Lajmet

​Partitë pa koalicione, LVV në pritje të Osmanit, Nisma i thotë jo listës së PDK-së

Publikuar

Partitë e mëdha politike po e vlerësojnë të arsyeshme mosarritjen e koalicioneve parazgjedhore me parti më të vogla. Shfrytëzimi i platformës dhe fuqisë politike të partive të mëdha, po konsiderohet ndër arsyet se PDK refuzoi bashkëpunimin me Nismën. Por, kjo për Lëvizjen Vetëvendosje nuk është problem për të garuar në një listë të përbashkët me iniciativën politike të ushtrueses së detyrës së presidentes, Vjosa Osmani.

Ndërkohë, në partinë e Fatmir Limajt, pas refuzimit të PDK-së, thonë se nuk ka kohë më për eksperimente në lista të përbashkëta dhe se në zgjedhjet e 14 shkurtit do të garojnë të vetëm. Kurse në AKR shprehen se nga ana e tyre ka pasur vullnet për koalicion klasik parazgjedhor me LDK, mirëpo një gjë e tillë nuk ka qenë e pranueshme nga LDK.

Zëdhënësi i LVV-së, Përparim Kryeziu thotë për KosovaPress se forma dhe modaliteti i bashkëpunimit me Vjosa Osmanin është në proces dhe i njëjti do të garantojë shumicë parlamentare pas zgjedhjeve.

“Ne kemi treguar se jemi të hapur për koalicione në kuptimin e bashkëpunimit me faktorë të rëndësishëm politikë. Tashmë ka një modalitet të bashkëpunimit të tillë me Alternativën dhe znj. Kusari-Lila. Ngjashëm ka një vullnet, disponim dhe gatishmëri, për një bashkëpunim edhe me znj. Osmani dhe nismën e saj, për çka ka një proces në zhvillim e tutje mbi formën apo modalitetin e konkretizimit të tij. Bashkëpunimi jonë më të tjerë është i bazuar mbi logjikën e qëllimeve të përbashkëta dhe mirëbesimit të ndërsjelltë që edhe synon edhe garanton shumicën parlamentare pas zgjedhjeve të 14 shkurtit, që përfundimisht mundëson kapërcimin e madh dhe ndryshimin e nevojshëm për vendin tonë”, u shpreh Kryeziu në një përgjigje me shkrim për KosovaPress.

Në PDK thonë se elektorati i tyre nuk ka pasur vullnet për koalicion parazgjedhor me Nismën. Zëdhënësi i partisë, Avni Bytyçi thotë për KosovaPress se Nisma Socialdemokrate dhe partitë e tjera të vogla, janë në shuarje e sipër dhe se ata kanë menduar përmes koalicioneve parazgjedhore të shpëtojnë veten.

“Nga viti 2017 shumë parti politike, duke përfshirë edhe Nisma Socialdemokrate dhe AAK-ja e kanë shfrytëzuar platformën dhe fuqinë tonë politike për t’u rritur. Nuk ka pas as vullnet dhe dëshirë që PDK-ja kësaj radhe të ofrojë hapësirën për parti tjera, e kemi bërë të qartë se PDK-ja garon për qytetarët me një platformë dhe kandidat, i cili besoj që është kandidati më i mirë se të tjerët. Nisma Socialdemokrate, AKR dhe parti tjera duket se janë në shuarje e sipër, nëse ata kanë menduar se përmes koalicionit parazgjedhor me PDK-në të shpëtojnë veten, kjo ka qenë kalkulim i gabuar. Në fund ne jemi parti politike dhe garojmë për vota dhe mbështetjen e qytetarëve”, tha ai.

Por, anëtari i kryesisë së Nismës, Zafir Berisha u shpreh kritik ndaj PDK-së duke thënë se ka munguar vullneti nga ana e tyre për koalicion parazgjedhor, derisa thekson se nuk ka asnjë mundësi që Nisma të përfshihet në listën zgjedhore të PDK-së.

“Nuk ka, ne sot sapo e përfunduam mbledhjen me kryetarët e degëve. Deri të premten e kemi listën gati prej 110 kandidatëve. Nuk ka më kohë të eksperimenteve të njerëzve të cilët nuk kanë treguar përgjegjësinë e duhur në këto rrethana”, thotë ai.

Ndërkaq, sekretari i AKR-së, Vesel Makolli u shpreh për KosovaPress se kanë insistuar për koalicion parazgjedhor klasik me LDK-në, mirëpo të njëjtin nuk e kanë pranuar një gjë të tillë.

“Kërkesa jonë ka me qenë me shkua në atë koalicionin klasik, mirëpo kërkesa tjetër nga LDK-ja ka qenë që ne të hymë në listë, e cila është vendosur dje. Kohën e fundit kemi pas kontakte dhe diskutime, mirëpo është vendosur në fund që ne të jemi në listën e LDK-së dhe do të marrim në zgjedhje ashtu”, thotë ai.

Zgjedhjet e parakohshme në vend pritet të mbahen më 14 shkurt, ndërsa partitë politike kanë kohë deri të shtunën në orën 18:00 për dërgimin e listave të kandidatëve për deputetë.

