Aktualitet

​Rama në OKB: Lufta e Rusisë në Ukrainë paraqet kërcënim për mbarë botën

Nga 1 qershori, për një muaj, Shqipëria do ta kryesojë Këshillin e Sigurimit të OKB-së

Published

4 years ago

on

Kryeministri i Shqipërisë, Edi Rama, ka mbajtur sot fjalim në selinë e Organizatës së Kombeve të Bashkuara në Nju-Jork, pasi Shqipëria mori për herë të parë Presidencën e Këshillit të Sigurimit.

Deklarata e mbajtur përpara kryesimit të mbledhjes së parë, u fokusua kryesisht te lufta në Ukrainë dhe pasojat e saj.

“Ky është vetëm fillimi i Presidencës shqiptare të Këshillit të Sigurimit dhe menjëherë sjellim tashmë për diskutim në Këshill një çështje të rëndësisë së lartë, llogaridhënien. Pas pak minutash do të kem nderin dhe kënaqësinë të kryesoj në emër të Presidencës shqiptare një debat të hapur për forcimin e llogaridhënies dhe drejtësisë për shkeljet e rënda të së drejtës ndërkombëtarë. Zbatimi i së drejtës ndërkombëtare dhe i Kartës së OKB-së, mbrojtja dhe promovimi i të drejtave të njeriut dhe mbështetja e sistemit të OKB dhe i veprimit shumëpalësh janë në zemër të politikës së jashtme shqiptare e po kështu janë përparësitë kryesore të mandatit tonë në Këshillin e Sigurimit”, ka thënë kryeministri Rama.

Kryeministri Rama tha se pasojat shkatërrimtare të luftës në Ukrainë ka shkaktuar edhe pasiguri ushqimore që mund të çojnë në një uri të pashembullt, duke bërë nevojën për një llogaridhënie më efektive, një çështje kyçe për Kombet e Bashkuara dhe vendet e saj anëtare.

“Lufta e Rusisë në Ukrainë që paraqet sfida e kërcënime të shumëfishta për mbarë botën, e ka përforcuar edhe më tej këtë nevojë. Vënia përpara përgjegjësisë për krimet, për shkeljet masive, përshi llogaridhënien e individëve në kuadër të së drejtës penale, është kyçe për të rivendosur besimin e publikut tek drejtësia dhe tek institucionet e sigurisë përfshirë Këshillin e Sigurimit dhe për të ndërtuar sundimin e ligjit dhe një paqe të qëndrueshme”, ka thënë Rama.

Ai ka theksuar se çështja e llogaridhënies mbetet në qendër të masave kolektive të bashkësisë ndërkombëtare për të zmbrapsur aktet e agresionit dhe se objektivat e sotme në debat janë të trefishta.

“Së pari, të rritet roli i bashkësisë ndërkombëtare për të vënë para përgjegjësisë shtete dhe ato që veprojnë për llogari të tyre për shkelje të rënda të së drejtës ndërkombëtare. Së dyti, të forcohen mekanizmat e llogaridhënies jo vetëm në nivel shtetëror, por po kështu në atë rajonal dhe ndërkombëtar. Së treti, ta orientojmë vëmendjen te viktimat, të përcaktojmë të vërtetën për krimet ndërkombëtare dhe shkeljet masive të të drejtave të njeriut dhe shkeljet e rënda të së drejtës ndërkombëtare humanitare është thelbësore për të vënë në vend të drejtat dhe dinjitetin e viktimave dhe të afërmve të tyre. Është po kështu kritike për të çuar më përpara paqen dhe pajtimin”, ka thënë Rama.

Ai ka theksuar se autorët e krimeve nuk mund të lihen të lirë, andaj është e rëndësishme që të punojmë së bashku në përputhje me të drejtën ndërkombëtare dhe parimet e objektivat e Kombeve të Bashkuara siç sanksionohen në kartën e OKB-së.

