Lajmet

​Dëshmitarja Canolli-Kaçiu thotë se nuk ka pasur persona të ndaluar në Zllash

Mustafa po qëndron në paraburgim në Hagë.

Published

on

Ibadete Canolli-Kaçiu është dëshmitarja e radhës e mbrojtjes së Salih Mustafës në Hagë, e cila gjatë dëshmisë në Dhomat e Specializuara ka thënë se ka qëndruar në fshatin Zllash nga data 16 deri më 21 prill të vitit 1999.

Dëshmitarja e cila ka qenë pjesë e UÇK-së si punëtore shëndetësore, i ka thënë trupit gjykues që Salih Mustafën në këtë fshat e ka takuar vetëm më datë 21 kur sipas saj po i zhvendosnin të plagosurit për në Majac. Ajo ka deklaruar se në Zllash nuk ka pasur njerëz të ndaluar apo të cilët janë maltretuar.

Ibadete Canolli-Kaçiu ka treguar se deri në mars 1999 ka jetuar në Prishtinë ku edhe ka punuar në qendrën rehabilituese të drejtuar nga Flora Brovina. Ajo ka thënë se punën e ka ndërprerë me fillimin e bombardimeve më 24 mars 1999, ndërsa më datën 31 të atij muaji serbët i kanë detyruar të shpërngulen nga Prishtina.

Dëshmitarja ka thënë se deri më 16 prill ka qëndruar në fshatin Mramor, në shtëpinë e Afrim Gashit, ndërsa ka shtuar se nga aty me vullnetin e saj i është bashkuar gueriles BIA dhe po me atë datë ka shkuar në Zllash.

Canolli, e cila edhe më herët kishte dhënë kontribut në UÇK, ka theksuar se deri në Zllash ka shkuar në këmbë, e shoqëruar nga disa ushtarë.

Nga avokati mbrojtës Betim Shala ajo është pyetur rreth objektit në të cilin ka qëndruar në Zllash, ndërsa ka thënë se aty kanë qenë disa shtëpi të shpërndara.

“Në fund të oborrit ka qenë një bunar aty afër e kam takuar Isa Kastratin. Isa Kastrati ka qenë udhëheqës i gueriles, të cilin e kam takuar edhe në Prishtinë. Në objektin e sipërm që ka qenë afër bunarit, ka qenë një objekt pak më i ri, sigurisht i ndërtuar më rishtas, aty ka qenë një dhomë me një ndarje të vogël, në atë dhomën e vogël e kam pasur një barnatore të vogël dhe një shtrat ku aty kam qëndruar”, ka thënë ajo.

Ajo ka thënë se aty pranë ka qenë një kuzhinë mbi të cilën sipas saj kanë qenë dhomat ku kanë qëndruar ushtarët e UÇK-së.

Dëshmitarja ka theksuar se nuk ka qenë ndonjëherë në pjesën e sipërme, ndërsa në kuzhinë ka thënë se kishte hyrë vetëm njëherë. Ajo ka thënë se ka qëndruar në të njëjtin objekt me familjen e Fatmir Humollit.

“Objekti i rinovuar ku unë kam qëndruar në njërën pjesë, ka qenë me ndarje, ndërsa në pjesën tjetër kanë qenë ushtarët dhe dy familje me fëmijë, familja e Fatmir Humollit dhe e plakut, axhës Mejdi. Në mbrëmjen e 16-shit kam filluar menjëherë me pastrimin e ambientit, kanë qenë disa batanije, kam klasifikuar materialin, kam buajt atë natë, me datën 17 tërë ditën kam përgatitur material shpenzues, më datën 18 kanë filluar bombardimet me mëngjes, më datën 20 kemi kaluar natën në një mal mbi shtëpi, në ambient hapur, deri më datën 21 kur i kemi hequr të plagosurit dhe jemi nisur për Majac, do të thotë nga 16 deri më datën 21 (kam qëndruar në Zllash)”, ka thënë dëshmitarja e mbrojtjes.

Canolli ka thënë se Salih Mustafën në Zllash e kishte takuar vetëm më datën 21 prill 1999, ndërsa ka shtuar se atë e kishte takuar më herët në Prishtinë.

