Lajmet

​Përplasen Gërvalla e Tahiri, ministren e quan përfaqësuese të Serbisë në Kosovë

Publikuar

Ministrja e Punëve të Jashtme dhe Diasporës, Donika Gërvalla, duke iu drejtuar deputetëve të Partisë Demokratike të Kosovës, tha se korrupsioni nuk është narrativë e Serbisë, por është realitet i hidhur i qytetarëve të Kosovës. Ajo të njëjtit i ka bërë përgjegjës edhe për krijimin e Gjykatës Speciale, e kjo ka ngjallur reagimin e shefit të Grupit Parlamentar të PDK-së Abelard Tahiri, i cili e ka quajtur ministren Gërvalla përfaqësuese të Serbisë në Kosovë.

Gërvalla tha se Qeveria Kurti është zgjedhur me mandatin për ta luftuar krimin dhe korrupsionin që është instaluar nga Partia Demokratike e Kosovës.

“Po ju drejtohem juve deputetëve të PDK-së, se korrupsioni nuk është shpikje jona, korrupsioni nuk është narrativë e Serbisë, por është realitet i hidhur i qytetarëve të Republikës së Kosovës dhe ky realitet i hidhur ka kërkuar zgjidhjen e tij në rezultatin e 14 shkurtit. Qeveria është zgjedhur me mandatin për të luftuar krimin dhe korrupsionin e instaluar më së shumti nga ju në këtë vend, edhe nga të tjerët, por më së shumti nga ju Partia Demokratike e Kosovës. Kjo është narrativa juaj, ju jeni përgjegjës për instalimin e korrupsionit dhe është narrativa jonë luftimi i këtij korrupsioni dhe sigurimi i barazisë, i vendeve të punës për qytetarët e Republikës së Kosovës. E vërteta i bën mirë gjithkujt, e vërteta është e domosdoshme për të dalë nga gropa në të cilën keni hyrë”, tha ajo.

Në vazhdim të fjalës së saj, ministrja Gërvalla tha se Gjykata Speciale nuk është instaluar nga Serbia, por nga vetë deputetët e PDK-së, teksa shtoi se janë pikërisht ata përgjegjësit që prijësit e tyre ndodhen sot në Hagë.

“Gjykata Speciale nuk është e instaluar nga Serbia, Gjykata Speciale në Hagë është e instaluar nga ju. Pse është e instaluar nga ju, sepse ju jo vetëm që nuk e keni luftuar, nuk keni ndërmarrë asgjë për dënimin dhe gjykimin e krimeve të pasluftës, jo vetëm që asgjë nuk keni ndërmarrë për gjykimin dhe dënimin e krimeve pas luftës, por ju jeni munduar kështu që ta evitoni gjykimin e krimeve në Kosovë. Ju jeni ata që në këtë formë e keni bërë të mundur Gjykatën Speciale, të mos flasim për pjesën e asaj që ju e keni votuar Gjykatën Speciale, Gjykata Speciale nuk ka pikuar nga qielli, mos ju ka kapur amnezia dhe të mos bëhemi qesharak, ju e dini shumë mirë se si është krijuar Gjykata Speciale. Ky koalicion qeveritar nuk e ka krijuar Gjykatën Speciale, atë e keni krijuar ju dhe tani jeni në nevojë për të sqaruar pse e keni bërë një gjë të tillë dhe prandaj merreni çdo ditë me sajime, me gënjeshtra edhe absolutisht, ju siguroj që nuk është kjo forma të cilën ju do të mund t’ia shpjegoni veprimet tuaja të së kaluarës përkrahësve tuaj, duhet të gjeni një zgjidhje tjetër. Ju, pikërisht ju jeni përgjegjës që prijësit tuaj ndodhen në Hagë”, tha ajo.

Ndaj deklaratave të ministres Gërvalla ka reaguar shefi i Grupit Parlamentar të PDK-së Abelard Tahiri, i cili e ka quajtur përfaqësuese të Serbisë në Kosovë.

