Lajmet

​Mbrojtja: Dëshmitarët do të tregojnë që nuk e kanë parë Pjetër Shalën në fabrikën e metalit

Avokatët kanë thënë se dëshmitarët do të bëjnë të ditur se Shala nuk ka qenë pjesë e Brigadës 128.

Published

on

Mbrojtja e Pjetër Shalës ka deklaruar se do të sjell dëshmitarë të cilët do të tregojnë se i akuzuari nuk ishte në Kukës siç pretendon Zyrës e Prokurorit të Specializuar, në periudhën që përfshinë aktakuza. Në konferencën përgatitore për mbrojtjen, avokatët kanë thënë se dëshmitarët do të bëjnë të ditur se Shala nuk ka qenë pjesë e Brigadës 128 dhe se nuk ka pasur asnjë rol në fabrikën e metalit, ku ZPS pretendon se janë mbajtur e keqtrajtuar njerëz.

Por për Zyrën e Prokurorit të Specializuar, shumë dëshmitarë të mbrojtjes janë të parëndësishëm. Derisa prokurori Filippo De Minicis ka treguar pse kundërshtojnë disa nga dëshmitarët, seanca është transmetuar me përmbajtje të redaktuar.

“Jemi të çuditur si mund të jetë ky një dëshmitar i cili do të mbështesë argumentet e mbrojtjes. Kundërshtimi lidhur edhe me tre ndërkombëtarët e propozuar nga pala mbrojtëse, që kanë kërkuar edhe të përmirësojnë listën e provave materiale nuk është i qartë për ne. Një nga këto prova materiale përmenden dy dëshmitarë që ZPS pretendon që janë ndaluar në Kukës”, ka thënë prokurori.

Ndërsa mbrojtja e Pjetër Shalës ka deklaruar se do të sjellin njerëz nga Brigada 128, ndër të tjera, për të dëshmuar që Shala nuk ka pasur marrëveshje me individë për të kryer vepra penale.

“Dëgjuam kolegët e ZPS-që janë të çuditur nga informacioni i paktë, ne po ashtu ishim të hutuar nga informacioni i paktë që na kanë paraqitur ata gjatë argumenteve të tyre, ne u përpoqëm ta trajtojmë situatën në bazë të asaj. Zoti Shala ishte akuzuar se ishte pjesë e Brigadës 128, ne po sjellim njerëz për të treguar qe zoti Shala nuk ka qenë në brigadën 128, ne po sjellim njerëz që të thonë që nuk e kanë parë zotin Shala atje, ne po përpiqemi të luftojmë kundër argumenteve që zoti Shala ka qenë atje apo që ka pasur ndonjë rol në fabrikën e metalit në Kukës, apo që ka qenë në marrëveshje me individë të tjerë për të kryer vepra penale, dhe kjo është arsye pse po sjellim njerëz nga brigada 128 për të provuar këtë”, ka thënë ai.

Avokati ka thënë se të gjithë dëshmitarët që mbrojtja po kërkon t’i sjellë për të dhënë dëshmi kanë rëndësi për këtë proces gjyqësor.

“Shumica e dëshmitarëve janë dëshmitarë të marrë në pyetje nga ZPS dhe prandaj po kërkojmë që të vinë këtu për të dhënë dëshmi që të dalë e vërteta. Duam të tregojmë që ka ekzistuar ky informacion kur kanë formuluar aktakuzën ZPS dhe kjo është me vlerë shumë të madhe për këtë çështje, bëhet fjalë për një individ që ka qenë atje i cili ka thënë që ka qenë gjatë gjithë kohës deri në çlirim dhe do të shpjegojë se kush ka qenë kjo brigadën, kush ishin njerëzit që kanë qenë aty, ky është në listën tonë numri 3. Pika tjetër e rëndësishme është dëshmitarët që janë tërhequr nga ZPS, ekziston një person i cili ka pasur filmim mbi ngjarjet që kanë ndodhur në atë kohë dhe ne po kërkojmë që të vijë ai për të dhënë dëshmi. Dhe ka qenë një person që ka qenë atje gjithë kohës, e ka takuar zotin Shala dhe do të shpjegojë në cilin kontekst, kur e ka parë, dhe kur e ka parë herën tjetër. Dhe këta janë të gjithë me vlerë shumë të madhe”, ka thënë ai.

Kundërshtimit të ZPS-së lidhur me dëshmitarët i është përgjigjur edhe avokati kryesor i Shalës, Jean-Louis Gilissen.

