Fëmijët me sindromën Down pritën krahë hapur presidenten e Kosovës, Vjosa Osmani në muajin e fushatës të ndërgjegjësimit dhe sensibilizimit.

Presidentja e Kosovës, Vjosa Osmani ka thënë se 11 tetori synon që të adresohen sfidat me të cilat përballen vajzat si dhe promovon fuqizimin e të drejtave të tyre. Gjithashtu ajo tha se vajzave duhet t’u sigurohet arsimimi dhe hapësira për të shkëlqyer në profesionet e tyre.

“Një dekadë më parë 11 tetori nisi të shënohet si dita e fëmijëve vajza, një ditë e dedikuar për to është më shumë vëmendje dhe më shumë shanse të barabarta. Kjo ditë synon adresimin e nevojave dhe sfidave me të cilat përballen vajzat dhe njëkohësisht promovon fuqizimin e vajzave dhe të drejtave të tyre. Sot vajzat tona janë shndërruar në modele frymëzimi nga Majlinda tek Nora, Distria, Dua, Rita e deri tek Medina jonë e shkëlqyeshme ato na bëjnë krenar të gjithëve. Ato janë shndërruar ambasadoret më të mira të shtetit tonë. Megjithëse vajzat tona dëshmojnë çdo ditë se janë luftëtare të denja, kundrejt pabarazisë stereotipave dhe diskriminimit nuk është e mjaftueshme prandaj duhet të vazhdojmë përpjekjen tonë që fëmijëve dhe vajzave tu sigurojmë një jetë të sigurt, arsimim, shëndet të plote dhe shanse të barabarta që ato të shkëlqejnë kudo dhe kurdo. Fëmijëve dhe vajzave duhet t’ua krijojmë mundësinë që të mund ta realizojnë potencialin e tyre të plotë ashtu siç i kanë edhe ato mundësitë edhe fëmijët e tjerë, asgjë më shumë se sa të bëjnë çfarë të duan dhe çfarë të vendosin ato me jetën e tyre”, tha ajo.

Osmani tha se duhet të krijohet një shoqëri gjithëpërfshirëse ku fëmijët me sindromën Down do të ndiheshin të barabartë me fëmijët tjerë dhe do të merrnin pjesë në vendimmarrje, larg paragjykimeve.

“Ata janë si ne të ngjashëm e të ndryshëm, por të barabartë, secili fëmijë duhet të ketë të drejtë dhe mundësi për ta arritur potencialin e vetë të vërtetë, prandaj na nevojitet jo vetëm një arsim gjithëpërfshirës por një shoqëri gjithëpërfshirëse ku secili anëtar i shoqërisë sonë e përkrahë secilin anëtar tjetër. Vetëm duke mos paragjykuar dhe duke mos krijuar përjashtime sociale por duke i përfshirë që të gjithë në vendimmarrje. Fëmijët me sindromën Down do të mund të ndihen pjesë e barabartë e integruar e shoqërisë sonë, për fëmijët tanë nuk mjafton e as nuk duhet të gëzojnë të punojnë dhe të flasim vetëm një ditë. Fëmijët më sindromën Down kanë nevojë për ne secilën ditë të jetës sonë, çdo ditë e tyre është edhe ditë e jona, e çdo ditë e jona e vë në qendër të vëmendjes kujdesin ndaj secilës kategori të shoqërisë sonë. Personat me sindromë Down e sidomos fëmijët e jashtëzakonshëm me sindromë kanë të drejtë dhe kanë potencial të madh që të ndihen si pjesë e barabartë e shoqërisë sonë dhe të kontribuojnë për shoqërinë tonë, ne duhet të mbështesim maksimalisht dhe do ta bëjmë këtë”, foli ajo.

Koordinatorja e OKB-së për Zhvillim dhe Përfaqësuesja e përhershme e UNDP-se ne Kosovë, Maria Suokko tha se shoqëritë që investojnë te vajzat mund të transformohen për të mirën e të gjithëve.

