Lajmet

​Nis në Shqipëri “Defender Europe 23”, shqiptarë e amerikanë qëndrojnë krah për krah

Kjo është një stërvitje shumëkombëshe, shumëdimensionale, e përvitshme e drejtuar nga ushtria amerikane.

Publikuar

1 vit më parë

më

Nisi sot (e hënë) për herë të dytë në Shqipëri, stërvitja e përbashkët shumëkombëshe drejtuar nga Komanda Evropiane e SHBA, ku do të demonstrohen aftësitë ndërvepruese të Shteteve të Bashkuara me ushtritë aleate dhe partnere të NATO-s. Në ceremoninë e nisjes së stërvitjes së përbashkët, krerët e shtetit dhe të ushtrisë vlerësuan lart bashkëpunimin mes Shqipërisë dhe Shteteve të Bashkuara të Amerikës.

Presidenti i Shqipërisë, Bajram Begaj deklaroi se me agresionin e padrejtë rus në Ukrainë, realiteti i sotëm gjeopolitik është tërësisht ndryshe dhe situata e sigurisë është bërë tejet më komplekse.

Sipas tij, këto ndryshime kanë efekte të ndjeshme edhe në Ballkanin Perëndimor, ku sipas tij, aktorë dashakeqës që nuk ndajnë të njëjtat vlera me ne përpiqen të zgjerojnë influencat e tyre.

“Shqipëria është e përkushtuar në misionin e saj si faktor stabilizues ne Ballkan dhe eksportuese e sigurisë në rajon e më gjerë… Çdo investim më shumë drejt forcimit të kapaciteteve mbrojtëse, është një investim më shumë drejt stabilitetit, është një investim për të garantuar një të ardhme më të paqtë të brezave të rinj, të cilët kurrsesi nuk duhet të përballen me pasojat shkatërruese që sjellin konfliktet. Koha për të marrë përgjegjësitë tona është tani dhe reagimi duhet t‘i përgjigjet sfidave aktuale”, deklaroi Begaj.

Kryeministri i Shqipërisë, Edi Rama, tha se zhvillimi i kësaj stërvitjeje me praninë e trupave shumëkombëshe, nën drejtimin e Shteteve të Bashkuara të Amerikës, është njëkohësisht dhe shprehje e unitetit të madh dhe vendosmërisë së palëkundur të të gjithë komunitetit euro-atlantik për të mbrojtur me çdo kusht vlerat dhe parimet mbi të cilat ngrihen dhe funksionojnë shoqëritë e të dy vendeve.

“Kjo stërvitje na rikujton edhe njëherë se pavarësisht gjuhës që flasim, pavarësisht flamurit që përfaqësojmë, jemi të lidhur pazgjidhshmërisht pikërisht me ato vlera dhe parime, të cilat janë të kërcënuara po njësoj për secilin prej nesh. Prandaj, të gjithë së bashku, jemi të imponuar nga historia jonë dhe nga ardhmëria jonë që të funksionojmë në unitet të plotë”, deklaroi Rama.

Ndërsa, ambasadorja e Shteteve të Bashkuara të Amerikës në vendin Shqipëri, Yuri Kim deklaroi se, amerikanët dhe shqiptarët qëndrojnë krah për krah me njëri-tjetrin. Ajo tha se të dy vendet kanë ndërmarrë hapa të mëdhenj së bashku si aleatë dhe partnerë të sigurisë, duke ngritur dy pranitë e para ushtarake të ShBA-së në historinë e Shqipërisë, shtabin rajonal pararojë të Komandës së Operacione Speciale të ShBA-së, Taskforcën për Ballkanin si dhe rotacionin e njësisë së Brigadës të Forcave të Sigurisë dhe ndihmës së ShBA-së.

“Jemi këtu si aleatë, miq dhe partnerë. Amerikanët dhe shqiptarët qëndrojnë krah për krah sikurse e thoni ju. Dikur të ndarë veçmas, tani aleatë të NATO-s dhe partnerët më të afërt ushtarakë. Në dy vjet, që prej ‘Defender Europe 2021’ bota ka ndryshuar, Rusia nisi një pushtim të plotë dhe brutal ndaj Ukrainës. ShBA, Shqipëria dhe aleatët tanë të NATO-s janë më të bashkuar dhe të fortë se kurrë. Nuk mund të mos kujtoj fjalët e Skënderbeut, Heroi Kombëtar të Shqipërisë dhe madje heroi im vetjak ‘Bashkimi bën fuqinë’”, deklaroi Kim.

