Lajmet

​Osmani: BE po e toleron refuzimin e Serbisë

Sipas saj, aneksi i marrëveshjes ka shumë paqartësi.

Published

on

Presidentja e vendit, Vjosa Osmani ka deklaruar se aneksi i marrëveshjes ka shumë paqartësi dhe se para delegacionit të Kosovës janë paraqitur versione të tmerrshme. Ajo ka theksuar se i gjithë presioni ndërkombëtar duhet të jetë mbi Serbinë, meqë po rrezikon dakordimin në Ohër. Madje, siç tha ajo, Bashkimi Evropian e ka toleruar refuzimin e vazhdueshëm të Serbisë dhe që po rrezikohet edhe procesi i dialogut.

Kështu ka deklaruar ajo pas vizitës në Klinikën e Gjinekologjisë në Qendrën Klinike Universitare të Kosovës (QKUK) bashkë ministrin e Shëndetësisë Arben Vitia, ku po ashtu tha se Borrell nuk mund të pajtohet në emër të Vuçiqit.

Ajo para gazetarëve tha se Kosova nuk mund të marrë obligime të njëanshme, meqë është marrëveshje dypalëshe dhe ndërkombëtare. Po ashtu, Osmani theksoi se kanë pasur disa takime me kryeministrin Kurti para dhe pas udhëtimit nga Brukseli dhe pas dakordimit në Ohër.

“Serbia akoma pa u mbushur 24 orë nga dakordimi në Ohër, njëlloj siç ndodhi edhe në shkurt e përsëriti edhe në mars. Pra tregoi që premtimet që i ka dhënë në kuadër të dialogut, nuk kanë asnjë vlerë për të as politike e as juridike dhe rrjedhimisht njoftoi edhe komunitetin ndërkombëtar që ai nuk do të zbatojë obligimet të cilat qartë dalin nga marrëveshja bazë dhe nga aneksi. Tani pavarësisht që u dakordua në Ohër tani në mars, më lejoni të ritheksoj që teksti i marrëveshjes bazë mbetet si i tillë dhe nuk ndryshohet. Rrjedhimisht, akoma neni 4 i asaj marrëveshje, i cili e obligon Serbinë që të mos kundërshtojë anëtarësimin e Republikës se Kosovës në asnjë organizatë ndërkombëtare, pa dallim, pa përjashtim, mbetet në fuqi”, ka thënë ajo.

Sa i përket nenit 7 dhe 10 të marrëveshjes tha se në praktikë kanë një dallim, meqë e para ka të bëjë me të drejtat e serbëve, ndërkaq tjetra me të gjitha marrëveshjet që janë nënshkruar deri më tani në Bruksel.

“Tek neni 7 ajo që quhet ‘vetëmenaxhim’ nga komuniteti ndërkombëtar është interpretuar si zbatim i obligimeve që Kosova ka marrë në vitin 2013. Kjo për mua si presidente e Republikës së Kosovës nënkupton respektim të plotë të vendimit të Gjykatës Kushtetuese, ashtu siç kam thënë nga viti 2015 e tutje. Bashkimi i komunave apo i qytetarëve në asociacione është e drejtë që tashmë Kosova e njeh me kushtetutën e saj, e ka njohur me pakon e Atissaarit, e njeh me Ligjin për Vetëqeverisjen Lokale dhe njihet edhe përmes instrumenteve të Këshillit të Evropës të cilat drejtpërsëdrejti janë të aplikueshme në Kosovë. Nuk ka diçka të re, përveç atyre që tashmë janë në legjislacionin e aplikueshëm në Kosovë. Por, ajo mund të realizohet vetëm në përputhje të plotë me vendimin e Gjykatës Kushtetuese të vitit 2015”, ka thënë presidentja e vendit.

Pas vizitës në Klinikën e Gjinekologjisë, kryetarja e shtetit tha se Serbia po rrezikon dakordimin në Ohër e Bruksel.

“Neni 2 e neni 1 të cilat përcaktojnë parimet të së drejtës ndërkombëtare, të cilat përfshihen edhe vet në Kartën e Kombeve të Bashkuara që detyrojnë Serbinë ta njeh dhe ta respektojë integritetin territorial të Kosovës, që të dyja palët të trajtohen të barabarta, që të respektohen edhe simbolet kombëtare të njëra tjetrës, simbolet shtetërore, të respektohen parimet e tjera që janë të përfshira edhe në nenin 2 të Kartës së Kombeve të Bashkuara, ato mbesin në fuqi. Por në momentin kur Serbia del dhe tregon që nuk do të zbatojë asnjërën nga këto, duke kërkuar edhe vulosjen nga Kuvendi i Serbisë që të mos zbatojë, ata për të cilën është dakordësuar vet në Ohër por edhe në Bruksel, e rrezikon në esencë këtë dakordim, apo këtë marrëveshje në kuadër të Traktatit të Vjenës”, ka shtuar ajo.

