Lajmet

​Kërkohet që sa më parë të krijohet strategjia për drejtësi tranzicionale, MD thotë se nuk mungon vullneti politik

Haxhiu u shpreh nuk mungon vullneti i Qeverisë së Kosovës për finalizim e strategjisë për drejtësi tranzicionale.

Published

on

Drafi i parë i Strategjisë për Drejtësi Tranzicionale deri në shtator pritet të jetë në diskutim publik, ndërsa edhe Zyra e Bashkimit Evropian në Kosovë i bën thirrje Qeverisë së Kosovës që sa më shpejt ta hartojë këtë strategji. Kështu u tha me rastin e publikimit të udhëzimit “Drejt një Strategjie Kombëtare të Drejtësisë Tranzicionale për Kosovën”, nga Fondi për të Drejtën Humanitare në Kosovë (FDHK).

Ministrja e Drejtësisë, Albulena Haxhiu u shpreh nuk mungon vullneti i Qeverisë së Kosovës për finalizim e strategjisë për drejtësi tranzicionale. Haxhiu u shpreh se tashmë Projektligji për Institutin e Krimeve të kryera gjatë luftës në Kosovë aktualisht është në diskutim publik dhe së shpejti planifikojnë ta dërgojnë në Qeveri.

“Ministria e Drejtësisë është e angazhuar në hartimin e një strategjie e cila ka në fokus viktimat dhe nevojat e veçanta të tyre. Andaj konsultimi i vazhdueshëm me të gjithë ata që janë prekur nga lufta duke iu kushtuar vëmendje të veçantë krimeve dhe abuzimeve të kryera ndaj grupeve të margjinalizuara është mënyra më e mirë për t’i njohur pwr së afërmi nevojat e tyre që ato pastaj të pasqyrohen qartë në strategji. Duke qenë pjesë e planit qeverisës padyshim që vullneti politik në finalizimin e kësaj strategjie mbi parimet bazë për drejtësi tranzicionale nuk mungon, në fakt ne jemi më të përkushtuar si asnjëherë më parë që të trajtojmë të kaluarën tonë dhe t’i japim kahje të ardhmes drejtë respektimit dhe garantimit, por po ashtu edhe të drejtave të njeriut. Megjithatë duhet ta pranojmë se hartimi i kësaj strategjie deri tani ka qenë mjaftë sfidues, institucioneve të Kosovës duke se iu mungojnë kapacitetet e nevojshme për zhvillimin e politikave në drejtësi tranzicionale”, u shpreh Haxhiu.

Kurse shefi i Zyrës së Bashkimit Evropian në Kosovë, Tomas Szunyog u shpreh se publikimi i këtij udhëzuesi do të ndihmojë në zhbllokimin e vonesave për hartim të strategjisë për drejtësi tranzicionale. Ai i bëri thirrje Qeverisë së Kosovës që sa më parë të hartojë draftin e kësaj strategjie.

“Udhëzuesi duhet të ndihmojë në zhbllokimin e vonesave aktuale në hartimin e strategjisë për drejtësi tranzicionale për Kosovën. Qëllimi i udhëzuesit është që t’ia angazhojmë politikanët dhe popullin që të kërkojnë veprime të qarta nga autoritet dhe të fillojnë diskutimet për drejtësi tranzicionale. Strategjia për drejtësi tranzicionale jo vetëm që do të shpërfaqë zotimin e autoriteteve për tu marr me të kaluarën dhe të mundësojnë edhe një mbyllje, por gjithashtu siguron edhe efektivitet maksimal të punës së drejtë, objektive të përmirësimit të reagimit ligjor dhe politikave ndaj kësaj çështje, Kosova si një shoqëri e larmishme që del nga konflikti ende ka nevojë për transformime shoqërore, bashkëjetesë paqësore dhe pajtim, por pa këtë qasje gjasat për zhvillim pozitiv janë të kufizuara, prandaj BE i bënë thirrje Qeverisë që ta finalizojë draftin e strategjisë për drejtësi tranzicionale. Në strategji Qeveria ka nevojë që të adresojë të gjitha sfidat dhe të marr masa për të siguruar nëse ky proces është gjithëpërfshirës me qartësi në zgjidhje dhe nuk ka diskriminim”, u shpreh shefi i Zyrës së BE-së në Kosovë.

Udhëheqësi i Divizionit për Drejtësi Tranzicionale, Baki Svirca u shpreh se në shtator pritet të jetë në diskutim publik drafti i parë formal për strategjinë për drejtësi tranzicionale.

“Ajo që dua ta theksoj është se shumë shpejt do të del drafti i parë I cili do tu shpërndahet anëtarëve të grupit punues dhe besoj që nuk mund ta precizoj por në një afat gogja optimal do të ketë edhe do të vendoset në platformën diskutive paraprake dhe pas asaj do të jenë diskutimet publike. Unë besoj që deri kah shtatori do të jetë në diskutime publike drafti i parë formal i cili ka pastaj mundësi për tu përmbushur dhe plotësuar”, u shpreh Svirca.

