Këtë fundjavë më 24 tetor, do të mbahet Konferenca e Fakultetit të Menaxhmentit, Biznesit dhe Ekonomisë (MBE), në kuadër të Konferencës Shkencore Ndërkombëtare të UBT-së. Ngjarja pritet të bëjë bashkë hulumtues, akademikë dhe ekspertë nga Kosova dhe bota për të diskutuar prirjet e reja ekonomike, financiare dhe menaxheriale.

Dekani i Fakultetit të Menaxhmentit, Biznesit dhe Ekonomisë në UBT, Muhamet Gërvalla, njoftoi se përgatitjet janë në fazën përfundimtare dhe se programi sjell një larmi tematike.

“Për ne është e rëndësishme që konferenca të jetë jo vetëm një mundësi për prezantimin e rezultateve shkencore, por edhe një hapësirë për diskutim, shkëmbim përvojash dhe krijim të bashkëpunimeve të reja akademike. Temat kryesore përfshijnë transformimin digjital dhe inteligjencën artificiale, zhvillimin ekonomik, financat, inovacionin dhe ndërmarrësinë”, ka thënë Gervalla.

Hulumtimet e prezantuara nga akademikët vendorë u kushtojnë vëmendje të veçantë sfidave konkrete të tregut vendas, si përdorimi i inteligjencës artificiale në biznese, zhvillimi i NMM-ve, turizmi, politikat tatimore dhe pjesëmarrja e grave në menaxhment.

Lidhur me dobinë e kërkimeve vendore, dekani Gërvalla nënvizoi se këto punime lidhen me sfidat konkrete të Kosovës dhe përpjekja për të ofruar analiza që mund të ndihmojnë në përmirësimin e vendimmarrjes.

Përveç studiuesve kosovarë, konferenca ka tërhequr edhe pjesëmarrës ndërkombëtarë nga vende si Shqipëria, Maqedonia e Veriut, Maroku, Kameruni, India, Emiratet e Bashkuara Arabe dhe shtete të ndryshme evropiane, të cilët do të trajtojnë tema të tregjeve financiare, rritjes së gjelbër dhe teknologjisë.

Dekani Muhamet Gërvalla e vlerësoi lart këtë ndërthurje përvojash ndërkombëtare:

“Konferenca e MBE-së synon të lidhë hulumtimet që trajtojnë sfidat konkrete të Kosovës me perspektiva dhe përvoja ndërkombëtare, duke kontribuar në zhvillimin e kërkimit shkencor dhe në forcimin e bashkëpunimit akademik”, shprehet Gervalla.

Në kuadër të shënimit të 25-vjetorit të themelimit, UBT po organizon tri ngjarje të rëndësishme ndërkombëtare, duke sjellë në Kosovë qindra ekspertë, shkencëtarë dhe përfaqësues të institucioneve prestigjioze botërore.

Rektori i UBT-së, Edmond Hajrizi, në një intervistë për Telegrafin ka folur për rëndësinë e Samitit të 67-të të Organizatës Evropiane për Cilësi (EOQ), Konferencës së Dytë Ndërkombëtare për Mjekësinë Sportive (ICSM 2026) dhe Konferencës së 15-të Ndërkombëtare Shkencore IC–UBT.

Sipas tij, organizimi i këtyre ngjarjeve përfaqëson një mundësi të rëndësishme për promovimin ndërkombëtar të Kosovës, avancimin e kërkimit shkencor dhe fuqizimin e bashkëpunimit mes akademisë, industrisë dhe institucioneve.

Samiti ndërkombëtar i cilësisë sjell deri në 300 pjesëmarrës nga bota

Duke folur për Samitin e 67-të të Organizatës Evropiane për Cilësi, Hajrizi tha se përzgjedhja e Kosovës si vend organizator përbën një arritje të rëndësishme.

Ai bëri të ditur se vendimi për organizimin e samitit në Kosovë është marrë pas shprehjes së interesimit nga përfaqësuesit e Kosovës në kuadër të organizatës.

Sipas Hajrizit, në këtë ngjarje pritet të marrin pjesë rreth 200 deri në 300 pjesëmarrës ndërkombëtarë dhe afërsisht 90 folës nga universitete, kompani, institucione dhe organizata të ndryshme.