Lajmet

​Kuvendi miraton projektligjin për rrugët

Të zgjedhurit e popullit i dhanë dritën e gjelbër Projektligjit për rrugët.

Publikuar

nga

Kuvendi i Kosovës në seancën e sotme plenare, ka miratuar një sërë projektligjesh. Të zgjedhurit e popullit i dhanë dritën e gjelbër Projektligjit për rrugët, Projektligjit për faturat e kulturave bujqësore dhe fletëmagazinave, ndërkaq u miratua edhe Programi Kombëtar i Shkencës 2023-2028, raporti vjetor i Fondit të Kursimeve Pensionale të Kosovës për vitin 2022, po ashtu raporti për gjendjen në mjedis për vitin 2022, si dhe rezoluta për vlerësimin e punës së Zyrës së Rregullatorit të Energjisë për vitin 2022.

Krahas kësaj, në mungesë të kuorumit, kuvendi dështoi të miratoi të miratojë Projektligjin për verëra dhe Projektligjin për shpronësimin e pronës së paluajtshme.

Në këtë seancë s’po marrin pjesë deputetët opozitarë. Të njëjtit pasi dështoi të themelohet komisioni hetimor parlamentar për kontratat njëburimore lëshuan sallën.

Vazhdo të lexosh

Lajmet

​Përkujtohen viktimat në 25-vjetorin e masakrës së Podujevës

Kryeministri tha se njësoj të bashkuar jemi edhe ne sot në kujtim dhe në nderim të rënies së tyre për tokën e Kosovës dhe për lirinë e popullit.

Publikuar

nga

Në përvjetorin e 25-të të masakrës së kryer në Podujevë nga njësiti serb “Skorpionët”, kryeministri Albin Kurti bëri sot homazhe te varrezat e të vrarëve të familjeve Bogujevci, Duriqi dhe Llugaliu.

Sikurse ishin të bashkuara familjet Bogujevci, Duriqi dhe Llugaliu, kryeministri tha se njësoj të bashkuar jemi edhe ne sot në kujtim dhe në nderim të rënies së tyre për tokën e Kosovës dhe për lirinë e popullit.

“Ata na e kujtojnë dhe përkujtojnë se sa i lartë ishte çmimi i shtetit dhe lirisë, që e gëzojmë sot, se si rrënjët e shtetit dhe të lirisë janë te gjaku i martirëve dhe dëshmorëve. Njëkohësisht, zëri ynë do të jetë gjithnjë më i fuqishëm si institucional ashtu edhe qytetar për kërkim të drejtësisë”, tha ai.

Në mesin e të mbijetuarve të kësaj masakre, kryeministri përmendi Saranda Bogujevcin, tashmë deputete dhe nënkryetare e Kuvendit të Republikës së Kosovës, e cila bashkë me të mbijetuarit e tjerë i bënë ballë breshërive të plumbave dhe të cilët sot janë ndër dëshmitarët e gjenocidit të Serbisë në Kosovë.

“Në mesin e atyre që u masakruan këtu ishte edhe Saranda Bogujevci e cila iu mbijetoi 16 plumbave, pra para 25 viteve trupi i njomë i Saranda Bogujevcit, atëherë e mitur, përfundoi me 16 plumba dhe ata pesë që shpëtuan nga kjo masakër ishte një mrekulli e vërtetë dhe sot janë dëshmitarë të gjenocidit të Serbisë në Kosovë”, tha ai.

Kurti vazhdoi duke i bërë thirrje edhe një herë Prokurorisë në Kosovë të punojnë në ndjekjen e kriminelëve dhe vënien e drejtësisë, e cila do të finalizohej me vënien prapa grilave të vrasësve mizorë të familjeve Bogujevci, Duriqi e Llugaliu.

Ngjashëm, u shpreh edhe Enver Duriqi, të cilit në këtë masakër iu vranë katër fëmijë të moshave 3, 5, 8 edhe 10-vjeç, bashkë me gruan dhe prindërit.

“Është mbajtur një gjykim sa për sy e faqe dhe kisha me quajt se ata i kanë metodat e veta, injorojnë, nuk gjykojnë, nuk i pranojnë krimet, por si do që të jetë, ne do të qëndrojmë edhe më të fortë”, tha Duriqi.

Vazhdo të lexosh

Lajmet

S’ka kuorum për themelimin e Komisionit Hetimor Parlamentar për kontratat njëburimore

Kjo pasi deputetët e Lëvizjes Vetëvendosje nuk kanë marrë pjesë në votim.

Publikuar

nga

Në mungesë të kuorumit, ka dështuar të formohet Komisioni Hetimor Parlamentar që do t’i hetojë kontratat njëburimore të Qeverisë Kurti. Kjo pasi deputetët e Lëvizjes Vetëvendosje nuk kanë marrë pjesë në votim.

Gjatë diskutimit që ka zgjatur rreth tri orë, deputetët e opozitës e kanë akuzuar pushtetin për numër të madh të kontratave njëburimore të nënshkruara gjatë kësaj qeverisje.

