Trajneri i Kombëtares së Zvicrës, Murat Yakin, ka komentuar në konferencën për shtyp pas publikimit të listës së futbollistëve të ftuar për ndeshjen kualifikuese ndaj Kosovës, që zhvillohet më 5 shtator në St. Jakob-Park të Baselit.

Zvicra do të përballet me Kosovën në kuadër të Grupit B të kualifikimeve për Kupën e Botës 2026. Yakin ka grumbulluar 23 futbollistë për këtë takim, ndër ta edhe dy lojtarë me prejardhje shqiptare.

Në konferencë, trajneri u pyet për zgjedhjen e Leon Avdullahut që të përfaqësojë Kosovën, si dhe për mungesën e Albian Hajdarit në listën zvicerane. Për Avdullahun, Yakin tha se ka pasur një bisedë të gjatë me të dhe i ka shpjeguar perspektivat sportive, por sipas tij, futbollisti nuk ka zgjedhur rrugën sportive që pritej.

“Avdullahu? Pata një bisedë të gjatë me të në pranverë dhe i shpjegova perspektivat sportive. Siç e shoh unë, ai nuk e zgjodhi rrugën sportive. Nëse dikush mendon ndryshe për kulturën, ne nuk mund ta ndikojmë këtë,” tha Yakin, duke mohuar se Federata e Zvicrës nuk i kishte dhënë mjaftueshëm përpjekje lojtarit.

Në lidhje me Albian Hajdarin, trajneri shtoi se për të ka një plan, i cili do të konkretizohet pas ndeshjeve të shtatorit. Ai gjithashtu u shpreh i shqetësuar për mundësinë e largimit të mbrojtësit të Hoffenheimit.

Christopher Nkunku është shumë pranë transferimit te AC Milan, pasi klubet Chelsea dhe Milani kanë arritur një marrëveshje verbale për kalimin e sulmuesit francez në San Siro.

Sipas gazetarit të njohur Fabrizio Romano, Milani do të paguajë rreth 35 milionë euro për Nkunkun, përfshirë edhe bonuset që lidhen me performancën, të cilat mund të rrisin shumën totale deri në 42 milionë euro.

Detajet e kontratës janë finalizuar, me sulmuesin që ka rënë dakord për një marrëveshje pesëvjeçare me klubin italian. Aktualisht, Chelsea dhe Milani po përgatisin dokumentet përfundimtare për finalizimin e transferimit.

Nkunku pritet të ketë një rol të rëndësishëm në projektin sulmues të AC Milanit, ndërsa nënshkrimi dhe zyrtarizimi i marrëveshjes pritet të ndodhin brenda ditëve në vijim.

Sulmuesi argjentinas Lionel Messi nuk ka konfirmuar ende nëse do të marrë pjesë në Kupën e Botës 2026 me Kombëtaren e Argjentinës.

Sipas mediave, përfshirë edhe gazetën sportive Ole, nuk ka garanci që 38-vjeçari do të jetë pjesë e turneut që mbahet në Shtetet e Bashkuara, Kanada dhe Meksikë. Messi preferon të marrë vendimet “nga dita në ditë” dhe momentalisht është i fokusuar në ndeshjen kualifikuese ndaj Venezuelës, që zhvillohet më 5 shtator.

Burime pranë lojtarit theksojnë se vendimi do të jetë shumë personal dhe do të merret kur ai të ndihet gati. Për momentin, të gjitha shenjat tregojnë se Messi mund të jetë në listën e Argjentinës për Kupën e Botës 2026.

Trajneri i Kombëtares, Lionel Scaloni, dhe presidenti i FIFA-s, Gianni Infantino, janë optimistë për pjesëmarrjen e Messit, ndërsa thuhet se ideja ka përkrahjen edhe të ish-presidentit amerikan, Donald Trump.

Chelsea ka paraqitur një ofertë prej 50 milionë eurosh për mesfushorin e Barcelonës, Fermin Lopez, por klubi katalanas kërkon të paktën 60 milionë euro për ta lënë të lirë lojtarin. Deri tani, dy klubet nuk kanë arritur marrëveshje, ndërsa vetë lojtari nuk ka dhënë ende një përgjigje përfundimtare lidhur me të ardhmen e tij.

Sipas raportimeve, Lopez ka marrë një ofertë që do t’i dyfishonte ose edhe trefishonte pagën aktuale te Barcelona, por vendimi i tij mbetet pezull.

Për Chelsea-n, Lopez shihet si një alternativë më e përballueshme krahasuar me objektivin e tyre kryesor – Xavi Simons, aktualisht pjesë e RB Leipzig. Ish-lojtari i akademisë së Barcelonës vlerësohet rreth 70 milionë euro, një shumë që mund të sjellë sfida të konsiderueshme për klubin londinez në raport me rregullat e Fair Play Financiar dhe regjistrimin e lojtarëve për Ligën e Kampionëve.

Këto kufizime kanë bërë që Chelsea të shqyrtojë alternativa më të qëndrueshme financiarisht, dhe emri i Fermin Lopez ka dalë në plan të parë. Megjithatë, për të arritur marrëveshjen, diferenca prej 10 milionë eurosh në vlerësim mbetet pengesë.

Situata pritet të qartësohet në ditët në vijim, ndërsa Chelsea vlerëson mundësitë dhe Barcelona mban qëndrimin e saj për vlerën e lojtarit.