Lajmet

​Policia ultimatum Qeverisë: Të dalin shtesat në pagën e majit ose protesta të përditshme

Kërkohet nga ekzekutivi realizimi i shtesave të rrezikshmërisë për të gjithë zyrtarët policorë, pa përjashtim.

Published

3 years ago

on

Sindikatës së Policisë së Kosovës i ka humbur durimi. Ajo po e paralajmëron Qeverinë e Kosovës për protesta të përditshme deri në realizimin e kërkesave të tyre për ekzekutimin e shtesave të rrezikshmërisë.

Sindikata e Policisë po kërkon vazhdimisht nga ekzekutivi realizimin e shtesave të rrezikshmërisë për të gjithë zyrtarët policorë, pa përjashtim.

Kërkesat e tyre duket të kenë hasur në vesh të shurdhër, pasi që nga muaji shkurt zyrtarët policorë nuk i morën shtesat për rrezikshmëri që u takojnë me Ligjin e pagave që aktualisht është në Kushtetuese.

Përkitazi me këtë, sindikata sërish me ultimatum, paralajmëron protesta nëse edhe në muajin muaj qeveria nuk e realizon premtimin për ekzekutimin e pagesës së rrezikshmërisë për të gjithë zyrtarët policorë.

Kryetari i Sindikatës së Policisë së Kosovës, Imer Zeqiri deklaron se është mundësia e fundit që qeveria të reagojë në lidhje me shtesën e rrezikshmërisë si e drejtë elementare dhe e merituar. Nëse nuk realizohen edhe këtë muaj këto shtesa, Zeqiri thekson se protestat nuk do të jenë njëditore, por të përditshme, deri në realizimin e kërkesave të tyre.

Nga mosplotësimi i kushteve për Policinë e Kosovës, Zeqiri thotë se numër i madh i pjesëtarëve kanë filluar të japin dorëheqje, me ç’rast thotë se ky fenomen duhet të jetë alarm për Qeverinë e Kosovës.

“Në rast se edhe këtë muaj nuk do të ndodhë ekzekutimi i shtesave për rrezikshmëri dhe shtesave të tjera për pjesën e stafit civil, atëherë si sindikatë do të veprojmë sipas kërkesave të pjesëtarëve të Policisë së Kosovës, çfarëdo që kërkojnë ata e që ne do ta vlerësojmë se është rrugë ligjore do të veprojmë, qoftë edhe protestë nëse kërkojnë do të bëjmë… Nëse vërtetë nuk marrim përgjigje prej tyre dhe nëse vërtetë vazhdohet kështu me këto kushte në Policinë e Kosovës, mund të themi se është lutja fundit (për Qeverinë që të veprojë)… Dhe në rast se detyrohemi të organizojmë protestë, nuk do të jetë njëditore, por do të vazhdojë deri në realizimin e të gjitha kërkesave që i kemi adresuar si sindikatë. Andaj, kërkoj nga qeveria që të mos na detyrojë që të veprojmë me veprime sindikale, qoftë edhe me protestë, përndryshe veprimet sindikale nuk do të ndalen… Nëse detyrohemi të organizojmë protestë, protesta do të vazhdojë çdo ditë deri në realizimin e kërkesave”, thotë Zeqiri.

Ai shprehet se nuk është dëshirë e sindikatës dhe e policisë që të ndërmarrë veprime sindikale, porse janë te detyruar nëse edhe këtë herë qeveria nuk vepron. Zeqiri thotë se dukuri shqetësuese është dorëheqja vullnetare e pjesëtarëve të Policisë së Kosovës, nga kushtet jo të mira për të ushtruar detyrën.

“Është shqetësuese dukuria tjetër që nga shprehjet e pakënaqësive rreth këtyre kushteve që po na mungojnë në Policinë e Kosovës. Në mënyrë individuale pjesëtarët e Policisë së Kosovës kanë filluar të japin dorëheqje vullnetare nga policia, e që për neve kjo është shumë e dhimbshme, sepse po humbim pjesëtar profesionist që kanë kryer punë vite të tëra në Policinë e Kosovës dhe gjithë atë profesionalizëm e kanë arritur me shpenzime të buxhetit të shtetit të Kosovës, e sot të detyrohen për shkak të kushteve të japin dorëheqje. Ne si institucion i sigurisë do të dëmtohemi shumë. Andaj, ky duhet të jetë një alarm për Qeverinë e Kosovës që ta ruajnë institucionin e sigurisë së Kosovës. Kjo bëhet që t’i plotësojmë kushtet dhe të përmirësojmë mirëqenien në Policinë e Kosovës, ndryshe neve po shkatërrohemi gradualisht”, thotë Zeqiri.

