Policia e Kosovës në raportin njëditor njofton se një person është gjetur pa shenja jete në rrugën “Rrahman Dini” në Prishtinë.

Sipas raportit rasti ka ndodhur rreth orës 05:30 të mëngjesit të datës 14 prill 2026.

Menjëherë pas marrjes së informatës, në vendngjarje kanë dalë njësitet përkatëse policore së bashku me një ekip mjekësor. Pas ekzaminimit fillestar, mjekët e pranishëm kanë konstatuar vdekjen e viktimës, një mashkull kosovar.

Për zbardhjen e rrethanave të kësaj vdekjeje, policia ka iniciuar rastin si “Hetim i vdekjes”.

Me urdhër të prokurorit të shtetit, trupi i pajetë është dërguar në Institutin e Mjekësisë Ligjore (IML) për obduksion.

Njësitë policore të Drejtorisë për Hetimin e Krimeve të Luftës (DHKL) kanë kryer një operacion të suksesshëm të martën, më 14 prill 2026, duke arrestuar një person të dyshuar për krime lufte kundër popullsisë civile. Arrestimi i të dyshuarit, u realizua në qytetin e Leposaviqit.

Sipas raportit zyrtar të Policisë së Kosovës, personi i arrestuar dyshohet se gjatë vitit 1999, konkretisht rreth datës 20 mars, ka vepruar si pjesëtar i grupeve kriminale në rajonin e Skenderajt. Ai ngarkohet me dyshimin se në bashkëkryerje me persona të tjerë, ka kryer akte mizore ndaj civilëve shqiptarë në një nga lagjet e këtij qyteti.

Në dosjen e policisë specifikohet se veprimet e tij përfshinin vrasje, tortura, rrahje brutale dhe dëbim të dhjetëra civilëve të pafajshëm nga shtëpitë e tyre. Këto krime lufte mbeten ndër plagët më të rënda të periudhës së konfliktit në Kosovë, dhe ky arrestim shënon një hap tjetër drejt vënies së drejtësisë për viktimat.

Pas arrestimit, i dyshuari është shoqëruar për intervistim nga hetuesit kompetentë. Me vendim të prokurorit të rastit, atij i është caktuar masa e ndalimit dhe është dërguar në mbajtje për procedime të mëtejshme gjyqësore.

Mes lotëve dhe një heshtjeje që peshonte rëndë, salla e Kuvendit të Kosovës u pushtua nga dhimbja dhe guximi i Vasfije Krasniqit.

Në seancën solemne për nder të 14 Prillit, Ditës Memoriale të të Mbijetuarve të Dhunës Seksuale, Krasniqi ndau një dëshmi që preku thellë të pranishmit, duke e shndërruar foltoren në një tribunë të të vërtetës që nuk mund të heshtet më.

Nën dritën simbolike të qirinjve, ky fjalim shënoi një moment reflektimi mbi rrugëtimin drejt drejtësisë dhe thyerjes së stigmës.

Vasfije Krasniqi, e cila është bërë simbol i guximit mbarëkombëtar, hapi fjalimin e saj duke kujtuar se kjo datë nuk është thjesht një shënim në kalendar, por dita që i ndau jetën përgjithmonë. Ajo kërkoi që institucionet dhe shoqëria të jenë krahu i fortë i të gjithë atyre që ende vuajnë në heshtje.

“Sot qëndroj para jush si një e mbijetuar, por mbi të gjitha si një zë që nuk zgjodhi heshtjen kurrë. 14 prilli nuk është vetëm një datë për mua, është data që ndryshoi jetën time përgjithmonë. Sot ky Kuvend bëhet një vend i veçantë i kujtesës, një vend ku dhimbja nuk fshihet, por ndriçon.” tha Krasniqi.

Krasniqi theksoi se errësira që ka mbuluar këto viktima për dekada po largohet, duke u zëvendësuar me respekt dhe prani institucionale.

“Për shumë vite drita ka munguar në jetën e shumë të mbijetuarve; heshtja, stigma dhe mungesa e mbështetjes ka bërë që shumë histori të mbesin të heshtura. Çdo qiri që ndezëm sot është një mesazh i qartë që të mbijetuarat nuk janë vetëm – zëri ynë ka rëndësi dhe dinjiteti ynë duhet të mbrohet e të respektohet.” u shpreh nën emocione Vasfije Krasniqi.

U.D. Presidentja dhe Ministrja e Drejtësisë, Albulena Haxhiu, vuri në dukje se dhuna seksuale nuk ishte rastësi, por një mjet brutal lufte i planifikuar nga Serbia për të goditur bërthamën e shoqërisë kosovare.

“Në Kosovë ky mjet brutal u ushtrua nga aparati shtetëror serb dhe kjo dhunë kishte për qëllim poshtërimin, nënçmimin dhe lëkundjen e themeleve të shtetit tonë. Autorët e këtyre krimeve mbeten të lirë jashtë juridiksionit tonë dhe nën mbrojtjen e Serbisë, por përkushtimi ynë nuk do të mungojë as me vepra e as me përpjekje”, tha Haxhiu.

Kryeministri Albin Kurti u zotua se shteti nuk do të lejojë që harresa të mbulojë krimet e forcave okupuese, duke bërë thirrje që shoqëria të marrë mbi supe detyrën e thyerjes së heshtjes.

“Kjo ditë është thirrje për drejtësi. Heshtja dhe stigma që ende rëndojnë mbi mijëra viktima vazhdojnë të peshojnë, por kjo heshtje nuk duhet të jetë barrë juaja – është detyrë e jona që ta thyejmë këtë heshtje. Serbia vazhdon të shërbejë si strehë ndaj kriminelëve që kryen këto krime.”, u shpeh Kurti.

Kurti kritikoi ashpër edhe tentativat e fundit të Beogradit për falsifikimin e së vërtetës historike, duke rikonfirmuar se sakrifica e të mbijetuarve do të nderohet gjithmonë me krenari shtetërore.

U.D. Presidentja, Albulena Haxhiu, dhe Kryeministri Albin Kurti, kanë nënshkruar sot vendimin për vazhdimin e mandatit të Petrit Ajetit si drejtor i Agjencisë së Kosovës për Inteligjencë (AKI).

Me këtë vendim, Ajeti do të udhëheqë institucionin kryesor të inteligjencës në vend edhe për një mandat tjetër pesëvjeçar.

Sipas njoftimit, ky vendim vjen si rezultat i besimit në profesionalizmin, integritetin dhe lidershipin e treguar nga Ajeti në mbrojtje të sigurisë kombëtare.

Gjatë takimit të përbashkët, krerët e shtetit e falënderuan drejtorin e AKI-së për punën dhe përkushtimin e treguar gjatë mandatit të kaluar, duke vlerësuar kontributin e tij në forcimin e institucioneve të sigurisë në Republikën e Kosovës.