Lajmet

​Punëtorët e Lotarisë: Zhgënjyese mbyllet Lotaria e Kosovës lejohet të operojë lotaria nga Serbia

Published

on

Derisa në Kosovë është mbyllur Lotaria e Kosovës, në territorin tonë është duke funksionuar Lotaria e Serbisë.

Kjo lotari e shtetit fqinjë që operon ilegalisht, po kundërshtohet nga punëtorët e Lotarisë së Kosovës, të cilët sot protestuan para Qeverisë së Kosovës me kërkesën për miratimin e ligjit për Lotarinë e Kosovës dhe kthimin në vendet e punës.

Kryetari i Sindikatës së Lotarisë së Kosovës Shkumbin Goçi në këtë protestë theksoi se gjendja e punëtorëve të lotarisë është e rëndë dhe fajësoi Qeverinë Kurti se nuk po përfill kërkesat e Lotarisë.

Po ashtu Goçit po i pengon edhe më shumë lejim i operimit të Lotarisë nga Serbia në territorin e Kosovës.

“Një punëtorë yni i Mitrovicës na dha këtë informacion që në Mitrovicën e veriut funksionon Lotaria e Serbisë, që këtë informatë e kemi pasur edhe më herët. Gjithashtu Lotaria e Serbisë funksionon edhe në Graçanicë dhe në krejt komunat me shumicë serbe. Kështu që Lotaria e Serbisë ushtron veprimtarinë në territor të Kosovës, kurse Qeveria jonë neve na mbyll dhe s’merret me neve hiç. Pra, Lotarinë e Kosovës e mbyllë në territor të Kosovës, kurse Lotaria e Serbisë vepron në territorin e Kosovës. S’kemi qysh me përcjell këtë informacion institucioneve kur s’po pranojnë që katër muaj as me u takua qeveria e re. Sa i përket qeverive të kaluara me u bërë i sinqertë kur kemi dalë në protesta dikush prej tyre ka dalë na ka pranua. Ndërsa, që katër muaj kjo qeveri as nuk na pranon, as nuk merr kurrë farë përgjegjësie. Zhgënjim total”, theksoi Goçi.

Përfaqësuesja e punëtorëve Ibadete Hasani Berisha tha se punëtorët e Lotarisë së Kosovës gjenden në një situatë të rënduar, pasi sipas saj tash e një vit nuk kanë marrë paga.

Hasani-Berisha tha se po ashtu se qeveria e Kosovës i ka premtuar Sindikatës së Punëtorëve të Lotarisë së Kosovës se do të gjejë një zgjidhje për punëtorët, mirëpo një premtim i tillë ende nuk është përmbushur.

“Edhe sot protestojmë për të drejtat tona, për realizimin e qëllimeve tona, për miratimin e Ligjit për pagat. Qe dy vjet Lotaria është e pezulluar në atë kur janë pezulluar të gjitha lojërat e fatit pa përjashtuar edhe Lotarinë e Kosovës që është legale dhe asnjë hap deri më sot nuk është ndërmarrë. Premtime kemi pasur herë pas herë, por nuk është marr asnjë hap për me vepruar megjithëse shumë kanë premtuar. Kështu që kemi dal sot dhe do të dalim deri në miratimin Ligjit[…]Kemi mbet 65 deri 67, ky është numri. Qe një vit s’kemi marr paga as asgjë. As pjesë e pakos së rimëkëmbjes”, theksoi ajo.

Organizatorët e protestës paralajmëruan se do të vazhdohet me protesta edhe gjatë ditëve të në vijim deri në përmbushjen e kërkesave të punëtorëve të Lotarisë së Kosovës.

Lajmet

Prokuroria kërkon të refuzohet kërkesa e Selimit për kufizime në pyetje të dëshmitarëve të mbrojtjes

Published

on

By

Zyra e Prokurorit të Specializuar (ZPS) i është kundërpërgjigjur kërkesës së mbrojtjes së Rexhep Selimit lidhur me vendosjen e disa masave gjatë marrjes në pyetje të dëshmitarëve të mbrojtjes. ZPS-ja ka kërkuar që kërkesa të refuzohet.

