Lajmet

​OVL e UÇK-së: Gjykata Speciale sot dënoi njerëz të pafajshëm

Ata vazhdojnë ta kundërshtojnë Gjykatën Speciale.

Published

3 years ago

on

Anëtarët e Organizatës së Veteranëve të Luftës së Ushtrisë Çlirimtare të Kosovës konsiderojnë se ish-krerët e tyre Hysni Gucati dhe Nasim Haradinaj janë të pafajshëm. Ata vazhdojnë ta kundërshtojnë Gjykatën Speciale pasi mendojnë se e njëjta duhet t’i ndjekë krimet serbe të kryera gjatë luftës në Kosovës.

Pas shqiptimit të dënimit nga Dhomat të Specializuara në Hagë, e cila dënoi Hysni Gucatin dhe Nasim Haradinajn me nga 4.5 vjet burg, ushtruesi i detyrës së kryetarit të OVL të UÇK-së Faton Klinaku, duke e konsideruar Gjykatën Speciale si gjykatë politike, tha se gjyqtari i cili e shpalli sot aktgjykimin, ka qenë ai i cili kishte kërkuar që në rastin “Kleçka” të dënohej Fatmir Limaj, pati apo nuk pati fakte. Ai u shpreh se me të gjitha mundësitë e tyre do ta pengojnë funksionimit e Speciales.

“Unë pres nga kjo prokurori, që është e skandaleve, të më sjellë edhe CD siç i kemi quajtur pjata fluturuese dhe nëse i sjellin, unë prapë do t’i paraqes në media, sepse këtë gjykatë speciale ne as nuk e kemi njohur as nuk e njohim. Me të gjitha mundësitë tona ne do ta pengojmë funksionimin e saj, sepse krimet e luftës nuk i ndjek, por i ndjek shqiptarët. Po t’i ndiqte krimet e luftës, do të duhej të ndiqeshin krimet dhe masakrat që i ka shkaktuar Serbia pushtuese në Kosovë. Është fatkeqësi që deputetët e Kuvendit të Kosovës miratojnë gjykatë politike, është fatkeqësi që deputetët edhe tash që janë në Kuvendin e Kosovës nuk marrin masa kundër kësaj pseudo-gjykate sepse është gjykatë që jep vendime politike. Cilët persona zyrtarë i kanë kërcënuar Hysni Gucati dhe Nasim Haradinaj? Nëse dikush i ka kërcënuar, jam unë ai që i kam kërcënuar më shumë. Dhe çfarë persona i kanë penguar këta dhe çfarë dëshmitarë kanë zbuluar këta që thonë që 100 persona. Të gjitha ato që ne i kemi bërë, i kemi paraqitur para mediave. Dokumentacionet që kanë ardhur nga zyrat në Hagë dhe ka qenë detyrë e mediave që t’i publikojnë ato, qoftë për t’i fshehur personat apo emrat e atyre dëshmitarëve, por është në rolin apo redaktimin që e bëjnë mediat se si i bëjnë ato publike”, tha ai.

Klinaku tha se do të dakordohen dhe nëse do të organizojnë protesta ato do të jenë kundër Kuvendit të Kosovës, i cili nuk ka bërë asgjë në kundërshtim të Gjykatës Speciale apo edhe ndjekjen e krimeve të luftës në Kosovë.

“Tash unë pres që të komunikoj me shokët, protesta nëse do të bëjmë, ato do të jenë edhe atje, por edhe kundër Kuvendit të Kosovës… Edhe ne fillim ato më kanë thënë që mos të protestojnë për shkak të këtyre shantazhuesve, gjyqtarët politikë kanë thënë që po pengohet drejtësia… Edhe ata dëshmitarë rastësisht është përmendur një emër, janë kriminelët serbë, policët serbë që ata kanë dhënë dëshmi dhe të gjitha dokumentacionet janë të Serbisë pushtuese, por edhe një dëshmitar që është përmendur, vetë e ka pranuar që është dëshmitar i Speciales”, theksoi ai.

Anëtari i Këshillit Drejtues të OVL-UÇK-së, Pren Marashi u shpreh se thelbi kryesor i këtij gjykimi ishte mbrojtja e dëshmitarëve atë që nuk ka arritur ta bëjë vetë Prokuroria Speciale. Sipas tij, në këtë rast do të duhej të bëheshin publike edhe burimet e rrjedhës së këtyre informacioneve dhe duke e mos bërë këtë po dënojnë njerëz të pafajshëm.