“E nderuara ministre, sot na e dëshmove që Republika e Serbisë nuk ka nevojë më të merret me Republikën e Kosovës, sepse të ka ty përfaqësuese në Kosovë. Ti je turpi i diplomacisë së Kosovës. Të dilet sot dhe të thuhet që nuk është bërë prej Serbisë Gjykata Speciale është turpi më i madh për qytetarët e Republikës së Kosovës. Prandaj, sot dil dhe kërkoju falje qytetarëve të Republikës së Kosovës, sepse ajo Gjykatë është bërë me faktet e rrejshme të ofruara nga qeveria serbe, me fakte të sajuara nga qeveria serbe, dil kërkoju falje qytetarëve dhe atyre që janë atje të akuzuar, sepse kjo gjykatë është bërë prej njerëzve sikur ju, me dëshmi sikur ju. Prandaj, sot nuk ka nevojë Daçiqi të flasë, sepse është Donika Schwarz, se atë mbiemrin tjetër po më vjen marre me ta përmend me dal me fol për krimet që janë bërë në Kosovë”, tha ai.

Ai ka kërkuar nga kryeministri Kurti të shkarkojë ministren Gërvalla, pasi ajo sipas tij nuk e përfaqëson qytetarin e Kosovës.

“Pra, ti sot në vend që me i përmend viktimat, civilët, dhunimin që ka ndodhur në Kosovë, por ti del fletë me sajime të Beogradit, pra ti sot më shumë ngjason me përfaqësuesen e Republikës së Serbisë në Kosovë sesa me ministren e Punëve të Jashtme. Vërtet ndihem keq, nuk më intereson a jam pozitë apo opozitë, por si qytetarë i Kosovës me dëgjua një fjalë të tillë prej ministres së Punëve të Jashtme është mjerim për këtë vend, është turp i madh për këtë vend. Prandaj, dil kërkoju falje, dil kërko që gjenocidi serb duhet të dënohet. Kjo është turp për ty, është marre, ti je përfaqësuese e Serbisë në Kosovë, ti nuk më përfaqëson mua, ti je turpi më i madh, sot nëse do të kishte një kryeministër të përgjegjshëm sot do të duhej me të shkarkua, asnjë edhe minutë ti nuk mundesh me qenë ministre e Punëve të Jashtme, ky është turpi më i madh që ndodh në këtë vend. Prandaj, i bëjmë thirrje kryeministrit që ti nuk mund të qëndrosh në këtë sallë, ti duhet me ecë, ti nuk e përfaqëson qytetarin e Kosovës”, tha ai. 

Lajmet

Vazhdon rënia e numrit të nxënësve shqiptarë në Luginën e Preshevës, është përgjysmuar për dhjetë vjet

Publikuar

nga

Nga viti 2010 e deri më sot, nëpër shkollat fillore shqipe në Luginën e Preshevës numri i nxënësve shqiptarë është përgjysmuar. Nga 7.246 sa kanë qenë në vitin 2010/11, dhjetë vjet pas janë vetëm 3.982 nxënës.

Shpërnguljet e mëdha të popullsisë nga vendet rurale në ato urbane, emigrimi dhe rënia e natalitetit, kanë ndikuar që shumë shkolla fillore shqipe në Luginën e Preshevës të vijojnë mësimin me pak nxënës, madje disa prej tyre me vetëm një apo dy.

Në tri komunat e banuara me shumicë shqiptare në jug të Serbisë: në Preshevë, Bujanoc e Medvegjë, numri i filloristëve shqiptarë është përgjysmuar për dhjetë vite me radhë. Nga të dhënat e siguruara nga drejtoritë e këtyre shkollave vërehet një rënie enorme nëpër vendbanimet rurale, sidomos ato në pjesën e Malësisë së Bujanocit e Karadakut të Preshevës.

Shkolla Fillore “Migjeni” në Muhoc të Bujanocit në vitin shkollor 2010/11, ka pasur gjithsej 246 nxënës, ndërsa në këtë vit shkollor, gjegjësisht më 2020/21 ka vetëm 90.

Një rënie e tillë vërehet edhe në fshatin më të madh të Bujanocit, në Tërnoc. Shkolla Fillore “Muharrem Kadriu”, në vitin shkollor 2010/11 ka pasur gjithsej 1.150 nxënës, kurse tani ka vetëm 467.

Në shkollën “Ali Bektashi” në fshatin Nesalcë, në vitin shkollor 2010/11, kanë qenë gjithsej 441 nxënës, kurse në vitin 2020/21 janë 177.

Në Shkollën Fillore “Desanka Maksimoviq” në fshatin Bilaç, në vitin 2010/11 kanë qenë 529 nxënës, kurse në vitin 2020/21 janë 235.

Në shkollën Fillore “Sami Frashëri” në fshatin Lluçan, në vitin 2010/11 kanë qenë 462 nxënës, kurse në vitin 2020/21 janë 214.