“Unë pyes vetën çfarë po ndodh, pse, nga çfarë kanë frikë, që të dëgjojnë disa njerëz, ne e dimë që ata janë persona që kanë qenë pjesë e brigadës, që kanë qenë në listën e UÇK-së, çfarë, ZPS ka frikë t’i dërgojë këta njerëz, ka frikë nga realiteti, kjo është pyetja”, ka thënë Gilisen.

Gjatë kësaj konference, mbrojtja e Pjetër Shalës ka folur edhe për frikësimin apo hezitimin e disa personave për të biseduar me avokatët lidhur me çështjen për të cilën akuzohet ish-pjesëtari i Ushtrisë Çlirimtare të Kosovës. Sipas mbrojtjes, shumë takime janë zhvilluar infromale, sepse kjo ka qenë mënyra e vetme për të biseduar me persona të caktuar.

Mbrojtja ka deklaruar se kanë bërë një përmbledhje pas takimeve që kanë zhvilluar me njerëz të ndryshëm.

“Një prej vështirësive është se ne nuk jemi gjykatës, nuk jemi prokurorë, nuk kemi polici dhe për këta persona në Kosovë kjo është shumë e rëndësishme, janë shumë hezitues, edhe në rastet kur pranojnë të merren me ne, ndjehen të lirë, ndodh që bëjmë një takim e nuk vinë, kemi takime të programuara por nuk vinë. Herën e fundit ishim në Prishtinë për të takuar një person të caktuar dhe ditën kur shkuam na tha kam dasmë, ne thamë çfarë dasme ne kemi takim, tha është dasma e vajzës time, ne thamë ju e dini këtë gjë, pra këto janë lloje të vështirësive me të cilat jemi përballur, jemi përpjekur maksimalisht, me gjithë mend, ata kanë frikë qartësisht, nuk janë të bindur që të bashkëpunojnë, pra është një punë që kërkon shumë diplomaci, është shumë vështirë. Jemi përpjekur me dëshmitarët në grupin e parë që t’i kemi, do të përpiqemi shumë e vështirë, është shumë e vështirë, nuk kemi zgjedhur ne kështu pro është shumë e vështirë”, tha Gilisen.

Derisa ka kërkuar që trupi gjykues të aprovojë kërkesën e tyre për të thirrur dëshmitarët, mbrojtja gjithashtu ka bërë të ditur se kanë kontaktuar edhe me disa ekspertë për t’u marrë me disa prej dëshmive të paraqitura nga viktimat e pretenduara.

Mbrojtja ka thënë se po përpiqen të takohen edhe me katër dëshmitarë derisa ka shtuar se hapat përfundimtar të hetimeve nuk do të çojnë në vonesa të procesit gjyqësor dhe paraqitjes së provave.

Ndërsa në përfundim të seancës, kryegjykatësja Mappie Veldt Foglia ka bërë të ditur se në seancën që do të mbahet nesër do të lëshojë disa urdhra.

Pjetër Shala ka marrë pjesë në këtë konferencë përmes videolidhjes nga qendra e paraburgimit në Hagë ku po qëndron prej marsit të vitit 2021.

Sipas Speciales “Krimet për të cilat akuzohet z.Shala u kryen përafërsisht midis 17 majit 1999 dhe 5 qershorit 1999 kundër personave që u mbajtën të ndaluar në fabrikën e metalit në Kukës(Shqipëri), që pretendohet se përdorej prej Ushtrisë Çlirimtare të Kosovës”.

Pjetër Shala u arrestua më 16 mars 2021 nga autoritetet belge dhe u transferua në Hagë më 15 prill të atij viti, në bazë të një kërkese për bashkëpunim në zbatimin e fletëarrestit dhe urdhrit për transferim lëshuar nga Dhomat e Specializuara të Kosovës.

lajme

Zelensky u bën thirrje SHBA-së dhe Muskut t’i heqin kufizimet e Starlinkut dhe të jenë në “anën e duhur të historisë”

Published

on

By

Presidenti i Ukrainës, Volodymyr Zelensky, ka deklaruar se një shërbim jetik amerikan i internetit satelitor po funksionon ende shumë ngadalë, duke ndikuar në aftësinë e Ukrainës për t’i ndalur sulmet ruse.“Po llogarisim që këto kufizime të hiqen. Mbrojtja e jetëve dhe e infrastrukturës energjetike të Ukrainës para dimrit varet drejtpërdrejt nga kjo”, ka thënë ai.

