Lajmet

Rama: Bullgaria ka marrë peng Shqipërinë dhe Maqedoninë e Veriut

Rama ka thënë se krejt kjo po ndodh në kulmin e një lufte të nxehtë në kufi të Evropës.

Published

3 years ago

June 23, 2022

Betim Gashi

Kryeministri i Shqipërisë, Edi Rama nuk pret të ndodhë zgjidhje në Bullgari sa i përket vetos bullgare ndaj hapave të mëtejmë të integrimit të Shqipërisë dhe Maqedonisë së Veriut në Bashkimin Evropian. Rama ka folur para gazetarëve në Bruksel, ku ka thënë se nëse një gjë e tillë do të zgjidhet, atëherë do të jetë motiv “për të marrë frymë të lehtësuar nga kjo pengmarrje e një vendit të NATO-s për dy vende të NATO-s.

Rama ka thënë se krejt kjo po ndodh në kulmin e një lufte të nxehtë në kufi të Evropës, ku 26 vendet e tjera po vështrojnë si yjet.

“Përkundër optimizmit të ngutur të disave, edhe këtu në Bruksel, nuk pres të zgjidhet asgjë në Bullgari, pra ndërkohë që sigurisht nëse do të zgjidhet do të jetë një motiv për të marrë frymë të lehtësuar nga kjo pengmarrje e një vendi të NATO-s, të dy vendeve të NATO-s, në kulmin e një lufte të nxehtë në kufi të Evropës, dhe nën vështrimin e 26 vendeve të tjera që shohin si yjet që rrinë dhe vështrojnë”, ka thënë Rama.

Sipas Ramës, është turp që një vend anëtar i NATO-s, mban peng dy vende të tjera, Shqipërinë dhe Maqedoninë e Veriut, që janë anëtare të kësaj aleance.

“Ne e dimë sepse në këtë rrugë kemi një kohë të gjatë dhe këtu kemi një Bullgari, atje është një Bullgari. Ndërkohë, ne nuk e ndryshojmë rrugën tonë. Dhe ne duhet të vazhdojmë të ndërtojmë Evropën në vendin tonë”, tha Rama.

Rama nuk është shprehur optimist për lajme të mira sot në Bruksel.

“Dje pati pak optimizëm, por ja ku jemi. Ditë e re në Evropë, por jo në Bullgari”, përfundoi Rama.

Nga gazetarët, Rama është pyetu edhe për Kosovën sa i përket nismës Ballkani i Hapur.

“Ballkani i Hapur” është i hapur për të gjithë”, është përgjigjur Rama.

Në Bruksel mbahet sot konferenca e nivelit të lartë me Ballkanin Perëndimor që i paraprin sesionit të Këshillit të Bashkimit Evropian, ku pritet të vendosë për integrimin e vendeve të rajonit.

Shqipëria dhe Maqadonia e Veriut janë në pritje për hapje të negociatave por që janë të penguara nga Bullgaria.

Related Topics:shqiperia maqedonia e veriut Edi Rama Bullgaria

Up Next

Kriza globale e ushqimit ‘do të vrasë miliona’, paralajmëron ekzekutivi shëndetësor

Don't Miss

Statusi kandidat për Ukrainën dhe Moldavinë, ‘moment vendimtar’ për BE-në

Lajmet

Rama nga Londra: Kosova s’duhet të merret me Serbinë, por të përmbushë detyrimet ndaj BE-së

Published

3 hours ago

October 21, 2025

UBTnews

Në Londër po zhvillohet një tryezë me temën “Ballkani Perëndimor dhe Bashkimi Europian”, ku ndër folësit kryesorë është edhe kryeministri i Shqipërisë, Edi Rama.

I pyetur për pozicionin e Kosovës në rajon dhe për ecurinë e saj drejt anëtarësimit në Bashkimin Europian, Rama u shpreh se Prishtina duhet të fokusohet tek përmbushja e detyrimeve që burojnë nga dialogu me Serbinë dhe jo tek vetë raportet dypalëshe.

“Që të jetë e suksesshme Kosova duhet të harrojë Serbinë, fjalë për fjalë dhe duhet të realizojë të gjitha pikat që kanë të bëjnë me dialogun e ndërmjetësuar nga BE-ja, pavarësisht nga Serbia, pra ata t’ia lënë topin në fushë Serbisë dhe të ecin para drejt Europës duke lënë Europën të merret me Serbinë dhe mos ta lënë çështjen e Serbisë të shndërrohet në çështje fajësimi midis të dyjave. Megjithatë, është mendimi im ky, unë respektoj atë që vendosin udhëheqësit e zgjedhur të Kosovës për vendin e tyre”, tha ai./EO

Lajmet

Supremja: Pranohet ankesa e kandidatit të pavarur për kryetar të Kllokotit, rrëzohet vendimi i PZAP-së

Published

3 hours ago

October 21, 2025

UBTnews

Kolegji i Gjykatës Supreme e ka pranuar si të bazuar ankesën e kandidatit të pavarur për kryetar të Komunës së Kllokotit, Arber Emini, dhe ka prishur vendimin e Panelit Zgjedhor për Ankesa dhe Parashtresa (PZAP), të datës 15.10.2025.