Selimi kishte kërkuar që Prokuroria të kufizohet në marrjen në pyetje kundërshtuese vetëm në çështje që janë trajtuar në mënyrë të konsiderueshme gjatë paraqitjes së çështjes së saj, raporton “Betimi për Drejtësi“.

Ndërsa, Prokuroria në parashtresën e saj të dorëzuar më 28 korrik 2025, kishte thënë se kjo do anashkalonte pa nevojë procedurat që e rregullojnë këtë gjykim dhe si e tillë duhet të refuzohet në tërësi. Tha se kërkesa e Selimit injoron qartë rregulloren që ka të bëjë me marrjen në pyetje kundërshtuese.

Veç kësaj, ata thonë se Rregulla 143 (3) ua lejon palëve që të bëjnë pyetje që shqyrtojnë çështje që kanë dalë gjatë pyetjeve kryesore, por edhe pyetje mbi çështje që janë të rëndësishme mbi rastin e secilës nga palët.

Sipas Prokurorisë, kjo ishte konstatuar edhe në gjykimin ndaj Nasim Haradinajt dhe Hysni Gucatit, që lejohet marrja në pyetje kundërshtuese mbi çështje që janë të rëndësishme për rastin e palës që merr në pyetje kundërshtuese, duke përfshirë edhe ZPS-në.

Prokuroria thotë se palëve ashtu edhe atyre u jepet diskrecion i gjerë për t’i “treguar dëshmitarit çdo dokument apo provë tjetër në përputhje me Rregullat” duke përfshirë këtu edhe dokumente që nuk janë përdorur më herët gjatë marrjes në pyetje. Pra, Prokuroria pretendon se mund të përdoren dokumente që kanë rendësi për rastin e saj dhe jo vetëm për çështje që bien në fushëveprimin e pyetjeve kryesore.

Një urdhër siç ka kërkuar Selimi për provat e reja, Prokuroria pretendon se do të ndikonte negativisht mbi drejtësinë, shpejtësinë dhe efikasitetin e procedurave. Sipas tyre, kufizimi i fushëveprimit në marrjen në pyetje kundërshtuese, trupi gjykues do të përballej me kërkesa për të rikthyer dëshmitarë të mëparshëm në sallën e gjyqit për t’i kundërshtuar çështjet që janë përjashtuar.

Prokuroria thotë që mbrojtja e Selimit po kërkon të ndalohet që ata të nxjerrin prova gjatë marrjes në pyetje kundërshtuese që mund të lidhen me aktet dhe sjelljen e tij, pavarësisht nëse ato prova janë të rëndësishme ose jo.

Ky ndalim i përgjithshëm nuk është i justifikuar dhe duhet të refuzohet tërësisht, pasi (i) ka të bëjë me çështje hipotetike që kërkojnë kontekst për t’u gjykuar, (ii) nuk është i nevojshëm në dritën e masave të gjera mbrojtëse brenda kuadrit aktual procedural, dhe (iii) bie ndesh me natyrën e marrjes në pyetje të dëshmitarëve dhe me qëllimin e gjetjes së të vërtetës”, thuhet në parashtrimin e Prokurorisë.

Po ashtu, ZPS-ja thotë se çdo kërkesë për ndryshimin e paragrafit 112 të urdhrit mbi zhvillimin e procedurës është i panevojshëm, pasi tashmë ky paragraf ofron mundësi të mjaftueshme për një palë që të kërkojë leje për të rifilluar marrjen në pyetje kundërshtuese.

Continue Reading

Lajmet

Për një javë në rajonin e Ferizajt 99 aksidente trafiku, 1750 gjoba

Published

on

By

Policia e rajonit të Ferizajt ka njoftuar se nga 28 korriku deri më 3 gusht, janë shqiptuar 1750 gjoba kundërvajtëse, si dhe janë pezulluar 18 patentë shoferë.

