Lajmet

​Tërnava uron Kurban Bajramin: Festat fetare kultivojnë begatitë shpirtëore para atyre materiale

Myftiu i BIK-ut ka folur edhe për haxhin e therjen e kurbanit.

Published

on

Për drejtësi, paqe, solidaritet e bamirësi është lutur, myftiu i Kosovës, Naim Tërnava. Ai ka uruar të gjithë besimtarët myslimanë për festën e Kurban Bajramit. Myftiu i Bashkësisë Islame të Kosovës ka folur edhe për haxhin e therjen e kurbanit, ku theksoi se të dyja këto duhet të bëhen në emër të krijuesit.

Myftiu Naim Tërnava ka theksuar se pas dy vitesh, këtë vit besimtarëve iu mundësua udhëtimi drejt vendeve ku kryhet haxhi.

“Me këtë rast, në këtë ditë të madhe, kam kënaqësinë që në emër të Bashkësisë Islame, institucioneve të saj dhe në emrin tim, t’u bashkëngjitëm lutjeve e ibadeteve të besimtarëve myslimanë që sot janë në rrafshnaltën e Arafatit, ku të gjithë të veshur me petkun e bardhë – me ihrama, të barabartë e pa asnjë dallim, me çiltërsinë shpirtërore e me bindje dhe sinqeritet, kanë nisur kryerjen e obligimeve të haxhit. Haxhilerët nga trojet tona, sikurse haxhilerët e tjerët nga e gjitha bota, në këtë ditë të madhe luten me përkushtim e devocion dhe i drejtohen Krijuesit të Gjithësisë, duke dëshmuar kështu besimin dhe përkushtimin e tyre ndaj tij”, ka thënë Tërnava.

Devotshmëria, barazia e sakrifica, janë disa nga mesazhet e këtij Bajrami që përmendi myftiu i Kosovës, Naim Tërnava. Ai shtoi se haxhi është një nga shtyllat e fesë islame dhe një nga obligimet më të dashura për njeriun.

“Mesazhet e festës së Kurban-Bajramit janë devotshmëria, barazia, sakrifica, flijimi e solidariteti, vlera këto që shprehen si nga haxhilerët që gjenden në Qabe për të kryer haxhin, po ashtu edhe nga besimtarët myslimanë që gjenden gjithandej nëpër shtëpitë dhe familjet e tyre. Lutjet, ibadetet, devotshmëria, përkushtimi e sakrifica që e karakterizojnë Kurban-Bajramin, me të gjitha ritualet e tjera, përfshirë edhe haxhin dhe kurbanin si dimensionet kryesore të kësaj feste, krijojnë një reflektim shpirtëror, që besimtarin e fisnikërojnë edhe më shumë, e bëjnë më human dhe më të dobishëm për rrethin dhe shoqërinë”, ka shtuar Tërnava.

Derisa ka folur për therjen e kurbanit, ai u shpreh se dobitë e tij duhet t’i përfitojnë kategoritë e shoqërisë dhe institucionet në nevojë.

“Në Kuranin fisnik, besimtarët myslimanë në këto ditë të caktuara feste, urdhërohen që të prenë kurban në emër të Zotit, porse dobitë e tij t’i përfitojnë kategoritë e shoqërisë dhe institucionet në nevojë”, ka shtuar Tërnava.

Ai ka shtuar se dy festat e bajrameve janë më populloret për besimtarët myslimanë.

“Festat fetare te ne, në vazhdimësi kanë kultivuar begatitë shpirtërore para atyre materiale, urtësinë para euforisë, drejtësinë para zullumit, paqen para konfliktit e dhunës dhe solidaritetin e bamirësinë para koprracisë, ndaj, ne lutemi dhe urojmë që edhe ky Bajram të jetë në frymën e tillë. Duke ju uruar për festën e madhe të Kurban-Bajramit, lus Zotin për shëndet, mbarësi, begati, dashuri e harmoni në familjet tuaja”, ka uruar Tërnava.

Festa e Kurban Bajramit është e njohur si “Bajram i haxhive”, sepse gjatë kësaj kohe kryhet edhe pelegrinazhi ritual në Mekë.

Lajmet

Përurohet rruga që lidh zonën e dytë ekonomike të Gllavicës me magjistralen mes Shtimes dhe Ferizajt

Published

on

By

Në komunën e Shtimes sot është përuruar rruga që lidh Zonën e dytë Ekonomike të Gllavicës me rrugën magjistrale mes Shtimes dhe Ferizajt, investim ky që pritet të ndikojë drejtpërdrejt në zhvillimin ekonomik të komunës dhe më gjerë.

Kryetari i Komunës së Shtimes, Qemajl Aliu, tha se kjo rrugë është një hap i rëndësishëm drejt funksionalizimit të zonës ekonomike.