“Salih Mustafën e kam takuar më datën 21 kur kemi filluar t’i zhvendosim të plagosurit për në Majac. Para shkuarjes në Zllash, në Prishtinë po, ndërsa gjatë ditëve sa kam qëndruar në Zllash jo. Salih Mustafa mesa kujtoj sa ka qenë përgjegjës për sigurimin e civilëve dhe ushtarëve në zonën ku ky ka vepruar dhe këtë përgjegjësi e ka ndarë me doktoreshën Flora Brovina, i kam takuar në ordinancën ku unë kam punuar”, ka thënë ajo.

Ajo ka thënë se nuk ka vërejtur roje pranë objekteve në Zllash, ndërsa ka shtuar se aty nuk ka pasur persona të ndaluar.

Avokati Shala: Gjatë kohës sa ju keni qenë në Zllash, a keni parë që ka pasur persona të ndaluar, përkatësisht që kanë qenë të izoluar në një hapësirë të caktuar.

Dëshmitarja Canolli-Kaçiu: Jo.

Avokati Shala: Gjatë kohës ju keni qenë në Zllash a keni parë apo a keni dëgjuar që dikush të jetë maltretuar aty në atë lokalitet.

Dëshmitarja Canolli-Kaçiu: Jo.

Me këtë kanë përfunduar pyetjet e avokatit mbrojtjes ndërsa në pjesën tjetër të seancës Ibadete Canolli-Kaçiu do të përgjigjet në pyetjet e zyrës së Prokurorit të Specializuar. Ajo është dëshmitarja e 15-të e mbrojtjes në gjyqin ndaj Salih Mustafës në Hagë, i cili është arrestuar më 24 shtator 2020 me pretendimin për krime lufte.

Salih Mustafa po qëndron në paraburgim në Hagë, ndërsa në paraqitjen e tij para trupit gjykues ai është deklaruar i pafajshëm.

Lajmet

Donika Emini kritikon interpretimin e këngës nacionaliste serbe në forumin e BE-së në Bruksel

Published

on

Ekspertja e politikës së jashtme, Donika Emini, ka kritikuar interpretimin e këngës nacionaliste serbe “Oj Kosovo, Kosovo” në mbrëmjen hapëse të Forumit të Zgjerimit të Bashkimit Evropian në Bruksel, duke e cilësuar të papranueshme përzgjedhjen e një kënge që përmban pretendime territoriale ndaj Kosovës.

Gjatë fjalimit të mbajtur më 16 nëntor, Emini tha se ngjarja e kishte detyruar ta ndryshonte tërësisht fjalimin e përgatitur. Ajo e nisi paraqitjen duke cituar disa vargje të këngës, të interpretuar një natë më parë.

“Popull serb, thërrit fort. Kosovë, nuk do të të dorëzojmë. Ti gjithmonë ke qenë e jona. Kështu ka qenë që nga kohët e lashta”, citoi Emini, duke theksuar se teksti përmban pretendime të drejtpërdrejta territoriale ndaj Kosovës.

Ajo ngriti pikëpyetje nëse institucionet evropiane i kuptojnë kompleksitetet politike dhe ndjeshmëritë historike të Ballkanit Perëndimor.

“Pas asaj që ndodhi mbrëmë, vërtet pyes veten nëse ata i kuptojnë kompleksitetet e rajonit, edhe pse po flasim për një Komision Evropian që është mjaft afër këtij rajoni”, deklaroi ajo.

Emini tregoi se kishte vendosur të merrte pjesë në forum pasi kishte vërejtur mungesën e përfaqësuesve nga Kosova në listën e folësve. Megjithatë, ajo theksoi se prania e saj si përfaqësuese e shoqërisë civile nuk mund ta zëvendësonte përfaqësimin institucional të vendit.

Ajo tha se nuk do të befasohej nëse një këngë e tillë do të interpretohej në tubime nacionaliste apo në një tubim të ish-presidentit serb Slobodan Millosheviq, por u shpreh e befasuar që ajo u dëgjua në një aktivitet të Komisionit Evropian.

“U befasova shumë kur e dëgjova në Komisionin Evropian, një projekt paqeje, një projekt që po e udhëheq rajonin drejt demokracisë”, u shpreh Emini.

