

Kulturë
Kosova do ta ketë bibliotekën presidenciale “Dr.Ibrahim Rugova”
Published
4 years agoon
By
Betim GashiTë gjithë librat e shkruar nga ish-presidenti i Kosovës, Ibrahim Rugova, po edhe librat që janë shkruar për të, artikuj e fotografi, do të mblidhen në bibliotekën presidenciale që do të mbajë emrin e tij.
Themelimi i kësaj biblioteke është iniciativë e presidentes së Kosovës, Vjosa Osmani, e cila sot ka nënshkruar marrëveshje bashkëpunimi me ministrin për Kulturë, Rini dhe Sport, Hajrulla Çeku.
Pas nënshkrimit të marrëveshjes, e para e shtetit, Vjosa Osmani, tha se kjo ide është e bazuar në modelin amerikan të ndërtimit të bibliotekave presidenciale.
Qëllimi i kësaj biblioteke presidenciale, e që do të mbajë emrin “Dr.Ibrahim Rugova”, tha se ka për qëllim që ta mbajë kujtesën tonë historike dhe shtetërore dhe në veçanti përpjekjet e gjata të popullit të Kosovës për të ndërtuar shtetin e vet të pavarur dhe sovran.
“Është i bazuar në modelin amerikan të ndërtimit të bibliotekave presidenciale, kemi filluar me ndërtimin e bibliotekës presidenciale e cila do ta mbajë emrin e presidentit historik “Dr.Ibrahim Rugova” dhe e cila ka për qëllim që ta mbajë kujtesën tonë historike dhe shtetërore dhe në veçanti përpjekjet e gjata të popullit të Kosovës për të ndërtuar shtetin e vet të pavarur dhe sovran. Siç e përmenda kjo bazohet në modelin amerikan dhe rrjedhimisht kemi marrë përkrahje nga departamenti i shtetit amerikan, i cili do të dërgojë një ndër ekspertët më të njohur të saj për të ndihmuar që të kompletohet kjo bibliotekë duke u bazuar në këtë model”, tha ajo.
Presidentja Osmani deklaroi se Biblioteka Kombëtare, Muzeu, po edhe Arkiva Shtetërore, do të ndihmojnë që të punojnë së bashku për të zhvilluar fondet për bibliotekën. Ajo tha se Biblioteka Kombëtare do ta ofrojë të gjithë bibliografinë që e kanë të Ibrahim Rugovës, siç janë librat, artikujt e tij, por edhe të gjithë librat e artikujt që janë shkruar për të.
Lajm të rëndësishëm, Osmani e ka quajtur që familja e presidentit Rugova ka vendosur që të gjithë arkivin privat të presidentit t’ia vë në dispozicion kësaj biblioteke.
Sa i përket lokacionit se ku do të vendoset biblioteka presidenciale “Dr.Ibrahim Rugova”, Osmani tha se fillimisht do të vendoset në ndërtesën e Presidencës, e që më pas tha se së bashku me MKRS-në dhe ministritë e tjera të linjës, do të gjejnë një lokacion të përshtatshëm.
“Ekspertja që do të vijë nga Departamenti i Shtetit do të jetë në dispozicion të institucioneve tona në mënyrë që të mësojmë nga praktikat e atjeshme. Për momentin i gjithë fokusi është në mbledhjen e fondeve bibliotekare, arkivore, pra gjithçka që qoftë institucionet tjera edhe në këtë rast edhe familja Rugova dhe i falënderoj që kanë shprehur gatishmërinë, t’i mbledhim të gjitha ato materiale që tregojnë siç thash e tregojnë rrugën tonë të gjatë drejtë shtetit të pavarur sovran të Kosovës dhe memorien institucionale të këtyre përpjekjeve. Pra, në momentin që kemi fonde të mjaftueshme, besoj shumë shpejt do ta gjejmë edhe lokacionin e përshtatshëm për një bibliotekë të tillë, e cila do të jetë një vend ku edhe brezat e ardhshëm do të mund të mësojnë shumë për përpjekjet e gjata të gjithë qytetarëve të Kosovës të prirë në atë kohë deri më 2006 nga presidenti historik Ibrahim Rugova për shtetndërtim, paqe ndërtim po edhe procese të tjera jo të lehta në të cilat kemi kaluar”, tha ajo.
Ajo ka ftuar edhe të gjitha institucionet bibliotekare, arkivore dhe muzeore që të ofrojnë materiale siç janë librat, artikujt, revistat, fotografitë apo eksponantet e presidentit Rugova, sepse në këtë mënyrë Osmani u shpreh se do të ruhet kujtesa jonë dhe mbi të gjitha do të ruhen në kujtesën tonë historike përpjekjet e një populli të tërë për liri dhe pavarësi, e mbi të gjitha për shtetndërtim.
Në anën tjetër, ministri i Kulturës, Rinisë dhe Sportit, Hajrullah Çeku, tha se një bibliotekë e tillë përveç që nderon figurën e presidentit historik Ibrahim Rugova, nderon edhe Republikën e Kosovës.
“Për t’ia shtuar Kosovës një institucion të ri të dijes, të shkencës dhe studimit. Besoj që duke e krijuar këtë institucion dhe duke e pagëzuar me emrin e presidentit historik Ibrahim Rugova, ne përveç që nderojmë figurën e tij nderojmë edhe kombin edhe Republikën e Kosovës. Si ministri e Kulturës bashkë me institucionet që janë pjesë e ministrisë, me Bibliotekën Kombëtare, Muzeun Kombëtar të Kosovës, Arkivin Shtetëror dhe të gjitha pjesët përbërëse do të jemi në dispozicion dhe do ta marrim me shumë seriozitet këtë detyrë kaq të rëndësishme dhe fisnike në të njëjtën kohë. Prandaj, përveç se kënaqësi ne ndjejmë edhe obligim që t’i përgjigjemi kësaj nisme dhe të bëhemi pjesë e bibliotekës presidenciale Ibrahim Rugova”, tha ai.
