Inspektorati Policor i Kosovës ka arrestuar katër policë që ishin me detyrë në stacionin policor në Mitrovicën e Jugut për shkak se dyshohen se në një rast kanë kryer veprën penale “manipulim me prova”.

Sipas njoftimit të IPK-së, më 13 shtator katër policët dyshohet se nuk kanë proceduar me rast penal në një rast të “Shkaktimit të rrezikut të përgjithshëm”, si dhe dyshohet se kanë fshehur si dhe kanë manipuluar me provat e gjetura në vendin e ngjarjes.

Atyre u është caktuar masa e ndalimit prej 48-orëve nga Prokuroria Themelore në Mitrovicë.

“Si pjesë e procedurave administrative IPK i ka rekomanduar Policisë së Kosovës Drejtorisë Rajonale të Policisë Mitrovicë Jug edhe suspendimin për katër të dyshuarit të cilët kanë qenë me detyrë në Stacionin Policor në Mitrovicën e Jugut. Hetuesit e IPK-së në koordinim të plotë me Prokurorinë do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast”, thuhet në njoftim./S.K/EO/

Revista prestigjioze amerikane Foreign Policy, ka publikuar një analizë mbi situatën aktuale në Serbi, duke e cilësuar vendin si të zhytur në krizën më të rëndë që nga përmbysja e regjimit të Sllobodan Millosheviqit në vitin 2000.

Në këtë analizë, autori dhe analisti politik Jasmin Mujanoviq e ka portretizuar presidentin serb si një autokrat që ndjek gjurmët e paraardhësit të tij, Millosheviqit, dhe si kërcënim të vazhdueshëm për stabilitetin e Ballkanit.

Prej më shumë se 10 muajsh, Serbia është përfshirë nga protesta të mëdha kundër qeverisë, të cilat u ndezën pas tragjedisë së rrëzimit të strukturës në stacionin hekurudhor të Novi Sadit.

Protestat janë shndërruar në një valë të gjerë pakënaqësie kundër regjimit të Vuçiqit, me mijëra qytetarë kryesisht të rinj që kërkojnë përgjegjësi dhe demokraci.

Sipas Foreign Policy, Vuçiq ka ndjekur një rrugë të ngjashme me Millosheviqin, duke goditur mediat e pavarura, duke manipuluar zgjedhjet dhe duke forcuar lidhjet me Rusinë dhe Kinën.

“Vuçiq është një aktor dashakeq në politikën e Ballkanit Perëndimor”, shkruan Mujanoviq, duke shtuar se presidenti serb mban gjallë një axhendë etnonacionaliste për destabilizimin e Kosovës dhe Bosnjës e Hercegovinës.

Analiza thekson se Vuçiq ka vazhduar përpjekjet për bashkimin e serbëve në rajon, përfshirë përmes ndërhyrjeve në Kosovë dhe përkrahjes për liderin separatist të Republikës Srpska, Milorad Dodik.

“Sulmi i armatosur në Banjskë më 2023 tregoi përkushtimin e tij ndaj axhendës së ‘Serbisë së Madhe’”, thekson artikulli.

Mujanoviq vlerëson se largimi i Vuçiqit është parakusht për një transformim të vërtetë demokratik në Serbi dhe në rajon.

“Serbia nuk mund të ecë përpara pa refuzuar madhështinë imperiale dhe pa një proces të thellë pajtimi historik. Demokracia e vërtetë kërkon njohjen e së kaluarës – përfshirë njohjen e pavarësisë së Kosovës dhe krimeve të luftës në Bosnjë”, thuhet në analizë.

Në përfundim, Mujanoviq nënvizon se megjithëse e vështirë, një Serbi ndryshe është e mundur një Serbi demokratike, paqësore dhe e integruar në Europë.

“Çdo përpjekje për zgjerim territorial është kthyer kundër vetë popullit serb. Është koha për të ndalur ciklin e dhunës dhe për të ndërtuar një të ardhme ndryshe”, përfundon analiza./S.K./EO/

Kosova ka nisur edhe luftën kundër spiunazhit, e institucionet e sigurisë tashmë kanë gjetur dhe fakte me të cilat i ngarkon disa persona, mesin e tyre dhe shqiptarë të cilët nuk hezituan të bëjnë argatin e Inteligjencës serbe-BIA.

Avokati Arbër Jashari ka lavdëruar Agjencinë Kosovare të Inteligjencës (AKI), e cila e ka cilësuar veprimtarinë e spiunazhit si krim serioz që cenon rendin kushtetues dhe sigurinë e Kosovës.

