Lajmet

​Si të përballeni me bullizmin në vendin e punës?

A ndiheni gjatë gjithë kohës të frikësuar dhe të tmerruar nga ndonjë koleg/e në punë?

Published

on

A ke njohuri në lidhje me shenjat të cilat tregojnë që po bullizoheni në vendin tuaj të punës? Nëse nuk e keni plotësisht të qartë, atëherë lexoni përgjigjuni në pyetjet në vazhdim për ta kuptuar!

A ndiheni gjatë gjithë kohës të frikësuar dhe të tmerruar nga ndonjë koleg/e në punë? A është dikush i cili ju ofendon, ju bërtet ose ju hedhë poshtë, për ndonjë arsye që është e parëndësishme për punën? A është dikush në punë që flet për ju gjatë mbledhjeve, ju kritikon apo ka guxim që t’jua vjedhë meritat?

Nëse është përgjigja “po” për të gjitha këto pyetje, atëherë mundësia për të qenë në mesin e miliona punonjësve në botë që bullizohen janë të mëdha.

Kur e keni ndjenjën e frikës brenda vetes për të marrë pjesë në takime, e shmangni shkuarjen në pjesën e ngrënies, bazuar se kush është aty, ose edhe ndrydheni përpara se të merrni pjesë në ndonjërin nga funksionet e kompanisë për punonjësit, problemi nuk është sepse jeni të turpshëm. Në të tilla kushte, ndaluni dhe shihni ndërveprimet e disa nga kolegët, mbase do ta gjeni që dikush prej tyre është duke ju bullizuar!

Si të përballeni me këtë gjendje?

Një gjë duhet t’ia bëni vetes të qartë: Nëse i toleroni këto sjellje, ju po lini hapësirë që këto veprimet të shkojnë më tej. Prandaj, mësoni disa veprime të cilat mund t’ju ndihmojnë në këtë drejtim!

Vendosni kufizime se deri ku mund të toleroni

Është shumë e rëndësishme që pasi ta keni vendosur kufirin në mendjen tuaj, ta ushtroni edhe të drejtën për t’i thënë dhunuesit ta ndalojë sjelljen. Për të mos u ngatërruar gjatë përballjes me të, përsëritni disa hapa me mikun/mikeshën tuaj në mënyrë që ta dini se çfarë t’i thoni ngacmuesit kur ai ju sulmon.

Përshkruani sjelljen që e shfaqë dhunuesi e as mos ofroni mendime, thjesht përshkruani atë se çfarë shihni! Nuk është forma e duhur t’i thoni që është njeri i keq, kjo do të ishte e pakuptimtë.Tregoni ngacmuesit saktësisht se si sjellja e tij po ndikon në punën tuaj! Tregoni ngacmuesit se çfarë sjellje nuk do të duroni më! Qëndroni me deklaratën tuaj dhe nëse ngacmuesi shkel hapësirën tuaj, kaloni në konfrontim!

Përballni ngacmuesit me sjelljen e tyre

Nëse ngacmuesi ju telefonon dhe jua ngre zërin, bëjani me dije që ai po bërtet dhe dilni nga dhoma ose mbyllni telefonin! Mos harroni që jeni një i rritur, po përballeni me një zemërim të paarsyeshëm! Kjo qasje konfrontuese funksionon edhe në takime. Nëse dhunuesi po flet për ju me ankesa dhe kritika, bëjani atij një pyetje të drejtpërdrejtë për atë që ai rekomandon në vend të kësaj! Kërkoni nga ai t’ju japë zgjidhje në vend që t’i përgjigjeni ankesave dhe kritikave!

Dokumentoni veprimet e bullizuesit

Sa herë që ndiheni të ngacmuar, dokumentoni datën, orën dhe detaje të tjera të ngacmimit! Shihni nëse është edhe dikush tjetër dëshmitar i atij momenti! Nëse vendosni që të drejtoheni të departamenti i burimeve njerëzore do ta keni më të lehtë për ta dokumentuar atë. Kjo u jep atyre që ta kuptojnë që nuk po lëndohen vetëm ndjenjat tuaja, por edhe suksesi i biznesit.