Hulumtuesi i Fondit për të Drejtën Humanitare në Kosovë, Besnik Beqaj tha se qëllimi kryesor i një strategjie të drejtësisë tranzicionale është t’u sigurojë viktimave dhe të mbijetuarve dëmshpërblim për shkeljet e pësuara të të drejtave të njeriut, vendosjen e besimit në legjitimitetin e shtetit dhe funksionin e sundimit të ligjit, vendosjen e kohezionit social të qëndrueshëm dhe kërkimin e pajtimit.

“Masat e drejtësisë tranzicionale duhet të inkurajojnë tranforimin politik, shoqëror dhe ekonomik dhe të avancoj barazinë gjinore në dy objektiva dalluese. Në një konsideron se duhet të arrihet drejtësi për viktimat dhe nën dy konsideron se drejtësia tranzicionale duhet të kontribuoj në krijimin e një shoqërive të drejta, gjithëpërfshirëse dhe paqësore. Në anën tjetër drejtësia tranzicionale karakterizohet nga dy qëllime fillestare që janë ndërrimi i besimit mes qytetarëve dhe njohja e statusit të viktimave, ndërsa si dy qëllime përfundimtare konsideron demokratizime e shoqërive dhe pajtimin në fund…. Ne kemi konsideruar 11 parime bazë që një strategji në draftimin e saj të merret parasysh nga grupi punues në fillim kemi konsideruar që strategjia duhet me marr periudhën kohore për hulumtim dhe fushëveprim të saj nga janari i viti 1998 deri në dhjetorin e vitit 2000. Sepse përderisa viktimat janë qendër e drejtësisë tranzicionale kemi shumë viktima të cilat ndoshta janë afektuar dhe si pasoj e konfliktit të armatosur dhe janë të ndërlidhura. Nën dy kemi konsideruar se qasja e përqendruar në viktima duhet të jetë pikë qendrore e strategjisë kombëtare”, theksoi ai.

Sipas këtij udhëzimi objektivat strategjike për drejtësi tranzicionale janë: Të mbështes të drejtat e viktimave për dëmshpërblime, duke përfshirë njohjen e përgjegjësisë, kornizën kohore për pranueshmërinë, një përcaktim dhe kategorizim të qartë të të drejtave dhe të llojeve të dëmshpërblimeve, afatin kohor për administrimin e reparacioneve, burimet dhe shpërndarjen e financimit. Legjislacioni duhet të tregojë gjithashtu institucionet përgjegjëse për dëmshpërblimin si dhe organet përgjegjëse për ofrimin e mbikëqyrjes; Të sigurohet që programet e dëmshpërblimit të përfshijnë forma të ndryshme përtej kompensimit, të tilla si masat e kënaqësisë, të kthimit dhe të rehabilitimit si dhe garancitë për mospërsëritje; në shkallën, në të cilën masat janë të dizajnuara dhe të afta për t’i rikthyer viktimat në gjendjen e tyre fillestare përpara se të ndodhnin shkeljet, që është rivendosja e lirive, e punësimit, e pronës dhe e dëmeve morale, siç përkufizohet në dokumentin udhëzues; Të sigurohet se reparacionet zbatohen në mënyrë të barabartë dhe gjithëpërfshirëse për të gjithë përfituesit, të lidhura me proceset afatgjata të zhvillimit. Për këtë qëllim, është thelbësore të krijohet një bazë e unifikuar dhe e kategorizuar e të dhënave e të gjithë përfituesve, pavarësisht nga të drejtat ose lloji i kompensimit dhe t’i bëjnë këto të dhëna të qasshme për shqyrtim publik sipas ligjeve dhe procedurave të mandatuara për mbrojtjen e të dhënave; Të sigurohet pranimi i shkeljeve, mbështetja për kërkimin e së vërtetës, kërkimi e personave të zhdukur, gjetja/rivarrimi i mbetjeve njerëzore, kërkimi i faljeve publike dhe ngritja e memorialëve dhe përkujtimet.

Udhëzuesi “Drejt një Strategjie Kombëtare të Drejtësisë Tranzicionale për Kosovën”, me autor Thomas Osorio, i cili nuk kishte pasur mundësi të vijë në Kosovë për ta prezantuar, është mundësuar nga Fondi për të Drejtën Humanitare në Kosovë (FDHK) dhe Zyrën e BE-së në Kosovë.