Në Shkollën Fillore “Naim Frashëri” në qytet në vitin shkollor 2010/11 kanë qenë 437 nxënës, kurse në vitin 2020/21 janë 401.

Në shkollat fillore në Komunën e Preshevës, gjithashtu vërehet një rënie e madhe e nxënësve, sidomos nëpër fshatra.

Në Shkollën Fillore “Dituria” në fshatin Corroticë, në vitin shkollor 2010/11, kanë qenë 402 nxënës, në vitin 2020/21 janë 198.

Në Shkollën Fillore ”9 Maji” në fshatin Leran, në vitin 2010/11 kanë qenë 551 nxënës, kurse në vitin 2020/21 janë 220.

Në Shkollën Fillore “Selami Hallaçi” e fshatit Rahovicë, në vitin 2010/11 kanë qenë 534 nxënës, kurse në vitin 2020/21 janë 295.

Në Shkollën Fillore “Migjeni” e fshatit Caravajkë në vitin 2010/11 kanë qenë 83 nxënës, kurse në vitin 2020/21 janë 38.

Në Shkollën Fillore “Zenel Hajdini” e fshatit Raincë në vitin shkollor 2010/11 kanë qenë 289 nxënës, kurse në vitin 2020/21 janë 254.

Në Shkollën Fillore “Ibrahim Kelmendi” në qytet në vitin 2010/11 kanë qenë 2.035 nxënës, kurse në vitin 2020/21 janë 1.347.

Shkolla Fillore “Abdulla Krashnica” e fshatit Miratoc kanë refuzuar t’i japin të dhënat pa ndonjë arsye.

Gjithashtu, edhe në shkollat fillore në Medvegjë ka një rënie të dukshme për dhjetë vjet. Megjithatë, atje vetëm një shkollë administrohet nga shqiptarët, vetëm Shkolla Fillore “ZenelHajdini” në fshatin Tupallë.

Nga të dhënat e kësaj shkolle, në vitin 2010/11 kanë qenë të regjistruar 21 nxënës, kurse në vitin 2020/21 janë vetëm 13. Sipas zyrës së Këshillit Kombëtar Shqiptar në këtë komunë, në vitin 2010/11 kanë qenë afërsisht 86 nxënës, kurse në vitin 2020/21 janë vetëm 46.

Shumica e drejtorëve nga këto shkolla kanë thënë që zvogëlimi i numrit të nxënësve ka ndikuar për shkak të rënies së natalitetit, por edhe gjendjes së vështirë ekonomike, e që për pasojë i detyrojnë familjet e shumta të ikin drejtë vendeve të perëndimit.

Drejtori i Shkollës “Zenel Hajdini” në fshatin Raincë të Preshevës, Shukri Ymeri u ka bërë thirrje autoriteteve komunale të bëjnë më shumë investime nëpër shkolla, gjë e cila mungon sidomos nëpër fshatrat malorë të këtyre komunave.

“Politika apo pushteti lokal i Preshevës duhet të bëj më shumë dhe urgjent një politikë shpresëdhënëse për këtë pakicë shqiptare që ka mbetë ende këtu”, ka thënë Ymeri, e që njëjtë sikurse ai mendojnë edhe shumica e drejtorëve të tjerë, të cilët apelojnë për kushte më të mira.

Kreu i Këshillit Kombëtar Shqiptar në Serbi, Ragmi Mustafi ka thënë se ky institucion ka për objektiv arsimin cilësor dhe se janë të përkushtuar në zgjidhjen e problemit të përdorimit të librave shqip, gjë e cila iu është mohuar nxënësve shqiptarë në këtë rajon për gati dy dekada.

“Këshilli Kombëtar Shqiptar që në fillim ka përcaktuar si objektiv arsimin cilësor për shkollat me mësim në gjuhën shqipe. Kuptohet se për të pasur arsim cilësor nënkupton arritja e standardeve të nevojshme për realizim. Andaj, jemi shumë të fokusuar në sigurimin e lejeve të përdorimit të teksteve mësimore nga Republika e Shqipërisë dhe vitin e kaluar patëm një sukses të jashtëzakonshëm edhe pse ende nuk janë siguruar të gjitha librat shkollor për shkollat fillore e me standardet e reja të arsimit nuk kemi asnjë̈ tekst mësimore për shkollat e mesme. Sigurisht, rënia e numrit të nxënësve ka rrezikuar seriozisht funksionimin e procesit edukativo-arsimore në radhë të pare në shkollat që funksionojnë̈ në vendbanimet rurale”, ka thënë Mustafi.

