Të paktën 12 persona kanë vdekur dhe gjashtë të tjerë janë lënduar si pasojë e një zjarri pyjor në Spanjën Jugore, ka njoftuar qeveria rajonale e Andaluzisë, raporton BBC.

Rreth 150 zjarrfikës po punojnë për të lokalizuar flakët, të cilat sipas dëshmitarëve u shkaktuan nga këputja e një linje elektrike, përpara se të shpërndaheshin në një zonë pyjore në Los Gallardos të Almerisë. Autoritetet ende nuk e kanë konfirmuar shkakun e zjarrit.

Një valë e zgjatur e të nxehtit me temperatura rreth 40°C ka shkaktuar zjarre të shumta pyjore anembanë Evropës Jugore gjatë kësaj vere. Qindra zjarrfikës po përballen me vatra të mëdha zjarri në Francë, Portugali dhe Spanjë, ku mijëra njerëz janë detyruar të braktisin shtëpitë e tyre.

“Numri i personave që humbën jetën nga zjarri në Los Gallardos ka shkuar në 12, pas konfirmimit të gjashtë viktimave të tjera”, thuhet në deklaratën e qeverisë rajonale të Andaluzisë.

Trupat e disa prej viktimave u gjetën brenda në makina, pasi kishin tentuar t’ u shpëtonin flakëve gjatë kohës që zjarri po përhapej me shpejtësi gjatë natës.

Kreu i qeverisë rajonale, Juanma Moreno, i quajti këto vdekje “një tragjedi”. Përmes një postimi në rrjetin social X, pas njoftimit të bilancit fillestar me gjashtë të vdekur, ai u shpreh: “Zemrat tona janë të rënduara dhe jemi të shkatërruar nga dhimbja”.

Në mes të të lënduarve, një person u dërgua me urgjencë në spital për shkak të thithjes së tymit, ndërsa një tjetër pësoi djegie. Katër persona të tjerë morën ndihmë mjekësore në vendngjarje për djegie të lehta dhe probleme të frymëmarrjes të shkaktuara nga tymi i dëndur.

Zjarri gjithashtu shkaktoi bllokimin e disa rrugëve, ndërsa rreth 1,000 banorë u evakuuan, sipas të dhënave nga shërbimet e emergjencës.

Kryeministri Pedro Sanchez deklaroi në maj se Spanja do të dislokonte këtë vit kapacitetet më të mëdha ndonjëherë për t’iu përgjigjur zjarreve verore, siç raportuan mediat lokale dhe agjencia AFP.

Njësia Ushtarake e Emergjencave e Spanjës (UME), e cila ndërhyn në raste të emergjencave të mëdha, konfirmoi se do t’u bashkohet forcave zjarrfikëse në Los Gallardos.

Në qershor, Spanja shënoi mesataren më të lartë ditore që nga viti 1950, duke regjistruar në disa ditë temperaturat më të larta historike për atë muaj. Në disa pjesë të vendit u parashikuan temperatura deri në 42°C.

Vitin e kaluar, një sipërfaqe rekord prej 393,000 hektarësh u dogj në Spanjë, sipas Sistemit Evropian të Informacionit për Zjarret Pyjore (EFFIS), që është mbi gjashtë herë më shumë se mesatarja spanjolle e periudhës mes viteve 2006 dhe 2024.

Ndryshimet klimatike po rrisin temperaturat globalisht, dhe Evropa është kontinenti që po ngrohet më së shpejti, duke u nxehur dy herë më shpejt se mesatarja globale, sipas shërbimit klimatik Copernicus.

Kjo po sjell valë më të shpeshta të të nxehtit gjatë verës, presion më të madh mbi rezervat e ujit në Evropë dhe zjarre pyjore shumë më intensive.

Viti i kaluar ishte sezoni më i keq i zjarreve për Bashkimin Evropian që nga fillimi i regjistrimit të të dhënave në vitin 2006, ku u dogjën më shumë se 1 milion hektarë në të gjithë BE-në — një sipërfaqe kjo e barabartë me pothuajse gjysmën e territorit të Uellsit.

Përkeqësimi i sezonit të zjarreve në rajonin e Mesdheut është lidhur drejtpërdrejt me ndryshimet klimatike në një studim të veçantë të realizuar nga grupi “World Weather Attribution” në Imperial College London.

Ekspertët paralajmërojnë se zjarret më të shpeshta dhe më të ashpra në mbarë Evropën pritet të vazhdojnë edhe në të ardhmen. /BBC/ /E.A/

Dronët ukrainas kanë goditur të enjten një sërë objektesh të naftës brenda territorit rus, si dhe kanë djegur dy anije-cisternë në Detin Azov. Këto sulme vijnë vetëm një ditë pasi presidenti i SHBA-së, Donald Trump, u zotua t’i japë Ukrainës licencën për të prodhuar vetë sistemet e mbrojtjes ajrore Patriot.