Është me e lehtë për t’u dokumentuar nëse ngacmimi ndodhë në email, ose ndonjë tekst tjetër. Në raste të tilla mbani kopje të shtypur apo edhe të ruajtur në kompjuterin tuaj! Nëse vendosni të ngrini akuza në të ardhmen, duhet të keni dëshmitarë dhe dokumentacion të datës.

Edhe kolegët mund të jenë cak i bullizmit

Vëzhgoni nëse ai që po ju bullizon e bën të njëjtën edhe me ndonjërin nga kolegët tuaj! Nëse po, atëherë kërkoni nga ata që ta dokumentojnë sjelljen e tij, njëjtë sikur edhe ju! Kjo do t’ju ndihmojë të krijoni një rast më të fortë që organizata juaj të ndërmarrë veprime.

Nëse pesë prej jush përjetojnë ngacmimin dhe pesë nga kolegët tuaj e dokumentojnë ngacmimin, atëherë ju ndërtoni një rast, ndaj të cilit burimet njerëzore dhe menaxhmenti juaj mund të përgjigjen ndaj kësaj sjelljeje. Ata kanë nevojë për prova dhe dëshmitarë.

Tregoni menaxhmentit

Nëse i keni ndjekur të gjitha udhëzimet e vogla, për t’u përmirësuar puna, por kjo nuk e ka ndaluar ngacmuesin, atëherë është koha për të kërkuar ndihmë. Shkoni të menaxheri juaj ose burimet njerëzore, bashkë me dokumentet tuaja dhe bëni një ankesë zyrtare! Është koha që të merret seriozisht. /Akademi Pune

Lajmet

Protestë e re kundër shtrenjtimit të rrymës në Prishtinë

Published

on

By

Grupi “Asnjë cent më shumë” ka njoftuar se do të organizojë një protestë të re më 19 prill, kundër rritjes së çmimit të energjisë elektrike. Protesta do të mbahet në sheshin “Skënderbeu” në orën 12:00, dhe organizatorët kanë ftuar qytetarët të marrin pjesë në masë.

Besnik Shabiu, organizatori i protestës, ka deklaruar se protesta është një reagim ndaj vendimit të ZRRE-së për rritjen e çmimit të energjisë elektrike, duke theksuar se, nëse autoritetet nuk reagojnë, grupi nuk përjashton mundësinë e përshkallëzimit të aksioneve. Ai paralajmëroi se mund të ndodhin bllokime të rrugëve dhe institucioneve, për të siguruar që zëri i qytetarëve të dëgjohet.

Shabiu ka shtuar se protesta e nesërme vjen në një moment të rëndësishëm, pasi të njëjtën orë mbahet edhe vazhdimi i seancës konstituive të Kuvendit të Kosovës. Ai bëri thirrje për deputetët e zgjedhur që, sapo Kuvendi të konstituohet, të thirret komisioni për energji dhe ZRRE-ja për të raportuar mbi çështjen e rritjes së çmimit të energjisë.

“Zëri i qytetarëve duhet të dëgjohet pa ndërprerë. Ne do të vazhdojmë të jemi të zëshëm, dhe nëse pas kësaj proteste nuk ka reagim, do të jemi të detyruar të përshkallëzojmë aksionet”, tha Shabiu.

Ai gjithashtu njoftoi se po shqyrtohen mundësitë e pezullimit të pagesave për energjinë elektrike për qytetarët si një masë për të mbrojtur interesat e tyre. “Ky është një kërkesë legjitime e qytetarëve. Kur institucionet nuk punojnë për qytetarët, pse duhet të funksionojnë?”, shtoi ai.

Në anën tjetër, Ardian Bajraktari, një nga përfaqësuesit e grupit, ka bërë të ditur se ekipi i tij po punon për hartimin e padisë për anulimin e vendimit të aktit administrativ nga ZRRE. Sipas tij, ky vendim është marrë në shpërputhje me autorizimet e këtij institucioni dhe ka dëme të mëdha për qytetarët. Ai ka njoftuar se janë duke përgatitur gjithashtu një propozim për një masë të përkohshme, për të shtyrë ekzekutimin e vendimit derisa të shqyrtohet nga gjykatat.