Zeqiri konsideron se mosekzekutimi i shtesave të rrezikshmërisë për tre muaj, ka krijuar një mosbesim të madh tek pjesëtarët e Policisë së Kosovës.

“Jo vetëm ne si sindikatë, por zhgënjimi është shumë i madh te të gjithë pjesëtarët e Policisë së Kosovës. Kjo ka ndodhur me fillimin e implementimit me Ligjin e ri te pagave, që nga muaji shkurt, shtesa e rrezikshmërisë në Policinë e Kosovës nuk është ekzekutuar. Në secilin muaj, edhe në këtë kanë premtuar me disa komunikata mediatike, ministria se kjo do të bëhet në muajt në vijim, pa e përcaktuar se në cilin muaj do të bëhet ekzekutimi i shtesave të rrezikshmërisë. Dhe kjo zvarritje, apo kalimi i tre muajve pa ekzekutimin e shtesës së rrezikshmërisë ka krijuar një mosbesim të madh tek pjesëtarët e Policisë së Kosovës, se do të bëhet apo jo”, thekson Zeqiri.

Mes tjerash, Zeqiri rendit edhe kërkesat tjera të tyre drejtuar qeverisë, e njëra ndër to është sigurimi shëndetësor. Ai thekson se deri më tani janë 22 zyrtarë policorë që kanë humbur jetën gjatë kryerjes së detyrës zyrtare.

“Që nga themelimi i Policisë së Kosovës deri më tani kemi 22 zyrtarë policorë që kanë humbur jetën në kryerjen e detyrës zyrtare, kemi qindra të tjerë të lënduar e që kanë mbetur me aftësi të përhershme të kufizuar me invaliditet. Po ashtu kemi me qindra të tjerë që kanë fituar sëmundje, këto janë mjaftueshëm statistika për të vlerësuar se duhet paguar ose jo shtesat e rrezikshmërisë. Dhe kjo mospagesa e shtesave të rrezikshmërisë krahasuar me pagat, që paga bazë ka pas një rritje me ligjin e ri, do të thotë kemi jo një rritje të pagës të një numër i madh, kemi të disa zbritje te pagës. Ne vazhdimisht jemi deklaruar dhe kemi bërë kërkesa drejtuar qeverisë edhe për sigurimin shëndetësor të cilin nuk e kemi, nuk kemi ligj të pensionimit, nuk na paguhet shujta, mungesë e infrastrukturës dhe e mjeteve logjistike, duke filluar nga uniforma e të tjerat dhe të gjitha këto janë grumbulluar dhe tanimë policia ka arritur në atë nivelin e demotivimit për punë, sepse po ndihet e diskriminuar dhe e nënçmuar me këtë që po ndodhë”, thotë mes tjerash Zeqiri.

Kreu i kësaj sindikate, Zeqiri thotë po ashtu se ka kohë që nuk kanë marrë përgjigje nga Qeveria për kërkesat e Policisë së Kosovës. I njëjti ka shprehur gatishmëri të takohet me zyrtarë të Qeverisë apo me kryeministrin e vendit, Albin Kurti, që të diskutojnë për plotësimin e kërkesave të tyre.

Në fund të muajit mars, Ministria e Financave dhe Ministria e Punëve të Brendshme kanë dalë me një komunikatë të përbashkët.

Dy ministritë kanë thënë se të gjithë zyrtarët publikë diferencën do ta marrin në mënyrë retroaktive për të gjithë muajt që nga hyrja në fuqi e Ligjit për paga në sektorin publik. 

Related Topics:
Continue Reading

Vendi

Kuvendi ratifikon shtatë marrëveshje ndërkombëtare

Published

54 minutes ago

on

April 2, 2026

By

Në seancën e parë të Kuvendit të Kosovës pas një pauze rreth njëmujore, deputetët ratifikuan shtatë marrëveshje ndërkombëtare nga 12 sa ishin paraparë në rendin e ditës.

