Një ngjarje e rëndë ka ndodhur në orët e hershme të mëngjesit të sotëm në rrugën “Vëllezërit Frashëri” në Gjakovë, ku mbeti i vrarë një person dhe u plagos një tjetër.

Policia ka nisur një operacion të gjerë për arrestimin e të dyshuarit, i cili tashmë është identifikuar.

Zëdhënësi i Policisë për Rajonin e Gjakovës, Sheremet Elezaj, dha detaje mbi gjendjen e viktimave:

“Sot rreth orës 05:30, jemi njoftuar se në rrugën ‘Vëllezërit Frashëri’ në Gjakovë dy persona meshkuj, të moshës madhore, janë qëlluar me armë zjarri. Si pasojë e plagëve të marra, njëri prej tyre ka ndërruar jetë në vendin e ngjarjes (ekipi mjekësor ka konstatuar vdekjen e tij). Personi tjetër ka mbetur i plagosur dhe është dërguar për trajtim mjekësor”, tha Elezaj për UBTnews.

I dyshuari që po kërkohet është pronari i lokalit ku ndodhi incidenti, ndërsa dyshohet se personi i plagosur u qëllua aksidentalisht, pasi nuk kishte lidhje me shkakun e konfliktit fillestar.

Në vendin e ngjarjes kanë dalë menjëherë njësitë relevante dhe Prokurori i Shtetit për të udhëhequr hetimet.

Elezaj shtoi se po punohet me intensitet të lartë për kapjen e autorit.

“Njësitë përkatëse policore i janë përgjigjur menjëherë rastit dhe është njoftuar prokurori i shtetit i cili po ashtu ka dalë në vendin e ngjarjes. Aktualisht po ndërmerren veprimet e nevojshme hetimore me qëllim të arrestimit të të dyshuarit dhe zbardhjes së plotë të rrethanave të ngjarjes.”

Aktualisht, operacioni i kërkimit po vazhdon në disa lokacione, ndërsa policia bën thirrje për bashkëpunim nga qytetarët që mund të kenë informacione mbi vendndodhjen e të dyshuarit.

Në raportin 24 orësh të Policisë së Kosovës është regjistruar një numër i lartë i gjobave të shqiptuara dhe i aksidenteve në rrugët e vendit

Sipas të dhënave zyrtare, fatmirësisht nuk është shënuar asnjë aksident me fatalitet, mirëpo janë regjistruar gjithsej 34 aksidente trafiku, prej të cilëve 12 kanë përfunduar me persona të lënduar dhe 22 me dëme materiale.

Gjatë kësaj periudhe, policia ndaj shkelësve të rregullave të komunikacionit, ka shqiptuar gjithsej 1896 tiketa trafiku.

Sa i përket aktiviteteve operative për rendin dhe ligjin, janë arrestuar 5 persona, ku 2 prej tyre janë dërguar në mbajtje, ndërsa 3 persona janë dërguar direkt në vuajtje të dënimit.

Kryetari i Komunës së Bujanocit, Arbër Pajaziti, i ka bërë thirrje zyrtare Qeverisë së Kosovës që të aplikojë një model lehtësues për qytetarët e Luginës së Preshevës gjatë zbatimit të Ligjit për të Huajt dhe Ligjit për Automjetet.

Përmes një reagimi në rrjetet sociale, Pajaziti ka theksuar se ndonëse mbështet vendosjen e rendit ligjor, realiteti specifik i shqiptarëve të Luginës kërkon fleksibilitet.

Kreu i Bujanocit vlerësoi se rregullat e reja janë të domosdoshme për të parandaluar keqpërdorimet dhe strukturat paralele, por shprehu shqetësimin se zbatimi i tyre pa dallim mund të dëmtojë lidhjet jetike të qytetarëve me Kosovën.

“Lidhjet e tyre janë shpirtërore, familjare, arsimore dhe në përgjithësi jetike për përditshmërinë e tyre. Një numër i madh qytetarësh nga Lugina jetojnë, punojnë apo studiojnë në Kosovë,” deklaroi Pajaziti.