“Llogaria efektive do të kontribuojë për paqen, pajtimin dhe rritjen e sigurisë për të ndërtuar demokracinë në nivel lokal, rajonal, global e për ta mbrojtur dhe për të nxitur të drejtat e njeriut kudo. Duhet të bëjmë gjithçka mundemi që ta bëjmë botën gjithnjë e më të vogël për shkelësit duke përdorur mjetet dhe mekanizmat e llogaridhënies përmes drejtësisë. Pandëshkueshmëria duhet të mbetet histori”, ka thënë Rama.

Nga 1 qershori, për një muaj, Shqipëria do ta kryesojë Këshillin e Sigurimit të OKB-së. Kjo është hera e parë që vendi merr një rol të tillë në këtë organizatë ndërkombëtare, pasi që u përzgjodh që të jetë anëtare e përkohshme e Këshillit të Sigurimit të OKB-së këtë vit.

Related Topics:
Continue Reading

Lajmet

Foda me ndryshime në formacion për ndeshjen ndaj Izraelit: Rikthehet Avdullahu, mbetet në dyshim Muriq

Published

32 minutes ago

on

October 1, 2026

By

Përzgjedhësi i Përfaqësueses së Kosovës, Franco Foda, ka bërë publike listën e përditësuar të lojtarëve të grumbulluar për ndeshjen e sontme përballë Izraelit.

Në listën zyrtare të dorëzuar në UEFA është përfshirë mesfushaari Leon Avdullahu, i cili është rikthyer me ekip pas një shkëputjeje të përkohshme për arsye familjare. Po ashtu, në listë janë përfshirë Muharrem Jashari dhe Lindon Emërllahu, ndërsa jashtë grumbullimit për këtë sfidë kanë mbetur Baton Zabërgja, Vesel Demaku dhe Leard Sadriu.

Në dyshim për këtë përballje mbetet portieri Arijanet Muriq, i cili pësoi një lëndim gjatë ndeshjes së kaluar ndaj Austrisë.

Kosova zhvillon sonte ndeshjen e tretë në kuadër të Grupit B3 në Ligën e Kombeve kundër Izraelit, në stadiumin e Debrecenit në Hungari, nga ora 20:45. Pasi e nisën edicionin me fitore 1:0 ndaj Irlandës dhe pësuan humbje 3:1 ndaj Austrisë në Vjenë, “Dardanët” do të presin Austrinë në Prishtinë më 4 tetor.

Continue Reading

Lajmet

Mbyllen përkohësisht disa rrugë në Prishtinë për shkak të protestës për UÇK-në

Published

1 hour ago

on

October 1, 2026

By

Policia e Kosovës ka njoftuar se nga ora 15:00 do të mbyllen përkohësisht për qarkullim rrugët “Luan Haradinaj” dhe “Enver Zymeri” në kryeqytet, për shkak të protestës gjithpopullore që do të mbahet sot nga ora 16:00.

Protesta organizohet në mbështetje të ish-drejtuesve të Ushtrisë Çlirimtare të Kosovës dhe në shenjë kundërshtimi ndaj vendimeve të Dhomave të Specializuara në Hagë.

Sipas njoftimit zyrtar të Policisë, varësisht nga zhvillimet në terren dhe lëvizja e pjesëmarrësve, mund të ketë kufizime ose ndërprerje të përkohshme të trafikut edhe në rrugë të tjera ndërlidhëse.

“Sipas planifikimeve policore, prej orës 15:00 rrugët të cilat do të mbyllen përkohësisht për qarkullim në kryeqytet janë: ‘Luan Haradinaj’ dhe ‘Enver Zymeri’, por varësisht nevojës operative mund të ketë edhe rrugë të tjera në të cilat mund të ndërpritet qarkullimi përkohësisht”, thuhet në njoftimin e policisë.