Lajmet

​Ish-presidenti Nicolas Sarkozy zyrtarisht në burg, i pari në historinë e Francës

Published

on

Ish-Presidenti francez Nicolas Sarkozy është zyrtarisht në burg që nga mëngjesi i së martës për të vuajtur dënimin prej pesë vjetësh për konspiracion kriminal në një çështje që lidhet me financimin libian të fushatës së tij zgjedhore në vitin 2007.

Sarkozy mbërriti në burgun La Santé në Paris, duke u bërë presidenti i parë francez që përjetëshëm shkon në burg, raporton transmetuesi i BFM TV.

Më shumë se 100 vizitorë u mblodhën pranë shtëpisë së tij për të shprehur mbështetje, ndërsa avokati i Sarkozy¬s, Christophe Ingrain, i tha BFM TV-së se një kërkesë për lirimin e tij do të paraqitet shumë shpejt, duke theksuar se ai do të qëndrojë tre javë deri një muaj në paraburgim para se gjykata e apelit të vendosë.

Para se të largohej nga shtëpia, Sarkozy shpërndau një mesazh përmes kompanisë amerikane të mediave sociale X, duke u zotuar të vazhdojë të denoncojë skandalin gjyqësor.

“Do të vazhdoj të denoncoj këtë skandal gjyqësor, këtë përvojë që po përjetoj për më shumë se dhjetë vjet. Këtu kemi një rast financimi të paligjshëm pa asnjë financim! Një hetim gjyqësor që zgjat prej kohësh, nisur në bazë të një dokumenti që tani është vërtetuar se është i falsifikuar”, tha ai.

Sarkozy theksoi se nuk kërkon asnjë përfitim dhe asnjë favor.

“Këtë mëngjes ndjej një trishtim të thellë për Francën, e cila është poshtëruar nga një shprehje e hakmarrjes që ka ngritur urrejtjen në një nivel të paprecedentë. Nuk kam dyshim. E vërteta do të triumfojë. Por çfarë çmimi i tmerrshëm do të jetë paguar”, shtoi ai.

Ish-presidenti francez ishte shpallur fajtor muajin e kaluar me dënim pesë vjet për konspiracion kriminal, por u shpall i pafajshëm për korrupsion pasiv dhe për akuza të tjera për financim të paligjshëm zgjedhor.

Sarkozy ishte zgjedhur president i Francës në vitin 2007 dhe shërbeu deri në vitin 2012./S.K/KP/

Continue Reading

Lajmet

BE nën kritika për pezullimin e sanksioneve ndaj Izraelit

Published

on

Bashkimi Evropian është kritikuar për vendimin për të pezulluar sanksionet ndaj qeverisë izraelite, pas përpjekjeve të Donald Trump për paqe në Lindjen e Mesme, ndërsa armëpushimi mbetet i brishtë.

Pas takimit me ministrat e jashtëm të BE-së, shefja e politikës së jashtme, Kaja Kallas, njoftoi se BE do të ndalë përkohësisht planet për të pezulluar tregtinë preferenciale me Izraelin dhe për të vendosur sanksione ndaj personave përgjegjës për nxitjen e konfliktit.

Ajo tha se situata ka ndryshuar dhe se masat nuk hiqen nga tryeza, por nuk zbatohen tani.

Ish-përfaqësuesi i BE-së në territoret palestineze, Sven Kuhn von Burgsdorff, kritikoi vendimin duke thënë se sanksionet janë një mjet ligjor për t’iu përgjigjur shkeljeve të ligjit ndërkombëtar.

Sipas The Guardian, ai kujtoi se BE-ja kishte përfunduar në qershor se Izraeli kishte shkelur detyrimet për të drejtat e njeriut dhe duhet të respektojë opinionin e Gjykatës Ndërkombëtare që kërkon përfundimin e pushtimit të territoreve palestineze. 414 ish-diplomatë dhe zyrtarë të BE-së nënshkruan një deklaratë duke kërkuar veprim të fortë kundër ekstremistëve në të dyja anët.

Ish-këshilltarja e BE-së, Nathalie Tocci, paralajmëroi se heqja dorë nga sanksionet do të ishte “gabimi më i madh”, pasi është momenti për të mbajtur presionin, ndërsa plani i Trump është ende i pasigurt.

BE-ja mbetet e ndarë mes vendeve pro-palestineze, si Spanja e Irlanda, dhe atyre që mbështesin Izraelin, si Hungaria e Çekia. Megjithatë, protestat masive në Evropë kanë nxitur kërkesa për veprim më të ashpër kundër Izraelit.

Zyrtarët e BE-së duan që blloku të përfshihet në bordin e paqes të Trumpit dhe të ndihmojë në rindërtimin e Gazës, që mund të kushtojë rreth 70 miliardë dollarë.

