Shtetet e Bashkuara thanë se e respektojnë aktgjykimin e Dhomave të Specializuara ndaj Hashim Thaçit, Kadri Veselit, Jakup Krasniqit dhe Rexhep Selimit dhe u bënë thirrje të gjitha palëve që ta pranojnë vendimin e gjykatës.

“Ne e respektojmë aktgjykimin e sotëm të Dhomave të Specializuara të Kosovës”, tha një zëdhënës i Departamentit amerikan të Shtetit për Radion Evropa e Lirë.

Departamenti i Shtetit tha se SHBA-ja mbështet drejtësinë për të gjitha viktimat dhe familjet e tyre dhe ritheksoi mbështetjen për llogaridhënien, procesin e rregullt ligjor dhe sundimin e ligjit.

Uashingtoni bëri thirrje, gjithashtu, për shmangien e retorikës nxitëse pas shpalljes së aktgjykimit.

“U bëjmë thirrje të gjitha palëve që ta respektojnë vendimin e gjykatës, të shmangin retorikën nxitëse dhe të vazhdojnë të punojnë drejt një të ardhmeje paqësore dhe demokratike”, tha zëdhënësi i Departamentit të Shtetit.

Gjykata Speciale në Hagë i shpalli katër ish-krerët e Ushtrisë Çlirimitare të Kosovës fajtorë për katër akuza për krime lufte, ndërsa i liroi nga akuzat për krime kundër njerëzimit.

Hashim Thaçi dhe Jakup Krasniqi u dënuan me nga 25 vjet burgim, ndërsa Kadri Veseli me 18 dhe Rexhep Selimi me 13.

Aktgjykimi është i shkallës së parë dhe avokatët mbrojtës kanë paralajmëruar se do ta apelojnë atë. /REL/

Kryeministri i Kosovës, Albin Kurti, e ka cilësuar si një “padrejtësi të papranueshme” dhe “ndëshkim të dëmshëm” vendimin e Dhomave të Specializuara për shpalljen fajtorë të katër ish-krerëve të Ushtrisë Çlirimtare të Kosovës: Hashim Thaçit, Kadri Veselit, Rexhep Selimit dhe Jakup Krasniqit.

Në një adresim për qytetarët, kreu i qeverisë theksoi se ky aktgjykimi nuk përfaqëson vullnetin e popullit dhe shprehu besimin se ai do të korrigjohet në shkallën e apelit.

“Aktgjykimi mund të jetë shqiptuar formalisht në emër të popullit të Kosovës, por kjo formulë e zbrazët nuk duhet ngatërruar me vullnetin e popullit. Ky aktgjykim patjetër duhet ndryshuar dhe korrigjuar në shkallën e apelit dhe atë sa më parë”, deklaroi Kurti.

Pavarësisht dënimit, Kurti vuri në dukje se procesi gjyqësor rrëzoi pretendimin më të rëndë që rëndonte mbi UÇK-në, duke vërtetuar se nuk ka pasur një sulm të gjerë apo sistematik ndaj popullsisë civile.

Ai po ashtu ngriti shqetësime për njëanshmëri etnike në procesin gjyqësor, duke kritiukuar faktin se aparati shtetëror serb që kreu krimet mbeti i pagjykuar:

“Kur në bankën e të akuzuarve gjenden vetëm pjesëtarët e një etnie, ndërsa aparati shtetëror që kreu masakra, dëbime dhe krime gjenocidale mbetet jashtë juridiksionit, krijohet në mënyrë të pashmangshme pamja e një drejtësie njëetnike”.

Kryeministri nënvizoi se pastërtia e luftës çlirimtare mbetet e paprekur dhe se gjykimi i veprimeve individuale nuk e zbeh kauzën historike të Kosovës.

“Sot u gjykuan akuza dhe veprime të caktuara; nuk u gjykua dhe nuk mund të dënohet arsyeja pse lindi UÇK-ja e as të njolloset ajo. Sepse kur atdheu nuk duroi më gjakatarë, ai thirri çlirimtarë”, u shpreh ai.

