Të martën mbrëma ka përfunduar një tjetër periudhë e gjatë e ndeshjeve ndërkombëtare, ndërsa janë zhvilluar edhe sfidat e fundit të këtij cikli në Ligën B të Ligës së Kombeve të UEFA-s.

Në këtë ligë garojnë 16 përfaqësuese, të ndara në katër grupe. Pas katër prej gjashtë xhirove, Kosova ka lënë pas gjysmën e tyre sa i përket pikëve të grumbulluara.

Kosova po garon për herë të parë në Ligën B dhe në short ishte e vendosur në vazon e fundit. Duke marrë parasysh këtë, si dhe faktin se bëhet fjalë për një nivel më të lartë të garës, pritjet reale mund të ishin që “Dardanët” të ishin në pjesën e poshtme të renditjes pas katër xhirove.

Megjithatë, situata është krejtësisht ndryshe. Kosova aktualisht është në pjesën e epërme të tabelës, përballë disa përfaqësueseve me përvojë të madhe, të cilat janë pjesëmarrëse të rregullta në Kampionate Evropiane dhe Botërore.

Në Grupin 3, i cili po del të jetë më konkurruesi, Kosova ka grumbulluar pesë pikë dhe renditet e dyta. Me po aq pikë është Irlanda në vendin e tretë, ndërsa Austria kryeson me tetë pikë. Izraeli është i fundit me vetëm dy pikë.

Në Grupin 1, Zvicra ka dominuar bindshëm, duke i fituar të katër ndeshjet dhe duke grumbulluar 12 pikë. Sllovenia është e dyta me shtatë pikë, ndërsa Skocia ka katër dhe Maqedonia e Veriut nuk ka marrë asnjë pikë.

Në Grupin 2, Irlanda e Veriut kryeson me tetë pikë, e ndjekur nga Hungaria me shtatë. Ukraina ka katër pikë, ndërsa Gjeorgjia dy.

Në Grupin 4, Suedia është lidere me 10 pikë, dy më shumë se Bosnjë-Hercegovina. Polonia ka katër pikë, ndërsa Rumania ende nuk ka grumbulluar pikë.

Kështu, në renditjen e përgjithshme të Ligës B, pas Kosovës janë Irlanda, Polonia, Skocia, Ukraina, Gjeorgjia, Izraeli, Rumania dhe Maqedonia e Veriut.

Pikërisht Maqedonia e Veriut e kishte eliminuar Kosovën në rrugën drejt Evropianit 2021. Ndërkohë, ndaj Rumanisë “Dardanët” ende nuk kanë regjistruar fitore. Bilanci është një barazim dhe tri humbje, me njërën prej tyre të regjistruar me rezultat zyrtar.

Rezultatet në Ligën e Kombeve kanë rëndësi edhe përtej kësaj gare. Një prej arsyeve kryesore është se renditja në edicionin aktual ndikon në përcaktimin e vazove për shortin e kualifikimeve për Euro 2028.

Bazuar në renditjen aktuale, Kosova do të ishte pjesë e vazos së dytë për shortin e kualifikimeve. Megjithatë, këtë pozitë duhet ta konfirmojë në dy ndeshjet e fundit të grupit.

“Dardanët” më 14 nëntor do ta presin Izraelin në Prishtinë, ndërsa tri ditë më vonë, më 17 nëntor, do të përballen me Irlandën në Dublin.

Një vend në vazon e dytë do të ishte një arritje e rëndësishme për Kosovën dhe do t’i krijonte kushte më të favorshme në shortin kualifikues për Euro 2028. Përfaqësuesja kosovare synon të sigurojë për herë të parë kualifikimin në Kampionatin Evropian.

Për Euro 2021, Kosova ishte në vazon e pestë, ndërsa për Euro 2024 në vazon e katërt. Tani, “Dardanët” janë vetëm dy ndeshje larg një pozite që do t’i vendoste në vazon e dytë dhe do t’u jepte një avantazh të rëndësishëm në rrugëtimin drejt një kualifikimi historik.

D.L

Përzgjedhësi i Shqipërisë, Rolando Maran, nuk është ndarë i kënaqur me paraqitjen e skuadrës në fitoren ndaj San Marinos.

Pas ndeshjes, Maran theksoi se kuqezinjtë krijuan shumë raste shënimi, por nuk arritën t’i shfrytëzonin, ndërsa në pjesën e dytë ulën ritmin.

“Nuk më ka pëlqyer paraqitja e skuadrës, por në fund morëm tri pikët. U vumë në vështirësi, sepse krijuam shumë raste në pjesën e parë dhe nuk i shfrytëzuam. Në pjesën e dytë ulëm ritmin dhe e pësuam. E rëndësishme është që morëm tri pikët përballë tifozëve”, deklaroi Maran.

Tekniku italian vlerësoi pikët e grumbulluara, por rikujtoi se Shqipëria kishte mundësi të mbyllte këtë fazë me bilanc edhe më të mirë.

“I kënaqur me nëntë pikë? Nuk duhet të harrojmë se, nëse llogarisim edhe ndeshjen me Finlandën, mund të ishim me 12 pikë në grup”, u shpreh Maran.

D.L

Mesfushori 17-vjeçar, Adri Mehmeti, ka regjistruar një tjetër paraqitje me përfaqësuesen e Shteteve të Bashkuara të Amerikës.

SHBA-ja në orët e para të së mërkurës mposhti Kanadanë me rezultat 1:0, në një ndeshje miqësore.

Mehmeti u inkuadrua në lojë në minutën e 74-t, duke regjistruar kështu paraqitjen e tij të tretë me përfaqësuesen amerikane. Futbollisti është pjesë e New York Red Bulls.

Ai debutoi më 26 shtator në ndeshjen ndaj Perusë, ndërsa më 30 shtator ishte titullar në përballjen kundër Kilit. Në ndeshjen ndaj Meksikës qëndroi në stol, për t’u rikthyer më pas në fushë në duelin ndaj Kanadasë.

Golin e vetëm dhe të fitores për SHBA-në e shënoi 19-vjeçari Justin Ellis.

Mehmeti më herët ka qenë pjesë edhe e grupmoshave të Shqipërisë. Në vitin 2023, ai luajti për përfaqësuesen shqiptare U15.

D.L

Vance Jackson është shpallur MVP i javës së tretë në ProCredit Superligën e Kosovës në basketboll.

Basketbollisti i Vëllaznimit zhvilloi një paraqitje të jashtëzakonshme, duke qenë ndër protagonistët kryesorë të skuadrës së tij.

Jackson e përfundoi ndeshjen me 29 pikë, 9 kërcime dhe 3 asistime, duke regjistruar një indeks prej 36.

Kjo paraqitje i mjaftoi basketbollistit të Vëllaznimit për të fituar epitetin e MVP-së së javës së tretë në elitën e basketbollit kosovar.

D.L