Gjatë periudhës maj-qershor 2023, Forcat e Armatosura të Shqipërisë do të marrin pjesë në stërvitjet e paketës të Komandës Amerikane për Evropën “Defender Europe 23”, e cila do të zhvillohet në disa vende të Evropës dhe do të demonstrojë aftësitë e aleancës për t’u dislokuar, për të shtuar kapacitet luftarake, unifikuar, gatishmërinë e njësive në një mjedis të përbashkët, si dhe për të ushtruar aftësitë dhe potencialet e vendeve pritës.

Kjo stërvitje do të shërbejë gjithashtu për të testuar aftësitë dhe kapacitetet e NATO-s për të mbajtur një qëndrim frenues ndaj të gjithë agresorëve në Evropë.

Stërvitja “Defender Europe 23”, është një stërvitje shumëkombëshe, shumëdimensionale, e përvitshme e drejtuar nga ushtria amerikane (USAREUR-AF), e cila ka fokus konsolidimin e elementëve të gatishmërisë dhe ndërveprueshmërisë ndërmjet forcave amerikane, vendeve të NATO-s de atyre partnere. 

Etiketa
Vazhdo të lexosh

Lajmet

Gërvalla: Ende asnjë pasojë ndaj Serbisë për sulmin në Banjskë

Publikuar

11 orë më parë

më

23 Maj, 2024

nga

Ndikimi rus në Ballkanin Perëndimor, rreziku i destabilizimit të rajonit si pasojë e veprimeve të Serbisë dhe Rusisë si dhe angazhimi i Republikës së Kosovës për paqe dhe siguri, ishin në fokus të takimit të zëvendëskryeministres dhe ministres së Punëve të Jashtme dhe Diasporës, Donika Gërvalla, me kongresistin republikan, Keith Self.

Sipas njoftimit nga MPJD, gjatë këtij takimi ministrja Gërvalla e njoftoi kongresistin Self lidhur me kërcënimet e vazhdueshme të Serbisë ndaj Kosovës duke përmendur faktin që ende nuk ka asnjë pasojë për Serbinë pas sulmit në Banjskë, sulmit ndaj KFOR-it dhe veprimeve të vazhdueshme agresive por edhe vendosmërinë e Republikës së Kosovës për t’i qëndruar besnike parimeve të saj.

Duke njoftuar kongresistin Self për progresin e Republikës së Kosovës në shumë fusha, ministrja Gërvalla falënderoi ShBA-të për mbështetjen e vazhdueshme në çlirimin, shtetndërtimin, zhvillimin dhe integrimet euroatlantike të Kosovës.

Vazhdo të lexosh

Lajmet

Szunyog: Të tregojmë unitetin e përbashkët mes BE-së dhe Kosovës

Publikuar

11 orë më parë

më

23 Maj, 2024

nga

Në takimin e ambasadorit të Zyrës së Bashkimit Evropian, Tomas Szunyog dhe kryetarit të Komunës së Suharekës, Bali Muharremaj është premtuar për bashkëpunim në projekte të reja, dhe për një mirëqenie më të mirë sociale mes BE-së dhe kësaj komune.

Ambasadori Szunyog, ka thënë se këto vizita janë të rëndësishme, pasi që sipas tij në këtë mënyrë shprehet uniteti dhe veprimi i përbashkët mes Bashkimit Evropian karshi Kosovës.

“Është një aktivitet shumë i rëndësishëm për ne, sepse dëshirojmë të tregojmë unitetin dhe veprimin e përbashkët mes BE-së karshi Kosovës. Kemi biseduar për zhvillimin ekonomik, sfidat që përballet komuna për furnizim me rrymë elektrike dhe ujë, që do të bëjë jetën më të mirë për qytetarët. Edhe për çështjen e sigurisë dhe bizneset për interesat e tyre, e përfshimë pak edhe futbollin. Biseduam edhe për çështjen e arsimit dhe regjistrimin e popullsisë”, ka thënë Szunyog.

Ndërsa, kryetari i Komunës së Suharekës, Bali Muharremaj ka shtuar se në takimin e tij me ambasadorin Szunyog është biseduar rreth zhvillimit ekonomik, shtimin e popullsisë, mjekësinë dhe sportin në këtë komunë.

