Zinedine Zidane ka pranuar se ëndrra e tij mbetet stoli i Kombëtares së Francës, megjithëse ende nuk është e qartë kur mund të ndodhë kjo.

Në një intervistë gjatë Festivalit “dello Sport” , legjenda franceze theksoi se është i gatshëm të rikthehet në stolin e trajnerit pas disa viteve pushim.

“Jam i sigurt se do të kthehem te trajneri dhe ajo që dua është të bëhem trajner i ekipit kombëtar një ditë; do ta shohim. Juventusi? Nuk e di, por është gjithmonë në zemrën time”, u shpreh Zidane.

Zidane, që nuk ka drejtuar asnjë skuadër që prej largimit nga Real Madridi në vitin 2021, foli edhe për filozofinë e tij të punës.

“Për të qenë trajner i mirë, gjëja më e rëndësishme është pasioni për futbollin dhe dëshira për t’u përcjellë lojtarëve atë që ke brenda vetes. Sipas mendimit tim, trajneri luan një rol vendimtar, madje 80% në suksesin e ekipit”, tha ai.

Duke kujtuar vitet me Juventusin, Zidane nuk i kurseu lavdet për bashkëlojtarët dhe trajnerin e tij të atëhershëm. “Del Piero ishte i jashtëzakonshëm, kishte diçka më shumë se të tjerët. Marcello Lippi më dha besim pas një fillimi të vështirë, më tha: ‘Do të kesh një karrierë të shkëlqyer dhe do ta bësh këtu’”, tregoi francezi.

Në fund, Zidane ndaloi edhe te talenti i ri spanjoll Lamine Yamal, për të cilin kishte vetëm fjalë vlerësimi.

“Të shohësh se si e prek topin më emocionon,” përfundoi ai./S.K/KP/

Presidentja e Komisionit Evropian, Ursula von der Leyen në konferencën e përbashkët për shtyp sot me kryeministrin Edi Rama, tha se Shqipëria ka bërë një progres të mrekullueshëm në rrugën drejt integrimit në Bashkimin Evropian.

Von der Leyen vlerësoi punën e bërë nga qeveria shqiptare dhe theksoi se mbështet ambicien e kryeministrit Edi Rama për mbylljen e grup-kapitujve deri në fund të vitit 2027.

“Mesazhi im i parë është mjaft i qartë: Shqipëria është në rrugën e duhur drejt BE-së. Ju keni bërë një rrugë të gjatë, keni bërë progres, por dua të theksoj se është një progres i mrekullueshëm, në një shpejtësi rekord dhe një përshpejtim i vërtetë në tre vitet e fundit.

“5 nga 6 grup-kapitujt janë të hapur, ne planifikojmë të hapim të fundit në vjeshtë. Qëllimi juaj është të mbyllni negociatat deri në vitin 2027. Është ambicioze, por ne na pëlqen ambicia. Ne jemi të gatshëm dhe do të jemi me ju në çdo hap të kësaj rruge”, tha Von der Leyen.

Von der Leyen theksoi se Shqipëria është plotësisht në përputhje me politikën e jashtme të sigurisë me Bashkimin Evropian.

“Momenti gjeopolitik është tani këtu. Agresioni i Rusisë kundër Ukrainës ka riformësuar kontinentin tonë dhe çdo komb evropian duhet të zgjedhë vendin e tij dhe Shqipëria e ka bërë zgjedhjen e saj, jeni plotësisht në përputhje me politikën e jashtme të sigurisë së BE-së dhe së bashku veprojmë si një”, tha ajo.

Më tej Presidentja e KE-së theksoi se ekonomia jonë ka fituar akses në tregun e përbashkët dhe në investimet e reja të BE-së.

“Që të afroheni me Bashkimin Evropian, nuk ka të bëjë vetëm me politikat, por ka të bëjë edhe për një biznes të zgjuar dhe në të vërtetë dy vite më parë ne lançuam Planin e Rritjes për Ballkanin Perëndimor, dhe parimi juaj është mjaft i qartë: ekonomia juaj ka fituar akses në tregun e përbashkët dhe në investime të reja të BE-së dhe në këmbim ju zbatoni reforma kyçe.

Dyert e sektorit të tregut të vetëm janë të hapura. Kemi një treg të gjerë të përbashkët. Plani i Rritjes ka potencialin që të dyfishojë ekonominë e vendeve të Ballkanit Perëndimor në këtë dekadë dhe shohim që tashmë ka filluar të japë rezultate”, u shpreh Von der Leyen, shkruan ATSH.

Von der Leyen dha tre shembuj të përmbledhur në lidhje me këtë.

“Ju keni bërë progres të fortë në reformat kyçe, në sajë të kësaj mund të them dhënien e 100 milionë eurove. Tani kemi për ta zbatuar këtë plan. Jemi në rrugën e duhur. Kjo është rruga që Shqipëria të aksesojë të gjithë fondin, në bazë të Planit të Rritjes ka rreth 1 miliardë euro.

“E dyta, është futja e Shqipërisë në SEPA. Në atë kohë dukej si projekt ambicioz, por për dy vite ju e bëtë që të ndodhte. Që prej javës së kaluar transferimet e parave mes Shqipërisë dhe BE-së janë më të sigurta dhe të lira.

“Shembull i tretë është roaming. Ne arritëm një marrëveshje me operatorët në 2023-shin dhe vitin që vjen ne do të heqim të gjitha tarifat e roaming midis Shqipërisë dhe BE-së”, tha Von der Leyen.