“Kemi arritur që këta 90 folës të jenë të gatshëm që me punimet, praktikat dhe mesazhet e tyre të marrin pjesë. Do të kemi kolegë që do të flasin nga Harvardi, nga Universiteti i Kembrixhit, nga Siemens dhe nga qeverisjet lokale të vendeve të ndryshme”, u shpreh Hajrizi.

Ai theksoi se diskutimet do të përfshijnë standardet ndërkombëtare të cilësisë, inovacionin, inteligjencën artificiale, arsimin, shëndetësinë, energjinë dhe administratën publike.

Një nga rezultatet e synuara të samitit, sipas tij, është miratimi i një deklarate ndërkombëtare për të ardhmen e cilësisë dhe standardeve.

“Pritja jonë është që në fund të samitit të dalim me një deklaratë, Deklarata e UBT-së dhe e Prishtinës 2026, me të cilën të japim një orientim se si duhet ta trajtojmë cilësinë dhe standardet për 50 vitet e ardhshme”, deklaroi ai.

Konferenca e mjekësisë sportive, Hajrizi: Kosova ka nevojë për zhvillimin e kësaj fushe

Një tjetër ngjarje e rëndësishme është Konferenca e Dytë Ndërkombëtare për Mjekësinë Sportive, e cila synon avancimin e shërbimeve shëndetësore për sportistët dhe shkëmbimin e përvojave ndërkombëtare.

Hajrizi vlerësoi se mjekësia sportive është një fushë që ende nuk është zhvilluar mjaftueshëm në Kosovë, megjithëse pjesëmarrja e sportistëve kosovarë në garat ndërkombëtare kërkon mbështetje gjithnjë e më profesionale.

Ai tha se UBT ka ndërmarrë iniciativa për themelimin e Shoqatës së Mjekësisë Sportive në Kosovë, anëtarësimin e saj në organizatat ndërkombëtare dhe zhvillimin e infrastrukturës profesionale.

Sipas tij, konferenca e këtij viti do të ketë edhe një veçanti, pasi është akredituar nga Oda e Mjekëve të Kosovës, duke u mundësuar pjesëmarrësve të përfitojnë pikë për zhvillimin e tyre të vazhdueshëm profesional.

Në konferencë, sipas Hajrizit, pritet të marrin pjesë drejtues të organizatave ndërkombëtare të mjekësisë sportive, si dhe ekspertë nga Gjermania dhe vende të tjera.

Ai theksoi se teknologjitë moderne për monitorimin e gjendjes shëndetësore të sportistëve dhe parandalimin e problemeve gjatë aktiviteteve sportive do të jenë ndër temat e rëndësishme të diskutimit.

Konferenca shkencore e UBT-së bashkon mijëra pjesëmarrës

Rektori foli edhe për Konferencën e 15-të Ndërkombëtare Shkencore IC–UBT, e cila organizohet në vazhdimësi prej 15 vjetësh.

Sipas Hajrizit, kjo platformë përfshin rreth 22 konferenca të organizuara paralelisht nga fakultetet dhe shkollat e UBT-së, duke krijuar mundësi për bashkëpunim ndërmjet studiuesve të disiplinave të ndryshme.

Ai tha se në kuadër të kësaj ngjarjeje pritet pjesëmarrja e mijëra studiuesve, ekspertëve dhe profesionistëve.

Hajrizi vlerësoi se organizimi i konferencave ndërkombëtare në Kosovë u jep mundësi veçanërisht shkencëtarëve të rinj që të shkëmbejnë njohuri dhe të krijojnë kontakte profesionale pa qenë të detyruar të udhëtojnë jashtë vendit.

Sipas tij, bashkëpunimi ndërdisiplinor është gjithnjë e më i domosdoshëm për adresimin e sfidave me të cilat përballet shoqëria.

UBT shënon 25 vjet, synon zgjerim ndërkombëtar

Duke reflektuar për 25 vitet e funksionimit të UBT-së, Hajrizi tha se institucioni ka shënuar rritje të vazhdueshme në arsim, teknologji, inovacion dhe ndërkombëtarizim.

“Është një fat i mirë që në këto 25 vite kemi pasur një rritje të vazhdueshme organike, inovative, një qasje lidershipi dhe të teknologjive moderne, një rritje të vendeve të punës”, deklaroi ai.

Hajrizi theksoi se përvjetori nuk duhet të shihet si përfundim i një etape, por si mundësi për të vazhduar zhvillimin dhe për të zgjeruar modelin e institucionit në nivel ndërkombëtar.

