Lajmet

​Këtë vit pritet miratimi i rregullores së re të Kuvendit

Publikuar

3 vjet më parë

më

Kuvendi i Republikës së Kosovës pritet të bëhet me rregullore të re më së largu deri në fund të sesionit veror. Grupi punues ka nisur punën për hartimin e saj, në kuadër të së cilës përfshihet edhe formimi i një trupi të ri të Kuvendit i quajtur “konferenca e kryetarëve”, që u jep rol vendimmarrës edhe shefave të grupeve parlamentare.

Rregullorja e punës së Kuvendit të Kosovës për vite me radhë nuk është miratuar, porse si duket këtë radhë ka vullnet për finalizimin e saj. Kështu beson kryetari i komisionit për legjislacion, Adnan Rrustemi, i cili thotë se Kuvendi pritet të bëhet me rregullore të re para sesionit vjeshtor.

“Si kryetar i Komisionit për legjislacion dhe pjesë e grupit punues do të përpiqemi që sa më parë ta kemi rregulloren e re të Kuvendit të Kosovës, që shqyrtohet dhe miratohet në seancë. Unë nuk po jap afate, por gjithsesi mendoj se duhet të miratohet para sesionit vjeshtor. Kjo nënkupton që brenda verës së këtij viti do të miratohet rregullorja e re”, thotë ai për KosovaPress.

Teksa shprehet optimist se do të miratohet rregullorja e re në një afat të afërt, Rrustemi thotë se kjo e fundit duhet të jetë reflektim i të gjitha palëve. Ai tregon se përmes rregullores së re synojnë të përmirësojnë efikasitetin e punës në Kuvend, duke marrë praktikat më të mira që janë shfaqur përgjatë viteve.

“Ne synojmë gjatë këtij procesi që të përmirësojmë efikasitetin e Kuvendit të Kosovës, të përfshijmë të gjitha sfidat dhe pengesat që janë hasur gjatë legjislaturave, por edhe të formalizojmë praktikat e mira që janë shfaqur gjatë këtyre viteve. Sa i përket vonesave, kjo duket qartë që në legjislaturat e kaluara nuk ka pasur kosnensus të mjaftueshëm për ta miratuar rregulloren e Kuvendit, sepse rregullorja e punës e Kuvendit miratohet me 2/3 dhe kjo e ka vështirësuar”, thekson ai.

Se Kuvendi duhet të bëhet sa më parë me rregullore të re, thotë edhe deputeti i Partisë Demokratike të Kosovës, Hajdar Beqa, sipas të cilit, rregullorja aktuale ka nevojë për plotësim-ndryshim të tërësishëm. Ai thotë për KosovaPress se rregullorja do vetëm vullnet politik.

“Unë kosnideroj që është më shumë se e domosdoshme të ndryshojë rregullorja e Kuvendit, ka nevojë për plotësim ndryshim të tërësishëm. Ne e dimë që ka pasur shpesh gjatë seancave në mandatet e kaluara zbrazëtira, të cilat nuk i ka mbuluar rregullorja. Mendoj që duhet të miratohet këtë vit, edhe pse kjo është legjislatura e katërt që ka marrë në agjendë rregulloren dhe nuk ka mundur me dërgu deri në fund. Në vitin 2019, kam qenë unë kryetar i komisionit, e kemi kalu në lexim të parë, por nuk ka pasur vullnet politik. Rregullorja donë vetëm vullnet politik”, thotë ai.

Pak më skeptike për miratimin e rregullores së re del të jetë Agnesa Haxhiu nga Instituti Demokratik i Kosovës (KDI). Ajo thotë se përkundër deklarimeve të subjekteve politike se kanë për ta shtyrë përpara miratimin e rregullores së punës të Kuvendit, një gjë e tillë tash 10 vite nuk ka ndodhur.

“Edhe tash grupet parlamentare të gjitha e kanë deklaruar vullnetin e tyre për të miratuar rregullore këtë legjislaturë, mirëpo mbetet të shihet nëse do të ketë dakordim mes tyre në fund kur ajo të draftohet për përmbajtjen e rregullores”, thotë ajo.

Meqenëse është punuar 10 vite në të, Haxhiu thotë se draft-rregullorja ka pësuar shumë ndryshime në krahasim me rregulloren aktuale me të cilën punon Kuvendi. Ajo bënë të ditur se pothuajse çdo kapitull ka ndryshime, diku ndryshime të mëdha, e diku ndryshime teknike.

“Një prej risive që është propozuar në Rregulloren e re, është një trup e re Kuvendit, e cila është emërtuar si ‘konferenca e kryetarëve’, kjo është marrë model nga Kuvendi i Shqipërisë, dhe është pak a shumë një formalizim i asaj se si punon kryesia, se si vendoset për seancat plenare, ku edhe shefat e grupeve parlamentare kanë mundësi për vendimmarrje, që aktualisht nuk e kanë. Më së shumti kundërshtime ka pasur në këtë pikë. Grupet më të vogla e kanë përkrahur, të tjera kanë kundërshtuar. Mbetet të shihet tash sesi do të procedohet tutje, ajo vazhdon në mbes në draftin që ka qenë në legjislaturat e kaluara”, thotë ajo.