“Kosova për vite të tëra ka qenë, si të thuash, një oazë e shërbimeve të huaja, përfshirë edhe atyre që nuk ia duan të mirën këtij vendi. Nga vendet të cilat janë jo miqësore me Republikën e Kosovës, siç është Republika e Serbisë, ku ato kanë operuar pa e parë pasojën ose frikën se mund të zihen, të zbulohen apo dhe të arrestohen, viteve të fundit, sidomos nga viti 2023 e tutje, kemi parë një përkushtim më të madh të institucioneve të sigurisë, siç është Agjencia Kosovare e Inteligjencës dhe strukturat e sigurisë, të cilët kanë arrestuar disa persona; madje ka prej tyre që janë akuzuar nga prokuroria në një procedurë të mëtejshme dhe janë shpallur fajtorë. Kishim rastin ku një zyrtar i lartë, i cili ka punuar më herët në strukturat e shtetit të Kosovës, ka pranuar fajësinë dhe është dënuar nga Gjykata Themelore në Prishtinë. Disa raste janë në pritje e sipër. Kemi rastin e atyre personave në Ferizaj, Bedri Shabani dhe Muharremi Qerimi, për të cilët është ngritur aktakuzë në shkallë të parë dhe tashmë pritet vetëm vendimi i Apelit,” ka deklaruar Jashari.

Jashari ka përmendur edhe rastin e punonjës së OSBE-s, Jelena Gjukanoviq.

“Kemi raste, siç është ish-punëtorja e OSBE-së, të cilëve u është ngritur aktakuzë. Kemi parë një përkushtim të madh të institucioneve të sigurisë së Kosovës në luftimin e spiunazhit. Krejt kjo punë ka rezultuar me arrestime, aktakuza dhe në një rast apo dy ka pasur edhe aktgjykim. Është mirë që organet e Kosovës janë vetëdijesuar dhe kanë arritur në atë nivel që ta luftojnë këtë dukuri, sepse është dukuri e rrezikshme e cila natyrisht i bën dëm shtetit të Kosovës dhe tenton ta luftojë, ta minojë shtetësinë e Kosovës nga brenda. Përderisa të ketë struktura të organizuara të spiunazhit në shtetin e Kosovës, atëherë kjo paraqet një rrezik për sigurinë e këtij shteti”, tha ai.

Më tej ai ka thënë se Kosova ka qenë terren i shërbimeve të huaja, me theks ata që nuk ia duan të mirën Kosovës.

“Tani është koha kur institucionet e Kosovës kanë arritur një pjekuri dhe maturi dhe kanë arritur në një stad dhe në atë nivel që t’i identifikojnë dhe t’i kapin. Ndoshta në të kaluarën ky kriminalitet, sepse spiunazhi është krim, nuk ka qenë shumë prioritet i vetë institucioneve – për arsye që nuk i di. Fakti që ka pasur një mobilizim të madh kohëve të fundit tregon për një qasje të re të institucioneve, krahasuar me të kaluarën. Kemi një luftë më serioze nga ana e organeve të sigurisë kundër spiunëve dhe spiunazhit, i cili është i dëmshëm dhe nuk dyshoj që në të kaluarën, përmes kësaj veprimtarie kriminale të agjenturës, janë bërë shumë dëme shtetit të Kosovës”, shtoi avokati.

Të martën para trupit gjykues në Gjykatën Themelore të Prishtinës ka nisur gjykimi fillestar ndaj  Jelena Gjukanoviqit, e cila po akuzohet për spiunazh nga Prokuroria Speciale. Kjo e fundit, para trupit gjykues, nuk e ka pranuar fajësinë për akuzat që i ngarkohen.

Sipas aktakuzës Gjukanoviq ka kryer veprime të përsëritura që përbëjnë ndihmë aktive për veprimtarinë informative të një shërbimi të huaj, konkretisht të Agjencisë për Inteligjencë dhe Siguri të Republikës së Serbisë (e njohur si BIA), duke i ofruar të dhëna, dokumente dhe informacione të ndjeshme, të siguruara gjatë ushtrimit të detyrës së saj zyrtare në kuadër të aktivitetit të Misionit të OSBE-së, ndihmë kjo e realizuar përmes komunikimeve të shumta me tani të dënuarin për veprën penale të spiunazhit, Agjentit Rezident të BIA-së, Aleksandër Vllaiq.

Kujtojmë se deri më tani veç Gjukanoviqit, në Kosovë për spiunazh te BIA serbe janë arrestuar, Bedri Shabani, Muharrem Qerimi, Aleksandër Vllajiq, Bojan Jevtiq dhe Hysri Selimi./S.K/EO/

E përditësuar:

08:10

Ish-ndihmëssekretari amerikan i Shtetit, James Rubin, edhe sot do të dëshmojë në Gjykatën Speciale në Hagë.

Gjatë dy ditëve të kaluara, ai dha dëshminë e tij i ftuar nga mbrojtja e ish-presidentit Hashim Thaçi. Gjatë dëshmisë së tij, Rubin tha se gjykimi që po i bëhet Thaçit, është i padrejtë.

Ai treguar edhe ngjarje dhe histori të ndryshme bashkë me Hashim Thaçin, Madeline Albright dhe emra të tjerë të rëndësishëm të asaj periudhe kohore.

Ish-zyrtari i lartë i ShBA-së, dëshminë e tij e filloi me përshtypjen fillestare të Shteteve të Bashkuara për Ushtrinë Çlirimtare të Kosovës më 1999, duke thënë ato kishin përshtypje më ndryshe.

Derisa foli edhe për disa periudha të ndryshme gjatë luftës dhe rolin e Hashim Thaçit, si drejtor politik i UÇK-së, por edhe personalitete tjera me rëndësi si ai i Adem Demaçit./S.K/EO/