Aktualitet

Po konsiderohet diskriminues lejimi i tubimeve partiake në pandemi

Published

4 years ago

January 14, 2021

Betim Gashi

Tubimet elektorale në vendet e mbyllura të partive politike dhe mosndëshkimi i këtyre subjekteve po konsiderohet diskriminues nga Këshilli për Mbrojtjen e të Drejtave dhe Lirive të Njeriut(KMDLNJ), Oda e Afarizmit të Kosovës dhe gastronomët.

Përgjatë muajve të fundit janë shqiptuar mbi 100 mijë gjoba në vlerë mbi 3 milionë euro, ndërsa asnjë nga këto nuk është për aktivitetet e partive politike të cilat nxorën Ligjin për pandeminë.

Kryetari i KMDLNJ-së, Behxhet Shala ka thënë për KosovaPress se me këto veprime të partive politike dhe inspektoratit po krijohet një veprim diskriminues duke ndëshkuar vetëm qytetarët dhe bizneset. Shala po ashtu theksoi se shumë biznese kanë falimentuar shkaku i masave anti-COVID.

“Absolut nuk duhet të krijohet një raport diskriminimi, të favorizohen politikanët, të diskriminohen qytetarët. Kemi raste që disa sektorë të ekonomisë janë pranë falimentimit apo kanë falimentuar pikërisht shkaku i masave anti-COVID. Edhe gastronomia dhe të tjerët kanë pësuar. Ka shumë raste kur hynë në ndonjë kafiteri, futen policia dhe inspeksioni, dhe kur shohin që nuk ka distancë sociale prej dy metrash, aty për aty shqiptohen dënimet e larta. Ndërkaq, kemi parë tubime nëpër të mbyllura nëpër restorante, oda ku politikanët nga afërsia e tyre thuajse vetëm sa nuk përqafohen dhe nuk ka asnjë masë ndaj tyre”, thotë ai.

Ndërsa, kryetari i Bordit të Odës së Afarizmit të Kosovës (OAK), Skënder Krasniqi thotë se fatkeqësisht masat nuk i respektuan ato parti politike të cilat nxorën Ligjin për pandeminë.

Krahas kësaj, Krasniqi thotë se këto parti që po vazhdojnë të mbajnë aktivitete në kundërshtim me ligjin nuk po ndëshkohen nga askush, e në anën tjetër kanë ngufatur ekonominë, sektorin privat dhe punëtorët.

“Ne prej fillimit të pandemisë e deri tash kemi thënë që Kosova fatkeqësisht është ndarë në dy shtresa, shtresa e skllavo-pronarëve që është pushteti dhe shtresa e skllavërisë qytetarët dhe bizneset ku vendimmarrja e tyre mund të jetë vlefshme vetëm për ne, por jo edhe për ta. Kjo ka ndodhur edhe në këtë rast, ku edhe për kundër vendimit të qeverisë për kufizimin në pesë vetë dhe tubimet për ndalimin e aktiviteteve që kemi kërkuar edhe ne si Odë e Afarzimit për protestë, por na është ndaluar për shkak të vendimit të qeverisë, ndërsa (partitë) po vazhdojnë të mbajnë aktivitete në kundërshtim me Ligjin të cilin e kanë nxjerrë vetë”, thekson Krasniqi.

Po ashtu Krasniqi theksoi se me kufizimet me orë policore, bizneset, punëtorët dhe qytetarë që pësuan mjaft nga pandemia, nuk u mbështeten financiarisht.

“Ne kemi kundërshtuar edhe vendimin për kufizimin e orës policore dhe vendimet e tjera që janë ndërmarrë vitin e kaluar, patëm kërkuar që mos të ketë orë policore të mos ketë kufizim të lëvizjes së qytetarëve, të ketë reduktim të orarit, por që për orarin e reduktuar për biznese të mbështeten financiarisht bizneset. Kjo nuk ka ndodhur, vendimet për kufizime janë marrë, ndërsa bizneset e as punëtorët që afektohen nga ky vendim nuk po përkrahen nga shteti”, deklaroi ai.

