Lajmet

​Gjykimi ndaj Salih Mustafës në Hagë, flet dëshmitarja e mbrojtur

Dëgjimi i dëshmitares ka filluar me seancë të mbyllur.

Published

on

Dëshmitarja e Zyrës së Prokurorit të Specializuar (ZPS) e cila po dëgjohet në gjykimin ndaj ish-pjesëtarit të Ushtrisë Çlirimtare të Kosovës (UÇK), Salih Mustafa, ka thënë se ka marrë pjesë në zhvarrimin e një personi në fshatin Zllashë.

Dëshmitarja është e mbrojtur dhe nuk është bërë i ditur roli i saj në ngjarjen për të cilën thotë të ketë qenë pjesë e saj.

Dëgjimi i dëshmitares ka filluar me seancë të mbyllur ndërsa më vonë në seancë publike prokurorja ka kërkuar nga dëshmitarja që të përshkruajë një zonë në Zllashë ku ajo kishte thënë se ishte e varrosur një viktimë.

“Vendi ku kemi shkuar ka qenë një mal jo shumë i shpeshtë, diku në thellësi të fshatit është ndalë traktori dhe aty kemi zbrit, aty kam takuar edhe persona të tjerë dhe babai i viktimës thotë këtu është trupi i tij dhe këtu duhet ta marrim”, ka thënë dëshmitarja e mbrojtur.

Prokurorja i ka prezantuar disa fotografi dëshmitares, ato nuk u bënë publike.

Dëshmitarja e cila mban kodin W04676 ka thënë se ato tregojnë vend-identifikimin e varrezës dhe procesin e hapjes së varrit.

“Kjo fotografi është bërë në fillim të procesit kur kemi shkuar atje dhe na u ka thënë që këtu supozohet që është vendvarrimi i viktimës…Kjo fotografi e përshkruan vendvarrimin por e marrë nga krahu i djathtë dhe sidomos këto dy degët që kanë qenë përmbi, do të thotë një fotografi e marrë prej anës së djathtë… Është lehtë e identifikuar thellësia e varrit, nuk mund të jetë më shumë se 20 centimetra kjo thellësi, është lehtë e identifikueshme për shkak të ndriçimit që e ka, dielli që i bie direkt dhe ajo thellësia e një varreze që nuk është si çdo varr tjetër kur të hapet në rrethana normale”, ka thënë dëshmitarja e ZPS-së.

Sipas dëshmitares, viktima ka qenë i mbuluar me një batanije ngjyrë të kaltër të mbyllur.

Gjatë dëshmisë së saj, ajo ka thënë se pranë trupit të cilin sipas saj e kanë zhvarrosur ka qenë edhe një tjetër trup i varrosur, por nuk e kanë hapur atë varr.

“Në momentin kur është identifikuar komplet viktima kanë kërkuar që të mos vazhdohet tutje, sepse është edhe një person tjetër i varrosur afër tij… Një diskutim që është zhvilluar në mesin e personave që e bënin zhvarrimin sipas fotos po dua t’ju orientoj në foto, ishte nga ana e djathtë sepse pjesa e mbetur e qebes ka qenë ende përfundi dheu. Qeben nuk kemi mundur komplet me heq sepse ka qenë nën dhe. Ka qenë insistimi i të tjerëve që të mos groposet më shumë anash sepse ekziston edhe një trup tjetër”, ka thënë dëshmitarja e mbrojtur.

Ajo ka thënë se trupi tjetër ka qenë në anën e djathtë të varrit të cilin e kanë hapur dhe se nuk e di se çka ka ndodhur me të.

“Nuk është zhvarrosë atë ditë, por më vonë çka ka ndodhur nuk e di sepse ishte e panjohur, nuk e dinim kush është”, ka thënë dëshmitarja.

Fotografitë e prezantuara nga prokurorja, dëshmitarja ka thënë se tregojnë edhe procesin e identifikimit të viktimës.

“Është një vrimë por për të cilën askush nuk mundet ta konstatojë se nga çka është kjo vrimë, por është kështu gjendja e trupit të viktimës…. Një vrimë e cila është parë dhe e cila është markuar si e çuditshme në trupin e një kufome, mirëpo për shkak që trupi i kufomës ka qenë në procesin e dekompozimit është bukur vështirë me identifikuar se çka vërtetë kjo vrimë tregon”, ka thënë dëshmitarja e mbrojtur.