Në sallë ishin të pranishëm 81 deputetë, të cilët votuan pro shtatë marrëveshjeve të para. Mirëpo, seanca u përcoll me debate dhe largime, pasi deputetët e PDK-së lëshuan sallën në fillim të punimeve, meqë u refuzua kërkesa e tyre që draft-rezoluta për mbrojtjen e të vërtetës historike të vendosej si pikë e parë e rendit të ditës.

Nga ana tjetër, edhe pse ishin në sallë, deputetët e Listës Serbe nuk votuan as për prezencë e as për marrëveshjet në fjalë.

Ndërkaq, katër marrëveshjet e mbetura nuk u votuan nga deputetët e Lidhjes Demokratike të Kosovës (LDK), me arsyetimin se ato kishin nevojë për shqyrtim paraprak.

Ndër vendimet më të rëndësishme që kaluan këtë të enjte ishte edhe marrëveshja e kredisë prej 33 milionë eurosh ndërmjet Kosovës dhe Bankës Evropiane për Investime, e dedikuar për projektin “Energjia Diellore Fotovoltaike” në Korporatën Energjetike të Kosovës (KEK).

Marrëveshjet e ratifikuara:

  • Marrëveshja për qasje në arsimin e lartë dhe pranim për studime në Ballkanin Perëndimor.
  • Marrëveshja financiare ndërmjet Republikës së Kosovës dhe Bashkimit Evropian, për Programin IPA 2018.
  • Marrëveshja financiare ndërmjet Republikës së Kosovës dhe Bashkimit Evropian, për Programin IPA 2017.
  • Marrëveshja e kredisë mes Republikës së Kosovës dhe Bankës Evropiane për Investime për Projektin Energjia Diellore Fotovoltaike në KEK – Porta Globale.
  • Marrëveshja e Kredisë ndërmjet Republikës së Kosovës, e përfaqësuar nga Ministria e Financave, Punës dhe Transfereve dhe Bankës Evropiane për Rindërtim dhe Zhvillim (BERZh) për Projektin e efiçencës së energjisë në ndërtesa publike.
  • Marrëveshja e kredisë “Projekti i Rrugës me Shpejtësi të Lartë Prishtinë – Mitrovicë” (Kredi shtesë) ndërmjet Fondit Saudit për Zhvillim dhe Republikës së Kosovës.
  • Marrëveshja e kredisë ndërmjet Republikës së Kosovës dhe Bankës Evropiane për Rindërtim dhe Zhvillim për Projektin “Impianti për Trajtimin e Ujërave të Zeza në Podujevë”.

Vlera e katër prej këtyre marrëveshjeve, duke përfshirë edhe atë me Bankën Evropiane për Investime, shkon në 121 milionë euro.

Continue Reading

Vendi

Studentët e Mekatronikës në UBT përfitojnë përvojë praktike në teknologjitë më të avancuara në ITP Prizren

Published

1 hour ago

on

April 2, 2026

By

Fakulteti i Inxhinierisë së Mekatronikës në UBT vazhdon të dëshmojë qasjen e tij moderne dhe të orientuar drejt praktikës, duke organizuar aktivitete që i lidhin studentët drejtpërdrejt me industrinë dhe teknologjitë më të avancuara.

Në këtë kuadër, studentët e vitit të tretë realizuan një vizitë studimore në qendrën ITP në Prizren, të udhëhequr nga Prof. Ass. Dr. Betim Shabani dhe Ass. Ylli Rexhaj, MSc Cand., ku patën mundësinë të njihen nga afër me proceset më të reja të prodhimit dhe inovacionit teknologjik.

Gjatë vizitës, studentët u njohën në mënyrë të detajuar me teknologjinë e printimit 3D, duke ndjekur të gjithë ciklin e zhvillimit, nga skanimi dhe modelimi digjital i objekteve, deri te realizimi i tyre fizik dhe procesi i post-procesimit si fazë përfundimtare.

Kjo eksperiencë praktike përfaqëson një nga elementet kyçe të programit të Mekatronikës në UBT, i cili është i ndërtuar mbi ndërthurjen e teorisë me praktikën, duke përgatitur studentët për sfidat reale të industrisë moderne.