Edhe gastronomët kanë reaguar ndaj tubimeve të partive politike tash para fushatës zgjedhore dhe dënimeve të ashpra ndaj bizneseve dhe qytetarëve.

Kryetari i kësaj shoqate, Petrit Kllokoqi tha se ky është standard i dyfishtë, pasi që deri më tani mbi 5 mijë dënime janë shqiptuar për gastronomët për shkak të shkeljeve të masave anti-COVID, përfshirë edhe për numrin e njerëzve brenda lokaleve.

“Kjo çka po shohim në Kosovë ka te bëjë me standarde te dyfishta. Mbi 5 mijë dënime për gastronomët e asnjë dënim për politikanët. Dasmat e diskotekat i keni mbyll, e edhe kafiteritë po dënohen se po i lejojnë 5 persona në një tavolinë”, ka thënë Kllokoqi përmes një komunikate për media ditë më parë.

Po ashtu në formë proteste kishte reaguar edhe PSD-ja. Ndërsa, mësohet se nga nesër pritet që Qeveria në detyrë të marrë vendim për lehtësimin e masave anti-COVID.

Bota

WhatsApp thotë se dhjetëra përdorues ishin cak i softuerit izraelit të spiunimit

Published

55 minutes ago

January 31, 2025

UBTnews

Softueri i spiunimit i Izraelit, Paragon, i ka shënjëstruar dhjetëra përdorues të WhatsApp-it, përfshirë gazetarë dhe pjesëtarë të shoqërisë civile, tha të premten një zyrtar i aplikacionit të Meta-s.

Zyrtari tha për agjencinë e lajmeve Reuters se WhatsApp ia ka dërguar Paragonit një letër duke i kërkuar të ndalojë, pas përpjekjes për hakim.

WhatsApp tha në një komunikatë se kompania “do të vazhdojë ta mbrojë mundësinë e njerëzve për të komunikuar privatisht”.

Paragoni nuk ka dashur të komentojë.

Zyrtari i WhatsApp-it shtoi për Reuters se Paragoni u përpoq t’i hakojë rreth 90 përdorues të kësaj platforme.

Ai nuk tregoi se kush në veçanti ishte në shënjestër dhe nga cilat vende vinin, duke theksuar se cak i hakimit ishte një numër i paspecifikuar i figurave mediatike dhe shoqërisë civile.

Zyrtari theksoi se WhatsApp e “ndali” tentimin për hakimin e përdoruesve të tij.

Ai nuk pranoi të komentojë se si WhatsApp e kuptoi se Paragoni është përgjegjës për hakimin. Ai shtoi se institucionet ligjore dhe “partnerët industrialë” janë njoftuar për hakimin, pa dhënë më shumë hollësi./REL/

Bota

Spanja, e fundit në listën e NATO-s për shpenzimet e mbrojtjes

Published

1 hour ago

January 31, 2025

UBTNews

Gjatë vizitës në Spanjë këtë javë, sekretari i përgjithshëm i NATO-s u bëri thirrje vendeve anëtare të rrisin shpenzimet për ushtrinë përballë kërcënimit nga Rusia. Spanja shpenzon më pak për mbrojtjen në krahasim me madhësinë e ekonomisë së saj. Presidenti amerikan Donald Trump, ka veçuar Madridin për dështimin për të përmbushur objektivin e NATO-s për shpenzimet e mbrojtjes.

Spanja është ekonomia e katërt më e madhe e eurozonës. Megjithatë, vendi është në fund të listës kur bëhet fjalë për shpenzimet e mbrojtjes në aleancën 32 anëtarëshe të NATO-s, shkruan VOA.

Madridi shpenzoi rreth 21.3 miliardë dollarë për mbrojtjen vitin e kaluar, apo 1.28% të Prodhimit të saj të Brendshëm Bruto, pavarësisht zotimit që NATO ka bërë më 2014 për të shpenzuar të paktën 2%.

Sekretari i Përgjithshëm i NATO-s Mark Rutte vizitoi Spanjën dhe Portugalinë këtë javë dhe bëri këtë paralajmërim.