“Kjo ditë është një mundësi që ne t’i kujtojmë vetes se investimi te vajzat është jashtëzakonisht i rëndësishëm. Shoqëritë që investojnë te vajzat mund të transformohen për të mirën e të gjithëve. Kur vajzat janë të arsimuara, ato kanë më shumë gjasa të bëjnë jetë të shëndetshme, produktive dhe jetë të përmbushur. Kur vajzat marrin kujdesin e duhur shëndetësor, ato rriten me vetëbesim dhe autonomi më të madhe. Kur vajzat i kuptojnë të drejtat e tyre, duke përfshirë të drejtën për të jetuar pa kërcënimin e dhunës, ato kanë më shumë gjasa të qëndrojnë të sigurta dhe të raportojnë abuzimin.. Autobusi i fushatës së tyre do të vizitojë deri në 10 komuna në Kosovë, duke u takuar me qeveritë lokale dhe komunitetet. Përpara se të kthehemi në shtëpinë e OKB-së, më 24 tetor për të shënuar ditën e OKB-së, ne jemi vërtet krenarë që jemi partnerë në këtë fushatë. Fushata do të trajtojë një çështje tjetër të rëndësishme që prek vajzat me aftësi të kufizuara, mungesën e mirëkuptimit në komunitet për aftësitë e kufizuara”, deklaroi ajo.

Drejtoresha ekzekutive e shoqatës së personave me sindromën Down, Sebahate Beqiri tha se duhet të punojmë të gjithë që në këtë vend të ketë të ardhme të sigurt po ashtu ajo në qendrën e saj ofron shërbime terapeutike mbështetëse, ku përfitues direkt kemi mbi 300 anëtar me sindromën Down.

“Në gjithë botën muaji tetor shënohet si muaji i ndërgjegjësimit dhe sensibilizimit për sindromës Down. Jemi munduar dhe në vazhdimësi promovojmë vlerat tona jo vetëm për komunitetin tonë por të promovojmë vlera që në këtë vend ka një të ardhme të sigurt vetëm duhet dhënë kontributi i secilit të punojmë bashkë për një të ardhme më të mirë jo vetëm për persona me sindromën Down po për të gjithë qytetarët. Shoqata Down sindrom Kosova numëron mbi 9801 anëtar. Jemi një familje e madh. Për momentin ofrojmë shërbime terapeutike mbështetëse në katër qendra të shoqatës, ku përfitues direkt kemi mbi 300 anëtar me sindromën Down përfshirë fëmijë të rinj dhe të rritur me sindrom Down. Rrugëtimi ynë që nga viti 2007 deri më tani nuk ka qenë aspak i lehtë, kemi pasur ditë të cilat kanë qenë dërrmuese mirëpo asnjëherë nuk jemi ndalur. Besojmë në fëmijët tanë, besojmë që vendi ynë do të krijoj mundësi më të mira, një jetë të dinjitetshme për personat me sindromën Down”, tha ajo.

Afrim Sahiti, prind me fëmijë të prekur nga kjo sindromë tha se është i kënaqur që viteve të fundit me të arriturat e integrimit të këtyre fëmijëve. Por theksoi se ka ende për të punuar.

“Sot ka rastisur të jetë 11 tetori si muaji i ndërgjegjësimit të personave me sindromë Down si dhe viti ndërkombëtar i ditës së vajzave. Të cilët kanë arsyeje jashtëzakonisht të madhe të avokojnë në fushën e sensibilizimit dhe njohjes së drejtave të tyre. Ne si prind na ka sfiduar në një formë me ardhjen e tyre në jetë mirëpo, në momentin e marrjes së lajmit që kam një fëmijë me sindrom Down, kemi bërë të pamundurën që të arrijmë ta integrojmë sa më tepër në shoqërinë tonë. Fatkeqësisht në zbatim nuk është arritur sa duhet edhe pse po punohet jemi të kënaqur jashtëzakonisht sepse viteve të fundit është bërë shumë për ta mirëpo ende duhet të punohet”, u shpreh ai.

Kurse Ermelinda Hyseni e prekur nga kjo sindromë tha se ka ardhur për të ngritur zërin mbi të drejtat e tyre

“Sot jemi mbledhur për fëmijët me sindromën Down dhe vajzat tona. Kam pasur shumë dëshirë me takuar presidenten Vjosa Osmani dhe të gjithë stafin. Kam dëshirë që të gjithë fëmijët të ngrisin zërin që ne kemi të drejtë të punësohemi jo vetëm të tjerët por edhe ne kemi të drejtë”, u shpreh ajo.