Ndër ndryshimet tjera që parasheh draft-rregullorja, Haxhiu numëron edhe risitë tek procesi legjislativ, ku është ndryshuar pjesa e procedurës së përshpejtuar të ligjeve, duke përcaktuar afatin se kur mund të ndodh kjo; ndarja e procedurës për shqyrtimin e buxhetit nga ligjet tjera, që sipas saj është mëse e nevojshme si dhe, ndryshimet tek pjesa e seancave, ku sipas këtyre ndryshimeve prioritet të lirohet nga ngarkesa e pyetjeve parlamentare seanca plenare e Kuvendit të Kosovës.

Etiketa
Vazhdo të lexosh

Lajmet

BB mbështet përmirësimin e shërbimeve shëndetësore në Kosovë për të përmirësuar jetën e qytetarëve

Publikuar

4 orë më parë

më

8 Maj, 2024

nga

Bordi i Drejtorëve Ekzekutiv të Bankës Botërore ka miratuar sot Projektin për Qasje Gjithëpërfshirëse për Forcimin e Sistemit Shëndetësor në Kosovë (KOMPAS), i cili synon të forcojë kapacitetet institucionale dhe qeverisjen për cilësinë e kujdesit në sistemin shëndetësor të Kosovës.

Në njoftim thuhet se projekti do të mbështesë forcimin e kapaciteteve institucionale, do të rrisë ofrimin e shërbimeve dhe financimin e shëndetësisë dhe do të përmirësojë sistemet e informacionit. Kjo do t’u mundësojë ofruesve të shërbimeve të regjistrojnë dhe ndajnë informacionin thelbësor shëndetësor, duke lejuar monitorimin dhe matjen në kohë reale të performancës së sistemit shëndetësor.

“Ndërhyrjet e projektit do të përqendrohen në përmirësimin e qeverisjes dhe mekanizmave institucionalë për cilësinë e kujdesit, monitorimin, ngritjen e kapaciteteve të profesionistëve të kujdesit shëndetësor dhe koordinatorëve të cilësisë për përdorimin e udhëzimeve klinike, mbështetjen për Inspektoratin Shëndetësor, investimin në infrastrukturën kritike dhe ngritjen e kapaciteteve për gatishmëri dhe reagim të sistemit të shëndetit publik, duke ofruar mbështetje teknike për ndërhyrjet financuese shëndetësore që do të ndihmojnë në zhvillimin e kapaciteteve strategjike për blerje të shërbimeve me cilësi të lartë. Projekti do të mbështesë gjithashtu zhvillimin e një sistemi të integruar të informacionit shëndetësor (IHIS) për të përmirësuar cilësinë e kujdesit ndaj pacientëve”, thuhet në njoftim.

“Ka pasur progres në zhvillimin e kornizës ligjore dhe kushteve të tjera për forcimin e sistemit shëndetësor të Kosovës, por për të përmirësuar cilësinë e përgjithshme të kujdesit për popullatën, themeli i sistemit shëndetësor të Kosovës duhet të forcohet më tej”, tha Massimiliano Paolucci, Menaxher i Bankës Botërore për Kosovën dhe Maqedoninë e Veriut.

Sipas BB-së mbështetja financiare e miratuar nga Bordi për këtë projekt është 18.6 milionë euro (ekuivalente me 20 milionë dollarë), një kredi me kushte koncesionare nga Shoqata Ndërkombëtare e Zhvillimit (IDA), pjesë e Bankës Botërore. Periudha e shlyerjes së kredisë për këtë projekt është 25 vjet, e cila përfshin një grejs-periudhë 5-vjeçare. Pas miratimit nga Bordi i Drejtorëve Ekzekutiv, Qeveria e Kosovës dhe Banka Botërore do të nënshkruajnë një marrëveshje për financimin e projektit, e cila më pas duhet të ratifikohet nga Kuvendi i Kosovës në mënyrë që fondet e projektit të vihen në dispozicion për disbursim për të mirën e qytetarëve të Kosovës. Në fund thuhet se Ministria e Shëndetësisë e Kosovës do të jetë Agjencia Zbatuese dhe do të jetë përgjegjëse për zbatimin e përgjithshëm të projektit.

Vazhdo të lexosh

Lajmet

Shefi i OBSH-së paralajmëron se spitalet në Gaza kanë karburante vetëm edhe për tri ditë

Publikuar

4 orë më parë

më

8 Maj, 2024

nga

Spitalet në jug të Gazës kanë vetëm edhe për tri ditë karburante, që nënkupton se shërbimeve mund t’u vie fundi, tha shefi i Organizatës Botërore të Shëndetësisë.