Vitin e kaluar KKSH ka bërë shpërndarjen e librave shqip nga Shqipëria për nxënësit shqiptarë të Luginës së Preshevës, e cila është bërë e mundur përmes një marrëveshje midis Ministrisë së Arsimit në Shqipëri dhe asaj në Serbi.

Mustafi ka potencuar se shumica e shkollave fillore, sidomos ato nëpër vendbanimet rurale nuk kanë kushte esenciale për të vijuar procesin arsimor.

“Në kushte optimale edhe pse kemi gati gjysmën e kuadrit arsimore me kontrata me afat të caktuar çfarë shprehet në pasigurinë e mësimdhënësve, aq më tepër kur emërimin dhe shkarkimin e bën Ministri i Arsimit nga Beogradi.

Ndërkohë që kemi shkolla që nuk kanë qasje fare në internet e rrjet të telefonisë. Disa kanë mungesë edhe të ujit. Megjithatë, nxënësit shqiptarë mbeten të hendikepuar me mungesën e teksteve mësimore si e drejtë themelore tek të drejtat e fëmijëve për arsim të dinjitetshëm”, shprehet Mustafi.

Ai thotë se janë të angazhuar që bashkë me Republikën e Kosovës dhe atë të Shqipërisë të sigurojnë progres në të ardhmen.

Për të zhvilluar procesin e arsimit cilësor, duhet të ketë kushte esenciale. E për të pasur kushte esenciale, duhet investime. Një gjë e tillë shpesh anashkalohet nga pushtetet lokale në këto tri vendbanime shqiptare në Serbi, e jo vetëm, investime nuk ka as nga ana shtetërore.

(Hulumtimi është përgatitur nga Driton Hyseni dhe Lirigzona Nuredini, studentë të drejtimit “Media dhe Komunikim” në UBT).

Vazhdo të lexosh

Kuriozitete

Legjenda e kalasë së Gjirokastrës

Publikuar

nga

Legjendat e kalave të Shqipërisë ndonjëherë janë shumë të ngjashme pasi në bazë të tyre kanë një sakrificë të madhe dhe nuk kishte si të ndodhte ndryshe, me të njëjtën bazë do ta kishte edhe ajo e Argjiros prej nga mendohet se ka marrë edhe emrin kalaja po edhe qyteti, po kjo mbetet hipotezë.

Kështjella e qytetit të Gjirokastrës, njihet dhe me emrin kalaja e Argjirosë. Princesha Argjiro mendohet të ketë qenë sundimtarja e qytetit të Gjirokastrës gjatë shekullit XIV. Ajo ishte e martuar me princin e këtij qyteti.

Princesha Argjiro luftoi me turqit kur ata rrethuan kalanë e Gjirokastrës. Megjithatë, turqit e morën Gjirokastrën me tradhti. Prandaj princesha Argjiro për të mos rënë e gjallë në duart e turqve, u hodh nga kulla më e lartë e kalasë bashkë me djalin e saj foshnje.

Ajo ra drejt tek një shkëmb dhe u copëtua, por djali i saj mbeti gjallë, dhe për ta bekuar filloi të pikojë qumësht. Sipas legjendës thuhet se foshnja mbeti gjallë nga guri që pikonte qumësht.

Legjenda thotë që emri i Gjirokastrës vjen pikërisht nga emri i princeshës./Bordo.al

Vazhdo të lexosh

Lajmet

UEFA u ka kërkuar lojtarëve të Euro 2020 të mos heqin pijet e sponzorëve

Publikuar

nga

Cristiano Ronaldo filloi trendin të hënën në një konferencë për shtyp para-lojës duke larguar dy shishe të Coca-Cola-s.

Cristiano Ronaldo duke larguar shishet sponzorizuese të Cola-Cola-s.

Duke reaguar ndaj kësaj, UEFA u ka kërkuar lojtarëve në 24 skuadrat të ndalojnë heqjen e pijeve sponsorizuese të vendosura strategjikisht nga platformat në konferencat për shtyp.

Ronaldo, Paul Pogba dhe Manuel Locatelli hoqën shishet e sponzorëve nga pamja e kamerave kur zënë vendet e tyre në konferencat për media këtë javë.

Drejtori i turneut të Euro 2020, Martin Kallen tha se UEFA ka “komunikuar me ekipet në lidhje me këtë çështje”.

