Pas njoftimeve të publikuara në sistemet ndërkombëtare ADIS dhe WAHIS lidhur me konfirmimin e shpërthimit të sëmundjes Gjuha e Kaltër (Bluetongue – BT) në shtetin e Malit të Zi, me qëllim të parandalimit të përhapjes së kësaj sëmundje në territorin e Republikës së Kosovës, Agjencia e Ushqimit dhe Veterinarisë (AUV) ka vendosur masë ndalese të përkohshme për importin e kafshëve të gjalla të llojit gjedhë, dele dhe dhi nga i gjithë territori i Malit të Zi.

Autoritetet kufitare që veprojnë në kuadër të Menaxhimit të Integruar të Kufirit – Policia e Kosovës, Doganat dhe AUV – obligohen të zbatojnë masa të shtuara kontrolli në të gjitha pikat kufitare, për të parandaluar hyrjen në vend të kafshëve të gjalla të përmendura nga ky shtet.

Të gjitha institucionet përkatëse janë të detyruara të bashkëpunojnë dhe të ndërmarrin veprime të menjëhershme për parandalimin e përhapjes së sëmundjes.

Informata mbi sëmundjen Gjuha e Kaltër (Bluetongue – BT)

Është një sëmundje virale që transmetohet përmes pickimit të insekteve të llojit Culicoides (mushkonja). Prek ruminantët shtëpiak: gjedhë, dele dhe dhi. Delet janë më të ndjeshme ndaj sëmundjes, pasuar nga dhitë dhe gjedhët.

Shenjat klinike dhe ngordhjet paraqiten kryesisht tek delet, ndërsa gjedhi shërben si rezervuar i sëmundjes. Nuk është zoonotike, pra nuk transmetohet tek njerëzit dhe nuk paraqet rrezik për shëndetin publik/D.B/EO

Presidentja e Kosovës, Vjosa Osmani tha se ndërhyrja e Serbisë në zgjedhjet lokale në Kosovë është më flagrantja. Ajo deklaroi për A2 CNN se Serbia po përpiqet të blejë vota duke shkelur parimin e fqinjësisë së mirë.

Në zgjedhjet lokale që do të mbahen të dielën, është rikthyer në garë edhe Lista Serbe, subjekt ky që mbështetet nga Beogradi zyrtar. Përpos mbështetjes publike të zyrtarëve shtetërorë serbë për këtë subjekt politik, janë premtuar edhe vende pune dhe pensione për serbët kush e voton atë.

“Është një prej ndërhyrjeve më flagrante që ka ndodhur në proceset zgjedhore në Kosovë edhe pse ato kanë qenë të vazhdueshme dhe ky nuk është vetëm konstatim i yni por ka qenë konstatim i vazhdueshëm edhe i institucioneve europiane dhe atyre amerikane. Serbia vazhdimisht nëpërmjet njerëzve që i kontrollojnë në Kosovë kanë ndërhyrë madje edhe kanë përdorur edhe metoda të dhunshme dhe kërcënime dhe shantazhe ndaj qytetarëve serbë në mënyrë që të marrin vota dhe t’i drejtojnë ata ku ata dëshirojnë. Tash po e shohim që po tentojnë edhe të bëjnë edhe blerje të votave duke premtuar gjëra të cilat nuk i takojnë Serbisë sepse është shtet tjetër dhe kjo sipas çdo perimetri të drejtës ndërkombëtare është në kundërshtim të plotë me parimin e fqinjësisë së mirë sepse siç e dini e drejta ndërkombëtare parandalon apo ndalon ndërhyrjen në zgjedhjet e një shteti tjetër”, tha ajo.

Osmani la të nënkuptohet se Serbia po trimërohet nga fakti që nuk ndëshkohet asnjëherë sa herë dëmton Kosovën.

“Kjo është një shkelje e vazhdueshme që Serbia po e bën, një shkelje e cila është konstatuar disa herë në raportet ndërkombëtare por fatkeqësisht nuk është që është ndërmarrë ndonjë masë ndaj Serbisë dhe pastaj ata po i vazhdojnë këto punë të paligjshme të cilat janë ndërhyrje flagrante në punët e brendshme të Republikës së Kosovës dhe në sistemin tontë demokratik”, tha Osmani për A2 CNN.

Osmani tha se institucionet kosovare të sigurisë janë duke u përpjekur maksimalisht që të mbrojnë qytetarët serbë nga manipulmet e Beogradit zyrtar.

Megjithatë, ajo shtoi se duhet edhe presion ndërkombëtar mbi Serbinë në mënyrë që të mos ketë ndërhyrje të tilla.