Osmani, u është përgjigjur edhe pyetjeve të gazetarëve sa i përket besueshmërisë së qytetarëve në institucionin e Presidentit të Kosovës.
“Në këtë rast nuk është zyre partizanësh, e para. E dyta, më lejoni t’iu informoj që kurrë më herët nuk ka pasur bibliotekë presidenciale, prandaj është e çuditshme t’iu dëgjoj të thoni që janë shtuar bibliotekat kur në fakt është hera e parë që po themelohet. Një bibliotekë presidenciale gjë që mund të konfirmohet shumë lehtë dhe e treta, nuk është e vërtetë që po ulet besueshmëria në Zyrën e presidentit, sipas hulumtimit të fundit të financuar nga qeveria amerikane, ne këtë rast besoj ju si gazetarë do të duhej ta hulumtonit, tani Zyra e Presidentes së Republikës së Kosovës e ka nivelin më të lartë të besueshmërisë që e ka pasur që nga momenti i parë kur kanë filluar të bëhen hulumtime opinionesh. E vërteta është që po rritet besueshmëria e jo që po ulet, dhe e vërteta tjetër është që nuk ka pasur kurrë më herët bibliotekë presidenciale, është hera e parë që po ndërtohet nga institucionet tona”, tha Osmani.
Aktualitet
Në Prishtinë organizohet një mbrëmje kulturore me rastin e 115-vjetorit të lindjes së Shën Nënë Terezës
Published
2 days agoon
August 26, 2025By
UBT News
Me rastin e 115-vjetorit të lindjes së Shën Nënë Terezës dhe 20-vjetorit të bekimit të gurthemelit të Katedrales që mban emrin e saj “Shën Nënë Tereza” në Prishtinë organizohet një mbrëmje solemne kulturore, duke filluar nga ora 19:30.
Ngjarja do të mbahet në ambientet e katedrales dhe ka për qëllim të nderojë jetën, veprën dhe trashëgiminë e pavdekshme të humanistes shqiptare, e cila u bë simbol botëror i dashurisë, përkushtimit dhe mëshirës ndaj të varfërve.
Në këtë mbrëmje të veçantë pritet të performojnë artistë të njohur nga të gjitha trevat shqiptare, të cilët do të sjellin përmes muzikës dhe artit një mesazh mirënjohjeje, paqeje dhe dashurie në nder të figurës së Shën Nënë Terezës, e njohur nga mbarë bota si “Nëna e madhe e Globit”.
“Unë gjithmonë e kam në zemër popullin tem shqiptar. Shumë e luti Zotin që paqja e tij të vijë në zemrat tona, në gjitha familjet tona, në gjithë botën. Luti shumë për fukarat e mij dhe për mua dhe motrat e mija. Unë lutem për juve”, këto janë fjalët e Shën Nënë Terezës.
Nobelistja shqiptare Gonxhe Bojaxhiu-Nëna Terezë u lind më 26 gusht 1910 në Shkup, atëherë pjesë e Vilajetit të Kosovës në Perandorinë Osmane. Pasi kishte jetuar në Maqedoni për tetëmbëdhjetë vjet, ajo u shpërngul në Irlandë dhe më pas në Indi, ku jetoi pjesën më të madhe të jetës së saj.
Nënë Tereza themeloi Misionarët e Bamirësisë, një kongregacion fetar i cili në vitin 2012 kishte më shumë se 4.500 motra dhe ishte aktiv në 133 shtete.
Nënë Tereza është nderuar me çmimet dhe nderimet më të larta, duke përfshirë: më 1962 Çmimin e Paqes Ramon Magsaysay dhe 1979 Çmimin Nobel për Paqe.
Më 19 tetor 2003, ajo u lumturua dhe u quajt “Tereza e Bekuar e Kalkutës”. Për t’u kanonizuar në shenjtore, asaj duhej t’i njihej një mrekulli e dytë, në bazë të rregullave të kishës katolike.
Një mrekulli e dytë i është njohur nga Papa Françesku, në dhjetor 2015, duke i hapur rrugën që ajo të shpallet e shenjtë nga Kisha Katolike e Romës. Kanonizimi i saj është bërë më 4 shtator 2016, një ditë para 19-vjetorit të vdekjes së saj (5 shtator), ku njihet edhe si dita e saj e festës.
Një figurë e diskutueshme si gjatë jetës dhe pas vdekjes së saj, Nënë Tereza u admirua gjerësisht nga shumë njerëz për veprat e saj bamirëse.
Aktualitet
I jepet lamtumira e fundit Artur Zhejit, gazetarit që Kosovën e bëri çështje të parë
Published
3 days agoon
August 25, 2025By
UBT News
Personalitete të jetës publike, politikës, miq, kolegë dhe qytetarë i dhanë sot lamtumirën e fundit gazetarit dhe publicistit të njohur Artur Zheji ndërsa zhvilluan homazhe në nderim të tij në Universitetin e Arteve të Bukura në Tiranë.
Në këtë universitet, Zheji ka përfunduar studimet për regjisurë, por gjithashtu ka kaluar edhe një pjesë të mirë të jetës së tij.
Zheji ka qenë drejtues i Radio Televizionit Shqiptar, i Agjencisë Telegrafike Shqiptare, por edhe në media të tjera të shkruara dhe vizive.
Ministri i Ekonomisë, Kulturës dhe Inovacionit, Blendi Gonxhja u shpreh se pas ekranit, Zheji ka qenë akoma më artist e krijues dhe do të ishte shumë më tepër në vitet që do vinin.