Manuel Locatelli duke larguar shishet sponzorizuese të Coca-Cola-s.

“Sepse është e rëndësishme pasiqë të ardhurat e sponsorëve janë të rëndësishme për turneun dhe futbollin evropian”, tha ai.

Pogba, i cili është musliman dhe nuk pi alkool, kundërshtoi shishen e gjelbër të sponsorit zyrtar të birrës Euro 2020 Heineken.

Pogba ishte në dhomën e intervistës pasi u emërua lojtari më i mirë në fitoren 1-0 të Francës ndaj Gjermanisë të martën. Çmimet e lojtarëve sponsorizohen nga kompania e birrës.

Një rënie në çmimin e aksioneve të Coca-Cola këtë javë iu atribua veprimit të Ronaldos fillimisht, por ende nuk ka prova se ishte ndikimi i tij në pyetje.

Kjo e bëri UEFA-në të iu kujtojë lojëtarëve se duhet të respektojnë sponsorët dhe kontributet që ata japin në futbollin evropian.

Menaxherët e medias në secilin nga 11 stadiumet në të gjithë Evropën duhet të ndihmojnë gjithashtu në heqjen e shisheve të birrës përpara mbërritjes së ndonjë lojtari musliman.

Coca-Cola dhe Heineken janë ndër 12 sponsorët e nivelit më të lartë për Euro 2020 që kontribuojnë në të ardhurat totale të turneut të UEFA-s prej gati 2 miliardë eurosh (2.4 miliardë dollarë).

Lojtarët gjithashtu indirekt marrin para nga të ardhurat komerciale të Euro 2020 përmes federatave dhe klubeve të tyre kombëtare.
(Përktheu dhe përshtati UBTNews)

Vazhdo të lexosh

Film & TV

Scarlett Johansson kritikon ‘seksualizimin e tepërtë’ të karakterit Black Widow

Publikuar

nga

Scarlett Johansson ka kritikuar “seksualizimin e tepërtë” të karakterit të saj Black Widow në filmin Marvel Iron Man 2.

Black Widow, apo Natasha Romanoff, u shfaq për herë të parë në filmin e vitit 2010.

Scarlett Johansson në rolin e Black Widow.

“Ju shihni më herët në Iron Man 2 dhe edhe pse ishte me të vërtetë argëtuese dhe kalova shumë momente të shkëlqyera, personazhi është shumë i seksualizuar, më kuptoni?” tha aktorja.

“Me të vërtetë flitej sikur ajo të jetë një diçka, si një pasuri ose një send apo çfarëdo tjetër”.

Black Widow është bërë një figurë e rëndësishme në Marvel Cinematic Universe, duke u shfaqur në shtatë filma dhe do të interpretojë filmin e saj të pavarur muajin tjetër.

“Dhe Toni [luajtur nga Robert Downey Jr.] madje i referohet asaj si diçka e tillë në një moment. Po, në një moment ai e quan atë një copë mishi dhe ndoshta në atë kohë në të vërtetë shihej si një kompliment. E kuptoni?”

Ajo shtoi se vetë-vlera e saj ishte “ndoshta e matur në krahasim me atë lloj komenti” – në lidhje me pamjen e saj fizike – në atë kohë, por që ajo ishte rritur për të kuptuar më mirë vlerësimin e vetës së saj që kur u bë nënë.

“Unë jam duke e pranuar më shumë vetveten, mendoj. E gjithë kjo ka të bëjë me atë largim nga lloji i shumë-seksualizimit të këtij karakteri,” tha ajo.

36-vjeçarja gjithashtu vuri në dukje se si gjërat “po ndryshonin tani” për aktoret e reja femra në vazhdën e lëvizjes #MeToo.

“Tani njerëzit, vajzat e reja, po marrin një mesazh shumë më pozitiv, por ka qenë e pabesueshme të jesh pjesë e asaj zhvendosjeje dhe të jesh në gjendje të dalësh në anën tjetër dhe të jesh pjesë e asaj historie të vjetër, por edhe përparim,” ajo shtuar.

“Evoluoni. Mendoj se është shumë bukur” tha Johansson.

Filmi i ri i ‘Black Widow’ nuk është një histori e origjinës, por vjen para ngjarjeve të dy filmave të fundit Avengers, Wars of Infinity dhe Endgame./UBTNews

Vazhdo të lexosh

Të kërkuara