“E thamë edhe më parë që fillimisht ky gjyq nuk është duhur të mbahet fare, sepse edhe në seancën e sotme është dëshmuar që gjykatë për të mbuluar dështimin e mbrojtjes së dëshmitarëve, dështimin e prokurorisë publike shpall dënime. Thelbi i këtij gjyqi është mbrojtja e dëshmitarëve, atë gjë nuk e ka bërë Gjykata Speciale, ne nuk kemi pas mundësi të bëjmë zbulimin e këtyre dosjeve as emrat e këtyre dëshmitarëve. Këtë e ka bërë prokuroria publike dhe dhomat e veçanta jo Organizata e Veteranëve… Në këtë rast gjykata është duhur të publikojë kush është burimi i informacionit, këtë nuk e kanë bërë, pastaj dënohen njerëzit pa faj. Edhe heshtja e organeve të drejtësisë shihet që është një proces i montuar sepse kanë dalë emrat nga gjykata, jo nga Organizata e Veteranëve”, theksoi ai.

Kryetari i Shoqatës së Familjeve të Dëshmorëve, Xhavit Jashari duke i quajtur Dhomat e Specializuara gjykatë raciste, u shpreh se rrjedhja e informacioneve ka ndodhur për të bërë spektakël. Ai kërkoi nga institucionet në vend që të mos rrinë duarkryq karshi kësaj gjykate.

“Sot me të vërtetë është faktuar në qëndrimet tona që është një gjykatë raciste. Nuk ndihem keq nëse i them edhe fashiste, sepse pretendimet e saj sot u dëshmuan që punon, vepron me sugjerime politike nga ish-okupatori ynë, Serbia. Sot u faktua me këtë vendim se rrjedhja e informacioneve për të bërë spektakël gjatë gjithë vlerës së luftës së UÇK-së është kjo prokurori dhe pavarësisht të gjitha rrjedhave dhe kësaj që po ndodh padrejtësisht ndaj luftës së drejtë dhe të pastër të UÇK-së, ne jemi të vendosur në të drejtën tonë që liria për të ardhur deri këtu është dashur sakrificë, por mendoj që institucionet e Kosovës duhet të mendojmë seriozisht duhet të mësojnë dhe ta dinë se për të ardhur deri këtu dhe për tu uluar në ato karrige që janë ulur sot tre përfaqësuesit e Kosovës duhet ta dinë rrugën se si kemi ardhur deri këtu …Dhe nëse këtyre institucioneve iu ka mbetur sado pak moral, profesionalizëm, atdhetarizëm dhe kombëtarizim, mendoj se nuk duhet të rrinë duarkryq”, u shpreh ai.

Ish-drejtuesit e Organizatës së Veteranëve të Luftës së Ushtrisë Çlirimtare të Kosovës, Hysni Gucati e Nasim Haradinaj nga Dhomat e Specializuara në Hagë janë dënuar me nga katër vjet e gjysmë burgim nga Gjykata Speciale, për publikimin e dokumenteve të Speciales. Në dënim llogaritet edhe koha e kaluar në paraburgim.

Related Topics:
Continue Reading

Lajmet

Gjashtë të arrestuar pas një përleshjeje në Viti, në vendngjarje konfiskohet drogë

Published

8 minutes ago

on

October 16, 2025

By

Gjashtë persona janë arrestuar në Viti pasi dyshohen se u përleshën mes vete. Të gjithë të dyshuarit pësuan lëndime dhe pranuan ndihmë mjekësore.

Në raportin 24-orësh të Policisë, thuhet se rasti ka ndodhur të mërkurën në Viti dhe u iniciua si “Lëndim i lehtë trupor”.