Sipas tij, një trajtim i ngurtë ligjor mund të ketë pasoja indirekte, duke përfshirë ndikimin në procesin e ndjeshëm të pasivizimit të adresave në vendbanimet e tyre origjinale. Pajaziti sugjeroi që Prishtina zyrtare të ndjekë shembujt e mëparshëm të bashkëpunimit, siç ishte rasti i përjashtimit nga pagesa e sigurimit të automjeteve.

Kryetari Pajaziti u shpreh i bindur se institucionet e Kosovës nuk kanë qëllim dëmtimin e bashkëkombasve, por kërkoi një “zgjidhje të balancuar” që ruan zbatimin e ligjit duke marrë parasysh nevojat e përditshme të shqiptarëve të Luginës.

Zbatimi i Ligjit për të Huajt dhe atij për Automjete për serbët që punojnë në institucione paralele apo që studiojnë në veri i cili hyri në fuqi nga dje, më 15 mars 2026 , ka nxitur reagime të shumta në Kosovë.

Kërkesat e Presidentit të SHBA-së, Donald Trump, për një koalicion që do të ndihmonte në rihapjen e Ngushticës së Hormuzit, duket se ranë në vesh të shurdhër të hënën, pasi aleatët si Japonia dhe Australia deklaruan se nuk planifikojnë të dërgojnë anije ushtarake në Lindjen e Mesme për të shoqëruar anijet në këtë rrugë ujore jetike.

Ndërsa lufta SHBA-Izrael kundër Iranit po shkakton trazira në të gjithë Lindjen e Mesme dhe po trondit tregjet globale të energjisë në javën e saj të tretë, Trump këmbënguli të dielën se kombet që mbështeten shumë te nafta e Gjirit kanë përgjegjësinë të mbrojnë ngushticën, përmes së cilës kalon 20% e energjisë botërore.

Tregjet në Azi reaguan me kujdes, me naftën bruto “Brent” që u rrit me mbi 1%, duke kaluar vlerën prej $104.50, ndërkohë që tregjet rajonale të aksioneve ishin kryesisht më të dobëta mes shqetësimeve për rrezikun ndaj objekteve të naftës në Lindjen e Mesme dhe pas kërkesës së Trump që aleatët të përfshihen më shumë.

“Po kërkoj që këto vende të vijnë dhe të mbrojnë territorin e tyre, sepse është territori i tyre,” u tha Trump gazetarëve në bordin e avionit Air Force One gjatë rrugës nga Florida për në Uashington. “Është vendi nga i cili ata marrin energjinë e tyre.”

Trump tha se administrata e tij ka kontaktuar tashmë shtatë vende, por nuk i identifikoi ato. Në një postim në rrjetet sociale gjatë fundjavës, ai shprehu shpresën se Kina, Franca, Japonia, Koreja e Jugut, Britania e Madhe dhe të tjerë do të merrnin pjesë.

Kryeministrja japoneze Sanae Takaichi, një mbështetëse e vendosur e Trump, tha të hënën se vendi i saj, i kufizuar nga kushtetuta që heq dorë nga lufta, nuk ka asnjë plan për të dërguar mjete lundruese ushtarake për të shoqëruar anijet në Lindjen e Mesme, prej nga merr 95% të naftës së saj.

“Ne nuk kemi marrë asnjë vendim lidhur me dërgimin e anijeve shoqëruese. Po vazhdojmë të shqyrtojmë se çfarë mund të bëjë Japonia në mënyrë të pavarur dhe çfarë mund të bëhet brenda kornizës ligjore,” i tha Takaichi parlamentit.

Australia, një tjetër aleat kyç i sigurisë i SHBA-së në rajonin Indo-Paqësor, e cila gjithashtu mbështetet shumë te karburantet e prodhuara me naftë bruto të Lindjes së Mesme, tha se as ajo nuk do të dërgojë anije ushtarake për të ndihmuar në rihapjen e ngushticës.

