Kryetari i Lidhjes Demokratike të Kosovës (LDK), Lumir Abdixhiku, ka refuzuar ftesën e ushtrueses së detyrës së presidentes, Albulena Haxhiu, për takimin e liderëve të partive politike.

Siç raporton KOHA, nga LDK-ja kanë thënë se nuk do të marrin pjesë në takim, pasi Haxhiun e konsiderojnë vetëm deputete të Kuvendit të Kosovës. Megjithatë, LDK-ja është shprehur e gatshme të takohet me kryetarin e Lëvizjes Vetëvendosje, Albin Kurtin, për të diskutuar zhbllokimin e situatës politike.

Ftesën e Haxhiut e kanë refuzuar edhe PDK-ja dhe Aleanca. Nga PDK-ja kanë deklaruar se çështja e zgjedhjes së presidentit mund të trajtohet vetëm pasi të funksionalizohet Kuvendi.

Edhe Aleanca ka mbajtur të njëjtin qëndrim, duke kërkuar fillimisht konstituimin e Kuvendit. Shefi i Grupit Parlamentar të Aleancës, Besnik Tahiri, ka thënë se partitë opozitare nuk duhet të fajësohen për refuzimin e takimit.

Haxhiu kishte ftuar liderët e partive ose përfaqësuesit e tyre në një takim konsultativ të martën në orën 09:00, për të diskutuar zhvillimet aktuale politike dhe institucionale, përfshirë zgjedhjen e një presidenti konsensual dhe formimin e institucioneve.

Ndërkohë, kryesuesi i seancës konstituive, Avni Dehari, ka deklaruar se fillimisht duhet të arrihet marrëveshje për presidentin dhe më pas do të ftohen deputetët për vazhdimin e seancës së konstituimit të Kuvendit./A.K/

Gjatë javës që lamë pas, në Klinikën e Gjinekologjisë dhe Obstetrikës janë realizuar gjithsej 152 lindje, nga të cilat kanë ardhur në jetë 157 fëmijë, duke përfshirë edhe 5 çifte binjakësh.

Sa i përket metodave të kryerjes së lindjeve, 90 prej tyre u realizuan në mënyrë spontane (natyrale), ndërsa 62 të tjera u kryen përmes operacionit cezarian. Përsa i përket gjinisë së të porsalindurve, bilanci i javës shënon 85 djem dhe 72 vajza.

Nga Klinika e Gjinekologjisë dhe Obstetrikës konfirmojnë përkushtimin e tyre të vazhdueshëm për të ofruar kujdes dhe shërbime profesionale mjekësore, me synim garantimin e shëndetit dhe mirëqenies për të gjitha nënat dhe foshnjat. /E.A/

Prokuroria Themelore në Pejë, në bashkëpunim me Ekipin për Hetimin e Autokrimeve pranë Drejtorisë Rajonale të Policisë, ka përfunduar me sukses një operacion për sekuestrimin e një automjeti të llojit “BMW X6”, i cili kërkohej nga autoritetet gjermane.

Njoftimi i procedurës filloi pas marrjes së informacioneve nga Gjermania, përmes zyrës së ILECU-së, pasi ndaj shtetasit kosovar me inicialet Sh.Q. ishte iniciuar një procedurë penale për veprën “Shpërdorimi i pasurisë së huaj”.

Më 7 gusht 2026, pas lokalizimit të veturës, u krye sekuestrimi dhe Prokurori i Shtetit lëshoi urdhër për ndalimin e saj të përkohshëm. Pas përfundimit të të gjitha procedurave të nevojshme juridike, më 14 gusht 2026, u lëshua urdhri zyrtar për kthimin e automjetit te pronari i tij legjitim, shtetasi gjerman me inicialet R.D.

/E.A/

Një shtetas shqiptar 85-vjeçar ka ndërruar jetë si pasojë e një arresti kardiak, teksa avioni me të cilin po udhëtonte po kryente fazën e uljes në aeroportin “Guglielmo Marconi” të Bolonjës.

Sipas të dhënave paraprake, i moshuari po udhëtonte së bashku me familjen e tij dhe për shkak të gjendjes së rënduar shëndetësore kishte kërkuar ndihmë mjekësore gjatë fluturimit. Pavarësisht përpjekjeve, ai pësoi një goditje fatale pikërisht gjatë manovrës së uljes së mjetit fluturues.

Me të prekur token avioni, në vendngjarje mbërritën menjëherë ekipet e emergjencës mjekësore dhe njësitë e Policisë që shërbejnë në ambientet e aeroportit për kryerjen e procedurave të nevojshme. /Abcnews/