Lajmet

​Situata e menaxhueshme nga reshjet e fundit, komunat kërkojnë kod buxhetor për emergjenca

Published

6 years ago

on

Pas reshjeve të fundit atmosferike disa komuna të Kosovës u vërshuan, por nga Instituti Hidrometeorologjik i Kosovës thonë se tashmë lumenjtë që dolën nga shtrati janë qetësuar dhe gradualisht brenda disa ditëve do kthehen normalisht tek shtretërit e tyre.

Hidrologu Bashkim Kastrati thotë se duke parë edhe situatën meteorologjike që do të mbretërojë në vend, Kosova nuk do të ballafaqohet me përmbytje të tilla në një periudhë afatshkurtër. Por meqenëse ky fillim viti nisi me vërshime nëpër shumë rajone të Kosovës, nga komunat po kërkohet një kod buxhetor i veçantë për rastet emergjente.

Bashkim Kastrati, hidrolog në Institutin Hidrometeorologjik të Kosovës, ka deklaruar se për shkak të reshjeve të ditëve të fundit disa rajone të Kosovës u ballafaquan me valën e dytë të vërshimeve pasi që lumenjtë kaluan vlerat maksimale.

“Pas një stabilizimi relativ të niveleve nëpër lumenj të Kosovës, përsëri do të thotë ka qenë ajo faza e dytë e ngritjes së tyre, natyrisht pas reshjeve intensive që filluan në pjesën perëndimore të cilat pas dy ditë u shtrinë edhe në tërë territorin e Kosovës. Dhe si pasojë e tyre kemi pasur ngritje enorme të disa lumenjtë dhe natyrisht daljes së tyre nga shtrati dhe padyshim kemi pasur edhe vërshime masive nëpër disa pjesë dhe dëme materiale, por fatmirësisht kësaj here pa viktime në njerëz. Janë prekur komunat si Gjakova, Juniku, Deçani, Suhareka, Malisheva, Klina, pastaj edhe disa komuna të pjesës qendrore të Kosovës si Podujeva, Skenderaj dhe Drenasi e kështu me radhë. Dje pasdite kanë qenë ato nivelet kritike ku kanë arritur vlerat maksimale, ndërsa prej ditës së djeshme pasdite deri më sot ato janë në trend të rënies së vazhdueshme dhe nuk pritet që edhe ditëve në vazhdim të ketë vështirësi apo probleme dhe gradualisht brenda disa ditëve do të kthehen normalisht tek shtretërit e tyre”, theksoi ai.

Hidrologu i IHMK-së për KosovaPress ka deklaruar se Kosova pas këtyre vërshimeve në një periudhë afatshkurtre nuk pritet të ballafaqohet me ndonjë situatë tjetër emergjente natyrore. Ai madje thotë se ana pozitive e këtyre reshjeve të mëdha është se Kosova ka siguruar ujë të pijshëm për këtë vit.

“Pritet në vazhdim që temperaturat të jenë të ulëta dhe kjo kontribuon që kjo sasi e borës që ka rënë të qëndrojë, dhe kur e kemi një situatë të rënduar hidrologjike me vërshime të përcjell deri sot, atëherë kjo situatë ndikon pozitivisht. Në periudhën afatshkurtër nuk pritet asnjë përmbytje e karakterit të tillë sa ka qenë deri tash, dhe sa për informimin tuaj përmbytjet e datës 11 dhe 12 janar të këtij viti kanë qenë vërshimet më të mëdha në 40 vitet e fundit të cilat e kanë përfshirë Kosovën. Ana pozitive e kësaj është se në tri vitet e fundit nga viti 2017 e deri tani kemi trashëguar një deficiti të ujërave të lagështisë dhe reshjeve kemi pasur një trend të rënies së reshjeve në disa regjione por edhe në tërësi dhe kjo sasi e reshjeve përveç dëmeve që shkaktuan e ka edhe të mirën e vetë. Për disa muaj edhe fare mos të me rënë asnjë pikë shiu ne vetëm se e kemi siguruar ujin e pijshëm, këtë e them me plotë përgjegjësi, por ne jemi në muajin e dimrit dhe e dimë që sasia më e madhe e reshjeve fillon gjatë pranverës dhe natyrisht nëse e marrim periudhën e muajve të pranverës me një mesatare të sasisë së reshjeve që do të bie potencialisht, atëherë ne do të thotë pa asnjë problem këtë vit mundemi ta kalojmë”, u shpreh Kastrati.