Sipas dëshmitares, kufoma është tërhequr nga Zllashi për t’u varrosur, por nuk ka treguar se në cilin vend.

Dëshmitarja ka thënë se dheun e kanë lënë ashtu siç ka qenë ndërsa kufoma tjetër sipas saj ka mbetur aty.

Pas pyetjeve të prokurorisë, dëshmitarja e mbrojtur W04676 i është përgjigjur pyetjeve të mbrojtëses së viktimave, Anni Pues. Ajo e ka pyetur atë nëse dy degë pranë atij varri për të cilin ka folur dëshmitarja, kishin ndonjë kuptim.

“Për këto dy degë të premë, të vendosura njëra mbi tjetrën e kanë kuptimin e identifikimit dhe në asnjë formë dhe në asnjë rrethanë nuk e kanë kuptimin e fshehjes apo mbulimit të një varri, sepse ka forma dhe mënyra të tjera qysh fshihen gjurmët dhe mbulohet një varr për të mos u identifikuar, por këto dy degë e kishin kuptimin e identifikimit të kësaj varreze”, ka thënë dëshmitarja.

Tutje, ajo ka folur për procese të varrimit.

“Në rrethana të jashtëzakonshme dhe kur nuk ke kohë dhe duhet shpejt e shpejtë të kryhet një proces i varrimit, atëherë e hap një varr sa për ta mbuluar, por pa asnjë proces dhe asnjë mbulesë tjetër siç ka ndodh me varreza gjithandej gjatë kohës së luftës në Kosovë. Në një rast të tillë, kjo është përshtypja ime, nuk është konstatim, por është një përshtypja ime në të cilën jam bazuar tërë kohën, edhe sot, është që varrimi është kryer nga dikush dhe kufoma është mbështjellë që mos ta lënë mbi dhe e kanë fut nën dhe në atë thellësinë e cekët qysh e thash më herët, se nuk i ka as gjysmë metër thellësia e varrit. Zakonisht një varr në rrethana normale është identifikues për meshkuj dhe për femra, për meshkuj është, varësisht prej gjatësisë, thellësia e varrit është deri në këtë pjesën këtu, ndërsa për femra thellësia për varrit është deri këtu, është bestytni që i takojnë një ceremonia të varrimit, të gjitha varrezat në të cilat unë kam marrë pjesë, qoftë si… (përmbajtje e redaktuar)”, ka thënë ajo.

Ndërsa pyetjet e avokatit mbrojtës të Mustafës kanë filluar me seancë të mbyllur.

Në gjykimin ndaj Mustafës deri tani janë dëgjuar gjashtë dëshmitarë, të gjithë të mbrojtur, identiteti i të cilëve nuk është bërë i ditur për publikun.

Gjykimi ka filluar më 15 shtator 2021 dhe është i pari në Dhomat e Specializuara të Kosovës në Hagë, e Salih Mustafa është i arrestuari i parë nga Specialja.

Aktakuza ndaj Mustafës është konfirmuar më 12 qershor 2020, ndërsa ai u arrestua më 24 shtator të vitit të kaluar, me pretendimin për krime lufte.

Ai po qëndron në qendrën e paraburgimit në Hagë ndërsa në deklarimin e tij para trupit gjykues është deklaruar i pafajshëm.

Lajmet

Nagavci: Vendimi i Kushtetuese konfirmon se konstituimi është përgjegjësi e subjekteve fituese

Published

on

By

Ministrja në detyrë e Arsimit, Arbërie Nagavci, ka deklaruar se vendimi i Gjykatës Kushtetuese e konfirmon qartë se përgjegjësia për konstituimin e Kuvendit të Kosovës bie mbi subjektet fituese të zgjedhjeve, veçanërisht mbi tre partitë më të mëdha që duhet të kenë përfaqësuesit e tyre në Kryesi.

“Besoj ajo që është e qartë është se VV-ja është munduar që ta trajtojë vendimin e Gjykatës Kushtetuese në aspektin juridik. Vendimi e dëshmon edhe një herë atë që e kemi thënë – që konstituimi i Kuvendit është përgjegjësi e subjekteve fituese të zgjedhjeve, e veçmas tri subjekteve më të mëdha, të cilat do të kenë përfaqësuesit e tyre në Kryesi të Kuvendit,” tha Nagavci.