“Biseduam për zhvillimin ekonomik në komunën e Suharekës, për shtimin e popullatës, mjekësinë, edhe për sportin, dhe për një bashkëpunim shumë të mirë. Ne morëm përkrahjen e BE-së për projekte të reja dhe do të jemi bashkë për një mirëqenie speciale më të mirë”, ka shtuar Muharremaj.

Pas vizitës në Komunën e Suharekës, ambasadorët e BE-së kanë vizituar tri kompani në zonën industriale, të cilët kanë fituar grand nga Banka Evropiane për rindërtim dhe zhvillim. Dy nga tre kompani janë të mbështetura nga BE, vetëm një nga BERZH, kompania Metal “FIX”.

I kënaqur me bashkëpunimin me BE-në, pronari i kësaj fabrike, Burim Devetaku është shprehur se me ndihmën e tyre është investuar në makineri moderne ku 80 për qind janë në tregun e jashtëm.

“Me ndihmën e tyre ne kemi investuar shumë në makineri moderne ku 80 për qind janë për tregun e jashtëm. Një ndihmesë të madhe na ka dhënë edhe Kuvendi Komunal. Numrin e nxënësve e ndanë shkolla 4-5 nxënës çdo vit aftësohen më shumë për punë”, është shprehur ai.

Gjithashtu Szunyog ka theksuar se në këto kompani punësohen edhe nxënës të shkollave profesionale që Kosova të ketë fuqi punëtor të kualifikuar.

“80 për qind e prodhimit që bëhet në këtë kompani eksportohet jashtë vendit në shtetet e BE-se. Kjo kompani tashmë punëson 15 punëtorë edhe eksporton prodhim. I trajnojnë edhe nxënësit e shkollës profesionale që të dinë dhe të punojnë këtu, dhe kjo është një arsye shtesë që Kosova po mundohet të zgjerojë rrjetin e shkollave profesionale në mënyrë që të ketë fuqi punëtore të kualifikuar”, ka theksuar Szunyog.

Të pranishëm në këto vizita ishin edhe shefi i EULEX-it, Giovanni Pietro Barbano, Ambasadori gjerman, Jorn Rohde, Ambasadori i Francës, Olivier Guero, Ambasadori italian, Antonello De Riu si dhe përfaqësues të shteteve të tjera anëtare të BE-së.

Vazhdo të lexosh

Lajmet

Kremlini ka mohuar pretendimin e Trumpit mbi lirimin e gazetarit amerikan

Publikuar

11 orë më parë

më

23 Maj, 2024

nga

Ish-presidenti amerikan, Donald Trump dhe njëkohësisht kandidat për president nga Partia Republikane për zgjedhjet presidenciale, pretendoi se presidenti rus, Vladimir Putin, do të lironte pothuajse menjëherë, gazetarin e Wall Street Journal, Evan Gershkovich, pas zgjedhjeve, nëse do fitoi ai.

Ai shtoi në platformat dixhitale se këtë gjë Putin do e bënte për mua. Por pas këtij postimi, zëdhënësi i Kremlinit, Dmitry Peskov, tha se Trump dhe Putin nuk kanë pasur asnjë kontakt, duke shtuar se duhet “një heshtje e plotë” për arritjen e rezultateve për çdo këmbim të të burgosurve.

Evan Gershkovich është në burg që nga marsi i vitit të kaluar në Rusi, të cilin autoritetet ruse e akuzojnë për spiunazh./UBTNews/

Vazhdo të lexosh

Lajmet

​Putin nënshkruan dekretin që lejon përdorimin e pronës amerikane në Rusi si kompensim

Publikuar

11 orë më parë

më

23 Maj, 2024

nga

Presidenti rus Vladimir Putin nënshkroi të enjten një dekret që lejon përdorimin e pronës amerikane në Rusi si kompensim për dëmet e shkaktuara nga sekuestrimi i pronës ruse në SHBA.

Dekreti që përmban dispozitën përkatëse u publikua në portalin qeveritar, i cili udhëzoi qeverinë e vendit të vendoste një procedurë të veçantë për kompensimin e dëmit të shkaktuar ndaj Rusisë dhe Bankës së saj Qendrore nga qeveria amerikane ose vendimet gjyqësore.

“Qeveria e Federatës Ruse, brenda një periudhe katërmujore, siguron futjen e ndryshimeve në legjislacionin e Federatës Ruse që synojnë zbatimin e këtij dekreti”, thuhet më tej në document. /AA/

Vazhdo të lexosh

Të kërkuara