Lajmet

​Opozita dhe pushteti përplasen për themelimin e komisionit hetimor për rezervat shtetërore

Nevoja për themelimin e këtij komisioni është e domosdoshme pasi ka dyshime të bazuara për abuzime me rezervat shtetërore.

Published

on

Partitë opozitare dhe partia në pushtet janë përplasur sot (e enjte) në Kuvendin e Kosovës, në lidhje me themelimin e komisionit hetimor parlamentar për rezervat shtetërore. Sipas partive opozitare, nevoja për themelimin e këtij komisioni është e domosdoshme pasi ka dyshime të bazuara për abuzime me rezervat shtetërore, ndërkaq në LVV theksuan se kjo është ndërhyrje në sistemin e drejtësisë, pasi prokuroria veçse është duke hetuar këtë rast.

Shefi i Grupit Parlamentar të LDK-së, Arben Gashi, i cili është edhe iniciues për themelimin e këtij komisioni, tha se duhet të zbardhen të gjitha dyshimet për keqpërdorime në rezerva shtetërore.

“Duke pasur parasysh indicet përtej dyshimit të bazuar për abuzime të mundshme të ndërlidhura me procesin e furnizimit me rezervat shtetërore e konsiderojmë të nevojshme që të bëhet hetim i thelluar parlamentar. Me qëllim të ushtrimit të mandatit tonë kushtetues parlamentar theksojmë nevojën e madhe të zhvillimit të këtij hetimi, veçanërisht kur është parasysh fakti që rezerva shtetërore është e nivelit të prioritetit të sigurisë nacionale”, tha ai.

Mirëpo, themelimin e këtij komisioni e vlerësoi të ngutshëm shefja e Grupit Parlamentar të LVV-së, Mimoza Kusari-Lila. Sipas saj, deputetët opozitarë po dëshirojnë të bëhet hetues duke synuar të bëjnë paralelizma me prokurorinë.

Madje ajo ngriti dyshime se edhe propozimi për kryesues të këtij komisioni është në kundërshtim me rregulloren e Kuvendit. Ndërkaq, shtoi se shpenzimet e komisionit shkojnë mbi 20 mijë euro si mëditje të deputetëve, e cila sipas saj shkojnë dyfish më shumë sesa vlera e grurit që mungon.

“Ky hetim parlamentar synon të bëjë paralelizëm për diçka që organet e rendit tashmë veçse janë të përfshira. Pyetja për deputetët nënshkrues është shumë e thjeshtë: Nuk po i besoni Prokurorisë? Apo po e konsideroni vetëm hetues më të aftë sesa prokuroria dhe policia e vendit? Zakonisht deri tash fryma e hetimit parlamentar ka qenë që në Kuvend do të duhej të hetohej një çështje për të tërhequr vëmendjen e prokurorisë, ndërkaq, aktualisht prokuroria e ka këtë rast…. Gjithashtu shpenzimet që ndërlidhen me mbarëvajtjen e komisionit hetimor parlamentar që kemi pasur deri tani dhe që kanë zgjatur deri në periudhën e njëjtë kohore shpenzimet shkojnë deri 20 mijë euro. Aty përfshihen mëditjet e deputetëve, angazhimi i ekspertëve, koha nëse ka nevojë edhe për fluturimin që duhet të intervistohen nga vendet të tjera. Pra, kjo vlerë është gati dyfish më e madhe sesa krejt vlera e grurit që po e kontestoni”, theksoi ajo.

Por asaj i reagoi iniciuesi i themelimit të komisionit, shefi i deputetëve të LDK-së, Arben Gashi, i cili tha se ky komision nuk ndërhynë në punën e prokurorisë.

“Prokuroria e ka punën e vet dhe komisioni nuk lyp dokumente prej prokurorisë. Prokuroria vazhdon punën e vet, ndërkaq komisioni ka tri fusha kryesore të hetimit. Hetimin administrativ, hetimin ligjor dhe kushtetues dhe keqpërdorimet e mundshme. Prokuroria merret vetëm me këtë të fundit, por nuk e përjashton që komisioni me u marrë dhe gjetjet e veta t’i dërgoj në prokurori”, shtoi ai.