“Viti 15.10.2025-14:30. Janë arrestuar gjashtë të dyshuar meshkuj kosovarë, pasi që të njëjtit pas një mosmarrëveshje janë rrahur në mes veti. Si pasojë e rrahjes lëndime trupore kanë pësuar të gjithë personat të cilët kanë pranuar tretman mjekësor. Në vendin e ngjarjes është gjetur dhe konfiskuar edhe 5.38 gram substancë të dyshuar narkotike. Me vendim të prokurorit gjashtë të dyshuarit dërgohen në mbajtje”, thuhet në njoftim./EO

Continue Reading

Lajmet

Verifikohen dhe numërohen rreth 60% e vendvotimeve në nivel vendi, 13 komuna përmbyllin procesin

Published

13 minutes ago

on

October 16, 2025

By

Të enjten në mëngjes, Komisioni Qendror i Zgjedhjeve ka përditësuar të dhënat nga aktivitetet që janë duke u zhvilluar në Qendrat Komunale të Numërimit në komuna të ndryshme të Kosovës.

Sipas Zëdhënësit të KQZ-së, Valmir Elezi, rreth 60% e vendvotimeve kanë përfunduar procesin e numërimit të votave të kandidatëve për Kuvende Komunale si dhe të verifikimit të rezultateve nga zgjedhjet për Kryetarë të Komunave dhe rezultateve të subjekteve politike nga zgjedhjet për Kuvende Komunale.

“Sipas informacioneve nga Qendrat Komunale të Numërimit, deri në orën 10:00 të ditës së sotme, e enjte, janë verifikuar rezultatet për 1,531 vendvotime nga zgjedhjet për Kryetarë të Komunave dhe rezultatet për subjetet politike nga zgjedhjet për Kuvende Komunale nga 1,494 vendvotime. Nga po kaq vendvotime, 1,494, janë numëruar votat e kanidatëve nga zgjedhjet për Kuvendet Komunale”, tha Elezi.

Sipas tij, deri më tani, nga 5,142 kuti votimi që i takojnë dy llojeve të zgjedhjeve, janë procesuar 3,025 të tilla.

Më tej, ai ka bërë të ditur se nga e hëna deri të enjten në mëngjes, aktivitetet në QKN janë përmbyllur në 13 komuna: Hani i Elezit (e hënë), Junik, Mamushë, Zveçan (e martë), Mitrovicë e Veriut, Zubin Potok, Deçan, Shtime, Klinë, Shtërpcë, Istog dhe Skenderaj (e mërkurë) dhe Obiliq.

Sipas ligjit për zgjedhjet e përgjithshme dhe akteve nënligjore të KQZ-së, në Qendrat Komunale të Numërimit zhvillohen 3 aktivitete të rëndësishme: verifikimi i rezultateve nga zgjedhjet për Kryetarë të Komunave; verifikimi i rezultateve të subjekteve politike nga zgjedhjet për Kuvende Komunale; dhe numërimi i votave të kandidatëve për anëtarë të Kuvende Komunale.

Në platformën e KQZ-së për rezultate https://resultslocal2025.kqz-ks.org/ janë duke u prezantuar rezultatet nga QKN-të, vendvotim pas vendvotimi./EO

Continue Reading

Lajmet

Dogana ndalon 110 litra vaj ulliri të padeklaruar në Vërmicë

Published

45 minutes ago

on

October 16, 2025

By

Zyrtarët doganorë në Pikën Kufitare të Vërmicës kanë ndaluar një sasi prej 110 litrash vaj ulliri të padeklaruar, të fshehur në një automjet që po tentonte të hynte në Kosovë.

Sipas një postimi të Doganës në Facebook, kontrolli u zhvillua rreth orës 07:00 të mëngjesit të sotëm, pasi personi përgjegjës kishte mohuar se posedonte mallra për deklarim.

Gjatë kontrollit të detajuar, në automjet u gjetën 22 bidona prej 5 litrash secili, pa dokumentacion për origjinën e mallit.

Personi është proceduar për kundërvajtje doganore, në përputhje me nenin 244 të Kodit Doganor dhe të Akcizës së Kosovës (KDAK).

“Dogana e Kosovës rikujton qytetarët dhe udhëtarët se janë të obliguar të deklarojnë saktësisht çdo mall gjatë hyrjes në territorin e vendit. Mosdeklarimi përbën shkelje ligjore dhe sjell masa ndëshkuese”./EO

Continue Reading

Lajmet

Lista Serbe i drejtohet sërish Gjykatës Kushtetuese

Published

1 hour ago

on

October 16, 2025

By

Më 16 tetor, Lista Serbe sërish ka dorëzuar një ankesë në Gjykatën Kushtetuese të Kosovës lidhur me zgjedhjen e nënkryetarit të Kuvendit nga radhët e komunitetit serb, duke pretenduar se janë shkelur Kushtetuta, Rregullorja e punës së Kuvendit, si dhe një aktgjykimi i mëparshëm i Gjykatës Kushtetuese.

