Një fanellë e Michael Jordan nga sezoni i tij i famshëm “Last Dance” është shitur për 12.3 milionë dollarë (9.3 milionë funte), duke shënuar një rekord të ri për gjërat personale të përdorura gjatë lojës nga legenda e basketbollit.

Jordan e ka mbajtur këtë fanellë gjatë ndeshjes së tretë të finales së NBA-së në vitin 1998, që ishte edhe sezoni i tij i fundit me Chicago Bulls. Ai ndihmoi Bulls të fitonin serinë me rezultat 4-2, duke siguruar titullin e tij të gjashtë dhe të fundit në NBA, ku në të gjitha këto finale u shpall lojtari më i mirë (MVP).

Rekordi i mëparshëm për një objekt të Jordanit ishte 10.1 milionë dollarë (7.6 milionë funte) për fanellën e tij nga ndeshja e primë e po të njëjtës finale të vitit 1998.

Fanella e ndeshjes së tretë u nxor në ankand nga sipërmarrësi Ryan Gough dhe u shit në “Joopiter”, shtëpia digjitale e ankandeve e Pharrell Williams, e cila e kishte vlerësuar atë paraprakisht mes 10 dhe 15 milionë dollarësh.

Përveç fanellës, makina e Jordanit e llojit Ferrari 550 Maranello e vitit 1997 u shit për 2.7 milionë dollarë (2 milionë funte), që është katër fishi i rekordit të mëparshëm të ankandit për këtë model.

“Pakkush nga objektet në historinë e sportit mishëron madhështinë aq plotësisht sa fanella e Michael Jordan nga ndeshja e tretë e finales së NBA-së e vitit 1998,” thuhej në njoftimin e shtëpisë së ankandeve “Joopiter”. “E mbajtur gjatë ‘Last Dance’… ajo shënon kulmin e një ere që e transformoi basketbollin në një fenomen kulturor global. Sot ajo renditet ndër objektet më të rëndësishme sportive të përdorura në lojë që kanë dalë ndonjëherë në treg.”

Ndërkohë, rekordi absolut për një objekt sportiv të përdorur gjatë lojës mbahet nga fanella e legjendës së bejsbollit Babe Ruth, e përdorur në “World Series” të vitit 1932, e cila u shit për 24.1 milionë dollarë (18.2 milionë funte) në vitin 2024. /BBC/

Sot shënohet 29-vjetori i protestave të Lëvizjes Studentore, të cilat vlerësohen si një nga kthesat më të mëdha historike për lirinë dhe pavarësinë e Kosovës.

Protesta paqësore e 1 tetorit të vitit 1997 u organizua si përgjigje ndaj masave të dhunshme të regjimit të Slobodan Milosheviqit, i cili kishte dëbuar studentët dhe profesorët shqiptarë nga objektet universitare, duke imponuar me forcë plan-programin serb.

E prirë nga rektori i atëhershëm, Ejup Statovci, së bashku me drejtuesit e Lëvizjes Studentore si Bujar Dugolli, Albin Kurti, Driton Lajçi e Muhamet Mavraj, marshimi paqësor u ndërpre dhe u shpërnda me dhunë brutale nga policia serbe. Si pasojë e ndërhyrjes policore, dhjetëra studentë dhe profesorë mbetën të lënduar e të arrestuar.

Akti i guximshëm i studentëve mori një jehonë të jashtëzakonshme në mediat vendore dhe ato ndërkombëtare, duke tejkaluar çdo zhvillim tjetër politik të asaj periudhe. Kjo ngjarje historike konsiderohet si një pikë kthese që vendosi çështjen e Kosovës në krye të agjendës diplomacisë ndërkombëtare.

Dhomat e Specializuara të Kosovës në Hagë kanë vendosur t’i vazhdojnë masën e paraburgimit ish-presidentit Hashim Thaçi, në procesin gjyqësor ku ai akuzohet për vepra penale kundër administrimit të drejtësisë së bashku me Bashkim Smakajn, Isni Kilajn, Fadil Fazliun dhe Hajredin Kuçin.

Vendimi është marrë më 30 shtator 2026 nga gjykatësi i vetëm i rastit, Christopher Gosnell, i cili konstatoi se vazhdojnë të ekzistojnë rreziqet se i akuzuari mund të pengojë ecurinë e procesit apo të kryejë vepra të tjera penale.

Në arsyetimin e saj, gjykata bëri me dije se gjatë marrjes së këtij vendimi ka pasur parasysh edhe shpalljen fajtor dhe dënimin e mëparshëm të Thaçit në çështjen gjyqësore për krime lufte. Sipas njoftimit zyrtar të Speciales, ky dënim nuk e ndryshon nevojën për rishikime periodike të paraburgimit në rastin aktual, i cili vlerësohet në bazë të faktorëve specifikë të kësaj çështjeje.

Gjatë seancës fillestare të mbajtur më 27 shkurt 2026, Hashim Thaçi dhe katër të akuzuarit e tjerë u deklaruan të pafajshëm për të gjitha akuzat. Zyra e Prokurorit të Specializuar pretendon se bëhet fjalë për veprime të koordinuara në grup me qëllim pengimin e personave zyrtarë në kryerjen e detyrave të tyre.

Ndaj ish-presidentit Thaçi në këtë çështje rëndojnë tri akuza për pengim të personave zyrtarë, tri akuza për shkelje të fshehtësisë së procedurës, si dhe katër akuza për mosbindje ndaj gjykatës. /E.A/

Një studim i ri farmakoepidemiologjik i realizuar nga profesorët e UBT-së, Arieta Hasani Alidema dhe Fitim Alidema, ka sjellë të dhëna me rëndësi mbi përdorimin, sigurinë dhe rivlerësimin e hershëm klinik të terapisë antihipertensive në kujdesin parësor shëndetësor.

Hulumtimi shkencor, i publikuar në revistën ndërkombëtare “Pharmacoepidemiology“, bazohet në analizën e 1,212 pacientëve të rritur me hipertension arterial, të trajtuar në kujdesin parësor gjatë periudhës janar 2024 – korrik 2026. Mosha mesatare e pacientëve të përfshirë në studim ishte 63.4 vjeç, ku 60.8% e tyre ishin gra dhe 80.1% banorë të zonave rurale, ndërsa mbi 82% e tyre vuanin nga hipertensioni i shkallës së dytë dhe të tretë.

Sipas gjetjeve të studimit, bari më i përshkruar nga mjekët ishte Losartani 40 mg në 56.4% të rasteve, i ndjekur nga Lisinoprili 5 mg me 25.7%. Reaksionet e padëshiruara nga barnat u dokumentuan te 25.2% e pacientëve, duke treguar dallime të ndjeshme statistikore ndërmjet klasave të ndryshme të antihipertensivëve. Në veçanti, analizat treguan se bllokuesit e kanaleve të kalciumit shoqëroheshin me mundësi më të larta për shfaqjen e efekteve anësore, ndërsa përdorimi i statinave dhe trajtimi kronik i rregullt lidheshin me një shkallë më të ulët të këtyre reaksioneve.

Gjithashtu, studimi nxori në pah se rivlerësimi i hershëm klinik brenda 7 deri në 30 ditë u realizua te 96.9% e pacientëve me përcjellje të dokumentuar, çka dëshmon rëndësinë e monitorimit të afërt. Përmes këtij hulumtimi, profesorët e UBT-së nënvizojnë nevojën për një qasje të individualizuar dhe ndjekje të strukturuar të pacientëve në mjekësinë familjare, me qëllim optimizimin e trajtimit dhe rritjen e sigurisë shëndetësore.