Ky zhvillim vjen pas njoftimit të ZRRE-së për një rritje të çmimit të energjisë elektrike për 16%, që do të hyjë në fuqi nga muaji maj. Ky vendim ka shkaktuar reagime të shumta nga qytetarët, bizneset dhe subjektet politike, që po kundërshtojnë një rritje të tillë. Protesta të ngjashme janë mbajtur tashmë dhe grupet e aktivistëve po kërkojnë anulimin e këtij vendimi.

Për më shumë, grupi “Asnjë cent më shumë” ka paralajmëruar se do të vazhdojnë aksionet deri në arritjen e kërkesave të tyre dhe kanë ftuar qytetarët të bashkohen në protestën e nesërme për të shprehur pakënaqësinë e tyre ndaj shtrenjtimit të rrymës.

Continue Reading

Lajmet

Osmani dekoron me medalje tre të mbijetuar të dhunës seksuale gjatë luftës

Published

on

By

Presidentja e Republikës së Kosovës, Vjosa Osmani, ka dekoruar me medaljen “Nderi i Republikës së Kosovës” tre të mbijetuar të dhunës seksuale gjatë luftës së fundit në Kosovë. Në një ceremoni të organizuar në Presidencë, medalja iu dorëzua Vasfije Krasniqi-Goodman, Shyrete Tahiri-Sylejmani dhe Ramadan Nishori, të cilët kanë folur publikisht për përvojat e tyre të dhunës nga forcat serbe gjatë luftës.

Në fjalimin e saj, Presidentja Osmani ka vlerësuar guximin e të mbijetuarve për të ndarë me publikun përvojat e tyre dhe ka theksuar rëndësinë e dëshmive të tyre për drejtësinë dhe të vërtetën historike të Kosovës. Ajo ka shtuar se këta individë janë dëshmi e gjallë e luftës për drejtësi dhe kanë kontribuar në ndriçimin e rrugës së drejtë të historisë së vendit.

“Ka momente ku fjalët nuk mjaftojnë për të shprehur mirënjohjen, siç ka edhe njerëz që me guximin e tyre të lënë pa fjalë. Sot jemi këtu për t’iu përulur me respektin më të thellë përballë tre individëve që janë më shumë se thjesht individë, sepse me dhimbjen e tyre kanë ndriçuar rrugën e drejtë së vërtetës, drejtësisë dhe shpresës. Ju jeni zëri që keni zgjedhur dinjitetin, jeni zëri i të mbijetuarve që kanë zgjedhur heshtjen. Ky është një premtim i gjallë se historia nuk do t’i harrojë,” tha Osmani.

Pas dekoratës, Ramadan Nishori shprehu mirënjohjen për përkrahjen nga populli, duke theksuar se ndihej mirë që kishte marrë mbështetje në këtë rrugëtim të vështirë. “E përshëndes gjithë popullin tonë që më ka përkrahur këto ditë,” tha ai shkurt.

Vasfije Krasniqi, një tjetër e dekoruar, bëri thirrje që viktimat e dhunës seksuale të flasin hapur dhe të kërkojnë drejtësi. “Dua të falënderoj për qasjen, angazhimin. Të dashura viktima, ju lutem, ku do që jeni, ka ardhur koha të kërkojmë drejtësi. Lirojeni shpirtin që të mos ia falim Serbisë krimin që ka kryer,” tha Krasniqi.

Shyrete Tahiri-Sylejmani, gjithashtu e dekoruar, theksoi rëndësinë e drejtësisë për arritjen e paqes. “Kur të kemi drejtësi, kemi paqe. Faleminderit për kurajën që na jepni,” përfundoi ajo.

Continue Reading

Lajmet

Prokuroria kërkon vazhdimin e paraburgimit për Selimin dhe Krasniqin

Published

on

By

Prokuroria në Hagë ka kërkuar vazhdimin e paraburgimit për Rexhep Selimin dhe Jakup Krasniqin edhe për dy muaj të tjerë.

Në kërkesën për Krasniqin e ngjashëm edhe për Selimin, Prokuroria thotë se përfundimi i paraqitjes së provave nga ana e tyre rrit rrezikun e pengimit të drejtësisë dhe kryerjes së krimeve të tjera.

