Lajmet

​Ibishi: BIA ishte strukturë e paarmatosur, nuk kishte të drejtë të arrestojë apo ndalojë individ

Komandant Leka tregoi se më 10 prill 1999 ishte plagosur pasi kishin bërë fortifikimin e pozicioneve me qëllim të mbrojtjes së refugjatëve.

Published

on

Dëshmitari i nëntë i mbrojtje së Salih Mustafës, Nuredin Ibishi gjatë dëshmisë së tij të martën ka deklaruar se njësiti BIA ka qenë strukturë civile e paarmatosur dhe nuk ka pasur të drejtë të arrestojë apo ndaloj individ. Komandant Leka ka treguar edhe për periudhën kur ishte plagosur dhe trajtimin mjekësor që kishte marr bashkë me bashkëluftëtarin, Kapllan Parduzi i cili dëshminë e tij si dëshmitar i mbrojtjes e ka dhënë dje para Dhomave të Specializuara në Hagë.

Dëshmitari: Sa unë kam njohuri njësiti BIA ka qenë strukturë civile e paarmatosur ka pasur detyrat mbështetëse për UÇK-në pjesën aktive dhe mbrojtjen civile dhe normalisht na ka dhënë informacione për pozicionimin e forcave serbe në qytet dhe pjesët urbane.

Avokati Shala: A ka pasur të drejtë të arrestoj dhe të ndaloj individë?

Dëshmitari: Jo.

Komandant Leka tregoi se më 10 prill 1999 ishte plagosur pasi kishin bërë fortifikimin e pozicioneve me qëllim të mbrojtjes së refugjatëve që kanë ikur nga Podujeva dhe Lugina e Llapit.

“Jemi pozicionuar pasi e kemi bërë fortifikimin e pozicioneve me qëllim të mbrojtjes të refugjatëve që ikën nga Podujeva dhe lugina e Llapit dhe u vendosën në luginën e Turuçicës e deri në Orllan atëherë unë dhe disa bashkëluftëtarët vendosëm fortifikatat, pozicionet dhe njësitet aty dhe në kohën kur ndodhi sulmi ne iu bashkëngjitëm forcave pasi ishim duke shkuar në vizitë tek refugjatët por ndërkohë unë i përgjoja me një sistem të lidhjes edhe e vërejta që do vijnë në drejtim tonin dhe gjatë këmbimit të zjarrit, normal ata ishin me armatim të rëndë me autoblinda e praga dhe nga vetë luftimi u plagosëm unë dhe Kapllan Parduzi dhe arritëm t’i thejmë forcat serbe dhe të mos t’i lejojmë të futen tek refugjatët ku prisnim se do të kryenin edhe masakra në pjesën e refugjatëve që ishin të zhvendosur”, tha ai.

Më pas Ibishi tregoi se trajtim mjekësor fillimisht e kishte marr aty për aty, ndërsa transporti i tyre për në spitalin e improvizuar në Potok kishte ndodhur po në ditën e plagosjes më 10 prill por vetëm pas orën 19:00 dhe kishte zgjatur 48 orë.

I pyetur nga avokati mbrojtës, Betim Shala për masat e sigurisë dhe se a ishin shoqëruar gjatë transportit, dëshmitari, Nuredin Ibishi tha se nuk e di se nga kush ishin shoqëruar sepse ishte në gjendje të rëndë shëndetësore dhe ndodheshin në një rimorkio të shtrirë dhe të mbuluar me tend pasi tërë kohën binte shi.

Avokati Shala: Na thatë që për transportin tuja janë ndërmarr të gjitha masat e sigurisë, cilat janë ato masa që janë ndërmarrë?

Dëshmitari: Në kuptim të sigurisë dhe transportit dhe kontakteve dhe mashutës që duhet të kaloj për këtë arsye kujdesej një prej eprorëve që ishte me ne pasi ne ishim të pamundur për tu siguruar sepse ishim në situatë të rëndë unë dhe Kapllan Parduzi.

Dëshmitari: Jashtë nuk kam pasur mundësi me pa por brenda ka qenë personeli mjekësor ka qenë absolvent i mjekësisë, Enver Hoxha ka qenë edhe një teknike ashtu, ka qenë gjithashtu në afërsi edhe Latif Gashi që ka ndërmarrë masa të sigurisë dhe normal në pjesën jashtë nuk kam mundur ta shoh sepse rimorkio ka qenë e mbuluar me tend për shkak të kushteve atmosferike sepse non-stop binte shi.

