Në Departamentin Special të Gjykatës Themelore në Prishtinë ka vazhduar shqyrtimi gjyqësor kundër tre të akuzuarve për sulmin terrorist në Banjskë më 24 shtator 2023. Në këtë seancë do të dëgjohet dëshmitari i Prokurorisë Speciale, zyrtari policor Elez Peci në sesionin e paradites dhe Avni Shala në sesionin e pasdites.

Nën masa të larta të sigurisë janë sjell në gjykatore të akuzuarit Bllagoje Spasojeviq, Vladimir Toliq dhe Dushan Maksimoviq.

Dje është dëgjuar zyrtari policor i Njësisë për Ndërhyrje të Shpejt, Mirsad Kryeziu i cili tha se ky sulm ka qenë i organizuar ushtarak dhe se edhe armët e përdorur kanë qenë të altilerisë së lehtë dhe të rëndë.

Prokuroria Speciale e Kosovës më njëmbëdhjetë (11) shtator (dymijenjëzetekatër) 2024 ka ngritur aktakuzë kundër Milan Radoiçiq dhe 44 të tjerëve për sulmin terrorist të 24 shtatorit 2023 në Banjska të Zveçanit, ku mbeti i vrarë rreshteri policor Afrim Bunjaku, raporton KosovaPress.

Të pandehurit ngarkohen për veprat penale kryerja e veprës terroriste, veprat e rënda kundër rendit kushtetues dhe sigurisë së Republikës së Kosovës, lehtësimi dhe financimi në kryerjen e terrorizmit dhe shpëlarja e parave.

42 të akuzuar, përfshirë edhe Milan Radoiçiq, që e pranoi publikisht se udhëhoqi sulmin në Banjskë, janë në arrati.

Kryeministri në detyrë, Albin Kurti, në mbledhjen komemorative për ish-kryeministrin Bujar Bukoshi, tha se ai ishte mbështetës i rezistencës paqësore, por edhe kritik i saj në disa raste. Po ashtu, ai ishte mbështetës i kryengritjes së armatosur, por herë pas here shfaqte qëndrime kritike ndaj saj.

“Ai ishte i guximshëm në çdo situatë. Kurajoz në politikbërje, realist në qëndrime dhe adhurues i veprimeve,” tha Kurti.

Ai vlerësoi sidomos komunikimin e Bukoshit me diplomatët dhe gazetarët gjermanë. “Bujar Bukoshi ishte kryeministri i parë dhe i fundit i Republikës së parë të Kosovës,” u shpreh Kurti, duke përmendur përpjekjet e tij për ta njohur opinionin ndërkombëtar me represionin politik dhe shkeljet e të drejtave të njeriut në Kosovë gjatë viteve ’90.

Kurti theksoi se Bukoshi ishte ndër protagonistët kryesorë të zhvillimeve politike të asaj kohe dhe shtoi se me kalimin e viteve, historianët do të studiojnë rolin dhe kontributin e tij në historinë moderne politike të Kosovës.

Në fjalën e saj, vajza e Bukoshit, Shota Bukoshi, foli për anën njerëzore të babait të saj. Ajo tha se ai ishte po aq i saktë dhe i guximshëm si në profesionin e mjekut, ashtu edhe në ndjekjen e vizionit për vendin.

“Po aq ishte mbështetës, plot dashuri dhe me humor kur ishte te ne në shtëpi. Në vitet e fundit, kur ai u përball me një sëmundje të rëndë, ne njohëm edhe një baba tjetër: luftëtarin që sfidonte sëmundjen me të njëjtën vendosmëri me të cilën përballonte vështirësitë që i sillte politika,” tha ajo.

Shota Bukoshi përfundoi fjalimin me theksin se në dhimbjen e familjes së saj është një ngushëllim i madh fakti që vepra dhe kontributi i të atit po vlerësohen.

Në Gjykatën Themelore të Prishtinës sot do të mbahet seanca e radhës për rastin “Banjska”, e treta këtë javë.