Çështja e shpejtësisë së sistemit Starshield – një shërbim i nivelit ushtarak i zhvilluar nga kompania Starlink e Elon Muskut dhe i ofruar për Ukrainën nga qeveria amerikane – po zgjat prej javësh. Zelensky ka bërë të ditur se u ka kërkuar zyrtarëve “të punojnë sa më ngushtë që të jetë e mundur” me qeverinë amerikane dhe kompaninë e Muskut. “Është e rëndësishme të jesh në anën e duhur të historisë”, ka theksuar ai. BBC-ja ka kërkuar koment nga Shtëpia e Bardhë dhe Starlinku lidhur me këtë çështje.

Ukraina e përdor shërbimin e zakonshëm Starlink për komunikime në fushëbetejë, ndërsa Starshieldi shërben për kapjen e raketave dhe dronëve në hapësirën ajrore të vendit. Kufizimet e shpejtësisë u vunë re për herë të parë në muajin tetor, duke shkaktuar deklarata kundërthënëse mes Elon Muskut dhe presidentit amerikan, Donald Trump. Musku pati deklaruar se përgjegjëse ishte qeveria e SHBA-së pasi sistemi kontrollohet prej saj, mirëpo Trumpi e mohoi këtë, duke thënë se i kishte kërkuar pronarit miliarder ta “rikthente” shërbimin. Edhe pse pas një jave u duk se gjendja po kthehej në normalitet, Ukraina njoftoi se kufizimet po vazhdonin të zbatoheshin.

Problemet me lidhjen përkuan me një përplasje të tensionuar diplomatike mes Zelenskyt dhe Trumpit rreth sulmeve ukrainase ndaj infrastrukturës së naftës brenda Rusisë. Trumpi ka thënë se sulmet ndaj rafinerive ruse të naftës – të cilat Kievi i konsideron vendimtare për t’ia prerë Moskës burimin kryesor të të ardhurave për luftën – kanë shkaktuar rritje të çmimeve globale.

Të dielën, Zelensky deklaroi se Ukraina po has vështirësi në kapjen e dronëve rusë me motor reaktiv që po godasin nënstacionet elektrike, sepse “kufizimet në shpejtësinë e funksionimit të terminaleve Starshield përgjatë vijës së frontit dhe në territoret e pushtuara përkohësisht janë ende aty”.

“Dronët tanë kapës humbasin lidhjen me operatorët e tyre në shpejtësinë 161 km/orë (100 milje në orë) dhe thjesht nuk mund t’i arrijnë ‘shahedët’ rusë me motor reaktiv”, ka shkruar ai, duke iu referuar dronëve të dizajnuar sipas modelit iranian. Më herët, të premten, ai kishte bërë të ditur se kufizimet prej rreth 100 miljesh në orë ishin vendosur që nga e hëna, por vetëm në zonat e pushtuara nga Rusia dhe jo në të gjithë Ukrainën.

“Kjo tashmë ka implikime politike. Nëse vendosni kufizime atje, ju tashmë po i njihni pjesërisht territoret e pushtuara përkohësisht si jo tonat”, ka cituar New York Times fjalët e tij.

Përveç kësaj, Ukraina po përballet edhe me mungesë të sistemeve mbrojtëse amerikane Patriot që përdoren kundër raketave ruse – një situatë që Rusia e ka shfrytëzuar për t’i intensifikuar sulmet. Gjatë natës dhe mëngjesit të së dielës, forcat ruse goditën infrastrukturën energjetike në Zaporizhzhia, si dhe në rajonet Sumy, Odesa, Zhytomyr e Kirovohrad, ndërsa sulmuan edhe infrastrukturën hekurudhore në rajonet Dnipro, Kharkiv dhe Zaporizhzhia. Dhjetëra persona raportohet se janë lënduar në këto sulme, përfshirë dy në rajonet Donetsk dhe Kiev. Në Mena të rajonit Chernihiv u vranë dy persona nga goditja e një objekti infrastrukturor, bëri të ditur guvernatori Vyacheslav Chaus, duke shtuar në Telegram se sulme të shumta u kryen edhe ndaj objekteve energjetike në mbarë rajonin.

Ndërkohë, ushtria ukrainase njoftoi se ka goditur një uzinë petrokimike dhe një rafineri nafte në qytetin qendror rus Nizhnekamsk. “Natën e 15 nëntorit, njësitë e Forcave të Mbrojtjes të Ukrainës arritën në Nizhnekamsk të Tatarstanit. Dy ndërmarrje që e furnizojnë luftën ruse me lëndë të parë dhe karburant u vunë në shënjestër”, thuhet në njoftimin e ushtrisë në Telegram. Sulme të tjera ukrainase vranë një person në qytetin portual industrial Taganrog pranë kufirit, njoftoi guvernatori rajonal Yuri Slyusar, ndërsa në rajonin e pushtuar të Luhanskut mbetën të vrarë një shofer kamioni dhe një grua e moshuar, sipas liderit rajonal të emëruar nga Moska, Leonid Pasechnik.