Komandant Leka tregoi se trajtimin mjekësor në spitalin ushtarak në Potok e ka marr për 3 javë.

Avokati Shala: Zotëri dëshmitar sa ka zgjatur trajtimi juaj në këtë spital, sa keni qëndruar aty?

Dëshmitari: Nuk më kujtohet me kohë por me siguri se kjo duhet të ketë zgjatur edhe pse në kushte të vështira ndoshta 3 javë ditë por them ashtu e merrja vetën sepse duhej t’i përgjigjem nevojave çfarë ishin realisht në terren dhe që ishte koha e operacioneve luftarake për pastrim etnik të forcave serbe, që kulmoi me largimin e 700 mijë banorëve nga Kosova, periudha më e ndjeshme për këtë arsye unë i plagosur është dashur ta lëshoj spitalin mu për shkak të kryej detyrën ta zbatoj detyrën.

Dëshmitari i mbrojtjes, Nuredin Ibishi tregoi edhe për trajtimin e dytë që e kishte marr në pjesën e majit në Maqedoni së bashku me tre persona të tjerë.

“Trajtimi i dytë kjo ka ndodhur diku kah pjesa e dytë e maji në Maqedoni pasi që ka dështuar tentativa e parë e shkuarjes përkundër asaj që isha vetë i sëmurë organizohej me gjitha ato mbështetje në kuptim të bartjes pasi kishim dy të plagosur dhe një të sëmurë rëndë kishte të bënte me Kapllan Parduzin i cili ishte i palëvizshëm dhe kishte të bënte me zëvendëskomandantin e brigadës 152 i cili kishte distrofin e muskujve dhe Afrimi i zonës së Karadakut për të cilët të tre u deshtë të transportohen në Maqedoni për shkak të gjendjes dramatike…12’49 Po ka zgjatur pak ditë, Korabi ka vazhduar, Kapllan Parduzi ka vazhduar të mbetet aty me Batushën zëvendëskomandantin e brigadës 152 Shaban Shala dhe Afrimi që ka qenë i plagosur ndërsa unë është dashur të kthehem në Kosovë“, tha ai.

Në sesionin e parë të kësaj seanca të sotme mbrojtja i ka përfunduar pyetjet për dëshmitarin, Nuredin Ibishi i cili pas pauzës pritet tu përgjigjet pyetjeve të prokurorëve.

Lajmet

Kurti: Serbia mund të shfrytëzojë elemente destruktive për të nxitur incidente në Gazimestan

Published

on

By

Kryeministri në detyrë i Kosovës, Albin Kurti, ka thënë të premten se Serbia mund të përdorë “elemente destruktive” për të nxitur incidente gjatë festës serbe Vidovdan të shtunën në Gazimestan, rreth 10 kilometra nga kryeqyteti Prishtinë.

Duke folur në një mbledhje të Qeverisë në detyrë, Kurti tha se Serbia do të përpiqet ta zhvendosë vëmendjen nga protesta antiqeveritare që pritet të zhvillohet të shtunën në Beograd, duke nxitur incidente në Kosovë.

Serbët nga Kosova, Serbia dhe rajoni tradicionalisht e shënojnë Vidovdanin më 28 qershor në Gazimestan, një monument historik pranë Prishtinës.

Kurti tha se – sipas vlerësimeve të institucioneve të sigurisë dhe inteligjencës – ka përpjekje që tubimi në Gazimestan të jetë “sa më masiv, prandaj janë organizuar grupe serbësh nga Serbia, Mali i Zi dhe Bosnjë e Hercegovina që të vijnë në Kosovë nesër”.

Grupet e tilla kanë qenë tradicionalisht provokuese, duke bartur simbole nacionaliste serbe e ruse që janë në kundërshtim me Kushtetutën e Kosovës dhe janë gjithashtu kundër vlerave demokratike dhe evropiane”, tha Kurti.

Ai tha se festa e Vidovdanit, “megjithëse me karakter fetar, fatkeqësisht vazhdimisht është përcjell me retorikë politike, nxitëse e kërcënuese për sigurinë publike nga ana e Serbisë”.