Në anën tjetër, shefi i Grupit Parlamentar të PDK-së, Abelard Tahiri tha se thellimi i këtij komisioni është i domosdoshëm për ta vënë në pah skandalin e ekzekutivit me rezervat shtetërore. Ai sqaroi se të gjitha procedurat për themelimin e komisionit janë në bazë të Rregullores së Kuvendit, derisa shprehu gatishmërinë që dy deputetë të PDK-së të heqin dorë nga mëditjet në këtë komision.

“Partia Demokratike e Kosovës e mbështet këtë iniciativë por nuk është iniciues. Kjo është e qartë edhe në ligj, që iniciuesit nuk i takon kryesuesi në këtë rast, e jo nënshkruesi. Nëse cilësohemi si iniciues edhe ai person që vjen nga PDK-ja që nuk është nënshkrues nuk mundet me qenë kryesues i këtij grupi… Ne nuk po kërkojmë të bëhemi hetues. Kjo është një e pavërtetë që po thotë zonja Kusari, por po kërkojmë të kryejmë mandatin tonë si deputetë në bazë Kushtetutës së Kosovës. Kushtetuta i jep Parlamentit mundësinë të ketë hetim parlamentar, andaj ne po kërkojmë të shfrytëzojmë një të drejtë që na takon”, deklaroi Tahiri.

Të nevojshme themelimin e këtij komisioni e shprehu edhe shefi i Grupit Parlamentar të AAK-së, Besnik Tahiri.

“Ne dëshirojmë me pa këtë skandal, mega-skandal të një mashtrimi të madh në perspektivën politike, pasi ju keni ardhur në pushtet duke thënë ‘lufta kundër korrupsionit dhe ndaljen e gjakderdhjes’ po ashtu duke folur për rezervat shtetërore që s’jeni ndal duke folur që ne i kemi harxhuar. Tash ne po dëshirojmë me pa sesi e keni trajtuar ju”, tha ai.

Lajmet

Presidenti i FIFA-s, dekorohet nga Osmani

Published

on

By

Presidentja e Kosovës, Vjosa Osmani-Sadriu, në ceremoninë solemne të dekorimit të Presidentit të FIFA-s, Gianni Infantino, ka vlerësuar rolin e futbollit në historinë e vendit, duke e cilësuar atë si simbol të lirisë dhe qëndrueshmërisë së popullit të Kosovës edhe në periudhat më të vështira të okupimit.

Osmani tha se futbolli ishte streha e fëmijëve kosovarë në kohën e luftës dhe shprehja më e pastër e ëndrrës për liri.

Dhe një grup fëmijësh që ndiqnin jo vetëm një ëndërr, por edhe ndjenjën e lirisë. Në vitet më të errëta të okupimit, kur një luftë gjenocidale po zhvillohej kundër popullit tonë të pafajshëm, fëmijët e Kosovës gjetën lirinë në lojën e futbollit. Ata shikonin drejt idhujve të tyre për forcë dhe frymëzim. Dhe ata e mbanin topin duke u rrokullisur nëpër fusha të improvizuara, nëpër oborre me pluhur dhe rrugë të shkatërruara. Edhe në kampet e refugjatëve, larg nga shtëpia, futbolli u bë streha e tyre, veprimi i vetëm që nuk u hesht kurrë. Kur lufta përfundoi dhe liria u bë më në fund realitet, futbolli sërish u bë zemra që rrihte e popullit tonë. Dhe në ato vite të hershme të rindërtimit, një emër, një emër u bë përfaqësuesi i shpirtit të futbollit tonë dhe i shpirtit të vendit tonë Fadil Vokrri”, tha Osmani.

Duke kujtuar figurën e legjendës së futbollit, Fadil Vokrri, presidentja tha se ai ishte shumë më tepër se një lojtar, ishte simbol i qëndrueshmërisë dhe krenarisë kombëtare.

Ai ishte më shumë se një lojtar dhe më shumë se një udhëheqës. Ai ishte mishërimi i gjallë i qëndrueshmërisë dhe krenarisë së Kosovës. Ai mbante shpresat e vendit tonë shumë përpara se Kosova të kishte një vend në ndonjë tryezë ndërkombëtare. Dhe ai e përdori futbollin për t’i treguar botës se Kosova besonte dhe se Kosova ishte gati të qëndronte krah për krah me të tjerët. Vokrri frymëzoi një brez që refuzoi të dorëzohej. Ai dëshmoi se talenti, disiplina dhe besimi në vendin tënd mund të lëvizin male, edhe kur ato duken të palëvizshme. Trashëgimia e tij jeton në çdo lojtar të ri që ëndërron të veshë fanellën e Kosovës, në çdo fitore që bashkon popullin tonë dhe në çdo stadium ku tani luhet me krenari himni ynë. Ai jeton në çdo futbollist që shihni sot në këtë sallë, lojtarë që mbajnë të njëjtën krenari teksa shënojnë sukseset e tyre për vendin e tyre dhe për ekipet e tyre në mbarë botën”, theksoi ajo.

Presidentja Osmani përmendi edhe momentin historik kur Kosova u pranua në UEFA dhe më pas në FIFA, duke e cilësuar këtë si një akt drejtësie dhe njohjeje ndërkombëtare për sakrificat e popullit të Kosovës.

Dhe pastaj erdhi dita kur ajo ëndërr gjeti shtëpinë e saj të merituar, kur Kosova fillimisht u bë anëtare e UEFA-s dhe më pas anëtare e FIFA-s, duke iu bashkuar familjes së madhe të kombeve që flasin gjuhën universale të futbollit. Ky pranim shënoi një nga momentet më krenare në historinë tonë kombëtare — një moment kur më në fund mund të ndanim talentin tonë me botën. Mbi të gjitha, ishte një moment drejtësie — drejtësi dhe njohje për sakrificat, qëndrueshmërinë dhe ëndrrat e popullit tonë”, u shpreh ajo.

Ajo falënderoi Presidentin e FIFA-s, Gianni Infantino, për mbështetjen që i ka dhënë Kosovës në periudhën e pranimit në organizatat ndërkombëtare të futbollit.

“I dashur President Infantino, ne do ta kujtojmë gjithmonë që ju qëndruat pranë nesh gjatë këtyre momenteve historike dhe gjatë kësaj kohe vendimtare përmes anëtarësimit në UEFA si dhe në FIFA. Ju besuat në ne, besuat në potencialin e Kosovës dhe në fuqinë bashkuese të sportit, në një kohë kur të besoje kërkonte ende guxim. Ju e kuptuat se futbolli, në thelb, është për njerëzimin, për t’i dhënë çdo fëmije, pavarësisht nga vjen, mundësinë për të përkitur, për të përkitur”, tha Osmani.

Presidentja shtoi se nën udhëheqjen e Infantinos, FIFA është shndërruar në një familje të vërtetë kombesh që lidh popujt përmes sportit.

“Nëpërmjet udhëheqjes suaj, FIFA është bërë një familje e vërtetë kombesh, një familje ku secili ka vendin e vet. Ju keni punuar pa u lodhur për t’u siguruar që futbolli të ndërtojë ura mes njerëzve, kudo që ata mund të jenë. Dhe për Kosovën, kjo ka pasur një kuptim të jashtëzakonshëm. Ju ndihmuat lojtarët tanë të valëvitnin flamurin e një vendi të lirë e të pavarur, që sot garon me krenari dhe dinjitet në skenën ndërkombëtare”, u shpreh presidentja.

Duke përmbyllur fjalën e saj, Osmani tha se suksesi i Kosovës në futboll është ndërtuar mbi sakrificë dhe miqësi, duke falënderuar të gjithë ata që e kanë mbështetur vendin në këtë rrugëtim.

“Dhe sot, teksa shohim ekipin tonë kombëtar ulur këtu, si simbol i sa larg kemi arritur, na kujtohet se ky sukses nuk u ndërtua brenda natës. Ai u ndërtua përmes sakrificës, por edhe përmes miqësisë dhe mbështetjes. Dhe pikërisht kjo miqësi është ajo që na bashkon sot”, tha Osmani./D.B/EO

Continue Reading

Lajmet

Kurti takon komandantin e KFOR-it, Gjeneral Major Özkan Ulutash – flasin për sitauën e sigurisë

Published

on

By

Kryeministri në detyrë i Kosovës, Albin Kurti, priti në takim mirëseardhës Komandantin e ri të KFOR-it në Kosovë, Gjeneral Major Özkan Ulutash.