Në anën tjetër nga komunat e Kosovës po kërkohet një kod i veçantë buxhetor për emergjenca me qëllim që të intervenohet më shpejt në rast të vërshimeve apo edhe rasteve të tjera emergjente.

Kurse, kryetari i Asociacionit të Komunave të Kosovës, Sazan Ibrahimi tha se lidhur me vërshimet e djeshme nuk është raportuar ndonjë shqetësim nga kryetarët e komunave dhe sipas tij situata emergjente është e menaxhueshme nga komunat.

Ibrahimi tha se po kërkojnë që sa më parë të funksionalizohet Fondi Emergjent dhe të bëhet kompensimi i dëmeve sidomos për familjet me asistencë sociale.

“Nuk kemi pasur ndonjë shqetësim nga kryetarët e komunave deri më tani, sa i përket reshjeve të këtyre të fundit, jo në ato reshjet më herët. Situata është e menaxhueshme nga komunat kështu vlerësohet nga kryetarët e komunave. Shpresojmë që dëmet që janë shkaktuara nga vërshimet e kaluara jo shumë të largëta të kompensohen nga fondi emergjent që është krijuar dhe ka mbetur vetëm raportet të dërgohen nga niveli lokal në atë qendror. Në sektorin e bujqësisë, Ministria e Bujqësisë është kompetente dhe në sektorin e ekonomisë familjare do të dërgohen në dikasterin e caktuar por gjithashtu edhe sa i përket infrastrukturës rrugore do dërgohen në dikasterin adekuat. Ne shpresojmë që sa më shpejt fondi emergjent të fillojë të funksionalizohet të bëhet rimbursimi i familjeve të prekura nga vërshimet e fundit duke i dhënë prioritet dhe kryetarët e komunave kanë kërkuar që t’i jepet prioritet familjare që janë në asistencë sociale”, theksoi Ibrahimi.

Kryetari i Asociacionit të Komunave të Kosovës thotë se komunat po kërkojnë një kod buxhetor për emergjenca me qëllim të një intervenimi më të lehtë financiar në rast vërshimi.

Ai madje tha se nga Qeveria e Kosovës kanë kërkuar të bëhet dhe një studim fizibiliteti për lumenjtë.

“Niveli qendror e ka të krijuar Qendrën për Emergjenca në kuadër të Ministrisë së Punëve të Brendshme, por komunat kanë kërkuar dhe kërkojnë që t’u lejohet një kod buxhetor për raste emergjente ashtu si për rastin e fundit të vërshimeve. Mirëpo, neve e kemi pasur gjatë verës edhe zjarre, edhe ato janë raste emergjente, por komunat njëherë për njëherë nuk kanë kod buxhetor sa i përket rasteve emergjente që menjëherë të dalin në terren dhe të fillojnë kompensimin e dëmeve të shkaktuara nga situatat emergjente në këtë rast nga vërshimet. Gjithashtu është me rëndësi ta kemi një studim të fizibilitetit dhe ta shohim situatën në terren, komunat me kompetencat vetanake të cilat i kanë dhe me atë buxhet që kanë bërë shumë projekte që kanë ndihmuar që kjo situatë të mos eskalojë edhe më shumë, kanë intervenuar në shtretër të lumenjve dhe kanë intervenuar në ura dhe në përmirësim të rrugëve lokale të ndryshe dhe për këtë arsye kërkojmë një kod buxhetor për emergjencë dhe të kemi një studim fizibiliteti dhe do analizohej situata në terren dhe duke e pasur atë studim fizibiliteti do të ishte edhe intervenimi financiar më i lehtë”, deklaroi ai.

Në orët e hershme të mëngjesit, përgjegjësi për Marrëdhënie Ndërkombëtare dhe Marrëdhënie me Publikun në Agjencinë për Menaxhim të Emergjencave, Nehat Koqinaj ka njoftuar që disa shtëpi banimi janë vërshuar, por përgjithësisht situata është e qetë.

Koqinaj nëpërmjet një komunikate për media ka treguar se mbrëmjen e së martës janë vërshuar dy shtëpi banimi në fshatin Kozimin të Fushë Kosovës dhe disa shtëpi në fshatin Grebnin e Dresnik të Pejës, megjithatë ai thotë se rajone të tjera situata paraqitet e qetë. Edhe në fillim të janarit vendi u përball me vërshime në disa komuna.