Ai foli edhe për ekosistemin e krijuar nga UBT-ja, i cili, sipas tij, përfshin rreth 80 funksione organizative, afërsisht 300 laboratorë dhe 150 fusha të ndryshme të veprimtarisë.

Rektori u shpreh se synimi për vitet e ardhshme është rritja e bashkëpunimit ndërkombëtar, zhvillimi i teknologjive të reja dhe fuqizimi i rolit të UBT-së në zgjidhjen e sfidave globale.

Sipas tij, organizimi i tri ngjarjeve ndërkombëtare jo vetëm që kontribuon në zhvillimin akademik dhe profesional, por ndikon edhe në promovimin e Kosovës dhe në ekonominë vendore përmes pjesëmarrjes së vizitorëve ndërkombëtarë. /Telegrafi/

Fakulteti i Shkencave Mjekësore në UBT është në vlugun e përgatitjeve për Konferencën Ndërkombëtare Shkencore të UBT-së, që mbahet në fundjavë.

Dekani i Fakultetit të Shkencave Mjekësore në UBT, Dr. Fitim Alidema, në një bisedë për “UBT News” ka folur për përgatitjet që po bëhen për konferencën.

“Për ne, konferenca nuk është thjesht një aktivitet në kalendarin universitar, por një mundësi për të prezantuar rezultate kërkimore, për të shkëmbyer përvoja dhe për të forcuar bashkëpunimin ndërmjet studiuesve dhe profesionistëve shëndetësorë”, thotë ai.

Ai thekson faktin se hulumtimi në shkencat mjekësore po bëhet gjithnjë më i rëndësishëm.

”Interesimi i autorëve dhe larmia e temave të dorëzuara tregojnë se kërkimi në shkencat mjekësore po zë një vend gjithnjë e më të rëndësishëm në jetën akademike. Synimi ynë është të krijojmë një mjedis ku rezultatet diskutohen në mënyrë kritike, ku lindin ide për studime të reja dhe ku bashkëpunimi vazhdon edhe pas përfundimit të konferencës. Vlerën e saj e shohim para së gjithash te cilësia e diskutimit dhe kontributi që punimet mund të japin për shkencën dhe praktikën shëndetësore”, thekson dr.Alidema.

Por, cilat janë temat në të cilat është orientuar hulumtimi për këtë konferencë.

Dr. Alidema thotë se temat janë përzgjedhur duke pasur parasysh sfidat aktuale të mjekësisë dhe nevojat e institucioneve shëndetësore.

“Punimet e dorëzuara trajtojnë farmakoterapinë, diabetin dhe sëmundjet e tjera kronike, përdorimin e antibiotikëve, diagnostikën laboratorike, onkologjinë, radiologjinë, infermierinë, shëndetin publik dhe cilësinë e shërbimeve shëndetësore”, shton ai.

“Vëmendje meritojnë edhe punimet që shqyrtojnë mundësitë e përdorimit të inteligjencës artificiale në mamografi dhe të printimit 3D në fushën e onkologjisë. Këto tema tregojnë se mjekësia po zhvillohet përmes bashkëpunimit të disiplinave të ndryshme. Ne dëshirojmë që konferenca të pasqyrojë këtë zhvillim, duke lidhur kërkimin klinik me shkencat farmaceutike, laboratorike dhe teknologjike. Qëllimi përfundimtar mbetet i njëjtë: njohuri më të mira për vendime më të sigurta dhe kujdes më cilësor ndaj pacientit”, thotë dr.Alidema.

Fakulteti i Shkencave Mjekësore në UBT i kushton rëndësi të madhe hulumtimeve shkencore. Në të, mësimdhënia dhe kërkimi shkencor duhet të zhvillohen së bashku.

“Detyra e universitetit nuk është vetëm të përcjellë njohuritë që tashmë ekzistojnë, por edhe të krijojë kushte për njohuri të reja. Për këtë arsye, angazhimin e profesorëve dhe asistentëve në hulumtime e konsiderojmë pjesë të rëndësishme të përgjegjësisë së tyre akademike”, thotë ai.

Sipas tij, kërkimi shkencor ndihmon në zhvillimin e mendimit kritik, në vlerësimin e praktikave klinike dhe në identifikimin e problemeve që kërkojnë zgjidhje.

