëndë në tentativë”, ndërsa të lënduarit janë dërguar në QKUK për trajtim mjekësor.

Prokuroria Themelore në Prishtinë, në koordinim me Policinë e Kosovës, ka bërë të ditur se hetimet për rastin po vazhdojnë./A.K/

Continue Reading

Lajmet

Të shtëna me armë zjarri në Podujevë, katër persona të plagosur

Published

6 hours ago

on

July 2, 2026

By

Lajm i përditësuar:

Katër persona kanë mbetur të plagosur si pasojë e të shtënave me armë zjarri që kanë ndodhur sot rreth orës 13:30 në Podujevë.

Lajmin e ka konfirmuar zëdhënësi i Policisë së Kosovës për rajonin e Prishtinës, Enisa Pllana për UBTnews, duke bërë të ditur se njësitet policore kanë dalë menjëherë në vendin e ngjarjes pas pranimit të informatës.

Sipas informacioneve të para, fillimisht u raportua për tre të lënduar, ndërsa së fundmi në Qendrën Universitare Klinike të Kosovës (QKUK) është dërguar për trajtim mjekësor edhe personi i katërt. Të gjithë të plagosurit po marrin ndihmën e nevojshme shëndetësore.

Aktualisht, njësitet e policisë po vazhdojnë med ndërmarrjen e veprimeve intensive operativo-hetimore në terren, me qëllim të identifikimit të personave të përfshirë dhe sqarimit të plotë të rrethanave të kësaj ngjarjeje. /E.A/

Continue Reading

Lajmet

Nga burrat me maska te varësia nga morfina – ‘Little House on the Prairie’ ishte shumë më i errët sesa kujtohet.”

Published

6 hours ago

on

July 2, 2026

By

Netflix pritet të sjellë javën e ardhshme një adaptim të ri të “Little House on the Prairie”, bazuar në serinë e njohur të librave për fëmijë të autores Laura Ingalls Wilder.

Seriali origjinal, i transmetuar nga viti 1974 deri në 1984, u bë një fenomen televiziv ndërkombëtar, duke ndjekur jetën e familjes Ingalls në qytetin Walnut Grove të Minesotës gjatë shekullit XIX. Ai tërhoqi deri në 20 milionë shikues për episod në Shtetet e Bashkuara dhe u transmetua në më shumë se 100 vende të botës.

Edhe pse shumë njerëz e kujtojnë si një serial të ngrohtë familjar, kritikët theksojnë se versioni i viteve ’70 trajtoi tema shumë më të rënda sesa përshtypja që ka lënë te publiku.

Përveç historive për jetën e përditshme në komunitet, seriali përfshinte edhe tema si abuzimi i fëmijëve, vrasjet, varësia nga droga, vetëvrasja, problemet e shëndetit mendor, kanceri dhe vështirësitë e shtatzënisë.

Sipas studiuesve të televizionit, këto histori pasqyronin realitetin e ashpër të jetës në kufirin amerikan gjatë shekullit XIX, ku sëmundjet, humbja e fëmijëve dhe komplikimet gjatë lindjes ishin të zakonshme.

Versioni i ri i Netflix-it pritet t’i qëndrojë më besnik toneve familjare dhe frymës së librave origjinalë të Laura Ingalls Wilder, duke ofruar një qasje më të afërt me materialin burimor.

Mbetet të shihet nëse adaptimi i ri do të arrijë suksesin dhe ndikimin kulturor që pati seriali origjinal, i cili edhe sot vazhdon të mbetet ndër produksionet televizive më të dashura për disa breza shikuesish./BBC/A.K/

Continue Reading

Lajmet

Zbulimi pranë Jerusalemit hedh dritë mbi jetën e njerëzve para 3 mijë vjetësh

Published

6 hours ago

on

July 2, 2026

By

Një zbulim i rëndësishëm arkeologjik pranë Jerusalemit ka ofruar njohuri të reja mbi jetën e njerëzve që jetuan rreth 3.000 vjet më parë, gjatë periudhës së Tempullit të Parë.

Sipas “The Times”, edhe pse varri i lashtë ishte dëmtuar nga punimet ndërtimore dhe grabitjet, studiuesit arritën të nxirrnin informacione të vlefshme falë analizës së ADN-së së ruajtur në mbetjet njerëzore.

Vendi i varrimit u zbulua pranë Abu Ghosh, afër vendbanimit antik të Kiryat Yearim, ku arkeologët gjetën rreth 150 enë qeramike dhe mbetje skeletore të disa individëve, përfshirë edhe fëmijë.

Sipas ekspertëve, varri ishte përdorur për disa breza gjatë epokës së vonë të hekurit, në kohën e Mbretërisë së Judës.

Ruajtja e ADN-së në rajonin e Levantit është jashtëzakonisht e rrallë për shkak të temperaturave të larta dhe lagështisë, por studiuesit arritën të nxirrnin mostra nga kocka petrose e kafkës, një nga pjesët më rezistente të trupit të njeriut.

Analiza u realizua nga një ekip ndërkombëtar shkencëtarësh, ku bënin pjesë gjenetisti David Reich dhe arkeologu Israel Finkelstein.

ADN-ja u rikuperua pjesërisht nga dy individë, duke zbuluar të dhëna për linjat e tyre amtare dhe atërore, por jo një pamje të plotë të prejardhjes së tyre.

Shkencëtarët theksuan se nuk ka prova të drejtpërdrejta që personat e varrosur ishin izraelitë, pasi në varr nuk u gjetën mbishkrime apo shenja që do të përcaktonin identitetin e tyre etnik. Përfundimet mbështeten kryesisht në stilin e qeramikës, mënyrën e varrimit dhe afërsinë me qendrat e njohura të Mbretërisë së Judës.

Njëri prej individëve mbante kromozomin Y të haplogrupit J2, një linjë gjenetike e përhapur në Azinë Perëndimore dhe rajonin e Kaukazit, ndërsa të dy individët kishin linja të ndryshme mitokondriale, duke treguar prejardhje të ndryshme nga ana e nënës.

Sipas studiuesve, gjetjet nuk japin një përgjigje përfundimtare mbi identitetin etnik të banorëve të asaj kohe, por tregojnë se rajoni ishte një pikë takimi e popullsive të ndryshme./atsh/A.K/

Continue Reading

Të kërkuara