Më tej, presidentja Osmani u shpreh se presioni duhet të jetë mbi Serbinë që të respektojë obligimet që ka ndërmarrë. Sipas saj, traktati i Vjenës kërkon dakordimin e thënë nga të dyja palët, për çka tha se Borrel nuk mund të pajtohet në emër të Vuçiqit.

“Nuk mundet Borrelli të pajtohet në emër të Vuçiqit, kur Vuçiqi del qartë dhe thotë se nuk po pajtohet me së paku gjysmën e neneve të kësaj marrëveshje. Pra, kriteri bazë i Konventës së Vjenës, i cili është pajtimi, po mungon në këtë rast nga ana e Serbisë. I gjithë presioni, i gjithë angazhimi i komunitetit ndërkombëtar duhet të jetë pikërisht tek Vuçiqi, që ato për të cilat ai është dakordësuar, që në esencë përbëjnë njohje de-facto të Republikës së Kosovës, sepse kur ja njeh dikujt sovranitetin, kur e njeh si të barabartë, integritetin territorial, këto janë elementet kryesore të shtetësisë. E vetmja që mungon është një letër njohjeje të cilën nuk ende nuk e ka nënshkruar. Por, përderisa Vuçiqi refuzon t’i zbatojë këto për të cilat në fakt ka dhënë dakordësim në takim të mbyllur, por publikisht thotë që nuk do t’i zbatojë, atëherë kjo vërtetë rrezikon gjithçka. Shpresoj shumë që do të ketë penalizim të qartë nga komuniteti ndërkombëtar për Serbinë”, ka deklaruar Osmani.

Ajo shtoi se aneksi i marrëveshjes shumë gjëra ka lënë të pa qartësuara dhe nga Kurti është informuar për “versionet e tmerrshme”.

“Jemi informuar në detaje, jo vetëm për dokumentet, versionet e ndryshme që kanë qenë para kryeministrit dhe delegacionit të Kosovës, të cilat duhet ta them këtu që janë versione të tmerrshme, të cilat Republika e Kosovës është shumë mirë që nuk i ka pranuar, pavarësisht presioneve jashtëzakonisht të padrejta të cilat e kanë trajtuar Kosovën në mënyrë shumë të pabarabartë në raport me palën tjetër kur vërtetë janë propozuar gjëra të tilla. Të cilat nganjëherë për mua si presidente është vështirë të besoj që dikush nga komuniteti ndërkombëtar vërtetë e merr një iniciativë të tillë që të propozojë gjëra të tilla që e vendos vetëm njërën palë në pozitë kaq të pabarabartë. Por është arritur që në fakt të vije deri tek në një aneks, që për fat të keq shumë gjëra ka lënë të paqartësuara. Sepse aneksi është dashur që të paraqes në detaje se si do të zbatohen edhe pikat e tjera, cilat do të jenë penalizimet pastaj për moszbatim. Por, BE e ka toleruar refuzimin e vazhdueshëm të Serbisë, që mendoj se si qasje po e rrezikon procesin e dialogut”, përfundoi Osmani.

Kosova e Serbia të shtunën në Ohër janë pajtuar mbi aneksin e zbatimit të planit evropian, i cili do të jetë i obligueshëm për të dyja palët. Kryeministri Albin Kurti kishte thënë se kanë arritur pajtim publik me Serbinë për zbatimin e kësaj marrëveshje, por që Serbia nuk e ka nënshkruar.

Lajmet

Aksion kundër lojërave të fatit, arrestohen 34 persona

Published

on

By

Policia e Kosovës ka realizuar një operacion të gjerë policor në funksion të luftimit të veprimtarive të kundërligjshme që ndërlidhen me organizimin e skemave piramidale dhe lojërave të fatit-bixhozit të jashtëligjshëm në rajonin e Prishtinës. Sipas policisë, janë arrestuar 34 persona, të dyshuar për përfshirje direkte në këto aktivitete të paligjshme. Nga ta, 8 janë ndaluar me masë mbajtjeje prej 48 orësh, ndërsa 26 të tjerë janë liruar në procedurë të rregullt.

Sipas njoftimit, operacioni është zhvilluar në vazhdimësi që nga data 25.04.2025, pas pranimit të informatave të besueshme për zhvillimin e aktiviteteve të tilla të kundërligjshme në disa lokacione të Rajonit të Prishtinës.

Operacioni ka rezultuar tejet i suksesshëm, me ç’ rast; Janë vëzhguar-verifikuar, 91 lokale të ndryshme. Në 60 prej tyre janë ndërmarrë kontrolle të detajuara. 15 lokale janë mbyllur nga inspektorët e Ministrisë së Industrisë, Ndërmarrësisë dhe Tregtisë, dhe inspektoratet komunal për mungesë të dokumentacionit përkatës ose licencave”, thuhet në njoftim.

Po ashtu sipas policisë, janë iniciuar 25 raste penale, janë evidentuar shënime zyrtare dhe raporte operative që lidhen me vepra penale të ndryshme, si: organizim i lojërave të fatit, posedim i paautorizuar i substancave narkotike, armëmbajtje pa leje, kultivim, përpunim dhe shitje e substancave narkotike.