Në sallë ishin të pranishëm 63 deputetë, ndërsa në votim morën pjesë 26 përfshirë edhe Konjufcën që votoi pro themelimit të këtij komisioni. Ata kanë kërkuar që Prokuroria të merret me hetimin e tyre. Por deputetët e pushtetit kanë thënë se themelimi i komisionit është ia panevojshëm dhe ka mohuar akuzat e opozitës se në këtë qeveri janë lidhur më shumë kontrata njëburimore se në qeveritë e kalaruar.

Shefja e GP të Vetëvendosjes, Mimoza Kusari-Lila, ka refuzuar t’i paraqesë në Kuvend pesë emrat e grupit të saj për komisionin hetimor, me arsyetimin se duhet të binden se opozita po kërkon zgjedhje fillimisht e pastaj i dërgojnë emrat.

“Shumë lartë e vlerësojmë ofertën për pesë anëtarë, ne frikësohemi se komisioni po i shtyn zgjedhjet e shumëkërkuara nga opozita dhe nuk po dimë a janë më me prioritet komisionet apo zgjedhjet. Derisa ta marrin vendimin dhe derisa të jemi të bindur se këta vërtetë po kërkojnë zgjedhje ne nuk i kemi këta 5 emra”, ka thënë ajo.

Shefi i GP të PDK-së, Abelard Tahiri, ka propozuar një datë për zgjedhje.

“Marrë parasysh josinqeritetin e këtyre dhe frikën për të shkuar ne e dimë që ajo ka qenë vetëm një lojë fjalësh sepse këta nuk guxojnë ta shpërndajnë kuvendin më 9 qershor. Nuk mundet me kaq lehtësi dhe me këtë sportivitet kaq të madh me anashkalu votimin e një komisioni hetimor”, ka thënë Tahiri.

Kurse Driton Selmanaj nga LDK-ja ka thënë se komisioni hetimor duhet të themelohet, ndërkohë ka treguar pozicionin e partisë për zgjedhje.

“Atë që mund të them në emër të LDK, ne kemi filluar me u dashuruar në postulatin hajnat në burg, por jo hajnat në zgjedhje. Ne po duam hajnat vërtetë të përfundojnë në burg. Mesa po e shohim VV po do me shku me postulatin hajnat në zgjedhje sepse po i duhen paratë për të bërë fushatë edhe një herë. Ne insistojmë në themelimin e komisionin hetimor”, deklaroi Selmanaj.

Shefi i GP të AAK-së, Besnik Tahiri, ka thënë se VV-ja po i ik temës së komisionit hetimor sepse ka frikë.

“Është një ikje nga tema nga komisioni hetimor që në fakt është frika e qeverisë me u ballafaqu me të vërtetën dhe mos emërimi i kandidatëve e vërteton pohimin tonë se tenderët njëburimorë janë vatra korruptive e kësaj qeverie”, deklaroi Tahiri.

Vazhdo të lexosh

Lajmet

​BQK: Dërgesat e mërgatës deri në fund të shkurtit arritën në mbi 174 milionë euro

Sipas një komunikate, 174.30 milionë euro është vlera preliminare e remitancave.

Publikuar

nga

Banka Qendrore e Kosovës ka njoftuar se vlera preliminare e dërgesave nga mërgata për muajin shkurt 2024, është 87.90 milionë euro. Sipas një komunikate, 174.30 milionë euro është vlera preliminare e remitancave.

“64.40%, dërgesat përmes IFJB-ve, 312.70 milionë euro, asetet e kompanive të sigurimeve, 2.80 miliardë euro, asetet e fondeve pensionale, 555.20 milionë euro, asetet e ndërmjetësve të tjerë financiar, 60.60%, kreditë e ekonomive familjare, sektori mikrofinanciar, 41.40 milionë euro, kreditë e reja nga ndërmjetësit e tjerë financiarë. Rreth 88 milionë euro është vlera preliminare e dërgesave të mërgatës që janë sjell në Republikën e Kosovës për muajin shkurt 2024”, thuhet në njoftimin e BQK-së.

Sipas raportit, prurjet më të mëdha të remitancave ishin nga institucionet financiare jo-bankare me pjesëmarrje prej 64.4 për qind, pasuar nga kanalet tjera me 19.7 për qind dhe bankat me 15.9 për qind.

Për sa i përket aseteve të kompanive të sigurimit, BQK-ja tregon se deri në këtë muaj vlera e tyre ishte 312.7 milionë euro, duke shënuar rritje prej rreth 600 mijë euro krahasuar me janarin e 2024-së.

Ndërsa asetet e fondeve pensionale kanë arritur vlerën e 2.8 miliardë euro, e cila përfaqëson rritje për 46.5 milionë euro.

Në fund, BQK-ja tregon se asetet e ndërmjetësve tjerë financiar në fund të muajit shkurt 2024 janë rritur për 15.1 milionë euro, duke arritur vlerën e 555.2 milionë eurove.

Vazhdo të lexosh

Të kërkuara