Lajmet

​Dorëhiqen edhe katër policë serbë, Osmani kërkon dënimin e Serbisë dhe të Vuçiqit

Osmani tha se përmes shantazhit e presionit që Serbia u ka bërë policëve të rinj serb të PK-së, ka shkelur marrëveshjet e Brukselit.

Published

on

Ka shkuar në shtatë numri i policëve serbë që kanë dhënë dorëheqje nga Policia e Kosovës, e të cilët janë rekrutuar tash së voni. Kështu ka bërë të ditur presidentja Vjosa Osmani teksa ka apeluar bashkësinë ndërkombëtare që bashkë me dënimin e akteve të presionit she shantazhit të Serbisë ndaj këtyre policëve, të dënojë edhe autorët që gjenden në Beograd.

Osmani gjatë konferencës në Klinë tha po ashtu se përmes shantazhit e presionit që Serbia u ka bërë policëve të rinj serb të PK-së, ka shkelur marrëveshjet e Brukselit, por edhe standardet ndërkombëtare të të drejtave të njeriut.

“Sipas informatave të deritanishme, deri para një ore, kur u njoftova nga institucionet e sigurisë, numri i dorëheqjeve ka arritur në shtatë. Ka tashmë informata të konfirmuara, sipas hetimeve të institucioneve tona përgjatë këtyre javëve, që frikësimi i këtyre pjesëtarëve, shantazhi, vijnë direkt nga Serbia. Pra, burimin e kanë në Serbi, dhe ky shtet që fatkeqësisht vazhdon me agresion të hapur në raport me Kosovën, po vazhdon që nëpërmjet institucioneve të veta kriminale dhe ilegale dhe kriminale në Kosovë, t’iu bëjë presion qytetarëve serbë të cilët janë pro integrimit dhe pro bashkëpunimit, të cilat ua garanton Kushtetuta e Kosovës dhe Marrëveshjet e Brukselit”, tha Osmani.

Se Serbia është vatra e presionit dhe shantazhit që po bëhet ndaj policëve të rinj serbë, Osmani tha se e dinë edhe ndërkombëtarët.

“Veprime të tilla janë shkelje flagrante e Marrëveshjeve të Brukselit, të cilat edhe kanë paraparë që një numër i policëve serbë të jenë të komuniteteve, pra varësisht nga kompozicioni etnik i komunave. Unë pres nga BE-ja që të marrin masa ndaj Serbisë dhe presidentit Vuçiq, për këtë shkelje të marrëveshjeve të Brukselit dhe të marrëveshjeve të Brukselit dhe do të thosha edhe shkelje të standardeve ndërkombëtare të të drejtave të njeriut. Nuk ka asnjë pikëpyetje se prej nga po vjen ky presion, dhe të gjithë partnerët ndërkombëtarë e dinë këtë shumë mirë, sepse ma kanë konfirmuar mua në çdo takim, se presioni ndaj policëve serbë vjen nga Serbia dhe strukturat e saj. Ndaj, presim që dënimi i këtyre akteve të jenë bashkë më dënimin e autorëve, e autori është në Beograd”, u shpreh Osmani.

Ndryshe, të enjten është raportuar se tre policë të sapo rekrutuar serbë janë dorëhequr nga Policia e Kosovës. Për çka kanë reaguar krerët shtetërorë, ambasadorë dhe shefi i misionit të EULEX-it në Kosovë. 

Lajmet

KQZ: Fillon periudha për aplikim të partive për zgjedhjet lokale

Published

on

By

Komisioni Qendror i Zgjedhjeve (KQZ) ka hapur zyrtarisht periudhën për aplikim të subjekteve politike që synojnë të marrin pjesë në zgjedhjet lokale të 12 tetorit 2025. Afati për aplikim do të zgjasë 49 ditë, deri më 13 gusht.

Zëdhënësi i KQZ-së, Valmir Elezi, ka bërë të ditur se për të lehtësuar këtë proces, aplikimi do të mund të bëhet online përmes platformës elektronike të KQZ-së.

“Duke filluar nga sot, subjektet politike mund të aplikojnë për certifikim për pjesëmarrje në zgjedhje. Gjatë kësaj periudhe, ato duhet të dorëzojnë edhe listën me emrat e kandidatëve për kryetarë të komunave dhe për kuvendet komunale”, tha Elezi.