“Qëllimi për të shpenzuar 2% të Prodhimit të Brendshëm Bruto për mbrojtjen, i miratuar para një dekade, nuk do të mjaftojë për të përballuar sfidat e së nesërmes. Kërcënimi nga Rusia mund të duket i largët, por ju siguroj se nuk është”, tha zoti Rutte.

Kryeministri i Spanjës Pedro Sanchez tha se Spanja është e përkushtuar për të arritur objektivin prej 2% deri në vitin 2029. Ai tha se shpenzimet për mbrojtjen ishin rritur me 70% gjatë dekadës së fundit. Kryeministri Sanchez shtoi se Madridi, në përgjithësi, ishte kontribuesi i 10-të më i madh i NATO-s.

Trupat spanjolle gjithashtu ndihmojnë për të trajnuar forcat ukrainase ndërsa Kievi lufton kundër agresionit rus.

Megjithatë, kjo nuk ka gjasa t’i duket e mjaftueshme kontribuesit më të madh të NATO-s, Shteteve të Bashkuara, që më 2024 shpenzuan 3.38 për qind të Prodhimit të Brendshëm Bruto për mbrojtjen.

Presidenti Trump e cilësoi kontributin e Spanjës në NATO si “shumë të ulët”. Ai gjithashtu kërkoi rritjen e objektivit të shpenzimeve për mbrojtjen.

“Do t’u kërkoj të gjitha vendeve të NATO-s që të rrisin shpenzimet e mbrojtjes në 5% të Prodhimit të Brendshëm Bruto, një qëllim që duhej të ishte arritur vite më parë”, tha Presidenti Trump.

Ai është ankuar prej kohësh se aleatët evropianë po përfitojnë nga Shtetet e Bashkuara dhe thotë se ata duhet të marrin një pjesë të barrës së shpenzimeve për mbrojtjen.

Megjithatë, analisti Pere Ortega thotë se objektivi prej 5% është jorealist për Spanjën.

“Kjo do të thotë se Spanja të shpenzojë pothuajse 65 miliardë euro. Ne nuk e kemi atë kapacitet ekonomik. Për të arritur këtë shpenzim në mbrojtje, në një farë mënyre, do të duhej të sakrifikohej sfera e sigurimeve shoqërore. Spanjollët do ta ndëshkonin këtë me votën e tyre gjatë zgjedhjeve”, thotë zoti Ortega nga Qendra ‘Delàs’ për Studime të Paqes, me bazë në Madrid.

Presidenti Trump, megjithatë ka gjetur mbështetjeje nga Lituania e cila njoftoi këtë muaj se do të rrisë shpenzimet e mbrojtjes në 5 ose 6% të PBB-së, deri në vitin 2026.

“Ne po përshtatemi me planin e mbrojtjes të NATO-s, që është me rëndësi jetësore për rajonin tonë”, tha ministrja lituaneze e mbrojtjes, Dovilė Šakalienė.

Në takimin e tij të parë të NATO-s si President i Shteteve të Bashkuara, në vitin 2017, Donald Trump qortoi aleatët se kanë dështuar të shpenzojnë mjaftueshëm për mbrojtjen.

Aleatët evropianë, veçanërisht Spanja, janë të përgatitur të përballen me kërkesa të mëtejshme në takimin e ardhshëm të udhëheqësve të vendeve anëtare, që do të mbahet në Hagë, në muajin qershor.

Bota

Bethoven, Da Vinçi dhe Kyri’ në kartëmonedhat e reja euro

Published

1 hour ago

January 31, 2025

UBT NEWS

Banka Qendrore Evropiane (BQE) ka zbuluar një përzgjedhje paraprake të dizajneve për kartëmonedhat e reja të euros që pritet të lëshohen në të ardhmen, duke përfshirë figura të njohura të historisë dhe kulturës evropiane, si Ludvig van Beethoven, Mari Kyri dhe Leonardo da Vinci.