Jemi në përurimin e rrugës që të dërgon te zona e dytë ekonomike në Gllavicë, rrugë e cila këtë zonë ekonomike e lidh me rrugën magjistrale mes Shtimës dhe Ferizajt. Është investim mbi 600 mijë euro, rrugë me gjerësi shtatë metra, me kanale kulluese, kanalizim atmosferik për ujëra të zeza, trotuar, me ndriçim, me të gjitha normat e një rruge që i lidhë magjistralen mes dy qyteteve”, tha Aliu.

Ai shtoi se rruga është në shërbim të funksionalizimit të zonës ekonomike, ndërsa përveç saj, komuna ka bërë edhe investime të tjera në këtë zonë.

Kjo rrugë është në shërbim të funksionalizimit të zonës ekonomike dhe përveç kësaj rruge, ne kemi bërë afro gjysmë milioni euro investime në zonën ekonomike dhe presim që pranverën e ardhshme, siç edhe jemi zotuar me fillu funksionalizimin dhe vendosjen e bizneseve në këtë zonë, e cila do të ndihmojë dhe shërbejë në zhvillimin ekonomik të gjithëmbarshëm në Komunën e Shtimes, por edhe përreth. Kjo zonë ekonomike ka diku 37 hektarë dhe pritet me qenë një nga zonat më të mëdha me biznese”, tha Aliu.

Ky investim i ka kushtuar Komunës së Shtimës mbi 600 mijë euro./D.B/KP

Continue Reading

Lajmet

Presidenti i FIFA-s, dekorohet nga Osmani

Published

on

By

Presidentja e Kosovës, Vjosa Osmani-Sadriu, në ceremoninë solemne të dekorimit të Presidentit të FIFA-s, Gianni Infantino, ka vlerësuar rolin e futbollit në historinë e vendit, duke e cilësuar atë si simbol të lirisë dhe qëndrueshmërisë së popullit të Kosovës edhe në periudhat më të vështira të okupimit.

Osmani tha se futbolli ishte streha e fëmijëve kosovarë në kohën e luftës dhe shprehja më e pastër e ëndrrës për liri.

Dhe një grup fëmijësh që ndiqnin jo vetëm një ëndërr, por edhe ndjenjën e lirisë. Në vitet më të errëta të okupimit, kur një luftë gjenocidale po zhvillohej kundër popullit tonë të pafajshëm, fëmijët e Kosovës gjetën lirinë në lojën e futbollit. Ata shikonin drejt idhujve të tyre për forcë dhe frymëzim. Dhe ata e mbanin topin duke u rrokullisur nëpër fusha të improvizuara, nëpër oborre me pluhur dhe rrugë të shkatërruara. Edhe në kampet e refugjatëve, larg nga shtëpia, futbolli u bë streha e tyre, veprimi i vetëm që nuk u hesht kurrë. Kur lufta përfundoi dhe liria u bë më në fund realitet, futbolli sërish u bë zemra që rrihte e popullit tonë. Dhe në ato vite të hershme të rindërtimit, një emër, një emër u bë përfaqësuesi i shpirtit të futbollit tonë dhe i shpirtit të vendit tonë Fadil Vokrri”, tha Osmani.

Duke kujtuar figurën e legjendës së futbollit, Fadil Vokrri, presidentja tha se ai ishte shumë më tepër se një lojtar, ishte simbol i qëndrueshmërisë dhe krenarisë kombëtare.

Ai ishte më shumë se një lojtar dhe më shumë se një udhëheqës. Ai ishte mishërimi i gjallë i qëndrueshmërisë dhe krenarisë së Kosovës. Ai mbante shpresat e vendit tonë shumë përpara se Kosova të kishte një vend në ndonjë tryezë ndërkombëtare. Dhe ai e përdori futbollin për t’i treguar botës se Kosova besonte dhe se Kosova ishte gati të qëndronte krah për krah me të tjerët. Vokrri frymëzoi një brez që refuzoi të dorëzohej. Ai dëshmoi se talenti, disiplina dhe besimi në vendin tënd mund të lëvizin male, edhe kur ato duken të palëvizshme. Trashëgimia e tij jeton në çdo lojtar të ri që ëndërron të veshë fanellën e Kosovës, në çdo fitore që bashkon popullin tonë dhe në çdo stadium ku tani luhet me krenari himni ynë. Ai jeton në çdo futbollist që shihni sot në këtë sallë, lojtarë që mbajnë të njëjtën krenari teksa shënojnë sukseset e tyre për vendin e tyre dhe për ekipet e tyre në mbarë botën”, theksoi ajo.

Presidentja Osmani përmendi edhe momentin historik kur Kosova u pranua në UEFA dhe më pas në FIFA, duke e cilësuar këtë si një akt drejtësie dhe njohjeje ndërkombëtare për sakrificat e popullit të Kosovës.