“Institucionet tona të sigurisë janë duke bërë çmos që të mbrojnë qytetarët serbë janë qytetarë të Kosovës nga këto ndërhyrje, nga kërcënimet e vazhdueshme të cilat ata i marrin dhe që të mbrojnë jo vetëm jetën e tyre por të mbrojnë edhe pronën e tyre dhe njëkoëhsisht të drejtën e tyre për votë të lirë. Megjithatë, duhet të kemi parasysh që ndërhyrjet janë edhe të natyrës politike dhe në mënyrë që një ndëhyrje e tillë të ndalohet duhet presion ndërkombëtar mbi Serbinë dhe duhet veprime konkret në raport me Serbinë i cili është shteti që po e kryen këtë shkelje flagrante”

Alarm për ndërhyrjen e Serbisë në zgjedhjet lokale pati dhënë ditë më parë edhe kryeministri në detyrë i Republikës së Kosovës, Albin Kurti që kërkoi sanksione për Beogradin./D.B/EO/A2CNN

E ardhmja e portës së Gjermanisë në Kupën e Botës 2026 mbetet ende e paqartë, pasi që Marc-Andre ter Stegen po lufton për t’u rikthyer në formën e tij më të mirë.

Sipas Bild, portieri i Bayern Munich është i hapur ndaj një rikthimi, por kërkon që trajneri i kombëtares Julian Nagelsmann ta kontaktojë personalisht dhe t’i shprehë dëshirën e qartë për ta rikthyer në ekip.

Deri tani, vetëm drejtori sportiv i DFB-së, Rudi Voller, ka pasur komunikim të kufizuar me lojtarin për këtë çështje.

Neuer, i cili mbush 39 vjeç, e sheh të mundur bashkëpunimin me Nagelsmann në Kupën e Botës në SHBA, Kanada dhe Meksikë, por nuk dëshiron ta bëjë këtë çështje publike.

Ai synon të ruajë respektin ndaj portierëve aktualë të kombëtares dhe të shmangë çdo keqkuptim brenda grupit.

Në të kaluarën, marrëdhëniet midis Neuer dhe Nagelsmann kanë qenë të tensionuara. Gjatë periudhës së përbashkët te Bayern Munich, u krijua një përçarje pasi trajneri shkarkoi mikun e ngushtë të portierit, trajnerin e portierëve Toni Tapalovic.

Megjithatë, raportet janë përmirësuar që prej asaj kohe, sidomos gjatë bashkëpunimit në kombëtare.

Pas Kampionatit Evropian 2024, Neuer u tërhoq nga përfaqësuesja gjermane, por nëse Nagelsmann vendos t’i hapë sërish derën, rikthimi i tij në “Die Mannschaft” nuk është aspak i përjashtuar./S.K/KP/

Komisioni Qendror i Zgjedhjeve (KQZ) në mbledhjen e sotme ka prezantuar raportin lidhur me fazën përfundimtare të procesit përgaditor të Zgjedhjeve Lokale për Kryetarë të Komunave dhe për Kuvende Komunale, të cilat do të mbahen më 12 tetor 2025.

Sipas raportit, është përmbyllur procesi i trajnimit të anëtarëve të Këshillave të vendvotimit, të cilët do të angazhohen në ditën e zgjedhjeve, ndërkaq gjatë ditës së sotme në Qendrën Komunale të Numërimit në Prishtinë është mbajtur trajnimi me të gjithë administratorët e teknologjisë informative për përdorimin e teknologjisë informative në dorëzim-pranimin e materialeve zgjedhore dhe numërimin e fletëvotimeve nga zgjedhjet për Kuvendet Komunale.

Në mbledhje u bë e ditur se në kuadër të përgatitjes së procesit zgjedhor, janë shpërndarë pajisjet e teknologjisë informative, si kamerat vëzhguese për vendvotime, QKN dhe materialet tjera.

Në vazhdim të mbledhjes, KQZ mori vendim për deakreditimin e 2 organizatave vëzhguesve Youth Development & Corporation – YDC/ Rinia për Zhvillim dhe Bashkëpunim (12 vëzhgues) si dhe Iniciativa për progres (7 vëzhgues), pasi këto organizata në statutin e tyre nuk i kanë fushëveprim të drejtat e njeriut dhe proceset zgjedhore.

Në pikën tjetër të rendit të ditës, KQZ mori vendim për miratimin e planit operacional për ditën e zgjedhjeve, më 12 tetor 2025, me anë të të cilit planifikohet organizimi i punës së KQZ-së dhe bashkëpunimit me institucione të ndryshme për mbarëvajtjen e procesit zgjedhor./D.B/EO