Veç kësaj, ZPS ka thënë se kjo justifikon edhe rishqyrtimin e rrezikut të arratisjes në vendimet për vazhdimin e paraburgimit. E njëjta gjë është theksuat edhe tek vendimi për Rexhep Selimin.

Sipas tyre vazhdon të ekzistojnë dyshime të bazuara se Jakup Krasniqi ka kryer një ose më shumë prej krimeve që bien në jurisdiksiomin e DHSK-së. Madje, Prokuroria thotë se ky dyshim është përforcuar edhe nga provat e ZPS-së që tashme janë përfshirë në dosjen e gjykimit.

Ata thonë se, fakti që Krasniqi dhe Selimi tani kanë njohuri të veçantë mbi rastin dhe provat kundër tij e rrit rrezikun që ai mund të kryejë krime të tjera, përfshirë kundër dëshmitarëve që kanë dhënë ose mund të japin dëshmi në çështje dhe/ose që mund të paraqiten para këtij Paneli në faza të ardhshme të procedurave.

“Për më tepër, Selimi tashmë është në dijeni të identitetit të të gjithë dëshmitarëve të ZPS-së dhe të provave të tyre. Përfundimi i çështjes së ZPS-së nuk e zvogëlon rrezikun e pengimit, por e rrit atë, pasi i akuzuari tashmë ka njohuri të plotë për përmbajtjen e çështjes ndaj tij. Siç është theksuar nga Trupi Gjykues, ekziston rreziku që ndërhyrjet me qëllim për të siguruar tërheqje të dëshmive dhe/ose për të dekurajuar dëshmitarët e ardhshëm nga dhënia e dëshmive mund të pengojnë përparimin e procedurës. Më tej, ekziston mundësia që dëshmitarët të thirren sërish, duke i bërë ata të cenueshëm ndaj përpjekjeve për ndërhyrje”, thuhet në kërkesën e Prokurorisë për Selimin.

Përveç rrezikut të arratisjes dhe pengimit të procedurave, Prokuroria ka thënë se masat e vendosura ne objektet e paraburgimit kanë ofruar garanci kundër vizitave dhe komunikimeve të pa-monitoruara si masa për të minimizuar rreziqet përkatëse.

Ata thonë se paraburgimi mbetet proporcional dhe i arsyeshëm veçanërisht që procedurat tashmë kanë përparuar.

Ndryshe, Prokuroria më 15 prill 2025 ka njoftuar se ka përfunduar paraqitjen e provave në këtë rast.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /Betimi për Drejtësi/

Continue Reading

Lajmet

Rama: Vendimi për ndërprerjen e projektit në shesh nuk është i mbështetur ligjërisht

Published

on

By

Kryetari i Prishtinës, Përparim Rama, ka deklaruar se vendimi për ndalimin e punimeve në sheshin “Xhorxh Bush” është i paligjshëm dhe i pambështetur në argumente juridike. Ai tha se institucionet që morën këtë vendim po ndikohen nga qëllime politike, edhe pse duhet të veprojnë në mënyrë të pavarur.

“Për herë të dytë janë ndërprerë punimet në një projekt të planifikuar për transformimin e hapësirës publike. Arsyetimet për këtë ndërhyrje nuk qëndrojnë në bazë ligjore dhe nuk janë ngritur nga palët përkatëse,” tha Rama në një konferencë për media.

Ai theksoi se projekti ka për qëllim përmirësimin e hapësirës publike dhe integrimin e trashëgimisë kulturore në zhvillimin urban të qytetit.

“Ka munguar përgjigjja nga Ministri për një debat publik për këtë çështje, edhe pse kemi qenë të hapur për diskutim,” shtoi ai.

Rama njoftoi se Komuna e Prishtinës do të ndjekë rrugë ligjore ndaj veprimeve që, sipas tij, bien ndesh me ligjin.

“Kryeqyteti do të vazhdojë procedurat ligjore ndaj të gjithë atyre që shkelin ligjin,” përfundoi ai.

Continue Reading

Të kërkuara