“Humbje e rëndë, e parakohshme. Një personazh me shumë ngjyra, me shumë botë, me shumë përfshirje në jetën publike dhe në jetën e vendit. Nuk e kam arritur në akademi, por natyrisht që e njoh Zhejin si të gjithë ju, si gazetar e publicist. Pas Zhejit në ekrane, me siguri ka qenë një Zheji tjetër akoma më artist e krijues e do ishte shumë më tepër në vitet që do vinin, por fatkeqësisht jeta është ndonjëherë shumë e ashpër në këto ngjarje që janë kaq të papritura. Nuk dimë si të ngushëllojmë familjen e botën që ai la. Ikje shumë e parakohshme”, u shpreh Gonxhja pas homazheve në Akademinë e Arteve.
Aktorët e mirënjohur Rajmonda Bulku dhe Timo Flloko vlerësuan Zhejin si një analist të jashtëzakonshëm, por edhe një artis i madh në shpirt.
“Lindi i lirë, i mençur i kulturuar. Luftoi tërë jetën e tij për të thënë fjalën e drejtë. Elokuenca e Turit është e pakrahasueshme. Do na mungojë shumë, jo vetëm ne që e kishim afër dhe e donim shumë dhe e vlerësonim, por të gjithë atyre që donin ta dëgjonin zërin e Turit, një zë të lirë, një fjalë të drejtë, të mençur dhe besoj se do ta mbajnë në mendje ashtu siç ishte Turi, i drejtë dhe i mençur”, tha për gazetarët aktorja Bulku pas homazheve.
Aktori Timo Flloku u shpreh se “Tur Zheji ishte një personalitet i dimensioneve të jashtëzakonshme, nuk flas në prerjen politike apo si një analist i jashtëzakonshëm, por do të thoja atë që Arturi ishte në artis i madh në shpirt, me një sensibilitet të thellë. Kam patur miqësi të afërt me të. Zoti e rrëmbeu nga ne, iku shumë shpejt”.
Historiani dhe ish-ministri i Jashtëm, Paskal Milo vlerësoi kontributin e Zhejit jo vetëm në media, por edhe në çështje të rëndësishme si ajo e Kosovës.
“Me Artur Zhejin kam rreth 28 vjet që jam njohur. Më ka marrë intervistën e parë si gazetarë në Romë, kur unë isha në pozitën e Ministrit të Jashtëm dhe që aty vendosëm një bashkëpunim shumë miqësorë që vazhdoi edhe më tej. Arriti në majën e publicistikës shqiptare, me një stil të veçantë, një fjalor tejet të përpunuar që ndërthurej mes një gazetarie ekspresive, por dhe mendimi të thellë filozofik. Ajo kulturë e madhe që ky njeri rrezatonte, jo vetëm kur ishte në mediumet publike, por edhe jetën personale, kishe çfarë të bisedoje me të. Artur Zheji është një nga gazetarët më të shquar që është marrë me çështjen kombëtare në tërësi, por veçanërisht Kosovën. Arturi e bëri çështje të parë të profesionit të tij dhe madje temat e tij, diskutimet dhe programet e tij kanë patur në qendër çështjen kombëtare. Për këtë spikaste në mënyrë të veçantë”, tha Milo.
Humbja e tij e papritur ka tronditur jo vetëm familjen, por edhe kolegët dhe opinionin publik, të cilët e shihnin si një figurë me integritet dhe profesionalizëm të lartë.
Kulturë
Cirku Kombëtar i Shqipërisë shfaqet në festivalin “Faerbi” në Zyrih
Published
3 days agoon
August 25, 2025By
UBTNews
Kryeministri i Shqipërisë, Edi Rama, ka njoftuar se Cirku Kombëtar po merr pjesë në festivalin “Faerbi” që po zhvillohet në Wetzikon, afër Zyrihut në Zvicër.
Në një postim në Facebook, Rama ka ndarë me ndjekësit një seri fotografish nga trupa e cirkut, duke përshkruar performancën e tyre me fjalët:
“Trupa jonë magjike pushtoi për tre netë skenën e ‘Faerbi Festival’ në Wetzikon–Zyrih, duke sjellë ngjyra, energji dhe diversitet kulturor për publikun”.
Lifestyle
Nuk dini çfarë të bëni në fundjavë? Ja disa sugjerime për ju!
Published
5 days agoon
August 23, 2025By
UBT News
Ka shumë mënyra për ta kaluar fundjavën në mënyrë të këndshme, varësisht nga preferencat dhe nevojat e tua.
Ja disa ide që mund t’ë ndihmojnë të bësh fundjavën më të bukur:
Kaloni kohë për t’u relaksuar, duke bërë dush të ngrohtë, duke lexuar një libër që të pëlqen, ose duke dëgjuar muzikën tënde të preferuar.
Përdorimi i disa minutave për të medituar ose bërë ushtrime yoga mund të ndihmojë në uljen e stresit dhe përmirësimin e mirëqenies.
Nëse ke mundësi, një shëtitje në natyrë ose një ngjitje në një mal mund të jetë mundësi e shkëlqyer për të shkarkuar energjitë e akumuluara dhe për të shijuar bukuritë e natyrës.
Pasi ta kesh gjetur vendin e bukur, bëj piknik, të kalosh kohë me miqtë ose familjen, ose të shijosh vakt të thjeshtë në ajër të pastër.
Mund të organizosh një darkë të thjeshtë me miqtë ose një aktivitet të veçantë për familjen, si një film ose një lojë.
Mund të telefonosh dikë që nuk e ke takuar për një kohë të gjatë e të kalosh kohë duke biseduar për jetën, kujtime dhe planet.
Vizita në muze, galeri arti ose një shfaqje mund të jetë mundësi për të mësuar diçka të re dhe për të pasuruar jetën tënde kulturore.
Mund të mësosh diçka të re, si të luash një instrument, të bësh pikturë ose të përpiqesh me një hobby tjetër që e ke lënë mënjanë.