Siç njofton Zyra e Kryeministrit, gjatë këtij takimi është diskutuar për zhvillimet aktuale, me theks mbi situatën e sigurisë dhe për rëndësinë e bashkëveprimit dhe bashkëpunimit ndërmjet institucioneve të sigurisë të vendit dhe të misionit të NATO-s në Kosovë.

Duke i uruar mirëseardhje përsëri në Kosovë dhe duke i dëshiruar suksese në mandatin e dytë si komandant i KFOR-it, kryeministri Kurti theksoi gatishmërinë dhe angazhimin e tij dhe të Qeverisë për bashkëpunim të ngushtë me KFOR-in në ruajtjen e paqes dhe sigurisë në të gjithë territorin e vendit”, thuhet në komunikatë.

Komandanti i rikthyer në detyrë si udhëheqës i KFOR-it, Özkan Ulutas gjatë ceremonisë, katër ditë më parë tha se është i gatshëm për të përmbushur misionin e KFOR-it për paqe të qëndrueshme në Kosovë dhe për stabilitetin rajonal.

Continue Reading

Lajmet

Arrestohen dy persona të dyshuar për disa raste të vjedhjeve në Prishtinë

Published

on

By

Policia e Kosovës ka arrestuar dy persona të dyshuar për vjedhje në Prishtinë. Bëhet fjalë për 56 vjeçarin me inicialet B.J dhe M.C, 51 vjeç – të dy shtetas të Kosovës.

Arrestimi, sipas Policisë, ka ardhur pas një pune hetimore dhe operacionale të Sektorit të Hetimeve të Kryeqytetit.

Pas arrestimit, me vendim të Prokurorit të Shtetit, ata janë dërguar në mbajtje prej 48 orësh, përderisa hetuesit po kryejnë të gjitha veprimet e nevojshme hetimore e procedurale lidhur me së paku 15 raste të vjedhjeve, ku dyshohet se personat e arrestuar janë të përfshirë./D.B/KP

Continue Reading

Lajmet

Kurti: Sapo të fillojë punën Kuvendi, do ta zgjedhim qeverinë e re

Published

on

By

Kryeministri në detyrë, Albin Kurti ka komentuar raportin e fundit të Bankës Botërore për ngadalësim të rritjes ekonomike në Ballkanin Perëndimor.

Sipas këtij raporti, parashihet rënie e rritjes ekonomike nga 3.6 për qind në vitin 2024, në 3 për qind në vitin këtë vit për shtetet e Ballkanit Përëndimor. Por, rënien më të madhe është parashikuar ta ketë Kosovë.

Kurti gjatë vizitës në Termocentralin “Kosova B”, ka komentuar këtë raport, ku tha se “Kosova në çerekun e dytë të këtij viti ka pasur rritje ekonomike prej 4.58 për qind të Bruto Produktit Vendor (BPV)”.

“Ne po bëjmë gjithçka që dimë dhe mundemi që t’i ndihmojmë edhe sektorit privat, përveçse edhe ndërmarrjeve publike që t’i ndihmojmë edhe qytetarëve me mbështetje financiare në mënyrë që të rritet kërkesa agregate, po mbështesim eksportin e Kosovës dhe gjithashtu siç e shihni këtu edhe gjenerimin e energjisë elektrike me ç’rast investimi është në rritje të kapacitetit por gjithashtu edhe në siguri e qëndrueshmëri. Lajmi i mirë është që Kosova në çerekun e dytë sivjet ka pasur rritje ekonomike prej 4.58 për qind të Bruto Produktit Vendor dhe mos harroni që shpesh herë për aq shumë indekse edhe të demokracisë edhe të ekonomisë, Kosova është në krye të Ballkanit Perëndimor. Dhe unë besoj që kjo do të vazhdojë edhe më tej”, deklaroi Kurti.