Gjatë kësaj periudhe është njoftuar se janë shkaktuar 99 aksidente trafiku në këtë rajon, prej tyre 26 me lëndime, gjatë të cilave janë lënduar 37 persona e 73 aksidente me dëme materiale.

Policia Rajonale e Ferizajt do të vazhdojë me aktivitete të shtuara për të parandaluar aksidentet dhe apelon tek të gjithë drejtuesit e automjeteve që të jenë të kujdesshëm dhe t’i respektojnë rregullat e trafikut”, ka thënë Policia.

Continue Reading

Lajmet

Murati: Deri në qershor u regjistruan 6,642 biznese, shenjë e ekonomisë së shëndetshme

Published

on

By

Ministri në detyrë i Financave, Hekuran Murati, bëri të ditur se deri në qershor janë regjistruar 6,642 biznese, duke vlerësuar se kjo është shenjë e një ekonomie të shëndetshme.

Numri i bizneseve të reja ka shënuar edhe një rekord të ri në vitin e kaluar. Në vitin 2024 janë regjistruar 12,051 biznese të reja, që përbën një rritje prej 5.6% krahasuar me vitin paraprak.

Lajmi i mirë është se viti 2025 pritet ta tejkalojë vitin 2024 me rekord të ri. Deri në muajin qershor 2025 janë regjistruar 6,642 biznese, dhe me këtë ritëm shifra për tërë vitin pritet ta tejkalojë numrin 13 mijë për bizneset e reja të regjistruara.

Kjo është shenjë e një ekonomie të shëndetshme që po rritet në mënyrë të qëndrueshme. Hapja e bizneseve të reja nënkupton që ndërmarrësit janë optimistë për të ardhmen, por edhe që janë kreativë me ide të reja në treg”, shkroi në Facebook, Murati.

Continue Reading

Lajmet

Presidentja Osmani reagon pas thirrjeve antishqiptare në ndeshjen Maqedoni e Veriut-Rumani

Published

on

By

Thirrjet antishqiptare të dëgjuara gjatë ndeshjes në Kumanovë janë të papranueshme dhe cenojnë frymën e bashkëjetesës dhe respektit të ndërsjellë, që duhet të jenë themel i çdo shoqërie demokratike me aspirata evropiane, tha presidentja e Kosovës, Vjosa Osmani në një deklaratë të hënën, më 4 gusht.

Ajo theksoi se shqiptarët janë popull autokton në trojet e tyre si dhe meritojnë të trajtohen me dinjitet dhe barazi, ashtu si çdo komunitet tjetër.

Edhe më shqetësues mbetet fakti që zyrtarët më të lartë shtetërorë në Shkup nuk kanë reaguar ndaj kësaj gjuhe urrejtëse e përjashtuese, duke lënë hapësirë për retorika që minojnë tolerancën ndëretnike dhe harmoninë që vendi synon të ndërtojë në rrugën e tij drejt familjes evropiane”, deklaroi Osmani.

Osmani tha se sporti duhet të jetë mjet bashkimi, “jo platformë për ideologji të errëta që ngjallin kujtime të dhimbshme dhe kërcënojnë paqen”.

U bëjmë thirrje institucioneve të Maqedonisë së Veriut që të ndërmarrin masa të menjëhershme kundër organizatorëve të këtyre thirrjeve, përgjegjësve dhe atyre që nxisin e përhapin urrejtje, duke dënuar çdo formë të gjuhës së urrejtjes , mbrojtur parimet e bashkëjetesës dhe tolerancës, si vlera bazë të një shteti që synon integrimin në BE”, tha e para e shtetit ndërsa theksoi se “Republika e Kosovës do të mbrojë me vendosmëri dinjitetin e shqiptarëve, kudo që ata jetojnë”.

Thirrje raciste ndaj shqiptarëve u dëgjuan në fundjavë gjatë një ndeshjeje të basketbollit që u zhvillua në mes të Maqedonisë së Veriut dhe Rumanisë.

Continue Reading

Të kërkuara