Ministri i Punëve të Brendshme, Xhelal Sveçla ka deklaruar sot për herë të parë se Policia e Kosovës ka qenë e gatshme edhe fizikisht që të heq barrikadat në veri të vendit, të vendosura nga banorët serbë për të kundërshtuar reciprocitetin në targa.
Këto komente Sveçla i bëri kur është pyetur nga deputetë të Komisionit për Siguri dhe Mbrojtje lidhur me problemet logjistike që ka hasur Policia e Kosovës gjatë bllokadës në veri.
“Po e them për herë të parë, ne kemi qenë te përgatitur që edhe fizikisht të largojmë barrikadat. Ka qenë çështje e vlerësimit operacional nga policia dhe politik nga qeveria qe te zgjidhet rruga me e mire e mundshme për largimin e barrikadave, nuk ka pasur asnjë ngërç në përgatitjen logjistike”, deklaroi ai.
Edhe drejtori i Policisë, Samedin Mehmeti tha se nuk ka marrë informacione për probleme logjistike nga policët në veri të vendit.
“Edhe kontratat që nuk i kemi pasur bë dispozicion kemi arritur me i përmbush me Fondin emergjent”, tha ai.
Ai mohoi që pjesëtarët e Njësisë Speciale kanë qenë të bllokuar nga serbët në veri, teksa shtoi se qarkullimi nuk është ndalur për asnjë moment.
Mehmeti foli edhe për komunikimin ndërmjet policëve, për çka tha se për shkak të terrenit radiolidhjet nuk funksionojnë çdo herë.
“Gjithçka ka funksionuar përmes rrugëve alternative. Qarkullimi nuk është ndërprerë për asnjë moment. Ne i kemi bllokuar automjetet për shkak që kanë barrikadat në kufi. Ata kanë udhëtuar me autobus, po pikat nuk kanë qenë të bllokuar as për një moment të vetëm…Sa i përket komunikimit janë përdorur disa forma. Nuk jemi kushedi sa të kënaqur me këtë sistem që e kemi por komunikuar vazhdimisht”, u shpreh ai.
E sa i përket ushqimit të pjesëtarëve të Policisë së Kosovës gjatë qëndrimit në veri të vendit në kohën kur po mbanin nën kontroll situatën në veri të vendit, Mehmeti tha se janë siguruar që një vakt të jetë i nxehtë dhe një i ftohtë.
Ndërkohë që raportimi i Sveçlës dhe Mehmetit erdhi pas një shkëputje pasi që pati tensione mes kryetarit të Komisionit për Çështje të Sigurisë, Bekë Berisha dhe ministrit Sveçla.
Nënkryetari Enver Dugolli tha se gjuha e përdorur nga deputetë të Kuvendit të Kosovës ishte arrogante dhe e papërshtatshme, për çka kërkoi ndjesë nga Sveçla dhe Mehmeti.
“Ju kërkoj ndjesë për gjuhën e papërshtatshme dhe arrogante që është përdorur. Ne e dimë që jemi në fushatë zgjedhore, por nuk duhet të keqpërdoret fushata për show medial”, tha Dugolli.
Keqardhje për situatën e krijuar më parë shprehu ministri Sveçla, i cili tha se nuk mund të jetë pjesë e lojërave të tilla.
“Më vjen keq për situatën e mëparshme, por nuk mund të jem pjesë e lojërave të tilla. Kisha planifikuar të raportojë më gjatë por për shkak të rrjedhës së gjërave, po fokusohem tek zhvillimet në veri të vendit. Atje ishte mjaft shqetësuese prania e artilerisë serbe në Kosovë, prezenca e ambasadorit rus në Serbi. Ajo në këtë rast nuk i arriti qëllimet e saj dhe u zmbraps. Në këtë rast, të gjitha tentativat e strukturave kriminale në masën më të madhe kanë dështuar. Jemi dëshmitarë se më shumë ka pasur makineri të barrikadave të vendosura sesa qytetarë. Gjatë kësaj periudhe por edhe tani, koordinimi ynë ishte i shkëlqyeshëm. Bashkëpunimi jonë me aleatët tanë ishte i shkëlqyeshëm. Ngjarjet e zhvilluara sollën edhe rezultatin final e që është pajtimi i Serbisë me reciprocitetin e plotë në targa. Deri më.sot janë lëshuar mbi 17 tiketa ngjitëse (sikersa), që mbulojnë të gjitha simbolikat shtetërore të targave të Serbisë”, tha ai.
Ndërsa drejtorin Përgjithshëm i Policisë së Kosovës foli për situatën në veri dhe gjithë ecurinë e punëve prej momentit të vendosjes së reciprocitetit më targa me Serbinë.
“Situata në veri është e qetë dhe policia është garantuese. Veriu i Kosovës është bërë një urë lidhëse e kontrabandave të ndryshme. Është vërejtur se grupet kriminale në veri janë ndërlidhur me kompani të ndryshme të ndërtimit, ndikimi i tyre është vërejtur edhe në rastin e bllokimit të rrugëve”, tha ai.
Lajmet nga UBT2 months ago
Lajmet nga UBT2 months ago
Lajmet nga UBT2 months ago
Lajmet nga UBT3 months ago