Sipas presidentes së BQE-së, Christine Lagarde, këto kartëmonedha do të reflektojnë identitetin e përbashkët evropian dhe diversitetin që e bën Evropën të fortë. “Kultura evropiane feston hapësirat e përbashkëta kulturore që kanë formësuar identitetin evropian gjatë shekujve dhe ‘personalitetet ikonike evropiane'”, tha Lagarde gjatë një njoftimi nga selia e BQE-së në Frankfurt.

Dizajni i kartëmonedhave përfshin figura të njohura si laureatja e çmimit Nobel, Mari Kyri, kompozitori gjerman Ludvig van Beethoven dhe artisti italian Leonardo da Vinci, duke nderuar kështu trashëgiminë kulturore të kontinentit. Në anën e pasme të kartëmonedhave, mund të shfaqen elemente që lidhen me kulturën dhe arsimin, si një bibliotekë ose universitet.

Një tjetër grup dizajnesh do të përqendrohet te “Lumenjtë dhe zogjtë”, duke simbolizuar qëndrueshmërinë dhe diversitetin e ekosistemeve natyrore të Evropës. Ky dizajn mund të përfshijë imazhe të institucioneve evropiane, si Parlamenti Evropian ose Komisioni Evropian, si një mënyrë për të theksuar angazhimin e Evropës për ruajtjen e mjedisit dhe pasurimin e trashëgimisë kulturore.

“Ne jemi të emocionuar të prezantojmë këto motive që pasqyrojnë angazhimin tonë ndaj Evropës dhe festojnë trashëgiminë e saj kulturore dhe natyrore”, tha Lagarde, duke theksuar rëndësinë e këtyre kartëmonedhave si një simbol të unitetit dhe identitetit evropian./UBTNews/

Bota

Inflacioni francez mbetet i qëndrueshëm, BQE ul normat e interesit

Published

2 hours ago

January 31, 2025

UBT NEWS

Inflacioni në Francë është rritur me një ritëm të qëndrueshëm në fillim të vitit, duke qëndruar në 1.8% në janar, i njëjti nivel si në dhjetor. Kjo shifër mbetet nën objektivin 2% të Bankës Qendrore Evropiane (BQE), duke ofruar mundësinë që BQE të ulë normat e interesit në muajt në vijim për të stimuluar më tej rritjen ekonomike.

Këto të dhëna janë publikuar vetëm një ditë pas vendimit të BQE-së për të ulur normën bazë të interesit me 25 pikë bazë, një masë që synon lehtësimin e kushteve të financimit dhe nxitjen e aktivitetit ekonomik në eurozonë.

Presidentja e BQE-së, Christine Lagarde, komentoi këtë ulje të normës, duke theksuar se inflacioni po ngadalësohet në përputhje me pritshmëritë, por paralajmëroi se ekonomia evropiane ende përballet me disa sfida, përfshirë besimin e dobët të konsumatorëve dhe pasigurinë që shkaktojnë tarifat e mundshme nga administrata amerikane. Ajo shtoi se, megjithë ngadalësimin e inflacionit, rritja ekonomike mbetet e ngadaltë.

Indeksi i çmimeve të konsumit (CPI) i Francës u rrit me 1.4% në janar krahasuar me të njëjtën periudhë të vitit të kaluar, pas një rritjeje prej 1.3% në dhjetor. Në baza mujore, CPI ra me 0.1%, kryesisht për shkak të uljes së çmimeve të veshjeve dimërore, këpucëve dhe transportit. Nga ana tjetër, çmimet e energjisë, ushqimeve, duhanit dhe produkteve të sigurimit kanë pasur rritje.

Edhe pse të dhënat e inflacionit janë relativisht të qëndrueshme, qeveria franceze po përballet me një krizë buxhetore. Për të adresuar deficitin e lartë, kryeministri François Bayrou ka propozuar një projekt-ligj të ri për financat publike. Megjithatë, ai përballet me sfida politike, pasi Asambleja Kombëtare do të zhvillojë një votë mosbesimi ndaj tij javën e ardhshme.

Tregjet dhe analistët do të kenë sytë te Gjermania, e cila pritet të publikojë të dhënat e saj të inflacionit më vonë këtë javë, që mund të ofrojnë një pamje më të gjerë të situatës ekonomike në eurozonë./UBTNews/