Po ashtu, po aq e rëndësishme është përfshirja e studentëve, të cilët duhet të mësojnë të lexojnë e të vlerësojnë evidencën, jo vetëm të zbatojnë njohuri teorike.

“Dëshirojmë të përgatisim profesionistë të aftë për të marrë vendime të argumentuara dhe për të kontribuar në përmirësimin e shërbimeve shëndetësore. Kjo është arsyeja pse kërkimin shkencor e shohim si përgjegjësi ndaj studentëve, profesionit dhe shoqërisë”, shton ai.

Dr. Fitim Alidema është autor i një numri të madh të punimeve shkencore në platformat prestigjioze ndërkombëtare. Ai flet për kahun në të cilin po shkojnë hulumtimet më të reja në fushën e mjekësisë në Kosovë.

“Nga përvoja ime kërkimore dhe nga temat që trajtohen në komunitetin akademik, shoh një orientim më të madh drejt problemeve konkrete të praktikës klinike. Po studiohen efektiviteti dhe siguria e barnave, menaxhimi i sëmundjeve kronike, përdorimi racional i antibiotikëve, diagnostikimi i hershëm dhe faktorët që ndikojnë në rezultatet e trajtimit.

Një zhvillim pozitiv është përpjekja për të shkuar përtej përshkrimit të të dhënave, drejt analizave që identifikojnë faktorë rreziku, vlerësojnë lidhje ndërmjet trajtimit dhe rezultateve klinike dhe ndihmojnë në formulimin e rekomandimeve. Megjithatë, ky progres duhet të shoqërohet me metodologji të qëndrueshme, analiza statistikore të përshtatshme, bashkëpunime shumëqendrore dhe respektim të etikës kërkimore. Qëllimi duhet të jetë që studimet e realizuara në Kosovë të mund të krahasohen me kërkimet ndërkombëtare dhe të jenë të dobishme për praktikën tonë shëndetësore”, thekson dr. Fitim Alidema.

Por, sa janë të rëndësishme punimet shkencore nga Kosova për audiencën botërore dhe sa ka interesim për to?

Dr. Alidema thekson se rëndësia e një punimi shkencor nuk varet nga vendi ku është realizuar, por nga pyetja që trajton, cilësia e metodologjisë dhe besueshmëria e përfundimeve.

“Kosova mund të japë kontribute të vlefshme për literaturën ndërkombëtare, veçanërisht përmes të dhënave mbi praktikën klinike, përdorimin e barnave, sëmundjet kronike dhe organizimin e kujdesit shëndetësor”, thotë ai.

Sipas tij, studimet nga mjedise që janë më pak të përfaqësuara në literaturë mund të ndihmojnë në kuptimin e dallimeve ndërmjet popullatave dhe sistemeve shëndetësore. Interesimi për to rritet kur rezultatet publikohen në revista me standarde serioze, janë të qarta dhe të riprodhueshme dhe lidhen me pyetje që kanë rëndësi edhe jashtë Kosovës. Prandaj, synimi ynë nuk duhet të jetë vetëm rritja e numrit të publikimeve, por rritja e cilësisë dhe ndikimit të tyre. Kërkimi shkencor nga Kosova duhet të jetë pjesë aktive e diskutimit ndërkombëtar.

Konferenca mbledh edhe studiues nga jashtë UBT-së dhe jashtë Kosovës.

“Një nga vlerat e konferencës është mundësia e bashkëpunimit ndërmjet studiuesve me përvoja dhe përkatësi të ndryshme institucionale. Në materialet e dorëzuara përfshihen autorë nga UBT, nga institucione të tjera të arsimit të lartë dhe nga institucione shëndetësore e laboratorike. Në mesin e bashkëpunimeve të paraqitura shihen lidhje akademike dhe profesionale me Kosovën, Shqipërinë dhe Maqedoninë e Veriut”, thotë Alidema.

“Për ne, rëndësi ka që ky takim të mos kufizohet në prezantimin e punimeve. Konferenca duhet të krijojë kontakte të reja, të nxisë shkëmbimin e metodave dhe të hapë mundësi për hulumtime të përbashkëta. Bashkëpunimi ndërkombëtar ka vlerë të qëndrueshme kur përkthehet në projekte konkrete, shkëmbim përvojash dhe rezultate shkencore të përbashkëta”, shton ai.

Dhe, cilat janë interesimet kryesore në punimet e tyre shkencore?