Fushata e fundit e Kievit ndaj rafinerive dhe infrastrukturës energjetike ka shkaktuar një krizë të gjerë të karburantit në Rusi. Në shumë rajone raportohet për mungesë të benzinës dhe racionim të rreptë të karburantit, ku shoferët po presin me orë të tëra nëpër pika të furnizimit për të mbushur rezervuarët e tyre.

Autoritetet lokale ruse kanë konfirmuar dëmet e shkaktuara nga sulmet e fundit:

Ushtruesi i detyrës së guvernatorit, Vitaly Korolyov, deklaroi se një sulm me dron ka shkaktuar zjarr të madh në një depo nafte në qytet.

Guvernatori Vladimir Vladimirov njoftoi se rezervuarët e naftës janë përfshirë nga flakët. Si pasojë e zgjerimit të zjarrit, autoritetet urdhëruan evakuimin e menjëhershëm të banorëve nga disa ndërtesa banimi pranë objektit.

Dronët ukrainas kanë djegur dy anije-cisternë (tankerë).

Përmes një njoftimi në Telegram, Shtabi i Përgjithshëm i ushtrisë ukrainase bëri të ditur se këto anije përdoreshin nga Moska për të furnizuar me karburant trupat ruse në front, si dhe për të transportuar naftë duke anashkaluar sanksionet ndërkombëtare.

Kjo seri sulmesh është pjesë e një fushate të intensifikuar të Ukrainës, e cila synon ndërprerjen e linjave të furnizimit për forcat pushtuese ruse dhe izolimin logjistik të Krimesë së aneksuar. /BBC/ /E.A/

Presidenti amerikan, Donald Trump, ka deklaruar së fundmi se Shtetet e Bashkuara të Amerikës tashmë kanë fituar ushtarakisht përballë Iranit, duke shtuar se ka dyshime nëse Teherani është i gatshëm apo i denjë për një marrëveshje të re.

Gjatë një prononcimi në bordin e avionit presidencial “Air Force One”, menjëherë pas përfundimit të fjalimit të tij, Trump është deklaruar rreth tensioneve të fundit në Ngushticën e Hormuzit. “Ne sapo i goditëm ata shumë fuqishëm,” ka thënë Trump, duke iu referuar sulmeve ajrore amerikane mbi bregdetin iranian. Ai shtoi se SHBA-ja “tashmë ka fituar ushtarakisht” dhe se Iranit “i ka mbetur shumë pak”.

Megjithatë, përkundër pretendimeve të tij se pala iraniane ka kërkuar bisedime, Trump u shpreh skeptik për hapat e mëtejshëm. “Thjesht nuk e di nëse janë të denjë për të bërë një marrëveshje. Nuk e di nëse do ta respektojnë atë,” përfundoi ai, duke bërë që perspektiva për një zgjidhje diplomatike të duket edhe më e largët pas përshkallëzimit të fundit të luftimeve. /BBC/ /E.A/

Presidenti turk, Recep Tayyip Erdogan, ka deklaruar të mërkurën në hapjen e Samitit të liderëve të NATO-s në Ankara se vendet aleate duhet t’i heqin menjëherë kufizimet e ndërsjella në industrinë e mbrojtjes. Erdogan këmbënguli që Ankaraja zyrtare të përfshihet në nismat mbrojtëse evropiane, duke theksuar se pengesat e tilla dëmtojnë unitetin e aleancës. Turqia, e cila ka ushtrinë e dytë më të madhe në NATO, tashmë është shndërruar në një zhvilluese dhe eksportuese të fuqishme të armatimit.

Ky qëndrim vjen një ditë pasi Presidenti i SHBA-së, Donald Trump, gjatë një takimi krah Erdoganit, bëri të ditur se do t’i hiqte sanksionet ndaj Turqisë dhe se do të merrte një vendim për shitjen e mundshme të avionëve luftarakë F-35. Kjo lëvizje shënon një kthesë të rëndësishme në bashkëpunimin ushtarak mes Uashingtonit dhe Ankarasë.

Në fjalën e tij, Erdogan shtoi se Turqia është në rrugën e duhur për të arritur objektivin e shpenzimeve të mbrojtjes prej 5% të BPV-së deri në vitin 2030. Për më tepër, ai njoftoi se vendi ka ndarë një buxhet shtesë prej 24 miliardë dollarësh për projektin e mbrojtjes ajrore “Kupola e Çelikut”, i cili do të shërbejë për të forcuar sistemin e mbrojtjes ajrore dhe raketore të të gjithë bllokut të NATO-s. /E.A/