Ajo tha se nuk ka asnjë indikacion nga vendimi i Kushtetueses që votimi i fshehtë është në kundërshtim me Kushtetutën, duke lënë të kuptohet se ai do të përdoret sërish në përpjekjen për konstituim.

“Gjykata Kushtetuese askund nuk e ka cekur që votimi i fshehtë është kundërkushtetues. Besoj që edhe sot do të vazhdohet me të njëjtin votim,” u shpreh ajo.

Continue Reading

Lajmet

Zemaj: Askush s’mund të udhëheqë me diktat, deputetët i përgjigjen vetëm qytetarëve dhe Kushtetutës

Published

on

By

Deputeti i Lidhjes Demokratike të Kosovës (LDK), Armend Zemaj, ka deklaruar se zgjidhja e vetme për tejkalimin e krizës institucionale është respektimi i Kushtetutës dhe i vullnetit të qytetarëve, duke theksuar se Kosova është një sistem parlamentar dhe jo autokratik.

Ai ka thënë se kjo është kërkesa e vetme e LDK-së në takimin e thirrur nga Kurti.

“Kërkesa e vetme është mbrojtja e kushtetutshmërisë dhe ligjshmërisë, edhe vullnetit të qytetarëve të Kosovës. Ne jemi sistem parlamentar, askush nuk mund të udhëheqë me autokraci ose diktat, sidomos mbi deputetët që nuk i nënshtrohen asnjë lloj detyrimi dhe i përgjigjen vetëm qytetarëve, votuesve dhe subjekteve të tyre politike,” ka thënë Zemaj.

Continue Reading

Lajmet

Kurti: Serbia mund të shfrytëzojë elemente destruktive për të nxitur incidente në Gazimestan

Published

on

By

Kryeministri në detyrë i Kosovës, Albin Kurti, ka thënë të premten se Serbia mund të përdorë “elemente destruktive” për të nxitur incidente gjatë festës serbe Vidovdan të shtunën në Gazimestan, rreth 10 kilometra nga kryeqyteti Prishtinë.

Duke folur në një mbledhje të Qeverisë në detyrë, Kurti tha se Serbia do të përpiqet ta zhvendosë vëmendjen nga protesta antiqeveritare që pritet të zhvillohet të shtunën në Beograd, duke nxitur incidente në Kosovë.

Serbët nga Kosova, Serbia dhe rajoni tradicionalisht e shënojnë Vidovdanin më 28 qershor në Gazimestan, një monument historik pranë Prishtinës.

Kurti tha se – sipas vlerësimeve të institucioneve të sigurisë dhe inteligjencës – ka përpjekje që tubimi në Gazimestan të jetë “sa më masiv, prandaj janë organizuar grupe serbësh nga Serbia, Mali i Zi dhe Bosnjë e Hercegovina që të vijnë në Kosovë nesër”.

Grupet e tilla kanë qenë tradicionalisht provokuese, duke bartur simbole nacionaliste serbe e ruse që janë në kundërshtim me Kushtetutën e Kosovës dhe janë gjithashtu kundër vlerave demokratike dhe evropiane”, tha Kurti.

Ai tha se festa e Vidovdanit, “megjithëse me karakter fetar, fatkeqësisht vazhdimisht është përcjell me retorikë politike, nxitëse e kërcënuese për sigurinë publike nga ana e Serbisë”.

Javë më parë, Gjykata Themelore në Prishtinë e shfuqizoi vendimin e Komunës së Graçanicës për shfaqjen e flamurit të Serbisë për nder të Vidovdanit më 2024.

Në arsyetimin e gjykatës thuhet se komuna ka tejkaluar kompetencat e saj dhe ka vepruar në kundërshtim me ligjet e Kosovës, pasi ka miratuar një vendim për shfaqjen e flamurit të Serbisë më 28 qershor – ditë që nuk është e përcaktuar si festë zyrtare në Kosovë.

Kurti tha se tubimet për Vidovdan duhet të mbahen në përputhje me ligjin, “jo të shndërrohen në mjet për instrumentalizim politik nga autoritetet në Beograd”.

Tubimi zakonisht sigurohet nga Policia e Kosovës, ndërsa gjatë viteve të fundit nuk është lejuar të futen flamuj të Serbisë apo simbole të tjera kombëtare, përveç atyre kishtare, pasi përkujtimi organizohet edhe nga Kisha Ortodokse Serbe në nderim të betejës së vitit 1389 kundër ushtrisë osmane.