Related Topics:
Continue Reading

Lajmet

Ditari: Lajmet kryesore që shënuan datën 12 shtator 1993-1998

Published

1 hour ago

on

September 12, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 

12 shtator 1994

 

Në Nekoc e Kishnarekë vazhdon represioni i policisë serbe

 

Tash disa ditë, policia serbe vazhdon t’i keqtrajtoi banorët e fshatrave Nekoc e Kishnarekë të Gllogovcit, nën pretekst të vrasjes së paradoditshme të rojes së pyllit, Milaim Gashi në rrethana ende të panjohura, njofton Komisioni për Informim i Degës së LDK-së në Gllogovc.

Më 9 shtator, prej orës 11:00 deri në mbrëmje rreth orës 18:00, një ekspeditë e policisë serbe defiloi tërë ditën nëpër fshatrat e lartëshënuara. Policia ishte e pajisur me një llandrover dhe dy vetura.

Njoftohet se gjatë tërë ditës mbi fshatrat Nekoc e Kishnarekë fluturoi edhe një helikopter i policisë serbe.

Në fshatin Nekoc, policia kërkoi Bajram A.Rukiqin, i cili nuk gjendej në shtëpi. Bajram A.Rukiqi gjendet i shtrirë në spital, pasi ai ditë më parë është keqtrajtur brutalisht nga ana e policisë serbe, me ç’rast mori plagë të rënda trupore.

Ndërkaq, në fshatin Kishnarekë, policia serbe i provokoi nxënësit dhe arsimtarët e shkollës fillore “7 Marsi” duke i “përshëndetur” me dy gishtat lart.

E njëjta ekspeditë e policisë serbe, vazhdoi rrugën për në fshatin Llapushnik, me ç’rast morën Ferat Sopin dhe djalin e tij (emrin e të cilit nuk arritëm ta mësojmë, si dhe veturën e tyre të markës “Reno 4”).

Pardje, në fshatin Kishnarekë, policia kërkoi Rexhep A.Hykollin, i cili nuk gjendej në shtëpi. Më pas, policia legjitimoi çdo kalimtar të rastit, i cili kalonte nëpër fshatin Kishnarekë.

 

 

12 shtator 1995

 

 

Tragjedi e rëndë e pasagjerëve në një barkë shqiptare

 

Në një barkë që transportonte refugjatë nga Shqipëria për në Itali, ndodhi një tragjedi e rëndë në të cilën humbën jetën së paku 3 udhëtarë, ndërsa 12 konsiderohen të humbur.

Barka u përmbys për shkak të valëve të larta të shkaktuara nga një trajekt që kaloi fare pranë barkës.

Korrespondenti i BBC-së nga Roma, Ilir Gurakuqi, tha se edhe 10 pasagjerë të tjerë janë të lënduar.

Kjo ngjarje do të ishte edhe më tragjike sikur mos të ndërhynte një anije amerikane që patrullon në ujërat e Adriatikut, në kuadër të embargos ndaj ish-Jugosllavisë.

 

 

12 shtator 1997

 

Vatikani: Nënë Tereza mund të shpallet e shenjtë në kohë rekorde

 

Sekretari i Shtetit i Vatikanit Angjelo Sodano deklaroi sot se Papa Gjon Pali e donte shumë Nënën Tereze dhe se të gjithë në Kishën Katolike shpresojnë se ajo mund të kanonizohet shumë shpejt. “Procesi i shndërrimit të nënës Tereze në shenjtore mund të realizohet brenda një kohe rekorde – deklaroi ai.

Me rastin e mëparshme të shenjtërimit, zakonisht afati ka qenë i gjatë deri në 30 vjet. Sipas praktikës së deritashme së pari të caktohet një komision nga Vatikani i cili e vlerëson deri në hollësi veprën dhe shëmbëlltyrën e kandidatit për të shenjtë, e pastaj ai vlerësim i dorëzohet Papës. Pikërisht pse shëmbëlltyra dhe vepra e Nënës Tereze është tejet humane, dhe e pastër, mund të pritet që ajo të shpallet e shenjtë në kohë rekorde, thuhet në njoftimin e “Bujkut”.