Kryeministri në detyrë, Albin Kurti tha se “shifrat tregojnë se nuk ka vend për brengosje”, teksa shtoi se në katër vitet e fundit mesatarja e rritjes ekonomike ka qenë 6 për qind./D.B/KP

Kurti: Shifrat tregojnë se nuk ka vend për brengosje
(Video)
“Në katër vitet e fundit, mesatarja e rritjes ekonomike ka qenë 6 për qind, pa rënë asnjëherë nën 4 për qind. Në çerekun e dytë sivjet është 4.58 për qind. Do të thotë edhe më tutje nuk biem nën 4 për qind, ta shohim tash si do të jetë raporti për çerekun e tretë sivjet. Por deri tash është mirë. Raportet ndërkombëtare neve na përgatisin edhe më shumë por natyrisht që tash për tash shifrat tregojnë se nuk ka vend për brengosje”,
 shtoi kryeministri në detyrë.

Sipas Bankës Botërore, vonesat në formimin e një qeverie të re mund të ndikojnë negativisht në investime dhe të ngadalësojnë progresin në reformat strukturore.

Kryeministri në detyrë, njëherësh kryetar i Lëvizjes Vetëvendosje, Albin Kurti, deklaroi për KosovaPress se porsa Kuvendi i Kosovës të konstituohet, do të zgjedhin qeverinë e re.

Derisa është pyetur për mundësitë e formimit të një qeverie të përkohshme, ide e propozuar nga partnerja e saj e koalicionit, kryetarja e Alternativës, Mimoza Kusari-Lila, Kurti u shpreh i bindur për formimin e qeverisë së re.

Kosova s’ka themeluar institucionet e reja edhe mbi tetë muaj pas zgjedhjeve parlamentare të 9 shkurtit.

Lëvizja Vetëvendosje ka dalë partia e parë në zgjedhje, mirëpo së bashku me partnerët dhe nëntë deputetë të komuniteteve jo shumicë kanë dëshmuar në disa tentime për zgjedhjen e kryeparlamentarit se i kanë vetëm 57 deputetë. Një gjë të tillë për KosovaPress e ka thënë ditë më parë edhe vetë deputetja e Grupit Parlamentar të LVV-së, Mimoza Kusari-Lila.

Mirëpo, Kurti tha se ai po vazhdon punën si kryeministër në detyrë, edhe pse ka përfunduar mandatin e plotë katërvjeçar.

Ai shtoi se qeveria Kurti I ishte “më pak se ç’është dashur”, duke aluduar në rrëzimin e tij nga ekzekutivi në vitin 2020, derisa tha se qeveria Kurti II po vazhdon “më shumë se ç’është dashur”.

Ai theksoi se qeveria Kurti III do të jetë, siç tha, “taman”.

Ne jemi qeveria në detyrë, porsa të fillojë punën Kuvendi, e zgjedhim qeverinë e re. Unë jam në muajin e shtatë të vitit të pestë të mandatit të plotë katërvjeçar, pra është më shumë se ç’është dashur. Herën e parë ishte më pak se ç’është dashur, e herën e tretë do të jetë taman”, tha ai.

Deputetët e Kuvendit të Kosovës janë në pritje të publikimit të aktgjykimit të plotë të Gjykatës Kushtetuese në lidhje me seancën konstituive.

Kushtetuesja më 30 shtator ka dalë me një njoftim ku ka thënë se seanca konstituive e Kuvendit të Kosovës, që ka nisur më 15 prill, nuk ka përfunduar, pasi që nuk është zgjedhur nënkryetari nga komuniteti serb.

Vendimi i Kushtetueses është pas ankesës së Listës Serbe, partisë më të madhe të serbëve në Kosovë, lidhur me votimin ndaras të kandidatëve për nënkryetarë të Kuvendit nga radhët e komuniteteve jo shumicë.

Kushtetuesja ka urdhëruar deputetët e Kuvendit të konstituojnë legjislaturën e nëntë brenda afatit 12-ditor prej publikimit të aktgjykimit të plotë, por pa specifikuar pasojat juridike në rast se nuk kompletohen trupat e legjislativit./D.B/KP

Continue Reading

Të kërkuara