Ai shtoi se vendimi për llojin e pjesëmarrjes dhe për komunat ku do të garojnë i mbetet në dorë secilit subjekt politik. “Subjektet politike mund të vendosin nëse duan të garojnë vetëm për kryetar komune, për kuvend komunal ose për të dyja”, deklaroi Elezi.

Continue Reading

Lajmet

Falsifikim parash në Prishtinë, arrestohet një person

Published

on

By

Njësia për Hetimin e Krimeve Ekonomike në Prishtinë ka ndaluar një person nën dyshimin për prodhim të parasë së falsifikuar. Sipas raportit 24-orësh të Policisë së Kosovës, i dyshuari është arrestuar pas një pune operative hetimore.

Me urdhër të prokurorit, është kryer bastisje në banesën e të dyshuarit, ku janë sekuestruar materiale të ndryshme që shërbenin për prodhimin e kartëmonedhave false. Në mesin e provave të konfiskuara janë: 135 fletë formati A4 me fotokopje të kartëmonedhave të ndryshme, një xham me holograme të prera, një skalper dhe vizore, katër ngjitës, shirit izolues, një printer, një telefon dhe një shumë parash në vlerë prej rreth 4,796 euro.

Pas intervistimit, me vendim të prokurorit, i dyshuari është dërguar në mbajtje.

Continue Reading

Lajmet

Gjashtë raste dhune në familje brenda një dite, tre të dyshuar në mbajtje

Published

on

By

Në raportin 24-orësh të Policisë së Kosovës janë evidentuar gjithsej gjashtë raste të dhunës në familje në qytete të ndryshme të vendit. Rastet përfshijnë dhunë fizike dhe psikike, ndërsa në disa prej tyre janë ndërmarrë masa ligjore ndaj të dyshuarve.

Në Prishtinë janë regjistruar dy raste. Në një rast, një grua ka raportuar se bashkëshorti i saj ka ushtruar dhunë psikike ndaj saj pas një mosmarrëveshjeje. Palët janë shoqëruar në stacionin policor dhe rasti është proceduar në procedurë të rregullt. Në një rast tjetër, një burrë është arrestuar pasi dyshohet se ka sulmuar fizikisht partneren me të cilën bashkëjeton. I njëjti është dërguar në mbajtje me vendim të prokurorit.

Në Ferizaj, është arrestuar një person pasi nëna e tij ka raportuar se i dyshuari, nën ndikim të alkoolit, kishte fyer dhe shtyrë atë. Pas intervistimit, i dyshuari është dërguar në mbajtje.

Në Pejë, është raportuar se një grua ka qenë viktimë e keqtrajtimit fizik nga i dashuri i saj. I dyshuari nuk është gjetur në vendbanimin e tij dhe rasti është duke u hetuar.

Në Vitomiricë, është arrestuar një person nën dyshimin se kishte ushtruar dhunë psikike ndaj babait të tij. I njëjti është dërguar në trajtim psikiatrik dhe më pas i është caktuar masa e ndalimit për 48 orë me vendim të prokurorit.

Në Mitrovicën e Jugut, është raportuar se një grua ka qenë viktimë e dhunës nga bashkëshorti i saj. Është bërë bastisje në shtëpinë e të dyshuarit, por nuk është gjetur ndonjë provë dhe nuk është raportuar për ndonjë arrestim.

Continue Reading

Lajmet

Rreth 2200 tiketa trafiku brenda 24 orëve, 30 persona të arrestuar

Published

on

By

Gjatë 24 orëve të fundit Policia e Kosovës ka shqiptuar gjithsej 2182 tiketa trafiku.

Gjatë së njëjtës periudhë janë regjistruar 71 aksidente trafiku, prej të cilave 22 kanë përfunduar me persona të lënduar, ndërsa 49 me dëme materiale. Fatmirësisht, nuk është raportuar asnjë aksident me fatalitet.

Në aspektin e rendit dhe sigurisë publike, 30 persona janë arrestuar, ndërsa 14 prej tyre janë dërguar në mbajtje. Po ashtu, dy persona janë futur në vuajtje të dënimit, ndërsa nuk është raportuar asnjë rast ndalimi policor.

Policia ka theksuar rëndësinë e respektimit të rregullave të trafikut, si dhe bashkëpunimin e qytetarëve për të parandaluar incidentet që rrezikojnë jetën dhe sigurinë publike.

Continue Reading

Të kërkuara