Në një zhvillim tjetër, Estonia ka njoftuar se do t’i mbyllë pikat e kalimit kufitar me Rusinë nga 1 dhjetori, pas një sulmi të dyshuar sabotazhi ndaj një kompanie të mbrojtjes. Tetë persona janë ndaluar lidhur me një tentativë zjarrvënieje ndaj prodhuesit të dronëve “Threod Systems”. Autoritetet estoneze thonë se ata ishin urdhëruar nga shërbimi i inteligjencës ushtarake ruse GRU për ta kryer sulmin, ndërsa Rusia nuk ka komentuar.

“Rusia duhet ta kuptojë se veprimet armiqësore kundër Estonisë sjellin pasoja”, ka deklaruar ministri i Jashtëm estonez, Margus Tsahkna. /BBC/

 

Continue Reading

Lajmet

Terras kritikon BE-në për këngën nacionaliste serbe: Provokim i qëllimshëm ose injorancë e pastër

Published

on

By

Raportuesi për Kosovën në Parlamentin Evropian, Riho Terras, ka kritikuar ashpër Bashkimin Evropian lidhur me interpretimin e muzikës së këngës nacionaliste serbe kundër Kosovës në Bruksel, gjatë hapjes së Forumit të Zgjerimit të BE-së, i cili organizohet nga Komisioni Evropian nën udhëheqjen e komisioneres për zgjerim, Marta Kos.

Terras e ka cilësuar këtë veprim si një provokim të qëllimshëm ose injorancë të pastër, duke theksuar se Komisioni Evropian dhe komisionerja Kos i detyrohen Kosovës një shpjegim.

“Një provokim i qëllimshëm, ose një shfaqje e pastër e injorancës. Interpretimi i një kënge nacionaliste serbe, e cila pretendon sovranitet mbi Kosovën, në një aktivitet të BE-së për zgjerimin, përbën një gafë jashtëzakonisht të papërshtatshme dhe pa shije. Komisioni Evropian dhe Marta Kos i kanë borxh Kosovës një shpjegim”, ka shkruar ai në platformën “X”.

Edicioni i dytë i këtij Forumi ka nisur sot dhe përfundon të hënën, ndërsa Kosova nuk është e ftuar në të. Një ditë para ngjarjes kryesore, në kuadër të mbrëmjes hapëse më 15 nëntor, ku sipas programit ishte paraparë të interpretonte Orkestra e të Rinjve të Ballkanit Perëndimor së bashku me grupin slloven “Kapobanda”, u luajt ndër të tjera edhe muzika e këngës nacionaliste serbe “Oj Kosovo, Kosovo”, videoja e së cilës është siguruar nga KOHA.

Ndërkohë, në programin e ditës kryesore, më 16 nëntor, është paraparë të mbajnë fjalime presidentja e Komisionit Evropian, Ursula von der Leyen, presidenti i Finlandës, Alexander Stubb, dhe komisionerja për zgjerim, Marta Kos, ndërsa pritet të flasë edhe kryeministri i Shqipërisë, Edi Rama. /E.A/

Continue Reading

lajme

Kënga nacionaliste serbe kundër Kosovës hap Forumin e Zgjerimit të BE-së

Published

on

By

Muzika e këngës nacionaliste serbe kundër Kosovës është interpretuar në Bruksel, gjatë hapjes së Forumit të Zgjerimit të Bashkimit Evropian, një aktivitet i organizuar nga Komisioni Evropian nën udhëheqjen e komisioneres për zgjerim, Marta Kos. Edicioni i dytë i këtij Forumi ka nisur sot dhe përfundon të hënën, ndërsa Kosova nuk është e ftuar në të.

Një ditë para ngjarjes kryesore, në kuadër të mbrëmjes hapëse më 15 nëntor, ku sipas programit ishte paraparë të interpretonte Orkestra e të Rinjve të Ballkanit Perëndimor së bashku me grupin slloven “Kapobanda”, u luajt edhe muzika e këngës nacionaliste serbe “Oj Kosovo, Kosovo”.  Ndërkohë, në programin e ditës kryesore, më 16 nëntor, është paraparë të mbajnë fjalime presidentja e Komisionit Evropian, Ursula von der Leyen, presidenti i Finlandës, Alexander Stubb, komisionerja Marta Kos, si dhe kryeministri i Shqipërisë, Edi Rama.