 

12 shtator 1998

 

Gjatë sulmeve të djeshme në fshatrat e Skënderajt janë vrarë 3 dhe janë plagosur 16 shqiptarë

 

Dje, që në orët e hershme të mëngjesit, një konvoj i madh i forcave të ushtrisë dhe të policisë serbe i përbërë nga 58 tanksa, 38 kamionë dhe automjete të tjera të motorizuara nga Mitrovica arritën në Llaushë, ndërsa menjëherë nga këto forca filluan të granatohen fshatrat Rezallë, Ticë, Plluzhinë, Likoc e Makërmal, i tha sot QIK-ut Fadil Ymeri, përgjegjës i Këshillit për Informim në fshatin Qirez të Skënderajt.

Bëhet e ditur se gjatë kësaj ofensive, janë zhvendosur shumë banorë, të cilët e kaluan natën nën qiellin e hapur dhe gjendja e tyre është shumë e rëndë.

Edhe sot, që në orët e hershme të mëngjesit, forcat e ushtrisë dhe të policisë serbe, filluan t’i granatojnë fshatrat e lartpërmendura dhe fshatrat tjerë si Vërbovcin, Abrinë, Açarevën, Polluzhën e Kryshecin. Këto fshatra po sulmohen me artileri të rëndë, duke filluar nga minahedhësit deri te raketat e tipit tokë-tokë.

Gjatë këtrye dy ditëve, forcat e UÇK-së kanë bërë një rezistencë të fuqishme dhe me heroizëm po u kundërvihen forcave armike.

Si pasojë e bombardimeve të forcave serbe, deri tash janë vrarë tre shqiptarë, në mesin e të cilëve dy fëmijë dhe kanë plagosur 16 civilë të tjerë.

Bëhet e ditur se forcat serbe kanë vrarë, Leutrim Ahmetin (9), Xufë Ahmetin (8) dhe Ramë Ahmetin (42), ndërsa kanë plagosur Fatmire Malush Ahmetin (18), Gjyle Racin (30), Brahim Ahmetin (29), Makfirete Ahmetin (14), Bajram Ahmetin (11), Shpresa Ahmetin (9), Naser Gashin (15), Feti Musliun (22), Nuredin Bacajn (39), Xheladin Behramin (53), Rifat Smakiqin (34), Fatmire Ahmetin (35), Arben Makollin (24), Tahir Lladrovcin (22), Jahir Dërgutin (44) dhe Skënder Ahmetin (39).

Gjithashtu, si pasojë e bombardimeve të forcave serbe, deri në Bëhet e ditur se nga pasojat e bombardimeve serbe deri tash janë shkatërruar e djegur qindra shtëpi shqiptare dhe objekte të tjera ndihmëse.

 

Continue Reading

Lajmet

Gjithçka gati për “Marshin për Liri”

Published

2 hours ago

on

September 12, 2026

By

Në sheshin “Skënderbeu” në Prishtinë kanë përfunduar përgatitjet e fundit për “Marshin për Liri”, i cili nis sot në orën 14:00 në mbështetje të ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi, raporton Ekonomia Online.

Nga platforma “Liria Ka Emër” kanë bërë thirrje për pjesëmarrje masive të qytetarëve, ndërsa marshi zhvillohet para shpalljes së aktgjykimit të Gjykatës Speciale, të paralajmëruar për 16 shtator.

Ismail Tasholli nga kjo platformë ka thënë se bazuar në interesimin dhe gatishmërinë e qytetarëve, pritet që marshi të jetë masiv.

“Marshi me siguri do të jetë shumë masiv, edhe në bazë të asaj se çka kemi parë në terren edhe entuziazmit edhe gatishmërisë së njerëzve, në thirrjen tonë qytetare që të marshojnë për liri nën moton ‘Kosova po pret’”, tha ai.

Tasholli ka bërë të ditur se në sheshin “Skënderbeu” janë duke u përfunduar detajet e fundit të përgatitjeve, ndërsa bina tashmë është gati për nisjen e aktivitetit.

“Tashmë e shihni, bina është gati, në përfundim janë do të thotë detajet e fundit, që e rrumbullakësojnë edhe nisjen e këtij marshi qytetar, që ka për qëllim të përçojë një mesazh shumë të rëndësishëm, që Kosova me të vërtetë po pret, po i pret çlirimtarët në shtëpinë e tyre”, tha Tasholli.

Ai u ka bërë thirrje qytetarëve që të nisen më herët drejt Prishtinës, në mënyrë që në orën 14:00 të përcillet mesazhi i organizatorëve.

“Po, i ftoj le të vijnë sa më herët, Prishtina e ka zemrën e madhe, po i uron mirëseardhje të gjithë qytetarëve të saj, edhe le të nisen sa më herët sepse është shumë e rëndësishme që sot të përçojmë një mesazh bashkë në ora 14:00, që Kosova po pret. Jemi duke i pritur të gjithë”, tha ai.