“Po ashtu, kemi kërkuar vendosjen e një mase të përkohshme për të ndaluar veprimet antikushtetuese që mund të shkaktojnë dëme të pakthyeshme”, thuhet në njoftimin e Listës Serbe, partisë kryesore të serbëve të Kosovës që gëzon mbështetjen e Beogradit.

Kuvendi i ri i Kosovës u konstituua më 10 tetor, me zgjedhjen e Nenad Rashiqit si nënkryetar nga radhët e komunitetit serb.

Zgjedhja e tij u bë pasi të nëntë deputetët e Listës Serbe, ndonëse u hodhën nga tri herë në votim, nuk morën votat e nevojshme.

Kushtetuesja kishte trajtuar ankesën e dorëzuar më herët nga Lista Serbe lidhur me çështjen e nënkryetarëve, pasi kreu i Kuvendit, Dimal Basha, e kishte shpallur të konstituuar Kuvendin pa zgjedhjen e nënkryetarit të pestë nga radhët e komunitetit serb.

Më pas, Gjykata konstatoi se Kuvendi nuk ishte i konstituuar, duke kërkuar që deputetët të zgjidhnin nënkryetarin nga radhët e komunitetit serb, me qëllim që të hapej rruga për formimin e Qeverisë.

Në vendimin e Kushtetueses u tha se propozimi për nënkryetarin nga radhët e komuniteteve joshumicë, në këtë rast të pakicës serbe, duhet të bëhet nga shumica apo numri më i madh i deputetëve nga radhët e deputetëve të komunitetit serb.

Pasi deputetët e Listës Serbe nuk morën numrin e mjaftueshëm të votave, kryetari i Kuvendit, Dimal Basha, kërkoi që zgjedhja e nënkryetarit serb të vazhdojë përmes shortit, duke i mundësuar deputetit tjetër serb, Nenad Rashiq nga partia Për Liri, Drejtësi dhe Mbijetesë të zgjidhet nënkryetar.

Rashiq ka qenë ministër në Qeverinë e Albin Kurtit, duke udhëhequr dikasterin për Komunitete dhe Kthim.

Lista Serbe thotë se zgjedhja e Rashiqit është “jolegjitime” dhe paralajmëron se zgjedhjet do të humbasin kuptimin, nëse shumica e deputetëve shqiptarë u imponon serbëve përfaqësues, duke legalizuar ashtu “dhunën e shumicës ndaj pakicës”.

Një ditë pas zgjedhjes së Rashiqit, presidentja e Kosovës, Vjosa Osmani, ka mandatuar udhëheqësin e Lëvizjes Vetëvendosje, Albin Kurti, për formimin e Qeverisë së re. Sipas Kushtetutës, Kurti ka 15 ditë afat për t’i prezantuar Kuvendit përbërjen dhe programin e qeverisë së re.

Për zgjedhjen e Qeverisë duhen 61 vota të deputetëve dhe Kurti ka thënë se në ditët në vijim do të zhvillojë diskutime me partitë për një koalicion qeverisës. LVV në zgjedhjet e 9 shkurtit ka fituar 48 ulëse në Parlamentin me 120 deputetë.

Nëse Kurti nuk arrin të sigurojë 61 votat e nevojshme deri më 26 tetor, atëherë Osmani, sipas ligjeve, është e obliguar që brenda 10 ditëve t’i ftojë në konsultim edhe një herë partitë politike, edhe të vendosë, sipas diskrecionit të saj, për mandataren e re, nëse ajo ia dëshmon se i ka numrat për të formuar Qeverinë.

Edhe mandatarja e ardhshme duhet t’i ketë 15 ditë kohë që t’ia paraqesë Kuvendit përbërjen e kabinetit qeveritar.

Nëse Qeveria nuk formohet as pas 40 ditësh, presidentja Osmani duhet të shpallë zgjedhjet e reja./EO

Continue Reading

Të kërkuara