Drejtori i përgjithshëm, Tedros Adhanom Ghebreyesus shkroi në “X” se mbyllja e kufirit në Rafah ua pamundëson Kombeve të Bashkuara sjelljen e karburanteve. Pa karburante të gjitha operacionet humanitare do të marrin fund.

Ushtria e Izraelit e mori kontrollin e kufirit të Gazës në Rafah./UBTNews/

Vazhdo të lexosh

Lajmet

MPB-ja thotë se procesi i konvertimit të patentë shoferëve fillon nga 10 maji

Publikuar

5 orë më parë

më

8 Maj, 2024

nga

Ministria e Punëve të Brendshme ka njoftuar se nga data 10 maj do të fillojë procesi i konvertimit të patentë shoferëve të lëshuar nga strukturat ilegale serbe në patentë shoferë të Kosovës.

Sipas MPB-së, konvertimi i patentë shoferëve të lëshuar nga strukturat ilegale serbe në patentë shoferë të Kosovës do të zgjasë deri më 9 gusht të këtij viti.

“Të gjithë qytetarët që posedojnë patentë shoferi të lëshuar nga strukturat jo legale serbe mund të aplikojnë për patentë shoferi zyrtar të Republikës së Kosovës përmes aplikimit formularit elektronik në ueb faqen  https://patentshoferonline.rks-gov.net/ apo edhe fizikisht në Qendrën për Pajisje me Dokumente në të gjitha komunat e Kosovës”, thuhet në njoftimin e MPB-së.

MPB-ja njoftoi se në rast të paraqitjes fizike për aplikim në sportelet e Qendrave për Pajisje me Dokumente, qytetarët duhet të posedojnë me vete letërnjoftimin, origjinalin e patentë shoferit të lëshuar nga ana e autoriteteve serbe, certifikatën e gjendjes shëndetësore për pajisje me patentë shofer.

“Certifikata shëndetësore lëshohet nga institucionet shëndetësore të licencuara nga Ministria e Shëndetësisë e Republikës së Kosovës, në tërë territorin e Republikës së Kosovës. Çmimi për certifikatë shëndetësore varion nga kategoria e mjetit për të cilin posedon patentë shoferin dhe atë si në vijim: Për kategorinë B/BE çmimi i certifikatës shëndetësore është njëzetë euro (20.00. Për kategorinë C dhe kategorinë D çmimi i certifikatës shëndetësore është pesëdhjetë euro (50.00€). Dëshmi të pagesës së taksës vlera e së cilës është pesëmbëdhjetë euro (15.00€) dhe origjinalin e patentë shoferit të lëshuar nga UNMIK apo RKS në qoftë se bëhet aplikimi për shtimin e kategorive, gjë e cila po ashtu është mundësuar përmes këtij vendimi të Ministrisë së Punëve të Brendshme”, thuhet në njoftim./UBTNews/

Vazhdo të lexosh

Kronika e zezë

Një muaj paraburgim për vajzën që goditi babanë me mjet të mprehtë

Publikuar

5 orë më parë

më

8 Maj, 2024

nga

Gjykata Themelore në Ferizaj, ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurës L.J., pasi që dyshohet se ka goditur me mjet të mprehtë babanë e saj. Ngjarja ka ndodhur në Shtime.

Ajo dyshohet për veprën penale lëndimi i lehtë trupor nga neni 185 paragrafi 3 nën paragrafin 3.2 lidhur me paragrafin 1 të Kodit Penal të Republikës së Kosovës (KPRK).

Të martën Policia e Kosovës ka njoftuar për arrestimin e saj, p[asi siç thuhej në raportin 24-orësh, pas një mosmarrëveshje kishte sulmuar babanë e saj.

Në njoftimin e Gjykatës thuhet se pas mbajtjes së seancës dëgjimore dhe analizimit të shkresave të lëndës, gjyqtarja e procedurës paraprake, ka vlerësuar se ekziston dyshimi i bazuar, se e pandehura me datë 6 maj 2024, në Shtime.

“Saktësisht në shtëpinë e tyre të përbashkët, me dashje i shkakton lëndime të lehta trupore të dëmtuarit- prindit të saj R.J., si viktimë e ndjeshme për shkak të marrëdhënieve familjare që kanë, në atë mënyrë që pas një fjalosje verbale në mes tyre, pasi që e njëjta kishte kërkuar nga i dëmtuari ta ndërpresë telefonatën me vajzën e tij, e pandehura bëhet nervoz dhe e godet të dëmtuarin në anën e djathtë në pjesën e gjoksit, me një thikë-mjet, me të cilin mund t`i shkaktojë lëndime të rënda trupore ose dëmtim të rëndë të shëndetit, e pasi del në oborr dhe e godet me gurë në pjesë të trupit, i dëmtuari ka marrë tretman mjekësor dhe posedon raport mjekësor nga QKMF në Shtime”, thuhet në njoftimin e Prokurorisë.

Vazhdo të lexosh

Të kërkuara