Kreu i ekzekutivit rikonfirmoi se shteti i Kosovës do të vazhdojë t’u ofrojë mbështetje të plotë e institucionale katër ish-drejtuesve gjatë procedurave vijuese ligjore në shkallën e apelit.

Aktgjykimi i së mërkurës i Gjykatës Speciale në Hagë ndaj ish-krerëve të UÇK-së ka zënë ballinat e medieve ndërkombëtare, me theks të veçantë në titujt e tyre për dënimin prej 25 vitesh burgim për ish-presidentin e Kosovës, Hashim Thaçi.

Agjencia e lajmeve Associated Press raportoi se Gjykata në Hagë e dënon ish-presidentin e Kosovës, Hashim Thaçi, për krime lufte me 25 vjet burg. Sipas kësaj media amerikane, Thaçi u përball me akuza të shumta për krime lufte dhe krime kundër njerëzimit, përfshirë vrasje, torturë dhe persekutim, së bashku me tre ish-udhëheqës të tjerë të Ushtrisë Çlirimtare të Kosovës, të cilët luftuan kundër forcave serbe në luftën e viteve 1998-99.

Agjencia tjetër e lajmeve, Reuters, raportoi gjithashtu se ish-presidenti i Kosovës dënohet me 25 vjet burgim për krime lufte. Në artikullin e saj thuhet: “Ish-presidenti i Kosovës, Hashim Thaçi, u shpall fajtor për krime lufte nga Tribunali për Krimet e Luftës në Kosovë të mërkurën. Thaçi, 58 vjeç, u dënua me 25 vjet burgim për krime, përfshirë vrasje, torturë dhe ndalim të paligjshëm, të kryera në cilësinë e komandantit të lartë të Ushtrisë Çlirimtare të Kosovës (UÇK) gjatë shkëputjes së dhunshme të Kosovës nga Serbia në vitet 1990”.

Gjithashtu, gazeta britanike The Guardian vendosi në titull: “Ish-presidenti i Kosovës, Thaçi, dënohet me 25 vjet burgim”, duke raportuar se ish-komandanti i UÇK-së dhe më vonë presidenti i Kosovës është dënuar me 25 vjet burgim pasi gjykata ndërkombëtare në Hagë e ka shpallur penalisht përgjegjës për krime lufte gjatë konfliktit.

Në total, Gjykata Speciale shqiptoi 81 vjet burgim për katër ish-krerët e UÇK-së:

Hashim Thaçi: 25 vjet burgim (përgjegjës për vrasje, torturë, trajtim mizor dhe ndalim të paligjshëm).

Jakup Krasniqi: 25 vjet burgim (fajtor për ndalim arbitrar, trajtim mizor, torturë dhe vrasje të paligjshme).

Kadri Veseli: 18 vjet burgim (fajtor për ndalim të paligjshëm ose arbitrar, trajtim mizor, torturë dhe vrasje të paligjshme).

Rexhep Selimi: 13 vjet burgim (fajtor për trajtim mizor, torturë dhe vrasje të paligjshme).

Pas shpalljes së aktgjykimit ndaj ish-krerëve të Ushtrisë Çlirimtare të Kosovës, një grup qytetarësh është mbledhur në shenjë proteste dhe ka marshuar drejt zyrave të EULEX-it në Fushë-Kosovë, raporton Ekonomia Online. Për të garantuar rendin dhe sigurinë, pranë objektit të misionit ndërkombëtar janë vendosur forca të shtuara të Njësisë Speciale të Policisë së Kosovës.

Situata pranë objekteve të EULEX-it ka eskaluar pasi protestuesit e revoltuar me vendimin e gjykatës kanë filluar të hedhin gjësende të ndryshme në drejtim të ndërtesës. Reagimi i qytetarëve erdhi menjëherë pas vendimit ku Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet, duke çuar dënimin e tyre të përgjithshëm në 81 vjet burgim. /E.A/