Sonte bota e futbollit do t’i ketë sytë nga Mynihu dhe Londra, ku do të përcaktohen dy gjysmëfinalistët e radhës në Ligën e Kampionëve përmes dy ballafaqimeve dramatike.

Vëmendja kryesore është përqendruar në “Allianz Arena”, ku Real Madridi do të përpiqet të përmbysë disavantazhin prej një goli ndaj Bayern Mynihut.

Skuadra gjermane arriti të triumfojë në ndeshjen e parë në Madrid me rezultatin 2-1, duke detyruar “Mbretërit” që sonte të luajnë gjithçka për gjithçka në kërkim të një përmbysjeje të madhe.

Ky ballafaqim i vërtetë mes dy gjigantëve evropianë pritet të jetë një luftë e fortë taktike dhe fizike, ku lojtarët e Real Madridit do të sfidojnë mbrojtjen bavareze për të mbajtur gjallë rrugëtimin drejt titullit të kampionit.

Paralelisht me këtë superndeshje, emocione të forta priten edhe në Londër, ku Arsenali do të presë Sportingun e Lisbonës për të vulosur kualifikimin në fazën tjetër.

Në takimin e parë të zhvilluar në Lisbonë, Arsenali arriti një fitore tejet të rëndësishme me rezultatin minimal 1-0, duke krijuar një avantazh premtues për ndeshjen kthyese.

Megjithatë, Sportingu udhëton drejt Anglisë me synimin për të befasuar “Topçinjtë” dhe për të përmbysur rezultatin, ndërsa sonte pritet të mësohet përfundimisht se cili nga këto dy ekipe do të sigurojë një vend në mesin e katër më të mirave të Evropës.

Të dyja takimet priten me interes të jashtëzakonshëm, pasi mbrëmja e sotme do të diktojë fatin e disa prej skuadrave më të fuqishme të kontinentit në garën më prestigjioze për klube.

Sonte, palestra në Pejë do të jetë arenë e një prej përballjeve më intensive të sezonit në ProCredit Superligën e Kosovës. Dy prej skuadrave elitare, Peja dhe Golden Eagle Ylli, takohen në ndeshjen e dytë të serisë së parë të Play Off-it, një takim që pritet të dhurojë spektakël dhe rivalitet të lartë.

Posteri zyrtar i “Dite Ndeshjeje” paralajmëron një mbrëmje të zjarrtë me fillim nga ora 20:30, këtë të mërkurë. Nën moton “Gjithçka vendoset tani”, skuadrat do të kërkojnë fitoren në këtë fazë delikate, ku çdo gabim mund të jetë i kushtueshëm.

Në njërën anë, si nikoqirë, skuadra e Pejës,  synon të shfrytëzojë avantazhin e terrenit vendas për të kaluar përpara në këtë seri. Nga ana tjetër, “Yjet” nga Suhareka, vijnë në këtë takim me synimin e qartë për të bërë surprizën dhe për të marrë një fitore jetike në udhëtim.

Ky ballafaqim shihet si një nga më të barabartët e çerekfinaleve, duke pasur parasysh historinë dhe kualitetin e të dyja skuadrave.

Ndeshja do të transmetohet drejtpërdrejt në platformat ArtMotion dhe Kujtesa, duke u mundësuar tifozëve që nuk mund të jenë në palestër, të ndjekin çdo moment të kësaj drame basketbollistike.

Kush do t’i afrohet më shumë gjysmëfinales, Peja apo Golden Eagle Ylli? E mërkura do të na japë përgjigjen.

Kombëtarja e Kosovës në konkurrencën e femrave po kalon një formë të jashtëzakonshme në rrugëtimin kualifikues për Kampionatin Botëror 2027. “Dardanet” kanë shënuar fitoren e tretë radhazi, duke blinduar pozicionin e tyre si lidere të pamposhtura në Grupin 2 të Ligës C.

Me këtë seri pozitive, vashat tona kanë dëshmuar rritje të madhe profesionale dhe pretendime serioze për të shkruar historinë në arenën ndërkombëtare.

Ky sukses vjen si një paralajmërim i fortë para ndeshjes së radhës, ku Kosova do të kërkojë të vazhdojë këtë ecuri fantastike. Përballja e radhës, që konsiderohet vendimtare për ruajtjen e kreut të grupit, do të jetë ndeshja kthyese kundër Bullgarisë.

Ky takim do të zhvillohet këtë të shtunë, më 18 prill 2026, në stadiumin “Fadil Vokrri” në Prishtinë, duke filluar nga ora 18:00.

Federata e Futbollit dhe stafi teknik u kanë bërë thirrje tifozëve që të mbushin shkallët e stadiumit për t’u dhënë mbështetjen e nevojshme vajzave drejt objektivit të madh.

Me lojën e treguar deri më tani, Kombëtarja e Kosovës është shndërruar në favoriten kryesore për të mbyllur këtë fazë si kampione e grupit, duke hapur rrugën drejt ëndrrës botërore.

Agjencia e Ushqimit dhe Veterinarisë (AUV) ka njoftuar zyrtarisht se pas analizave laboratorike është konfirmuar rasti i parë i sëmundjes virale “Lija e Deleve dhe Dhive” (Sheep Pox/Goat Pox) në një fermë në fshatin Sazli të Ferizajt.

Menjëherë pas këtij konfirmimi, këtë të mërkurë, Ministria e Bujqësisë ka vendosur masa të rrepta kontrolli që prekin kryesisht regjionin e Ferizajt dhe atë të Gjilanit.

Sipas vendimit të AUV-së, ndalohet plotësisht lëvizja e deleve dhe dhive nga fermat, tregtimi i tyre në tregje, si dhe shitblerja, ndërsa të gjithë menaxherët e tregjeve janë urdhëruar të pezullojnë punën për kafshët e imta.

Fermat ku është konfirmuar prezenca e virusit janë vendosur në karantinë të plotë, duke ndaluar çdo hyrje-dalje, ndërkohë që fermerët janë të obliguar të raportojnë çdo ndryshim të gjendjes shëndetësore të kafshëve në numrin pa pagesë 0800 500 95.

Masat parashikojnë gjithashtu që komunat të përcaktojnë lokacione specifike për groposjen e kafshëve të ngordhura, ndërsa lëvizja lejohet vetëm nga fermat e lira direkt drejt thertoreve të licencuara me pëlqim paraprak të inspektorit.

Megjithëse lija e dhenve është një sëmundje shumë ngjitëse për kafshët dhe shkakton temperatura të larta e plagë në lëkurë, autoritetet qetësojnë qytetarët duke theksuar se kjo sëmundje nuk është zoonotike, që do të thotë se nuk paraqet asnjë rrezik për njerëzit. Policia e Kosovës dhe inspektorët komunalë do të asistojnë në mbikëqyrjen e zbatimit të këtyre masave urgjente në terren.