UBT përgatit liderët e së ardhmes në energji: Edhe pak vende të lira për regjistrim

Nora Gjakova nis rrugëtimin si trajnere e xhudos

Presidenti serb Vuçiq do të jetë pjesëmarrës në paradën ushtarake në Kinë

Gjykata Supreme refuzon ankesën e Korab Mushkolajt për certifikim në zgjedhjet lokale

Aktakuzë ndaj një personi për nxitje të përçarjes mes grupeve të ndryshme politike në Klinë

Gjyqtari Avdullah Mecinaj gjendet pa shenja jete, Policia po e heton rastin

OVL e UÇK-së kërkon shkarkimin e kryetarit të Kuvendit, Dimal Basha

AAK: Adem Hoxha nuk është më pjesë e grupit tonë parlamentar

Lista Serbe do t’i drejtohet Gjykatës Kushtetuese
Të kërkuara
-
Lajmet nga UBT3 months ago
UBT organizon debat rreth zgjerimit të BE-së dhe ruajtjes së vlerave evropiane
-
Lajmet nga UBT3 months ago
UBT – Institucioni privat me më së shumti programe të akredituara nga Agjencia e Akreditimit të Kosovës
-
Lajmet nga UBT3 months ago
UBT rilicencohet nga MAShTI për ofrimin e arsimit profesional në katër drejtime të rëndësishme shëndetësore
-
Kërkime2 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA