Lajmet

​Protestë në Prishtinë, kërkohen të drejtat e shqiptarëve të Luginës së Preshevës

Ata kërkuan që të ndërpritet menjëherë pasivizimi i adresave.

Published

3 years ago

on

Balli Kombëtar Demokrat Shqiptar ka protestuar me kërkesën për të drejtat e shqiptarëve në Luginën e Preshevës. “Stop pasivizimit të adresave të shqiptarëve”, ishte njëra nga thirrjet e protestuesve të cilët marshuan nga sheshi “Zahir Pajaziti” në drejtim të sheshit “Skënderbeu”.

Ata kërkuan që të ndërpritet menjëherë pasivizimi i adresave, të anulohen të gjitha vendimet e lëshuara si dhe një nga shtetet e bashkësisë evropiane të merr në mbështetje të gjithë banorët shqiptarë në atë pjesë.

Kryetari i Ballit Demokrat Shqiptar, Nikollë Perkaj, tha se Serbia po përdorë presion administrativ me qëllim të spastrimit etnik në heshtje.

“Në Kosovën Lindore po përdor presionin administrativ, duke i bërë in-ekzistent, duke i shlyer adresat e banimit dhe duke i hequr të drejtat e pajisjes me kartela të identifikimit, duke i shlyer nga pronësia e patundshme dhe një mori marifetesh që vetëm serbët i bien ndërmend t’i bëjë kur jemi ne shqiptarët në pyetje. Pra, këtu po implementon një spastrim etnik në heshtje. Serbia po kërkon të drejtat për serbët që jetojnë në Kosovë edhe pse kanë të drejta më shumë se edhe ne vet shqiptarët. Kurse shqiptarëve në trojet e veta që kanë mbetur nën Serbi nuk jap asnjë të drejtë, vetëm të drejtën e dëbimit nga shtëpitë e veta. Ne sot këtu kemi dalë që njëzëri të fuqishëm t’i themi Serbisë, që popullata shqiptare në Preshevë, Bujanoc, Medvegjë e Sangjak tu njihet e drejta e vet që u garanton Konventa Ndërkombëtare e të Drejtave të Njeriut”, deklaroi ai.

Për këtë situatë ai kritikoi Qeverinë e Kosovës dhe të Shqipërisë, për çka tha se nuk janë të bashkuar.

“Qeveritë tona, si ajo e Shqipërisë, si kjo e jona që nga pavarësia e deri më sot i kanë dhënë hapësirë me sjelljet jo të mira, jo të bashkuar i kanë dhënë hapësirë edhe kurajo Serbisë që të sulmojë në mënyrë politike, të bën një agresion ndaj nesh, ndaj shtetit tonë. Pikërisht se qeveritë tona të gjitha që nga e para deri tek e fundit, nuk janë t koordinuara, nuk janë në një zë”, shtoi ai.

Edhe aktivisti nga Lugina e Preshevës, Rexhep Abazi u shpreh se Medvegja është pjesa më e rrezikuar dhe goditur me masat administrative, të quajtura pasivizim i adresave.

“E para, Republika e Serbisë duhet të ndërprejë pasivizimin e adresave të shqiptarëve të Preshevës, Medvegjës e Bujanocit menjëherë. E dytë, të anulojë të gjitha vendimet e lëshuara për pasivizimin e adresave të banorëve shqiptar. E treta, njëri nga shtetet e bashkësisë evropiane të merr në mbështetje të gjithë banorët shqiptar me adresat e pasivizuara, duke u lëshuar dokumente të përkohshme të identitetit të udhëtimit dhe të tjera, që tu mundësohet e drejta e lëvizjes së lirë në Evropë”, deklaroi ai.

Ndërkaq, kryetari i Ballit Kombëtar Demokrat Shqiptar në Malishevë, Cenë Desku, kërkoi që të krijohet një asociacion edhe për shqiptarët në Luginën e Preshevës.

“Shqiptarët atje nuk kanë të drejta e liri, sikurse kanë serbët në Kosovë, në bazë të Kushtetutës së Kosovës. Prandaj, kërkojmë të drejta të barabarta në mënyrë reciproke. Dhe nëse krijohet një asociacion për serbët në Kosovë, kërkojmë që të krijohet një asociacion edhe për shqiptarët në Luginën e Preshevës. Kjo është e drejtë ligjore dhe me norma ndërkombëtare”, përfundoi ai.

Related Topics:
Continue Reading

Lajmet

Justina Shiroka-Pula merr zyrtarisht detyrën e presidentes

Published

8 hours ago

on

October 7, 2026

By

Justina Shiroka-Pula ka marrë zyrtarisht detyrën e presidentes së Republikës së Kosovës.

Në ceremoninë e inaugurimit, ushtruesja e detyrës së presidentes, Albulena Haxhiu, ia ka dorëzuar Kushtetutën presidentes së re.

Justina Shiroka-Pula mori 81 vota në Kuvend, në votimin që u zhvillua në mesnatën mes të martës dhe të mërkurës, në fund të afatit kushtetues që e caktoi 6 tetorin si datë të fundit për zgjedhjen e presidentit. Detyrën e siguroi pas dakordimit të Vetëvendosjes dhe Partisë Demokratike të Kosovës./A.K/

Continue Reading

Lajmet

BE-ja shqetësohet për ndryshimet në Ligjin për Dhomat e Specializuara

Published

8 hours ago

on

October 7, 2026

By

Bashkimi Evropian ka shprehur shqetësim të thellë për miratimin nga Kuvendi i Kosovës të Projektligjit për ndryshimin dhe plotësimin e Ligjit për Dhomat e Specializuara të Kosovës.

Në një përgjigje për KOHËN, një zëdhënës i BE-së ka thënë se ndryshimet e miratuara janë në kundërshtim me obligimet ndërkombëtare të Kosovës ndaj Bashkimit Evropian.

“Partneriteti ynë nënkupton jo vetëm interesa të përbashkëta, por edhe përgjegjësi të përbashkëta”, thuhet në përgjigje.

BE-ja ka theksuar se vazhdimisht ka mbështetur punën e Dhomave të Specializuara të Kosovës si institucion të pavarur gjyqësor, të themeluar përmes vendimeve të Kuvendit në vitet 2014–2015 dhe të përcaktuar në Kushtetutën e Kosovës.

Sipas BE-së, mandati dhe pavarësia e Dhomave të Specializuara duhet të respektohen plotësisht, ndërsa drejtësia duhet të vazhdojë të bazohet në parimin e përgjegjësisë penale individuale.

BE-ja i ka bërë thirrje Kosovës që t’u përmbahet obligimeve të saj ndërkombëtare dhe të garantojë pavarësinë gjyqësore të Dhomave të Specializuara, si dhe llogaridhënien dhe drejtësinë për viktimat dhe familjet e tyre nga të gjitha komunitetet në Kosovë.

Projektligji u miratua në Kuvend të martën, pak para përfundimit të afatit për zgjedhjen e Presidentit, pas një marrëveshjeje mes Lëvizjes Vetëvendosje dhe Partisë Demokratike të Kosovës.

Miratimi i tij u shoqërua me protesta në Kosovë, ndërsa kundërshtimi ndaj Dhomave të Specializuara është rritur pas aktgjykimit të 16 shtatorit ndaj Hashim Thaçit, Kadri Veselit, Jakup Krasniqit dhe Rexhep Selimit./A.K/

Continue Reading

Lajmet

Schuebel uron presidenten e re, mbështetja e BE-së do të mbetet e palëkundur

Published

10 hours ago

on

October 7, 2026

By

Ambasadori i Bashkimit Evropian në Kosovë, Dirk Schuebel, ka uruar Justina Shiroka-Pulën për zgjedhjen e saj në postin e Presidentes së Republikës së Kosovës.

Schuebel ka shprehur shpresën për rikthimin e stabilitetit politik dhe institucional në vend, duke theksuar gatishmërinë për të bashkëpunuar me presidenten e re, institucionet e Kosovës dhe spektrin politik.

“Me shpresën për ripërtëritjen e stabilitetit politik dhe institucional, pres me kënaqësi të punoj me Presidenten Shiroka-Pula, institucionet e Kosovës dhe spektrin e gjerë politik për ta afruar vendin më pranë Bashkimit Evropian”, ka deklaruar Schuebel.

Ai ka theksuar gjithashtu se mbështetja e Bashkimit Evropian për Kosovën do të vazhdojë të jetë e palëkundur.

Justina Shiroka-Pula u zgjodh Presidente e Kosovës në raundin e parë të votimit, duke marrë 81 vota në seancën e Kuvendit që kishte nisur më 6 tetor. Votimi përfundoi pak pas mesnate, ndërsa numërimi i votave përfundoi rreth 15 minuta më vonë.

Me zgjedhjen e Shiroka-Pulës, Kosova tashmë ka presidenten e re, ndërsa mesazhi i BE-së vjen me theks të veçantë te stabiliteti institucional dhe vazhdimi i rrugëtimit të vendit drejt Bashkimit Evropian.

D.L

Continue Reading

Lajmet

15 milionë euro për subvencionimin e faturave të energjisë për familjet në nevojë

Published

11 hours ago

on

October 7, 2026

By

Ministri për Punë, Familje dhe Vlerat e Luftës Çlirimtare, Andin Hoti, ka bërë të ditur se janë ndarë 15 milionë euro për mbështetjen e familjeve për faturat e energjisë elektrike, përmes Programit për Mbrojtjen e Konsumatorëve të Cenueshëm të Energjisë Elektrike 2026–2027.

Hoti ka njoftuar se programi është miratuar në mbledhjen e pestë të Qeverisë dhe synon subvencionimin e faturave për familjet që plotësojnë kriteret për përfitim.

Ai ka thënë se në ditët në vijim do të nënshkruajë vendimin që përcakton kushtet dhe kriteret për përfituesit, pas së cilës pritet të hapet thirrja për aplikim.

Sipas Hotit, programi lidhet edhe me obligimet e Kosovës në kuadër të procesit të integrimit evropian dhe zbatimit të Planit të Rritjes për Ballkanin Perëndimor, veçanërisht për identifikimin dhe mbështetjen e konsumatorëve të cenueshëm.

“15 milionë euro mbështetje. Drejtpërdrejt në faturat e familjeve”, ka shkruar Hoti./A.K/

Continue Reading

Të kërkuara