Një mandat i fortë i OKB-së pritet të mundësojë dërgimin e trupave ndërkombëtare, me Egjiptin në krye./S.K/KP/

Continue Reading

Lajmet

Ish-kryeministri Fatos Nano në gjendje kritike për jetën

Published

on

Gjendja shëndetësore e ish-kryeministrit Fatos Nano thuhet se prej afro dy javësh është në gjendje kritike për jetën. Ish-kreu i Partisë Socialiste pësoi një arrest kardiorespirator çka i shkaktoi edhe dëmtime në tru.

Ish-kryeministri Nano ndodhet në reanimacion, në një spital privat në kryeqytet.

Ai ka pësuar një arrest kardio-respirator në ambientet e shtëpisë së tij, por ndërhyrja e menjëhershme e mjekëve ka bërë të mundur kthimin e tij në jetë.

Dy vitet e fundit ish-kryeministri Nano i ka pasur të shpeshta kontrollet mjekësore në spitalin privat në Tiranë.

Më herët ai ka qenë i intubuar për shkak të një sëmundje kronike në mushkëri që mjekët e quajnë spok.

Pas rehabilitimit ai u rikthye në shtëpi, por sërish pati një problem shëndetësor duke iu nënshtruar një ndërhyrje ortopedike për shkak të thyerjes së një prej kockave të legenit.

73-vjeçari Fatos Nano u shkëput nga politika në vitin 2005.

Ai ka qenë kryeministër i vendit përgjatë viteve 1991, 1997-1998 dhe 2002-2005. Ai është themeluesi i Partisë Socialiste dhe kreu i parë i saj./S.K/EO/A2 CNN/

Continue Reading

Lajmet

Arsenal- Atletico Madrid, derbi i së martës në Champions

Published

on

Gara në Ligën e Kampionëve vazhdon me ndeshjet e xhiros së tretë të fazës së ligës, ku sot janë nëntë ndeshjet e para të xhiros së tretë, kurse vëmendja do të jetë në stadiumin “Emirates” në Londër.

Nga ora 21:00 takohen Arsenali dhe Atletico Madridi, në ndeshjen më interesante të së martës.

Arsenali ka fituar dy ndeshjet e para, njëjtë si Bayerni, Real Madridi, PSG-ja, Interi e Qarabagu. Skuadra e Mikel Artetas në xhiron e parë fitoi 2:0 në udhëtim tek Athletic Bilbao, ndërsa në të dytën fitoi po me 2:0 ndaj Olympiacosit.

Skuadra e Diego Simeones, Atletico Madridi, në xhiron e parë humbi 3:2 nga Liverpooli, ndërsa në të dytën e shkatërroi, 5:1, skuadrën gjermane, Eintracht Frankfurt.

Arsenali është në moment të mirë edhe në Premier League. Pas xhiros së tetë udhëheqë në tabelë me 19 pikë. Në fundjavë “topçinjtë” fituan 1:0 ndaj Fulhamit.

“Ishte një fillim i mahnitshëm i edicionit për ne. Por gjëja më e rëndësishme është se si përfundon kampanja. Është mirë që jemi në moment pozitiv. Ekipi është plot me besim dhe ne jemi në ecuri të mirë. Por na pret rrugë e gjatë. Gjëja e mirë është që në aspektin mental jemi gati për ndeshje dhe që të japim më të mirën”, ka thënë mesfushori i Arsenalit, Mikel Merino.

Trajneri i Arsenalit, Mikel Arteta, foli me respekt për Simeonen dhe punën që e ka bërë ai tek Atletico.

Ndërkohë, Simeone ka theksuar se në Londër kanë udhëtuar për fitore.

“Kemi ardhur me shpresë për ndeshje të madhe dhe për të siguruar fitoren që na duhet. Synojmë fitore në udhëtim në Ligën e Kampionëve. Do t’i qasemi ndeshjes me intensitetin që e meriton”, ka theksuar Simeone.

Të martën janë edhe disa ndeshje të tjera interesante:

Nga ora 18:45, Barcelona e pret Olympiacosin dhe llogarit në fitore tjetër.

Në termin të njëjtë zhvillohet ndeshja mes Kairat Almatyt dhe Pafosit qipriot.

Fituesi në fuqi i Ligës së Kampionëve, Paris Saint Germaini nuk pritet të ketë punë të lehtë ndaj Bayer Leverkusenit në Gjermani. Leverkuseni është nënkampion i Gjermanisë.

Fitore në udhëtim synojnë edhe dy skuadrat e mëdha italiane.

Kampioni i Italisë, Napoli, luan në Holandë ndaj PSV-së, ndërsa Interi luan në Belgjikë ndaj Royale Union.

Ndërkohë Manchester City i Pep Guardiolas është mysafir i Villarrealit në Spanjë.

Copenhagen- Dortmund dhe Newcastle United-Benfica janë ndeshjet tjera sonte./S.K/EO/

Continue Reading

Të kërkuara