“Ne e dimë se sa e rëndësishme është kjo, por kjo nuk është diçka që na është kërkuar ose në të cilën po kontribuojmë,” tha Catherine King, anëtare e kabinetit të Kryeministrit Anthony Albanese, në një intervistë për transmetuesin shtetëror ABC.

Trump mund të shtyjë vizitën në Pekin pa mbështetjen e Kinës

Trump i tha Financial Times të dielën se priste që Kina të ndihmonte në zhbllokimin e ngushticës përpara takimit të tij të planifikuar me Presidentin kinez Xi Jinping në Pekin në fund të këtij muaji, dhe mund ta shtynte udhëtimin nëse ajo nuk ofronte ndihmë.

“Mendoj se edhe Kina duhet të ndihmojë, sepse Kina merr 90% të naftës së saj nga ngushticat,” tha Trump. “Ne mund të kemi vonesa,” tha ai duke referuar vizitën e tij nëse Kina nuk ofron mbështetje në Gjirf. Ministria e Jashtme kineze nuk iu përgjigj menjëherë një kërkese të Reuters për koment.

Trump gjithashtu rriti presionin ndaj aleatëve evropianë, duke paralajmëruar se NATO përballet me një të ardhme “shumë të keqe” nëse anëtarët e saj dështojnë të vijnë në ndihmë të Uashingtonit. Ministrat e jashtëm të BE-së do të diskutojnë të hënën për forcimin e një misioni të vogël detar në Lindjen e Mesme, por nuk pritet të vendosin për zgjerimin e rolit të tij në Ngushticën e bllokuar të Hormuzit.

Kryeministri britanik Keir Starmer diskutoi nevojën për rihapjen e ngushticës me Trump dhe me Kryeministrin kanadez Mark Carney, tha një zëdhënëse e Downing Street të dielën, ndërsa Koreja e Jugut ka thënë se do ta shqyrtojë me kujdes kërkesën e Trump.

Pasojat globale dhe sulmet me dronë

Udhëtimi ajror global mbetet i ndërprerë rëndë për shkak të luftës në Iran, e cila ka mbyllur ose kufizuar nyjet kyçe të Lindjes së Mesme si Dubai, Doha dhe Abu Dhabi. Furnizimi me karburant për avionë është gjithashtu një shqetësim, ku autoritetet në Vietnam paralajmëruan reduktime të fluturimeve pasi Kina dhe Tajlanda ndaluan eksportet e karburantit.

Sekretari i OKB-së për Klimën, Simon Stiell, deklaroi se kjo krizë është një “mësim i hidhur” mbi rreziqet e varësisë nga lëndët djegëse fosile, duke thënë se kjo varësi po shkatërron sigurinë kombëtare dhe sovranitetin.

Edhe pse disa anije iraniane dhe pak anije të vendeve të tjera kanë kaluar, kalimi është efektivisht i mbyllur për shumicën e trafikut të cisternave që kur SHBA dhe Izraeli sulmuan Iranin më 28 shkurt. Izraeli ka vazhduar sulmet në Iran, Liban dhe Gazë, duke shënjestruar militantët e Hezbollahut dhe Hamasit. Ushtria izraelite tha të hënën se trupat e saj kishin filluar “operacione tokësore të kufizuara” kundër pozicioneve të Hezbollahut në jug të Libanit.

Pavarësisht pretendimeve të SHBA-së për shkatërrimin e kapaciteteve ushtarake të Iranit, sulmet me dronë vazhduan të hënën. Autoritetet e Dubait pezulluan fluturimet pasi një dron goditi një rezervuar karburanti, ndërsa Arabia Saudite njoftoi se ka ndaluar 34 dronë brenda një ore.

Zyrtarët amerikanë parashikojnë se lufta në Iran do të përfundojë brenda javësh dhe çmimet e energjisë do të bien, por Ministri i Jashtëm iranian, Abbas Araqchi, e kundërshtoi këtë pretendim. “Ne nuk kemi kërkuar kurrë armëpushim dhe nuk kemi kërkuar as negociata,” tha Araqchi. “Jemi gati të mbrohemi për aq kohë sa të jetë e nevojshme.”

/Reuters/