Çmimet e naftës u rritën të hënën, ndërsa përshkallëzimi i konflikteve Rusi-Ukrainë nxiti shqetësime për furnizimin dhe OPEC+ dha një rritje më të vogël se sa pritej të prodhimit.

Nafta e papërpunuar Brent u tregtua me 66.34 dollarë për fuçi në orën 10:43 të mëngjesit sipas kohës lokale (07:43 GMT), 1.3% më shumë nga mbyllja e mëparshme prej 65.45 dollarësh.

Çmimet e naftës në SHBA u rritën me 1.4% në 62.60 dollarë nga 61.70 dollarë në seancën e mëparshme, transmeton AA.

Çmimet e naftës u rritën ndërsa Rusia nisi sulmin e saj më të madh ajror në Ukrainë që nga fillimi i luftës, duke nxitur frikën e sanksioneve më të ashpra dhe rreziqeve të ripërtërira të furnizimit.

Presidenti ukrainas Volodymyr Zelenskyy tha në X se forcat ruse vendosën më shumë se 800 dronë, katër raketa balistike dhe nëntë raketa lundrimi në një sulm ndaj Kievit.

Forcat Ajrore të vendit raportuan se ndërsa shumica e dronëve u kapën, 54 UAV dhe nëntë raketa goditën objektiva në kryeqytet, përfshirë një ndërtesë qeveritare që u godit për herë të parë.

Duke folur me gazetarët përpara se të largohej nga Shtëpia e Bardhë për në Nju Jork, Presidenti i SHBA-së Donald Trump tha se ishte i përgatitur të kalonte në një fazë të dytë të sanksioneve ndaj Rusisë.

Presidenti i Këshillit Evropian Antonio Costa tha të premten se blloku po përshpejtonte punën për masat e reja dhe do të dërgonte një delegacion në Uashington.

Pritjet për një konflikt të zgjatur kanë rritur shqetësimet për furnizimin duke mbështetur lëvizjet në rritje të çmimeve, ndërsa kërcënimet e sanksioneve të Trump kundër Rusisë kufizuan fitimet duke nxitur frikën e një rritjeje më të dobët ekonomike dhe një kërkese më të dobët për energji në afat të shkurtër.

Ndërkohë, rritja më e vogël se sa pritej e prodhimit të OPEC+ gjithashtu mbështeti çmimet duke nxitur shqetësimet për furnizimin.

OPEC dhe aleatët e saj ranë dakord të rrisin prodhimin e naftës me 137,000 fuçi në ditë (bpd) në tetor.

Rritja, e udhëhequr nga Arabia Saudite, Rusia, Iraku, Emiratet e Bashkuara Arabe, Kuvajti, Kazakistani, Algjeria dhe Omani, nuk i përmbushi pritjet e tregut.

Megjithatë, çmimet gjetën mbështetje ndërsa tregtarët mirëpritën qartësinë mbi planin e furnizimit të kufizuar të grupit.

OPEC+ kishte rritur më parë prodhimin me 547,000 fuçi në ditë në shtator dhe 548,000 në gusht./D.B/KP

Një ngjarje e rëndë ka tronditur të premten Gjermaninë. Në një shkollë të qytetit të Essenit, një mësuese është therur me thikë nga një 17-vjeçar me origjinë nga Kosova.

Policia ndërhyri menjëherë, duke neutralizuar dhe arrestuar të dyshuarin. Si autori, ashtu edhe viktima u transportuan në Spitalin Universitar të Essenit.

Sipas mediave gjermane, pas ndërhyrjeve kirurgjikale, të dy ndodhen në gjendje stabile dhe jashtë rrezikut për jetën.

Motivet e sulmit mbeten ende të paqarta, ndërsa hetimet për zbardhjen e plotë të rastit po vazhdojnë./D.B/EO

Turizmi është një sektor kyç për zhvillimin ekonomik dhe të qëndrueshëm të Kosovës, që kërkon profesionistë të përgatitur sipas praktikave më të mira ndërkombëtare. Për ta bërë këtë të mundur, UBT ka nënshkruar një marrëveshje për Diplomë të Dyfishtë (Double Degree) me IMC Krems – University of Applied Sciences në Austri, një nga modelet më të suksesshme evropiane në arsimin për turizëm.

Në bazë të kësaj marrëveshjeje, studentët e Turizmit në UBT do të studiojnë dy vite në Kosovë dhe vitin e fundit në Austri, duke u pajisur me dy diploma universitare – një nga UBT dhe një nga IMC Krems.

Marrëveshja u nënshkrua nga Presidenti i UBT-së, Prof. Dr. Edmond Hajrizi, në Austri, ku ai u prit nga themeluesi dhe kryetari i bordit mbikëqyrës të IMC Krems, Heinz Boyer, drejtori ekzekutiv Udo Brändle, si dhe nga Iris Waringer, drejtuese e Marrëdhënieve Ndërkombëtare, dhe Chen Yang, përgjegjës për projektet ndërkombëtare.

“Ky bashkëpunim është dëshmi e orientimit ndërkombëtar të UBT-së dhe përkushtimit tonë për t’u ofruar studentëve mundësi unike që e rrisin cilësinë e studimeve dhe hapin dyert e karrierës ndërkombëtare”, tha Rektori Hajrizi.

Ky program Double Degree do të shndërrohet në një nga shtyllat kryesore të zhvillimit të turizmit në Kosovë, duke përgatitur gjenerata të reja profesionistësh që do të kontribuojnë në promovimin e vendit si destinacion turistik dhe në rritjen e standardeve të industrisë së mikpritjes.

Austria konsiderohet si një ndër modelet më të suksesshme në fushën e arsimit profesional për turizëm dhe hotelieri, duke ofruar një sistem shkollimi të avancuar dhe të orientuar drejt praktikës.

Për kryeministrin e Shqipërisë, Edi Rama, diplomacia ekonomike është pika më e dobët e bilancit të ambasadave shtetit nëpër botë.

Gjatë fjalës së mbajtur në takimin tre ditor me ambasadorët e Shqipërisë, kreu i qeverisë tha se kontributi i përfaqësive është thuajse inekzistent.

“Një element kyç që mbetet hallka më e dobët e punës së Shërbimit Diplomatik është diplomacia ekonomike ku roli i përfaqësive tona është i dobët dhe ku përjashto raste specifike që lidhen me natyrën dhe vullnetin e ndonjë ambasadori, kontributi është inekzistent. Është bërë një konferencë e dedikuar për përfaqësitë diplomatike në funksion të diplomacisë ekonomike, por rezultatet lënë për të dëshiruar. Ky aspekt duhet të jetë prioritet i ambasadave”, tha Rama, raporton Top Channel.

Sipas tij sa i përket politikës së jashtme, qeveria në Tiranë ua ka lehtësuar punën.

“Ndryshe nga si ndodhte më parë kur kancelaritë evropiane ishin të largëta për përfaqësitë tona, sot kancelaritë ndërkombëtare janë vetëm një telefonatë larg nga Tirana. Puna juaj duhet të jetë e fokusuar te rritja e intestitet të lidhjeve me botën ekonomike, e cila është tejet e zhvilluar në Evropë. Duke shfrytëzuar impaktin e Shqipërisë mund të bëjmë shumë së bashku”, tha ai./D.B/EO