Xhudistja kosovare Laura Fazliu ka përfunduar garën pa arritur të afrohet te zona e medaljeve në Kampionatin Evropian të xhudos që po mbahet në Tbilisi.

Fazliu e nisi garën nga xhiroja e dytë e kategorisë deri në 63 kilogramë, pasi në rundin e parë ishte e lirë. Në përballjen e saj të parë, ajo u ndesh me sllovenen Kaja Kajzer, e cila u tregua më e saktë dhe më dominuese në tatami.

Kajzer kaloi në epërsi që në fillim me “Yuko”, ndërsa më pas e përmbylli luftën me “Ippon”, duke mos i lënë shumë hapësirë Fazliut për reagim.

Nga xhudistja kosovare pritej një paraqitje më e fortë dhe luftë për medalje, por këtë herë ajo nuk arriti të gjejë ritmin e duhur dhe e mbylli garën më herët se sa pritej.

Xhudisti kosovar Akil Gjakova ka nisur me sukses garën në Kampionatin Evropian të xhudos që po mbahet në Tbilisi, duke siguruar kualifikimin në fazën tjetër të kategorisë deri në 73 kilogramë.

Në përballjen e tij të parë, Gjakova u ndesh me austriakun Samuel Gassner. Edhe pse në një moment ishte në disavantazh me “Waza-ari”, ai ruajti qetësinë dhe kontrollin gjatë gjithë luftës.

Vendimtare ishte një hedhje spektakolare, me të cilën Gjakova fitoi me “Ippon”, duke e mbyllur ndeshjen në mënyrë të fuqishme dhe duke siguruar avancimin.

Me këtë paraqitje, ai konfirmon ambiciet për medalje në këtë kampionat, duke u renditur ndër pretendentët seriozë në kategorinë e tij.

Pas triumfit të madh të Distria Krasniqi, e cila fitoi medaljen e artë në Kampionatin Evropian të xhudos për senior në Tbilisi, Kosova vazhdon sot paraqitjen në këtë ngjarje prestigjioze me tre garues të tjerë.

Në ditën e tretë të garave, në tatami do të ngjiten Laura Fazliu në kategorinë deri në 63 kilogramë, si dhe Akil Gjakova dhe Dardan Cena në kategorinë deri në 73 kilogramë.

Pas paraqitjes mbresëlënëse të Krasniqit, që i siguroi Kosovës medaljen e artë, pritjet janë rritur edhe për garuesit e sotëm. Të tre synojnë të vazhdojnë formën e mirë të ekipit kosovar dhe të sjellin medalje të tjera nga Kampionati Evropian 2026.

Kosova ndër vite ka dëshmuar se është një nga fuqitë kryesore në xhudon evropiane, dhe gara e sotme paraqet një tjetër mundësi për të konfirmuar këtë status në arenën ndërkombëtare.

Skuadra e Bora Prishtina ka vazhduar formën e shkëlqyer në plejof, duke eliminuar Sigal Prishtina dhe duke siguruar një vend në gjysmëfinale të elitës së basketbollit kosovar.

Në ndeshjen e zhvilluar të enjten mbrëma në Pallati i Rinisë dhe Sportit, Bora triumfoi me rezultat të thellë 101:60, duke e mbyllur serinë çerekfinale me rezultat të përgjithshëm 2:0. Edhe ndeshjen e parë e kishte fituar bindshëm, 105:67.

Ndeshja u vendos që në pjesën e parë, ku Bora krijoi epërsi të madhe prej 51:23. Në vazhdim, skuadra vetëm e menaxhoi avantazhin, duke e thelluar diferencën deri në 41 pikë në fund të takimit.

Më i dalluari në këtë fitore ishte Jordan Dingle me 24 pikë, dy kërcime dhe dy asistime. Kontribut të rëndësishëm dha edhe Carlton Bragg Jr. me 12 pikë dhe pesë kërcime.

Në anën tjetër, te Sigal Prishtina u veçuan vetëm Arbër Sinani dhe Jon Ismajli me paraqitje dyshifrore. Sinani realizoi 17 pikë, tri kërcime dhe tri asistime, ndërsa Ismajli shtoi 13 pikë, tri kërcime dhe një asistim.

Kjo fitore ka edhe më shumë peshë duke pasur parasysh se vetëm një vit më parë Bora luftonte për mbijetesë në elitë, duke siguruar qëndrimin përmes plejautit. Tani, skuadra prishtinase është shndërruar në një pretendente serioze për titull.

Në gjysmëfinale, Bora do të përballet me Bashkimi, që sezonin e rregullt e përfundoi në vendin e dytë me 48 pikë dhe do të ketë përparësinë e terrenit vendas. Bora e mbylli sezonin e rregullt në pozitën e tretë me 42 pikë, ndërsa Sigal Prishtina u kualifikua në plejof nga vendi i gjashtë me 38 pikë.