Javën e kaluar, ministri në detyrë për Komunitete dhe Kthim i Kosovës, Nenad Rashiq, bëri thirrje për respektimin e të drejtave të komunitetit serb sa i përket përdorimit të simbolit të tyre.

Ai tha se përdorimi flamurit serb nga serbët “nuk përbën kërcënim ndaj identitetit të askujt, por është dëshmi e përkushtimit të Kosovës si një shoqëri demokratike e bazuar në respektimin e të drejtave të njeriut dhe të pakicave”.

Lista Serbe, partia më e madhe e serbëve në Kosovë që ka mbështetjen e Beogradit, e akuzoi Kurtin se gjatë seancave në Kuvendin e Kosovës shfaq flamurin kombëtar të Shqipërisë.

Në një deklaratë, ajo kërkoi nga gjykata që të përdorë “të njëjtat standarde dhe të zbatojë të njëjtin arsyetim edhe në rastet që lidhen me flamurin shqiptar”.

Vitin e kaluar, festimet e Vidovdanit në Gazimestan kaluan pa ndonjë incident.

Por, në vitet paraprake ka pasur edhe arrestime për nxitje të urrejtjes fetare dhe kombëtare, ndërsa më 2023, Vidovdani nuk u festua në Gazimestan – vendin ku festohet tradicionalisht – për shkak të përkeqësimit të situatës së sigurisë në veri të Kosovës.

Gazimestani në Kosovë njihet edhe për fjalimin e ish-presidentit të Serbisë, Sllobodan Millosheviq, i cili, më 28 qershor 1989, nuk i përjashtoi “betejat e armatosura”.

Ai fjalim i Millosheviqit u pa nga shumë njerëz si paralajmërim i luftërave që pasuan në vitet ‘90 në ish-Jugosllavi.

Në të njëjtën ditë në vitin 2001, Millosheviq u ekstradua në Tribunalin e Hagës, i cili e akuzoi atë për krime lufte. Ai vdiq në paraburgim në vitin 2006, para gjykimit përfundimtar./REL

Continue Reading

Lajmet

​Bajrami: LDK do të marrë pjesë në takimin e nesërm

Published

on

By

Deputetja e Lidhjes Demokratike e Kosovës (LDK), Hykmete Bajrami deklaroi se do të jenë prezentë në takimin e nesërm të ftuar nga kryetari i Lëvizjes Vetëvendosje, Albin Kurti. Megjithatë, ajo tha se nuk kanë pritje nga ky takim, meqë theksoi se është më shumë për “show mediatik”.

Pas ndërprerjes së seancës, ku paraprakisht u mbajt një takim konsultativ me kryesuesin e seancës konstituive, Avni Deharin, Bajrami tha se do të shkojnë në takimin me Kurtin për të treguar se janë për konstituim të institucioneve.

Nuk është që kemi shumë pritje duke marrë parasysh komplet të kaluarën historike të LVV-së dhe krejt sjelljet e tyre konferencën për media nuk është që mund të presim diçka nga ky takim. Është më shumë për show mediatik. Megjithatë për të treguar që jemi për konstituim të institucioneve do të jemi prezent”, u shpreh ajo.

Deputetja e LDK-së tha se LVV po bën interpretim ndryshe të aktgjykimit të Gjykatës Kushtetuese.

Kemi parë edhe prononcimet e ndryshme nga eksponentë të Lëvizjes Vetëvendosje të cilët e kanë në plan ta vazhdojnë këtë ngërç duke e bërë një interpretim ndryshe nga krejt Kosova të aktgjykimit të Gjykatës Kushtetuese. Se sa zotëri Kurti është i gatshëm për bashkëpunim, unë po besoj që patët mundësi ta shihni vetëm para dy minutave, kur ishte këtu në sallën plenare dhe nuk ishte në gjendje që të vie në takim konsultativ me të gjithë liderët e partive politike parlamentare. Aktgjykimi është jashtëzakonisht i qartë kur është fjala tek mënyra e votimit sepse i referohet kreut të katërt të rregullores së kuvendit, pikërisht nenit 8 ku ka një agjendë të paracaktuar të seancës konstituive dhe aktgjykimi pikërisht i referohet nenit 8 të rregullores së Kuvendit të Kosovës”, deklaroi ajo.

Ajo tha se kryetari i Kuvendit duhet të votohet me marrëveshje politike dhe nuk kanë votë për asnjë kandidat të LVV-së.

Continue Reading

Të kërkuara