Në përmbyllje të fjalës së saj, Von der Leyen u shpreh se “mesazhi im i fundit është ky: ndoshta ky është rasti më i fortë për zgjerimin, nuk është çështja ekonomike apo gjeopolitike, por janë njerëzit. Studimi i fundit ka treguar se 90% të shqiptarëve do të votonin për anëtarësimin në BE”.

“Gjenerata e re është me ju. Dy të tretat e atyre që janë në moshë nga 15-40 vjeç mbështesin zgjerimin dhe ky është sinjali i të gjithëve. Gjenerata e re do të jetojë në një BE të fortë, të sigurt dhe të bashkuar”, tha ajo.

Presidentja e KE-së, Ursula von der Leyen ndodhet në Tiranë në kuadër të Forumit të parë të Investimeve “Bashkimi Europian-Ballkani Perëndimor” që do të zhvillojë punimet në datat 13-14 tetor./D.B/KP

Presidenti i Shqipërisë, Bajram Begaj, priti sot në një takim Presidenten e Komisionit Evropian, Ursula von der Leyen, gjatë të cilit u vlerësua partneriteti i fortë dhe progresi që Shqipëria ka bërë në rrugën e saj drejt anëtarësimit në Bashkimin Evropian.

Presidenti Begaj vlerësoi lidershipin e Presidentes von der Lyen për mbështetjen që i ka dhënë Shqipërisë në këtë proces, duke mundësuar që të jetë ndër të parat përfituese e fondeve nga Plani i Rritjes, si dhe për insistimin për të patur Ballkanin Perëndimor në qendër të agjendës të zgjerimit të Bashkimit Evropian.

Sipas njoftimit, kreu i Shtetit nënvizoi se rruga e Shqipërisë drejt BE-së është një mision kombëtar, interes kombëtar dhe ëndrra 35-vjeçare që bashkon brezat dhe shoqërinë, dhe se progresi i arritur në hapjen e 28 kapitujve negociues në pesë nga gjashtë grupkapitujt dëshmon vendosmërinë e institucioneve shqiptare për të ecur përpara me ritme të shpejta e të qëndrueshme.

Në fjalën e tij, Presidenti Begaj theksoi se reforma në drejtësi dhe lufta kundër korrupsionit janë dy arritje që Shqipëria i ka realizuar si asnjë vend tjetër në rajon dhe vijojnë të jenë prioritare në mbrojtje të interesit publik dhe të respektimit të të drejtave të qytetarëve.

Ai vuri në dukje rëndësinë e digjitalizimit dhe inovacionit në qeverisje si pjesë e procesit të modernizimit të administratës publike dhe rritjes së transparencës.

Presidenti Begaj theksoi se Shqipëria mbetet plotësisht e linjëzuar me Politikën e Jashtme dhe të Sigurisë të BE-së dhe e angazhuar aktivisht në dialogun e sigurisë dhe të mbrojtjes BE-Shqipëri.

Kreu i Shtetit u ndal edhe në rëndësinë e zgjerimit të BE-së në Ballkanin Perëndimor, të cilin e sheh si pjesë integrale të stabilitetit dhe të ardhmes së Evropës.

Në përfundim, Presidenti Begaj shprehu bindjen se Shqipëria do të vazhdojë të jetë partnere e besueshme dhe e përkushtuar në këtë udhëtim, duke theksuar se integrimi evropian është një investim i përbashkët për të ardhmen e kontinentit.

Presidenti i Republikës falënderoi Presidenten e Komisionit Evropian, Ursula von der Leyen, për mbështetjen e vazhdueshme teknike, politike dhe financiare, si dhe për vizionin e përbashkët për një Evropë të bashkuar, të fortë dhe gjithëpërfshirëse./D.B/KP

Dogana e Kosovës ka njoftuar se gjatë kontrolleve të kryera në Pikën Kufitare Vërmicë gjatë vikendit, zyrtarët doganor kanë parandaluar disa raste të hyrjes së mallrave të padeklaruara në territorin e Republikës së Kosovës.

Sipas njoftimit bazuar në analizat e riskut dhe sjelljet e dyshimta të disa udhëtarëve, janë selektuar për kontroll të dytë disa automjete, nga të cilat janë identifikuar mallra që nuk ishin deklaruar sipas legjislacionit doganor në fuqi.

“Në të gjitha rastet, personat përgjegjës kanë deklaruar se nuk posedonin fatura për mallin, ose kanë paraqitur dokumentacion të pjesshëm dhe jo të mjaftueshëm për arsyetuar sasinë e mallrave te transportuara“, thuhet në njoftim.

Mallrat e ndaluara përfshijnë:

Produkte tekstile në sasi prej gjithsej 200 copë

Produkte ushqimore në peshë totale prej 140.72 kg

Produkte kozmetike dhe parfume, përfshirë dhe artikuj të ndryshëm

CD për lojëra (PS5)

Mallra të ndryshme të përziera, gjithsej 104 artikuj, nga të cilat një pjesë nuk ishin të pajisura me dokumentacion përkatës

Për të gjitha rastet është iniciuar procedurë kundërvajtëse, ndërsa mallrat janë ndaluar deri në përfundimin e procedurave ligjore.

Dogana e Kosovës thotë se mbetet e përkushtuar në zbatimin e ligjit dhe ruajtjen e integritetit ekonomik të vendit. Udhëtarët inkurajohen të respektojnë obligimet ligjore për deklarimin e saktë të mallrave gjatë hyrjes në territorin e Republikës së Kosovës./D.B/KP