Tutje, Policia e Kosovës bën të ditur se zyrtarët policorë do të jenë të pranishëm në terren për të garantuar mbarëvajtjen e protestës, rendin publik dhe sigurinë e qytetarëve

Continue Reading

Kulturë

Fanella e Michael Jordan nga sezoni “Last Dance” shitet për 12.3 milionë dollarë

Published

1 hour ago

on

October 1, 2026

By

Një fanellë e Michael Jordan nga sezoni i tij i famshëm “Last Dance” është shitur për 12.3 milionë dollarë (9.3 milionë funte), duke shënuar një rekord të ri për gjërat personale të përdorura gjatë lojës nga legenda e basketbollit.

Jordan e ka mbajtur këtë fanellë gjatë ndeshjes së tretë të finales së NBA-së në vitin 1998, që ishte edhe sezoni i tij i fundit me Chicago Bulls. Ai ndihmoi Bulls të fitonin serinë me rezultat 4-2, duke siguruar titullin e tij të gjashtë dhe të fundit në NBA, ku në të gjitha këto finale u shpall lojtari më i mirë (MVP).

Rekordi i mëparshëm për një objekt të Jordanit ishte 10.1 milionë dollarë (7.6 milionë funte) për fanellën e tij nga ndeshja e primë e po të njëjtës finale të vitit 1998.

Fanella e ndeshjes së tretë u nxor në ankand nga sipërmarrësi Ryan Gough dhe u shit në “Joopiter”, shtëpia digjitale e ankandeve e Pharrell Williams, e cila e kishte vlerësuar atë paraprakisht mes 10 dhe 15 milionë dollarësh.

Përveç fanellës, makina e Jordanit e llojit Ferrari 550 Maranello e vitit 1997 u shit për 2.7 milionë dollarë (2 milionë funte), që është katër fishi i rekordit të mëparshëm të ankandit për këtë model.

“Pakkush nga objektet në historinë e sportit mishëron madhështinë aq plotësisht sa fanella e Michael Jordan nga ndeshja e tretë e finales së NBA-së e vitit 1998,” thuhej në njoftimin e shtëpisë së ankandeve “Joopiter”. “E mbajtur gjatë ‘Last Dance’… ajo shënon kulmin e një ere që e transformoi basketbollin në një fenomen kulturor global. Sot ajo renditet ndër objektet më të rëndësishme sportive të përdorura në lojë që kanë dalë ndonjëherë në treg.”

Ndërkohë, rekordi absolut për një objekt sportiv të përdorur gjatë lojës mbahet nga fanella e legjendës së bejsbollit Babe Ruth, e përdorur në “World Series” të vitit 1932, e cila u shit për 24.1 milionë dollarë (18.2 milionë funte) në vitin 2024. /BBC/

Continue Reading

Lajmet

Sot shënohet 29-vjetori i protestave studentore të 1 Tetorit 1997

Published

2 hours ago

on

October 1, 2026

By

Sot shënohet 29-vjetori i protestave të Lëvizjes Studentore, të cilat vlerësohen si një nga kthesat më të mëdha historike për lirinë dhe pavarësinë e Kosovës.

Protesta paqësore e 1 tetorit të vitit 1997 u organizua si përgjigje ndaj masave të dhunshme të regjimit të Slobodan Milosheviqit, i cili kishte dëbuar studentët dhe profesorët shqiptarë nga objektet universitare, duke imponuar me forcë plan-programin serb.

E prirë nga rektori i atëhershëm, Ejup Statovci, së bashku me drejtuesit e Lëvizjes Studentore si Bujar Dugolli, Albin Kurti, Driton Lajçi e Muhamet Mavraj, marshimi paqësor u ndërpre dhe u shpërnda me dhunë brutale nga policia serbe. Si pasojë e ndërhyrjes policore, dhjetëra studentë dhe profesorë mbetën të lënduar e të arrestuar.

Akti i guximshëm i studentëve mori një jehonë të jashtëzakonshme në mediat vendore dhe ato ndërkombëtare, duke tejkaluar çdo zhvillim tjetër politik të asaj periudhe. Kjo ngjarje historike konsiderohet si një pikë kthese që vendosi çështjen e Kosovës në krye të agjendës diplomacisë ndërkombëtare.

Continue Reading

Të kërkuara