Gjatë ditës pritet të dëgjohen deklaratat e dy dëshmitarëve, njëri prej të cilëve dëshmon nga ora 11:30, e tjetri në ora 13:00.

Në seancën e djeshme u dëgjua dëshmia e policit Mirsad Kryeziu, që në detaje përshkroi momentin e sulmit që i mori jetën rreshterit Afrim Bunjaku.

Gjykimi po mbahet ndaj të akuzuarve Blagoje Spasojeviq, Vladimir Toliq dhe Dushan Maksimoviq, vetëm tre nga 45 pjesëtarët e grupit terrorist që, në krye me Milan Radojçiqin, organizuan dhe kryen sulmin që tronditi vendin.

Bisedimet që synonin uljen e tensioneve midis SHBA-së dhe Kinës kanë përfunduar në një “marrëveshje”, sipas Presidentit të SHBA-së Donald Trump.

Ai tha se Kina kishte rënë dakord të furnizonte kompanitë amerikane me magnete dhe metale të rralla të tokës, ndërsa SHBA-ja do të tërhiqej nga kërcënimet e saj për të revokuar vizat e studentëve kinezë.

“Marrëveshja jonë me Kinën është bërë, në varësi të miratimit përfundimtar nga Presidenti Xi dhe unë”, shkroi Trump në platformën e tij mediatike Truth Social.

Kjo pasoi dy ditë bisedimesh intensive në Londër për të zgjidhur konfliktet që kishin lindur që kur të dy palët ranë dakord për një armëpushim në maj, pasi një përshkallëzim i shpejtë i tarifave kishte paralizuar pothuajse tregtinë midis dy ekonomive më të mëdha në botë.

Por natyra e kufizuar e njoftimit nënvizoi pyetjet me të cilat po përballet Shtëpia e Bardhë nëse strategjia e saj tarifore mund të sjellë shpejt marrëveshje të forta tregtare, shkruan BBC.

Duke folur të enjten, Presidenti Trump tha se do të vendosë tarifa të njëanshme me partnerët tregtarë në një ose dy javët e ardhshme.

Presidenti amerikan tha se do të dërgojë letra duke specifikuar kushtet e marrëveshjeve të reja përpara afatit të 9 korrikut për të rivendosur tarifat më të larta për vendet anembanë botës.

Veçmas, Sekretari i Thesarit i SHBA-së, Scott Bessent, tha se priste që SHBA-të të zgjasnin pauzën ekzistuese në disa nga tarifat e tyre më agresive për të lejuar që bisedimet tregtare me vendet e tjera të vazhdonin.

Detajet rreth marrëveshjes së re me Kinën ishin të kufizuara. Trump dhe udhëheqësi i Kinës, Xi Jinping, folën në telefon javën e kaluar për të nisur negociatat, të cilat përfshinin zyrtarë të lartë nga të dy vendet.

Zyrtarët thanë se kjo nuk do të ndryshonte skicat e përgjithshme të armëpushimit të majit, i cili uli – por nuk eliminoi – tarifat e reja të shpallura nga të dy vendet që kur Trump nisi një luftë të re tregtare në fillim të këtij viti.

“Në parim, të dy palët kanë arritur një kornizë për zbatimin e konsensusit të arritur nga dy krerët e shteteve gjatë telefonatës më 5 qershor dhe konsensusit të arritur në takimin e Gjenevës”, tha zëvendësministri i Tregtisë i Kinës, Li Chenggang.

Sekretari i Tregtisë i SHBA-së, Howard Lutnick, u tha gazetarëve se të dy palët kishin “arritur një kornizë për zbatimin e konsensusit të Gjenevës”.

“Sapo presidentët ta miratojnë atë, ne do të përpiqemi ta zbatojmë atë”, shtoi ai.

Duke folur për transmetuesin CNBC të mërkurën, ai tha se bisedimet e kishin “pastruar” marrëveshjen e Gjenevës.

“Jemi plotësisht në rrugën e duhur”, tha ai. “Gjërat duken vërtet mirë”.