Dhe pastaj erdhi dita kur ajo ëndërr gjeti shtëpinë e saj të merituar, kur Kosova fillimisht u bë anëtare e UEFA-s dhe më pas anëtare e FIFA-s, duke iu bashkuar familjes së madhe të kombeve që flasin gjuhën universale të futbollit. Ky pranim shënoi një nga momentet më krenare në historinë tonë kombëtare — një moment kur më në fund mund të ndanim talentin tonë me botën. Mbi të gjitha, ishte një moment drejtësie — drejtësi dhe njohje për sakrificat, qëndrueshmërinë dhe ëndrrat e popullit tonë”, u shpreh ajo.

Ajo falënderoi Presidentin e FIFA-s, Gianni Infantino, për mbështetjen që i ka dhënë Kosovës në periudhën e pranimit në organizatat ndërkombëtare të futbollit.

“I dashur President Infantino, ne do ta kujtojmë gjithmonë që ju qëndruat pranë nesh gjatë këtyre momenteve historike dhe gjatë kësaj kohe vendimtare përmes anëtarësimit në UEFA si dhe në FIFA. Ju besuat në ne, besuat në potencialin e Kosovës dhe në fuqinë bashkuese të sportit, në një kohë kur të besoje kërkonte ende guxim. Ju e kuptuat se futbolli, në thelb, është për njerëzimin, për t’i dhënë çdo fëmije, pavarësisht nga vjen, mundësinë për të përkitur, për të përkitur”, tha Osmani.

Presidentja shtoi se nën udhëheqjen e Infantinos, FIFA është shndërruar në një familje të vërtetë kombesh që lidh popujt përmes sportit.

“Nëpërmjet udhëheqjes suaj, FIFA është bërë një familje e vërtetë kombesh, një familje ku secili ka vendin e vet. Ju keni punuar pa u lodhur për t’u siguruar që futbolli të ndërtojë ura mes njerëzve, kudo që ata mund të jenë. Dhe për Kosovën, kjo ka pasur një kuptim të jashtëzakonshëm. Ju ndihmuat lojtarët tanë të valëvitnin flamurin e një vendi të lirë e të pavarur, që sot garon me krenari dhe dinjitet në skenën ndërkombëtare”, u shpreh presidentja.

Duke përmbyllur fjalën e saj, Osmani tha se suksesi i Kosovës në futboll është ndërtuar mbi sakrificë dhe miqësi, duke falënderuar të gjithë ata që e kanë mbështetur vendin në këtë rrugëtim.

“Dhe sot, teksa shohim ekipin tonë kombëtar ulur këtu, si simbol i sa larg kemi arritur, na kujtohet se ky sukses nuk u ndërtua brenda natës. Ai u ndërtua përmes sakrificës, por edhe përmes miqësisë dhe mbështetjes. Dhe pikërisht kjo miqësi është ajo që na bashkon sot”, tha Osmani./D.B/EO

Continue Reading

Lajmet

Kurti takon komandantin e KFOR-it, Gjeneral Major Özkan Ulutash – flasin për sitauën e sigurisë

Published

on

By

Kryeministri në detyrë i Kosovës, Albin Kurti, priti në takim mirëseardhës Komandantin e ri të KFOR-it në Kosovë, Gjeneral Major Özkan Ulutash.

Siç njofton Zyra e Kryeministrit, gjatë këtij takimi është diskutuar për zhvillimet aktuale, me theks mbi situatën e sigurisë dhe për rëndësinë e bashkëveprimit dhe bashkëpunimit ndërmjet institucioneve të sigurisë të vendit dhe të misionit të NATO-s në Kosovë.

Duke i uruar mirëseardhje përsëri në Kosovë dhe duke i dëshiruar suksese në mandatin e dytë si komandant i KFOR-it, kryeministri Kurti theksoi gatishmërinë dhe angazhimin e tij dhe të Qeverisë për bashkëpunim të ngushtë me KFOR-in në ruajtjen e paqes dhe sigurisë në të gjithë territorin e vendit”, thuhet në komunikatë.

Komandanti i rikthyer në detyrë si udhëheqës i KFOR-it, Özkan Ulutas gjatë ceremonisë, katër ditë më parë tha se është i gatshëm për të përmbushur misionin e KFOR-it për paqe të qëndrueshme në Kosovë dhe për stabilitetin rajonal.

Continue Reading

Lajmet

Arrestohen dy persona të dyshuar për disa raste të vjedhjeve në Prishtinë

Published

on

By

Policia e Kosovës ka arrestuar dy persona të dyshuar për vjedhje në Prishtinë. Bëhet fjalë për 56 vjeçarin me inicialet B.J dhe M.C, 51 vjeç – të dy shtetas të Kosovës.

Arrestimi, sipas Policisë, ka ardhur pas një pune hetimore dhe operacionale të Sektorit të Hetimeve të Kryeqytetit.

Pas arrestimit, me vendim të Prokurorit të Shtetit, ata janë dërguar në mbajtje prej 48 orësh, përderisa hetuesit po kryejnë të gjitha veprimet e nevojshme hetimore e procedurale lidhur me së paku 15 raste të vjedhjeve, ku dyshohet se personat e arrestuar janë të përfshirë./D.B/KP

Continue Reading

Të kërkuara