Javë më parë, Gjykata Themelore në Prishtinë e shfuqizoi vendimin e Komunës së Graçanicës për shfaqjen e flamurit të Serbisë për nder të Vidovdanit më 2024.

Në arsyetimin e gjykatës thuhet se komuna ka tejkaluar kompetencat e saj dhe ka vepruar në kundërshtim me ligjet e Kosovës, pasi ka miratuar një vendim për shfaqjen e flamurit të Serbisë më 28 qershor – ditë që nuk është e përcaktuar si festë zyrtare në Kosovë.

Kurti tha se tubimet për Vidovdan duhet të mbahen në përputhje me ligjin, “jo të shndërrohen në mjet për instrumentalizim politik nga autoritetet në Beograd”.

Tubimi zakonisht sigurohet nga Policia e Kosovës, ndërsa gjatë viteve të fundit nuk është lejuar të futen flamuj të Serbisë apo simbole të tjera kombëtare, përveç atyre kishtare, pasi përkujtimi organizohet edhe nga Kisha Ortodokse Serbe në nderim të betejës së vitit 1389 kundër ushtrisë osmane.

Javën e kaluar, ministri në detyrë për Komunitete dhe Kthim i Kosovës, Nenad Rashiq, bëri thirrje për respektimin e të drejtave të komunitetit serb sa i përket përdorimit të simbolit të tyre.

Ai tha se përdorimi flamurit serb nga serbët “nuk përbën kërcënim ndaj identitetit të askujt, por është dëshmi e përkushtimit të Kosovës si një shoqëri demokratike e bazuar në respektimin e të drejtave të njeriut dhe të pakicave”.

Lista Serbe, partia më e madhe e serbëve në Kosovë që ka mbështetjen e Beogradit, e akuzoi Kurtin se gjatë seancave në Kuvendin e Kosovës shfaq flamurin kombëtar të Shqipërisë.

Në një deklaratë, ajo kërkoi nga gjykata që të përdorë “të njëjtat standarde dhe të zbatojë të njëjtin arsyetim edhe në rastet që lidhen me flamurin shqiptar”.

Vitin e kaluar, festimet e Vidovdanit në Gazimestan kaluan pa ndonjë incident.

Por, në vitet paraprake ka pasur edhe arrestime për nxitje të urrejtjes fetare dhe kombëtare, ndërsa më 2023, Vidovdani nuk u festua në Gazimestan – vendin ku festohet tradicionalisht – për shkak të përkeqësimit të situatës së sigurisë në veri të Kosovës.

Gazimestani në Kosovë njihet edhe për fjalimin e ish-presidentit të Serbisë, Sllobodan Millosheviq, i cili, më 28 qershor 1989, nuk i përjashtoi “betejat e armatosura”.

Ai fjalim i Millosheviqit u pa nga shumë njerëz si paralajmërim i luftërave që pasuan në vitet ‘90 në ish-Jugosllavi.

Në të njëjtën ditë në vitin 2001, Millosheviq u ekstradua në Tribunalin e Hagës, i cili e akuzoi atë për krime lufte. Ai vdiq në paraburgim në vitin 2006, para gjykimit përfundimtar./REL

Continue Reading

Lajmet

​Bajrami: LDK do të marrë pjesë në takimin e nesërm

Published

on

By

Deputetja e Lidhjes Demokratike e Kosovës (LDK), Hykmete Bajrami deklaroi se do të jenë prezentë në takimin e nesërm të ftuar nga kryetari i Lëvizjes Vetëvendosje, Albin Kurti. Megjithatë, ajo tha se nuk kanë pritje nga ky takim, meqë theksoi se është më shumë për “show mediatik”.

Pas ndërprerjes së seancës, ku paraprakisht u mbajt një takim konsultativ me kryesuesin e seancës konstituive, Avni Deharin, Bajrami tha se do të shkojnë në takimin me Kurtin për të treguar se janë për konstituim të institucioneve.

Nuk është që kemi shumë pritje duke marrë parasysh komplet të kaluarën historike të LVV-së dhe krejt sjelljet e tyre konferencën për media nuk është që mund të presim diçka nga ky takim. Është më shumë për show mediatik. Megjithatë për të treguar që jemi për konstituim të institucioneve do të jemi prezent”, u shpreh ajo.