Përmes aktiviteteve të tilla, UBT synon të zhvillojë te studentët aftësi konkrete profesionale, mendim inovativ dhe gatishmëri për tregun e punës, duke e bërë programin e Mekatronikës një nga drejtimet më atraktive dhe të kërkuara për të rinjtë që synojnë të ndërtojnë karrierë në teknologji, automatizim dhe industri të avancuara.

Vizita në ITP Prizren është vetëm një nga shumë aktivitetet praktike që organizohen në kuadër të këtij programi, duke e pozicionuar UBT-në si një institucion lider në përgatitjen e profesionistëve të së ardhmes në fushën e mekatronikës dhe teknologjisë.

Continue Reading

Vendi

Gjermania ndan 3 milionë euro donacion për FSK-në

Published

2 hours ago

on

April 2, 2026

By

Gjermania ka konfirmuar edhe një herë mbështetjen e saj të palëkundur për transformimin dhe modernizimin e Forcës së Sigurisë së Kosovës përmes një donacioni të ri prej 3 milionë eurosh.

Ministri i Mbrojtjës Ejup Maqedonci, ka njoftuar se ky donacion vjen në kuadër të programit gjerman “Enable and Enhance”, i cili do të fokusohet në pesë projekte jetike, me synim kryesor fuqizimin e flotës së transportit ushtarak dhe ngritjen e kapaciteteve për mbështetje mjekësore brenda forcës.

Gjatë ceremonisë së zyrtarizimit të kësaj mbështetjeje, Ministri Maqedonci, priti ambasadorin gjerman në Kosovë, Rainer Rudolph, me të cilin diskutoi mbi ecurinë e reformave në mbrojtje dhe nevojën për zgjerimin e bashkëpunimit dypalësh.

Ministri Maqedonci e vlerësoi lart kontributin e qeverisë gjermane, duke theksuar se ky investim ndikon drejtpërdrejt në gatishmërinë operacionale të FSK-së.

“Republika Federale e Gjermanisë po vazhdon të mbështesë zhvillimin dhe rritjen e kapaciteteve të Forcës së Sigurisë së Kosovës,” u shpreh ministri Maqedonci, duke shtuar se ky donacion është i dedikuar për projekte konkrete që përmbushin standardet më të larta ushtarake.

Sipas krerëve të mbrojtjes, bashkëpunimi mes dy vendeve pritet të thellohet edhe më tej në të ardhmen, duke u fokusuar në trajnime të përbashkëta dhe asistencë teknike për të siguruar një forcë moderne dhe të ndërveprueshme me partnerët ndërkombëtarë.

Continue Reading

Lajmet

Studentet e masterit në Psikologji në UBT, Shqipe Shala dhe Drenusha Krasniqi mbajnë ligjëratë mbi autizmin

Published

2 hours ago

on

April 2, 2026

By

Në kuadër të aktiviteteve akademike dhe ndërgjegjësuese, studentet e programit master në psikologji, Shqipe Shala dhe Drenusha Krasniqi, mbajtën një ligjëratë tematike mbi çrregullimin e spektrit të autizmit.

Ligjërata u fokusua në prezantimin e koncepteve bazë mbi autizmin, duke përfshirë karakteristikat kryesore, shenjat e hershme të identifikimit dhe sfidat që shoqërojnë këtë çrregullim në aspektin e zhvillimit dhe ndërveprimit social. Një rëndësi e veçantë iu kushtua ndërhyrjes së hershme dhe rolit të saj në përmirësimin e cilësisë së jetës për personat në spektrin e autizmit.

Gjatë prezantimit u trajtuan gjithashtu aspektet praktike të mbështetjes, duke përfshirë qasjet bashkëkohore në punën me fëmijët me autizëm, si dhe roli i familjes, institucioneve arsimore dhe profesionistëve në krijimin e një mjedisi gjithëpërfshirës.

Ky aktivitet synoi të kontribuojë në rritjen e vetëdijes dhe njohurive profesionale mbi autizmin, si dhe të nxisë një qasje më të ndjeshme dhe mbështetëse ndaj personave me këtë çrregullim në shoqëri.

Ligjërata u vlerësua pozitivisht nga pjesëmarrësit, duke reflektuar interesin dhe rëndësinë e trajtimit të temave të tilla në kuadër të formimit akademik dhe profesional.

Continue Reading

Të kërkuara