Delegacioni i Kuvendit të Republikës së Kosovës, i udhëhequr nga nënkryetarët Ardian Gola dhe Emilija Rexhepi, po merr pjesë në punimet e sesionit të Asamblesë Parlamentare të Këshillit të Evropës (APKE), i cili ka nisur sot në Strasburg dhe do të zgjasë deri më 24 prill.

Gjatë kësaj jave, përfaqësuesit e Kosovës do të jenë pjesë e sesioneve plenare, mbledhjeve të komiteteve dhe aktiviteteve të tjera ku do të trajtohen zhvillimet aktuale ndërkombëtare.

Pika qendrore e angazhimit të sotëm pritet të jetë debati mbi raportin për vëzhgimin e zgjedhjeve të parakohshme parlamentare në Kosovë, të mbajtura më 28 dhjetor 2025. Ky raport është hartuar nga delegacioni vëzhgues i APKE-së, i cili ka monitoruar procesin në dy faza: gjatë ditës së zgjedhjeve dhe përmes një misioni paszgjedhor.

“Sot, ditën e hënë, në kuadër të sesionit, pritet të zhvillohet edhe debati për raportin mbi vëzhgimin e zgjedhjeve të parakohshme për Kuvendin e Kosovës, të mbajtura më 28 dhjetor 2025. Ky raport është përgatitur nga delegacioni vëzhgues i APKE-së, i cili ka zhvilluar dy misione vëzhguese”, thuhet në njoftimin e Kuvendit.

Në këtë debat, nënkryetari i Kuvendit dhe kryesuesi i delegacionit, Ardian Gola, do t’u drejtohet anëtarëve të Asamblesë për të paraqitur vlerësimet zyrtare mbi mbarëvajtjen e procesit zgjedhor në vend.

“Në këtë debat, krahas folësve të tjerë, pritet që edhe nënkryetari Gola t’u drejtohet anëtarëve të asamblesë, duke paraqitur vlerësimet për procesin e fundit zgjedhor në Kosovë”, thuhet në njoftim.

Sesioni i Strasburgut do të përfshijë gjithashtu adresime nga personalitete të larta shtetërore dhe diskutime mbi tema që prekin sigurinë dhe demokracinë në Evropë.

Përgjatë mandatit të dytë të Presidentit të SHBA-së, Donald Trump, tregtarët kanë vënë baste miliona dollarësh pak para se ai të bënte njoftime të rëndësishme.

BBC ka ekzaminuar të dhënat e vëllimit të tregtisë në disa tregje financiare dhe i ka krahasuar ato me disa nga deklaratat më domethënëse të presidentit që kanë lëvizur tregun.

Është gjetur një model i qëndrueshëm i rritjeve të menjëhershme vetëm pak orë, ose ndonjëherë edhe minuta, para se një postim në rrjetet sociale ose një intervistë mediatike të bëhej publike.

Disa analistë thonë se kjo mban shenjat e “insider trading” (tregtisë së paligjshme me informacione të brendshme), ku bastet vendosen nga njerëz bazuar në informacione që nuk janë të disponueshme për publikun e gjerë.

Të tjerë thonë se situata është më e komplikuar dhe se disa tregtarë janë bërë më të aftë në parashikimin e ndërhyrjeve të presidentit. /BBC/

Kryeministri Albin Kurti ka shprehur bindjen e tij se vendi nuk duhet të shkojë në zgjedhje të parakohshme, duke theksuar se procesi i zgjedhjes së presidentit kërkon gatishmëri për kompromis dhe vullnet politik.

Gjatë mbledhjes së Qeverisë, Kurti vuri në dukje se afatet kushtetuese po afrohen dhe se stabiliteti institucional është prioritet.

“Kemi hyrë në pjesën e fundit të muajit prill, dhe para vetës kemi një afat kushtues që po ofron, shkuarja në zgjedhje të parakohshme parlamentare unë besoj që nuk është opsion, e zgjedhja e presidentit është detyrë kushtetuese të zgjedhurve të popullit. Kjo kërkon vullnet për zgjidhje, gatishmëri për kompromis dhe vendime jo të lehta”, u shpreh Kurti.