Deputetja e LDK-së tha se LVV po bën interpretim ndryshe të aktgjykimit të Gjykatës Kushtetuese.

Kemi parë edhe prononcimet e ndryshme nga eksponentë të Lëvizjes Vetëvendosje të cilët e kanë në plan ta vazhdojnë këtë ngërç duke e bërë një interpretim ndryshe nga krejt Kosova të aktgjykimit të Gjykatës Kushtetuese. Se sa zotëri Kurti është i gatshëm për bashkëpunim, unë po besoj që patët mundësi ta shihni vetëm para dy minutave, kur ishte këtu në sallën plenare dhe nuk ishte në gjendje që të vie në takim konsultativ me të gjithë liderët e partive politike parlamentare. Aktgjykimi është jashtëzakonisht i qartë kur është fjala tek mënyra e votimit sepse i referohet kreut të katërt të rregullores së kuvendit, pikërisht nenit 8 ku ka një agjendë të paracaktuar të seancës konstituive dhe aktgjykimi pikërisht i referohet nenit 8 të rregullores së Kuvendit të Kosovës”, deklaroi ajo.

Ajo tha se kryetari i Kuvendit duhet të votohet me marrëveshje politike dhe nuk kanë votë për asnjë kandidat të LVV-së.

Continue Reading

Lajmet

Limaj konfirmon pjesëmarrjen në takimin me Kurtin, rithekson nevojën e arritjes së një marrëveshje politike

Published

on

By

Kryetari i Nisma Socialdemokrate, Fatmir Limaj, ka konfirmuar pjesëmarrjen në takimin e nesërm të ftuar nga lideri i LVV-së, Albin Kurti.

Limaj, para fillimit të seancës konstituive e cila po mbahet për herë të 38-të, tha se aktgjykimi i djeshëm i Gjykatës Kushtetuese për krizën politike në Kuvend tregon nevojën dhe domosdoshmërinë e arritjes së një konsensusi dhe marrëveshje politike për zgjedhjen e trupave të Kuvendit.

“Gjykata thotë uluni, bashkëbisedoni, tentoni të krijoni konsensus ose marrëveshje politike. Çështja ka mbetur këtu dhe këtu ka qenë edhe dje. Asnjë zgjidhje tjetër…(Pjesëmarrja në takim me Kurtin )Sigurisht se po…Duhet marrëveshje politike ashtu si në cdo demokraci të qytetëruar. Në këtë drejtim Nisma është e hapur”, tha ai.

Kryetari i Vetëvendosjes, Albin Kurti ka reaguar ndaj aktgjykimit të djeshëm të Gjykatës Kushtetuese.

Kryeministri në detyrë, Kurti ka thënë se aktgjykimi thekson qartë se obligimi për ta konstituuar Kuvendin është obligim i të gjithë deputetëve dhe jo vetëm i subjektit të parë.

Kurti ka ftuar të gjithë krerët e subjekteve të përfaqësuara në legjislaturën e nëntë, për takim të përbashkët të shtunën (nesër) në orën 16:00.

“Si kryetar i Lëvizjes VETËVENDOSJE! dhe në emër të grupit më të madh parlamentar të dalur nga zgjedhjet e 9 shkurtit 2025, sot u jam drejtuar të gjithë krerëve të subjekteve të përfaqësuara në legjislaturën e nëntë, me ftesë për takim të përbashkët të shtunën (nesër) në orën 16:00, në përpjekje të radhës në funksion të konsensusit për konstituim të Kuvendit”, ka shkruar Kurti.

Continue Reading

Lajmet

​VV insiston në votim të fshehtë: Deputetët opozitarë shkelën Kushtetutën për tridhjetë seanca me radhë

Published

on

By

Lëvizja Vetëvendosje nuk do të heq dorë nga zgjedhja e kryetarit të Kuvendit përmes votimit të fshehtë.

Deputeti i LVV-së, Hekuran Murati, pas ndërprerjes së vazhdimit të seancës konstituive për herë të 38-të, tha se aktgjykimi i Gjykatës Kushtetuese për krizën në Kuvend thotë se zgjedhja e trupave të legjislativit është përgjegjësi e të gjitha subjekteve parlamentare.

