Presidentja e Komisionit Evropian (KE) Ursula von der Leyen dëshiron të bisedojë me Presidentin e Shteteve të Bashkuara, Donald Trump, nesër në Romë, ku do të varroset Papa Françesku.

Ndërkohë që asnjë takim me Trump nuk është planifikuar aktualisht, një zëdhënës i KE i tha Politico se çdo mundësi për të biseduar me liderët kryesorë botërorë “do të shfrytëzohet”.

Von der Leyen nuk është takuar ende me Trump që kur u kthye në Shtëpinë e Bardhë në janar.

Varrimi i Papa Françeskut, i cili vdiq të hënën, do të bëhet në sheshin e Shën Pjetrit në Vatikan.

Në varrim do të marrin pjesë krerë të shumtë shtetesh dhe zyrtarë të lartë nga e gjithë bota, gjë që është një mundësi e rrallë për takime joformale.

Trump tha të mërkurën se do të ketë takime të shumta gjatë qëndrimit në Romë.

Pritshmëritë e biznesit mes eksportuesve gjermanë kanë rënë në një nga nivelet më të ulëta – që nga kriza financiare globale e vitit 2008 – pas tarifave të reja të shpallura nga presidenti i SHBA-së Donald Trump, tha sot instituti kryesor ekonomik gjerman, “ifo”.

Indeksi i institutit “ifo” me seli në Mynih u përkeqësua me 7,6 pikë në -9,8 në prill, vlera më e u ulët – që nga kriza financiare, duke përjashtuar rënien ekstreme të shkaktuar nga pandemia e koronavirusit.

“Konflikti tarifor me SHBA-në ka ulur shpresat për një rimëkëmbje në biznesin e eksportit”, tha Klaus Wohlrabe, kreu i anketave në “ifo”.

“Niveli i lartë i pasigurisë në lidhje me mënyrën se si do të zhvillohen tarifat në të vërtetë ndoshta do ta përkeqësojë më tej situatën”, shtoi ai.

Pritshmëritë e eksportit ranë ndjeshëm në pothuajse të gjithë sektorët.

Shpresat e prodhuesve të makinave për një rimëkëmbje janë shuar, me treguesin që ra me 11,8 pikë në -13,7.

Trump ka vendosur tarifa prej 25% për automjetet e importuara në SHBA, dhe në fillim të majit, pritet të pasojnë tarifat për pjesët e importuara.

Në inxhinierinë mekanike, indeksi ra me rreth 16 pikë në -10.

Pritshmëritë në industrinë kimike, një sektor tjetër i rëndësishëm për ekonominë gjermane, treguan gjithashtu një rënie të ndjeshme./ATSH/

Koordinatorja e Emergjencave në Sudan e Programit Botëror të Ushqimit (WFP) të OKB-së, Samantha Chattaraj tha se afërsisht 25 milionë njerëz në Sudan, ekuivalent me gjysmën e popullsisë, po përballen me uri akute.

Ajo theksoi se WFP kishte bërë disa përpjekje për të ndihmuar njerëzit që mbetën kryesisht pa ndihmë dhe raportoi se në mars ata arritën 4 milionë njerëz në të gjithë Sudanin, katër herë më shumë se numri i njerëzve që ndihmuan një vit më parë.

“Rreth 25 milionë njerëz në të gjithë vendin, gjysma e popullsisë, po përballen me uri akute. Rreth 5 milionë fëmijë dhe nëna që ushqejnë me gji janë të kequshqyera në mënyrë akute. Sudani aktualisht është i vetmi vend në botë ku uria është konfirmuar“, tha koordinatorja e OKB-së.

Chattaraj potencoi se synojnë të arrijnë 7 milionë njerëz deri në mesin e vitit dhe se u kanë dhënë përparësi 27 rajoneve që po përjetojnë uri ose klasifikohen si në rrezik urie.

Komiteti Hetues i Rusisë njoftoi sot se një oficer i lartë ushtarak është vrarë në një shpërthim makine këtë mëngjes në rajonin e Moskës.

Svetlana Petrenko, zëdhënëse e komitetit, konfirmoi se Yaroslav Moskalik, zëvendësshef i Drejtorisë së Operacioneve Kryesore të Shtabit të Përgjithshëm, ishte në automjet kur shpërtheu një pajisje eksplozive.

“Pajisja shpërthyese kishte një forcë ekuivalente me më shumë se 300 gramë TNT”, u tha Petrenko gazetarëve në Moskë.

Incidenti vjen pas vdekjes së një zyrtari tjetër të lartë ushtarak rus vitin e kaluar.

Igor Kirillov, kreu i Trupave Ruse të Mbrojtjes Kimike, Biologjike dhe Bërthamore, u vra gjithashtu në një sulm të ngjashëm, për të cilin shërbimet e inteligjencës së Ukrainës morën përgjegjësinë.

Që nga fillimi i luftës në Ukrainë, disa figura të tjera publike ruse, përfshirë reporterë lufte, janë vrarë në shpërthime që u atribuohen shërbimeve speciale ukrainase.