Punimet pasqyrojnë interesim për probleme që kanë ndikim të drejtpërdrejtë në kujdesin shëndetësor. Një pjesë trajton sëmundjet kronike, si diabeti dhe hipertensioni, si dhe përdorimin dhe sigurinë e barnave. Të tjera merren me antibiotikët, diagnostikën laboratorike, kujdesin infermieror, sigurinë e pacientëve, shëndetin publik dhe organizimin e shërbimeve.

Sipas dr. Alidemës, një vend të veçantë zënë edhe qasjet teknologjike, përfshirë inteligjencën artificiale në diagnostikën radiologjike dhe përdorimin e printimit 3D në onkologji. Këto tema janë të ndryshme, por kanë një pikë të përbashkët: kërkojnë të kuptojnë më mirë një problem shëndetësor dhe të shqyrtojnë mënyra për përmirësimin e diagnostikimit, trajtimit ose parandalimit. Kjo lidhje ndërmjet pyetjes shkencore dhe nevojës së pacientit është veçanërisht e rëndësishme për ne.

Krahas mësimdhënies, hulumtimi është një nga fushat kryesore që çmohet në kohën tonë. Dr. Alidema flet për faktin se sa po zhvillohen hulumtime cilësore në shkencat mjekësore në Kosovë?

“Në Kosovë shohim zhvillime inkurajuese në kërkimin shkencor mjekësor, por edhe nevojë për investime dhe përmirësime të vazhdueshme. Studiuesit tanë po trajtojnë probleme të rëndësishme klinike dhe po synojnë prezantimin e rezultateve në mjedise shkencore ndërkombëtare. Megjithatë, cilësia nuk mund të matet vetëm me numrin e punimeve.

Një studim i mirë kërkon pyetje të qartë, metodologji rigoroze, të dhëna të besueshme, analiza të përshtatshme dhe interpretim të kujdesshëm të rezultateve. Për ta forcuar këtë kulturë, na nevojiten infrastrukturë kërkimore, mbështetje për studiuesit e rinj dhe bashkëpunim më i ngushtë ndërmjet universiteteve dhe institucioneve shëndetësore. UBT dëshiron të kontribuojë në këtë drejtim duke nxitur kërkimin ndërdisiplinor dhe përfshirjen akademike. Suksesi i shkencës sonë do të shihet edhe në aftësinë për t’i përdorur njohuritë e reja në përmirësimin e kujdesit ndaj qytetarëve”, thekson Dr. Fitim Alidema, dekan i Fakultetit të Shkencave Mjekësore në UBT.

Prokuroria e Posaçme kundër Korrupsionit dhe Krimit të Organizuar (SPAK) në Shqipëri ka njoftuar se i ka komunikuar ish-zëvendëskryeministres dhe ish-ministres së Infrastrukturës, Belinda Balluku, akuzat përfundimtare në kuadër të hetimeve ndaj saj.

Sipas njoftimit të SPAK-ut, Balluku akuzohet për disa vepra penale, përfshirë shkeljen e barazisë në tenderë publikë, korrupsionin, mosdeklarimin e pasurisë dhe pastrimin e produkteve të veprës penale.

Prokuroria e Posaçme bën të ditur se ish-zyrtarja e lartë akuzohet për shkelje të barazisë së pjesëmarrësve në tenderë apo ankande publike, në bashkëpunim, në nëntë raste të ndryshme.

Ndaj saj rëndojnë gjithashtu akuzat për korrupsion pasiv të personave që ushtrojnë funksione publike dhe korrupsion pasiv të funksionarëve të lartë shtetërorë.

Një tjetër akuzë lidhet me refuzimin, fshehjen ose deklarimin e rremë të pasurisë dhe interesave private, vepër për të cilën Balluku akuzohet në dy raste.

SPAK-u e akuzon gjithashtu për pastrim të produkteve të veprës penale ose të veprimtarisë kriminale, në bashkëpunim dhe më shumë se një herë, lidhur me dy pasuri të paluajtshme.

Ndërkohë, Prokuroria e Posaçme ka bërë të ditur se po vazhdon veprimet procedurale për komunikimin e akuzave edhe personave të tjerë të përfshirë në të njëjtën çështje penale.

Komunikimi i akuzave përfundimtare përbën një hap procedural në këtë çështje dhe nuk nënkupton shpalljen e fajësisë së ish-zyrtares.

D.L