Sipas tij, votimi i fshehtë i kryekuvendarit nuk është shkelje kushtetuese, madje ai shtoi se e njëjta u dëshmua edhe në aktgjykim të Kushtetueses.

“Kjo është faqja e vendimit. Këtu te konstatimet kemi dy pika. Në asnjërën prej tyre, Gjykata Kushtetuese ka thënë se votimi i fshehtë nuk është në kundërshtim me Kushtetutën siç po tentohet të prezantohet gabimisht dhe rrejshëm nga opozita. Po besoj i keni dëgjuar deklaratat jo serioze por në asnjë pikë të këtij vendimi nuk thuhet një gjë e tillë. Përkundrazi, në paragrafin 141 dhe 180, Gjykata Kushtetuese veç sa e ka rikonfirmuar se votimi i fshehtë është një prej mënyrave që mund të përdoret për zgjedhjen e kryesisë së Kuvendit… Gjykata Kushtetuese ka rikonfirmuar se të gjithë deputetët duhet të marrin pjesë në votim. Pra nuk mund të vihet në seancë konstituive dhe mos të votohet. Mosvotimi fare është shkelje kushtetuese. Që nga data 1 maj, për 30 seanca me radhë të gjithë deputetët e opozitës kanë shkelur Kushtetutën duke mos marrë pjesë në votim”, tha ai.

Ndërkaq, kryetarja e partisë Guxo, deputetja Donika Gërvalla, tha se Gjykata Kushtetuese ka mundur të nxjerrë një vendim më konkret, pasi sipas saj i njëjti ishte shumë i përgjithshëm.

Megjithatë, sipas saj, është përcaktuar nevoja që të gjithë deputetët të marrin pjesë në votim dhe që votimi i fshehtë nuk është antikushtetues.

Madje ajo akuzoi deputetin e PDK-së, ish-ministrin e Drejtësisë, Abelard Tahirin, për deklarimet e tij se aktgjykimi i Kushtetueses tregon devijimin kushtetues që LVV-ja ka bërë në mbi dy muaj të vazhdimit të seancës konstituive.

“Tre gjëra shumë të qarta i ka thënë vendimi i Kushtetueses edhe pse është një vendim goxha i përgjithshëm, edhe pse dorën në zemër mund të ishte më konkret dhe mund të jepte rrugëdalje. Të gjithë deputetët obligon Kushtetuta të marrin pjesë në seancë dhe i obligon të marrin pjesë në votim. Nuk mundesh me ardhur në Kuvend me ardhur kot, por kur vjen në Kuvend duhet të votosh. Askush se imponon të votosh për kandidatin tonë, por duhet të votosh. E dyta është se secili deputet në Kuvendin e Kosovës nuk vjen aty për të bllokuar por për t’i dhënë drejtim konstituimit të Kuvendit. Pyetja që Kushtetuesja s’i ka dhënë përgjigje është se çka ndodh pas tridhjetë ditësh. Unë besoj se nuk do të sfidohemi përsëri që pas tridhjetë ditësh të kemi nevojë për zgjidhje kreative, por besoj se pas takimit të nesërm me Kurtin me liderët e opozitës të arrihet një dakordim. I kam lexuar 47 faqet e vendimit dhe pas deklaratës së ish-ministrit të Drejtësisë ku thotë se Kushtetuesja flet për devijim në atë aktvendim i kam lexuar përsëri 47 faqet pasi nuk më besoja se ish-ministri i drejtësisë është i gatshëm me gënjyer publikun”, tha ajo.

Seanca konstituive e Kuvendit të Kosovës e paraparë të mbahet sot (e premte) është ndërprerë për shkak të aktgjykimit të Gjykatës Kushtetuese dhe shpresës për takimin e nesërm të liderëve të partive parlamentare për zgjidhjen e ngërçit në Kuvend.

Kryesuesi i seancës, Avni Dehari, tha se shpreson që të arrihet një konsensus në takimin e nesërm që lideri i LVV-së, Albin Kurti, i ka ftuar përfaqësuesit e partive parlamentare për konstituimin e legjislaturës së nëntë.

Ai tha se seanca e radhës do të mbahet të dielën në orën 11:00.

Continue Reading

Të kërkuara