Sipas kreut të qeverisë, përsëritja e zgjedhjeve nuk do të prodhonte një rezultat ndryshe. Ai shtoi se dialogu për postin e presidentit duhet të bazohet në fuqinë politike të përcaktuar nga vota e fundit e qytetarëve.

“Ne e dimë që nuk ka parti që mund të pretendojë se i fiton 80 e më shumë deputetë, andaj duhet të pranohet rezultati i zgjedhjeve dhe nga këto pozicione të zhvillohen diskutime të sinqerta e të arsyeshme në interesin më të mirë për vendit tonë. Ne jemi të hapur për zgjidhje e cila i përgjigjet vullnetit qytetar”, deklaroi Kurti.

Kryeministri nënvizoi se Kosovës i duhen institucione stabile, “veçmas në këtë kohë të trazuar nga zhvillimet gjeopolitike”.

Në vazhdën e përpjekjeve për të gjetur një zgjidhje, Albin Kurti do të pritet sot në orën 11:00 në ambientet e Kuvendit nga kryetari i LDK-së, Lumir Abdixhiku. Ky përfaqëson takimin e pestë me radhë mes dy liderëve, me qëllim koordinimin për procesin e zgjedhjes së presidentit të ri.

Policia e Kosovës ka arrestuar 34 persona gjatë një aksioni të gjerë të zhvilluar në rajonin e Mitrovicës, Vushtrrisë, Istogut dhe Skenderajt, në kuadër të luftimit të veprimtarive të kundërligjshme që lidhen me organizimin e skemave piramidale dhe bixhozit të paligjshëm.

Sipas një komunikate për media, gjatë operacionit janë kontrolluar rreth 50 lokacione të ndryshme, përfshirë lokale afariste dhe shtëpi private.

Gjatë aksionit janë sekuestruar rreth 170 mijë euro para të gatshme, pesë automjete, si dhe pajisje e materiale të tjera që dyshohet se janë përdorur për zhvillimin e aktiviteteve ilegale.

Me vendim të prokurorit, 29 të dyshuar janë dërguar në mbajtje, ndërsa të tjerët janë liruar në procedurë të rregullt.

Policia ka bërë të ditur se veprime të ngjashme janë ndërmarrë edhe nga njësitë rajonale të hetimeve dhe stacionet përkatëse policore, duke rezultuar në parandalim të rasteve dhe arrestim të personave të dyshuar për vepra të ndryshme penale.

Në kuadër të këtij operacioni janë përfshirë edhe veprime policore në Skenderaj, ku janë kontrolluar 15 lokacione, janë arrestuar tetë persona dhe katër prej tyre janë dërguar në mbajtje.

“Ky operacion përfaqëson një angazhim të fuqishëm dhe të koordinuar institucional në luftimin e krimeve të rënda, krimit ekonomik dhe aktiviteteve të paligjshme që cenojnë rendin juridik dhe sigurinë publike”, thuhet në njoftimin e Policisë.

Ndërkohë, ministri i Punëve të Brendshme, Xhelal Sveçla, kishte deklaruar më herët se në një aksion në Mitrovicë dhe Vushtrri janë arrestuar 26 persona.

Në një postim në Facebook, ai ka bërë të ditur se aksioni kishte në shënjestër veprimtaritë e dyshimta që lidhen me skemat piramidale dhe bixhozin e paligjshëm, ndërsa janë sekuestruar rreth 150 mijë euro që dyshohet se burojnë nga këto aktivitete.

“Me të njëjtin përkushtim në të gjithë territorin e Kosovës: luftimin e kriminalitetit pa kompromis. Përveç aksionit anti-drogë në Pejë, u zhvillua edhe një aksion tjetër i madh në dhjetëra lokacione në Mitrovicë dhe Vushtrri”, ka shkruar Sveçla.