Continue Reading

Lajmet

Kurti i bën thirrje Hamzës për takim, do ta votojmë një deputet të PDK-së për nënkryetar të Kuvendit

Published

20 hours ago

on

September 11, 2026

By

Kryeministri në detyrë, Albin Kurti, ka thënë se Lëvizja Vetëvendosje do ta votojë një deputet të PDK-së për nënkryetar të Kuvendit.

Ai ka kërkuar që emrat e kandidatëve të diskutohen në takimet mes partive dhe ka thënë se ende nuk është tepër vonë për të arritur marrëveshje.

“Ne medoemos një deputet të PDK-së do ta votojmë për nënkryetar të Kuvendit. Ne medoemos një deputet ose deputete të LDK-së do ta votojmë për nënkryetar të Kuvendit”, ka deklaruar Kurti.

Kurti ka thënë se dëshiron të takohet me kryetarin e PDK-së, Bedri Hamza, për të diskutuar emrat e kandidatëve.

Ai e ka cilësuar si të keqardhshme braktisjen e procesit të konstituimit të Kuvendit, duke thënë se sot është humbur një mundësi për përmbylljen e tij.

“Jemi vonë, por nuk është tepër vonë. Nëse e bëjmë këtë të dielën, megjithatë do të konsiderojmë që përgjithësisht dhe së bashku ishim të suksesshëm”, ka deklaruar Kurti./A.K/

Continue Reading

Lajmet

Avokati: Kërkojmë shpalljen të pafajshëm të Fazliut, të akuzuarit s’u intervistuan nga ZPS-ja

Published

20 hours ago

on

September 11, 2026

By

Avokati i Fadil Fazliut, David Young ka kërkuar shpalljen të pafajshëm të Fadil Fazliut.

“Kërkojë me respekt që verdikti në këtë rast të korrigjohet dhe të jetë në përputhje me detyrën publike që është pafajësia e z.Fazliu”, tha Young.

Ai tha se gjatë ngritjeve të akuzave në këtë çështje, Prokuroria nuk ka intervistuar asnjëherë të dyshuarit.

 “Pjesa më e madhe e këtyre personave, e këtyre të akuzuarve nuk janë intervistuar asnjëherë. Besoj që z.Kilaj mund të ketë qenë para shumë shumë vitesh por pjesa më e madhe e të akuzuarve nuk janë intervistuar asnjëherë nga Prokuroria. Pra, mund të nxjerrim deduktimin nga kjo që Prokuroria ka marrë qasjen strategjike për të mos i intervistuar ata. Për të mos i intervistuar këta persona lidhur me pretendimet dhe a është kjo mënyrë  e drejtë për të filluar hetimet ap ngritur akuzat?! Unë besoj që jo. Unë thgem qartësisht që nuk është kështu”, tha David Young.

Young parashtroi se Fadil Fazliu duhej të paktën që të intervistohej por atij nuk iu dha mundësia të thoshte atë që kishte për të thënë.

“Nga përvoja juaj e gjerë i nderuar gjykatës ju e dini që normalisht ju jepet prokurorëve dhe hetuesve mundësia për pyetjet që do i bëjnë dëshmitarit për pretendimet dhe lidhur me provat. Në të njëjtën mënyrë, intervista I jep mundësinë të dyshuarit që të jep përgjigjet e tij ndaj pretendimeve që ngrihen kundër tij. Ndonjëherë është mënyrë e mirë për të vërtetuar provat dhe për të verifikuar pretendimet dhe për të parë se si personi përgjigjet”, tha ai.

David Young tha se kjo është mënyrë e duhur për të verifikuar provat nga mënyra se si përgjigjet I dyshuari.

“Por pas intervistave, është praktikë e zakonshme për prokurorët në nivel kombëtar dhe ndërkombëtarë që të marrin vendimin se nëse do të vazhdojnë më tej ndjekjen kundër të dyshuarit, të ngrenë akuza ndaj tij dhe kjo mund të varet nga ajo që është thënë gjatë intervistës apo jo”, tha ai.

Me kaq përfundoi fjalën përfundimtare mbrojtja e Fadil Fazliut për të vazhduar më pas me mbrojtjen e Hajredin Kucit e përfaqësuar nga avokati Alexander Admiral./A.K/

Continue Reading

Të kërkuara