Sipas Supremes, çështja është kthyer në rivendosje në PZAP.

“Bazuar në shkresat e lëndës, Arber Emini me datë 13.10.2025, është ankuar në PZAP, me pretendimin se “me datë 12.10.2025 në Zgjedhjet Lokale në Kllokot, Serbia ka ndërhyrë në sistemin zgjedhor në Komunën e Kllokotit, duke fabrikuar dëshmi mjekësore serbe të strukturave paralele për t’u shfrytëzuar votuesit me asistencë të përdorin këtë vërtetim mjekësor”, thuhet në komunikatë.

Më tej thuhet se Gjykata Supreme e Kosovës vlerëson se PZAP, gabimisht ka vendosur kur e ka hedhur poshtë ankesën e ankuesit, për faktin se nga pretendimet që dalin nga ankesa, i njëjti është ankuar për procesin dhe parregullsitë gjatë ditës së votimit dhe jo kundër rezultateve preliminare të tabuluara nga KQZ, ashtu siç ka pretenduar PZAP në vendimin e saj.

“Andaj, në rivendosje, PZAP, udhëzohet që t’i evitojë shkeljet e theksuara në Aktvendimin e Gjykatës Supreme, AA.nr.93/2025, dhe të vendos në mënyrë meritore lidhur me ankesën e kandidatit të pavarur për kryetar të Komunës së Kllokotit, Arber Emini”, thuhet në njoftim.

Zgjedhjet e rregullta komunale janë mbajtur më 12 tetor./KP

Lajmet

Rrahje dhe gjuajtje me armë zjarri në qendër të Podujevës, policia jep detaje

Published

3 hours ago

October 21, 2025

UBTnews

Pak qaste më parë ka ndodhur një rrahje dhe gjuajtje me armë zjarri në Podujevë.

Lajmin e ka konfirmuar Flora Ahmeti zëdhënëse e Policisë së Kosovës për Rajonin e Prishtinës.

Sipas Ahmetit lidhur me këtë rast policia ka shoqëruar në stacion policor katër persona, prej tyre 1 dëshmitar dhe tre persona të dyshuar të cilët ishin të përfshirë në rast.

Ajo tha se sot rreth orës 14:30 është pranuar informata për një rrahje dhe shkrepje të armës në Podujevë.

“Me të marrë informatën policia, ka dalë në vendin e ngjarjes nga ku jemi njoftuar se si pasojë e rrahjes nga një mjet i fortë (shkop) është lënduar një person i cili është dërguar për trajtimin e nevojshëm mjekësor. Lidhur me këtë rast policia ka shoqëruar në stacion policor katër persona, prej tyre 1 dëshmitar dhe tre persona të dyshuar të cilët ishin të përfshirë në rast”, thuhet në përgjigjen e zëdhënëses Ahmeti.

Ajo ka shuar se aktualisht policia po vazhdon punën për zbardhjen e rrethanave dhe motiveve që karakterizojnë ngjarjen./KP

Lajmet

Vdes në moshën 29-vjeçare kampioni amerikan i shahut

Published

4 hours ago

October 21, 2025

UBT News

Kampioni amerikan i shahut dhe komentatori online Daniel Naroditsky ka ndërruar jetë në moshën 29-vjeçare.

Sipas BBC, familja e tij e përshkroi vdekjen si të papritur, pa dhënë shkakun.

Naroditsky ishte një lojtar i talentuar, edukator dhe komentator, i njohur për kanalin e tij në YouTube me afro 500,000 abonentë dhe stream-et në Twitch me 340,000 ndjekës.

Ai luajti një rol kyç në popullarizimin e përmbajtjes së shahut online.

Ai filloi shahun në moshën 6 vjeç, fitoi Kampionatin Botëror të të Rinjve nën 12 vjeç në 2007, dhe në 2013 u bë Grandmaster i SHBA-së. Naroditsky u diplomua në Stanford dhe punoi si trajner shahu në Charlotte, Karolina e Veriut.

Shumë kolegë dhe fansa e përshkruan si një inspirim, historian të shahut dhe dikë që e bënte lojën argëtuese dhe të thjeshtë për të gjithë./S.K/KP/