Lidhur me këtë ngjarje, ekspertja e politikës së jashtme, Donika Emini, e cila do të jetë një nga folëset në forum si themeluese e think-tankut “d-square”, ka shpjeguar për KOHËN se aktiviteti kishte për qëllim trajtimin e çështjeve të Ballkanit Perëndimor dhe parashihte interpretimin e këngëve të vendeve kandidate dhe atyre të përfshira në procesin e zgjerimit. Sipas saj, pasi orkestra kishte luajtur këngë nga vende të tjera, situata ndryshoi kur erdhi radha e Kosovës, pasi këngëtari nuk e këndoi tekstin, ndonëse titulli u shfaq në ekran.

“Doli titulli i këngës që ishte shumë problematik dhe më pas u interpretua vetëm instrumental”, ka treguar Emini. Ajo shtoi se pjesëmarrësit nga Kosova dhe Shqipëria mbetën të shokuar nga kjo situatë. “Unë u shokova, dola menjëherë jashtë dhe e lëshova sallën. Duke dalë, u kam folur edhe pjesëmarrësve të tjerë nga Kosova dhe kam kërkuar të di se kush e kishte zgjedhur këtë këngë dhe kush ishte përgjegjës”, ka deklaruar ajo.

Pas këtij incidenti, ka reaguar ashpër kryenegociatori i Kosovës me Bashkimin Evropian, Jeton Zulfaj, i cili e ka cilësuar ngjarjen si skandaloze dhe të papranueshme, duke kërkuar përgjigje nga komisionerja Marta Kos.

“Një këngë nacionaliste serbe, që mohon shtetësinë e Kosovës dhe që u shkrua në kohën kur kasapi i Ballkanit, Millosheviqi, po i shfuqizonte të drejtat e Kosovës dhe po e shtypte popullin tonë, u interpretua në hapje të Forumit të Zgjerimit të BE-së. Kjo është skandaloze e papranueshme. Një aktivitet i BE-së për zgjerimin nuk mund t’i japë skenë nacionalizmit serb. Komisioneres Kos ia lëmë të shpjegojë se si ndodhi kjo dhe çfarë masash do të ndërmarrë, si dhe pse Kosova, vendi me përparimin më të madh demokratik në Ballkanin Perëndimor gjatë kësaj dekade dhe plotësisht e harmonizuar me politikën e jashtme dhe vlerat e BE-së, nuk ishte ftuar”, ka shkruar Zulfaj në platformën “X”.

Reagim të menjëhershëm ka pasur edhe nga kryenegociatori i Kosovës për dialogun me Serbinë, Agron Bajrami, i cili po ashtu e ka quajtur të papranueshëm interpretimin e kësaj kënge në një aktivitet zyrtar të Komisionit Evropian dhe ka kërkuar sqarime për mënyrën e përzgjedhjes dhe miratimit të repertorit.

“Në koncertin e hapjes së Forumit të Zgjerimit të BE-së në Bruksel, të organizuar nga Komisioni Evropian nën drejtimin e komisioneres Marta Kos, u interpretua kënga nacionaliste serbe “Oj Kosovo, Kosovo”. Ky nuk është shkëmbim kulturor. Kënga promovon pretendime të qarta politike mbi territorin e Republikës së Kosovës. Përfshirja e saj në një aktivitet zyrtar të Komisionit Evropian, kushtuar zgjerimit, unitetit dhe marrëdhënieve të fqinjësisë së mirë, është e papranueshme. Republika e Kosovës pret një sqarim të menjëhershëm nga Komisioni Evropian dhe komisionerja Kos lidhur me mënyrën se si u përzgjodh dhe u miratua ky repertor. Vlerat evropiane, marrëdhëniet e fqinjësisë së mirë dhe besueshmëria e procesit të zgjerimit të BE-së nuk mund të pajtohen me dhënien e një platforme pretendimeve irredentiste kundër një vendi që synon anëtarësimin në Bashkimin Evropian”, ka shkruar Bajrami në platformën “X”.

 

Continue Reading

Lajmet

Parashikimi i motit për sot

Published

on

By

Instituti Hidrometeorologjik i Kosovës ka njoftuar se sot në vendin tonë moti do të jetë kryesisht i vranët dhe me riga shiu.

Temperaturat minimale do lëvizin mes 3 dhe 7 gradë Celsius, ndërsa ato maksimale parashihen të arrijnë nga 8 deri në 13 gradë Celsius.

Ndërkohë, era do të fryjë nga jugperëndimi me një shpejtësi prej 1-5 m/s. /E.A/

 

Continue Reading

Të kërkuara