Përgjatë operacionit janë sekuestruar në cilësi të provave të rëndësishme edhe: 18 aparate për lojëra të fatit; 1 armë automatike AK-47, 1 armë e shkurtë, pajisje te laboratorit për kultivim, përpunim te substancave narkotike, para 5544.40 euro, 3 laptop, 2 printer për shtypje te tiketave, 3 aparate skenimi te tiketave, 16 telefona mobil të dyshuar se janë përdorur për pagesa online në bastore sportive.

Më tej thuhet se Policia e Kosovës mbetet e përkushtuar dhe e palëkundur në angazhimin e saj për parandalimin dhe luftimin e veprimtarive të jashtëligjshme që cenojnë rendin dhe sigurinë publike. Ky operacion dëshmon edhe njëherë profesionalizmin, bashkëpunimin institucional dhe përkushtimin e zyrtarëve policorë në mbrojtje të ligjshmërisë dhe interesit të qytetarëve.

Continue Reading

Lajmet

Osmani takon ambasadorin e Francës

Published

on

By

Presidentja e vendit, Vjosa Osmani priti në takim ambasadorin e Francës në Kosovë, Olivier Guerot, me të cilin bisedoi për zhvillimet e fundit politike në vend dhe në rajon, si dhe për raportet bilaterale ndërmjet Kosovës dhe Francës, njoftoi Presidenca të hënën, më 7 korrik.

Sipas njoftimit, Osmani dhe Guerot diskutuan edhe lidhur me konsultimet që presidentja ka zhvilluar me subjektet politike “në funksion të zbatimit të vendimit të fundit të Gjykatës Kushtetuese”.

Ajo ritheksoi se respektimi i rendit kushtetues dhe demokratik është thelbësor për stabilitetin institucional dhe kredibilitetin ndërkombëtar të Republikës së Kosovës”, thuhet në njoftim.

Në këtë periudhë të ngërçit politik, Osmani ka takuar përfaqësuesit e partive politike – në takim të përbashkët dhe të ndarë.

Ajo ka bërë thirrje për respektim të aktgjykimit të Kushtetueses – që Kuvendi të konstituohet deri më 26 korrik.

Deputetët janë mbledhur edhe sot, më 7 korrik, në tentimin e 43-të për konstituim, por pa ndonjë rezultat.

Procesi ka ngecur te zgjedhja e kryetarit të Kuvendit, për çka Lëvizja Vetëvendosje, në koalicion me Guxo dhe Alternativa, nuk po mund t’i sigurojnë 61 votat e nevojshme – në votim të hapur – për ta zgjedhur Albulena Haxhiun në krye të këtij institucioni.

Ata po kërkojnë që votimi të bëhet në mënyrë të fshehtë, por kjo po kundërshtohet nga partitë e tjera parlamentare.

Thirrje për të dalë nga kjo krizë institucionale ka brenda dhe jashtë Kosovës.

Continue Reading

Lajmet

Aksident mes dy veturave në Podujevë, një i lënduar

Published

on

By

Një person ka pësuar lëndime trupore si pasojë e një aksidenti mes dy veturave në Podujevë.

Agron Borovci, zëdhënës i Policisë për rajonin e Prishtinës konfirmoi për “Betimi për Drejtësi” se rasti ka ndodhur në rrugën “Ilir Konushevci”.

Sot rreth orës 10:20,  Policia ka pranuar informatën se në rrugën “Ilir Konushevci” në Podujevë, ka ndodhur një aksident trafiku rrugor me lëndime. Në këtë aksident kanë qenë të përfshira dy automjete, kurse si pasojë është lënduar një person, i cili ka pranuar tretmanin e nevojshëm  mjekësor. Njësia e Trafikut Rajonal ka dalë në vendin e ngjarjes dhe po ndërmerr veprimet e nevojshme për hetimin e shkaqeve që kanë sjellë deri te ky aksident”, tha ai.

Continue Reading

Lajmet

Komuna e Prishtinës zgjat orarin e punës për disa shërbime komunale

Published

on

By

Për shkak të fluksit të shtuar të qytetarëve gjatë sezonit veror dhe numrit të madh të bashkatdhetarëve nga diaspora, Komuna e Prishtinës ka vendosur të zgjasë orarin e punës për disa shërbime komunale.

Sipas njoftimit zyrtar, duke filluar nga data 8 korrik 2025, disa sportele do të funksionojnë me orar të zgjatur, nga e hëna deri të premten, prej orës 08:00 deri në 17:00.

Sportelet që do të punojnë me këtë orar të zgjatur janë: Komuna e vjetër: qendra për shërbime me qytetarë, gjendja civile, Komuna e re: qendra për shërbime me qytetarë, gjendja civile, bashkësia lokale – Lagjja e Muhaxherëve”, thuhet në njoftim.

Ky vendim thuhet se synon të përmbushë kërkesat e qytetarëve për dokumente dhe shërbime administrative, siç theksohet, duke ofruar kohë shtesë për të gjithë ata që kanë nevojë për t’i kryer punët e tyre gjatë kësaj periudhe.

Continue Reading

Të kërkuara