Ekspertja sqaroi se kundërshtimi i saj nuk kishte të bënte me gjuhën apo muzikën serbe, duke theksuar se do ta mirëpriste interpretimin e këngëve shqipe dhe serbe që promovojnë bashkëjetesën dhe tejkalimin e ndarjeve.

Në përfundim të fjalimit, Emini i bëri thirrje Bashkimit Evropian të mos riprodhojë narrativa nacionaliste dhe revizioniste që, sipas saj, kanë penguar procesin e pajtimit në Ballkan.

“A mundeni të paktën të mos i riprodhoni narrativat revizioniste dhe propagandistike të një regjimi që e përçau rajonin dhe që e bëri pajtimin kaq të vështirë deri më sot?”, pyeti ajo.

Fjalimi u mbajt në kuadër të forumit “Përmes pajtimit drejt zgjerimit të Bashkimit Evropian”, më 16 nëntor, një ditë pas interpretimit të këngës në mbrëmjen hapëse të aktivitetit në Bruksel./A.K/

Continue Reading

lajme

Studentët e Masterit në Agrokulturë me Mjedis nisin hulumtimin eksperimental për kultivimin e sallatës së gjelbër pa tokë

Published

on

By

Studentët e programit Master në Agrokulturë me Mjedis, Sihana Bokshi dhe Shpëtim Salihu, nën udhëheqjen e profesorit Ismet Babaj, kanë dizajnuar metodikën e hulumtimit dhe kanë nisur punën eksperimentale për kultivimin e sallatës së gjelbër (Lactuca sativa L.) në sistemin e kultivimit pa tokë.

Qëllimi i këtij eksperimenti është vlerësimi i efekteve të sistemit të prodhimit dhe furnizimit me azot në formë të nitratit mbi statusin ushqyes të bimëve, akumulimin e nitrateve dhe nitriteve, prodhimin e biomasës, si dhe morfologjinë e sistemit rrënjor.

Në kuadër të hulumtimit po testohen tre trajtime me tretësira ushqyese në dy sisteme të hapura të prodhimit pa tokë, përmes vazove me vëllim prej 1 litri: njëri sistem përdor vermikulitin si substrat rritës, ndërsa tjetri përdor cocopeat (torfë kokosi).

Puna kërkimore do të përmbyllet me analiza kimike dhe matje të parametrave të rritjes së bimëve. Të dhënat dhe rezultatet e përfituara do t’u shërbejnë studentëve për përgatitjen e punimeve të tyre të diplomës, si dhe për publikime në revista shkencore, duke dëshmuar gërshetimin e suksesshëm të teorisë me praktikën shkencore.

Continue Reading

lajme

Rama kritikon interpretimin e melodisë së këngës nacionaliste serbe në Bruksel

Published

on

By

Kryeministri i Shqipërisë, Edi Rama, ka kritikuar interpretimin e melodisë së një kënge nacionaliste serbe në koncertin e organizuar nga Komisioni Evropian në Bruksel. Ai e bëri këtë në fillim të një debati në “Forumin e Zgjerimit“, duke thënë se kjo çështje nuk mund të mbetet pa u përmendur.

“Nuk mund të heshtet ajo që ndodhi mbrëmë me muzikën e interpretuar në një mbrëmje në prag të këtij forumi. Nuk e di a ishte e qëllimshme apo injorancë, por ishte një këngë nacionaliste këtu, në mbrëmjen e këtij eventi. Për ta shtuar ironinë, u bë nën logon ‘Meloditë e Unitetit’”, tha Edi Rama.

“Asnjëherë nuk mund të lëmë anash diçka që na kthen nga e kaluara. E kam thënë për vite se sa e rëndësishme është Serbia për rajonin tonë, sa e rëndësishme është ta mbajmë Serbinë në anën tonë. Por dua të sigurohem që ajo që them të mos shkojë kundër kësaj bindjeje. Por, në të njëjtën kohë, mendoj se nuk duhet të tolerojmë hapësirë që betejat e mesjetës të bëhen motivim për ndasitë e sotme”, ka thënë Rama.

“Sa më shpejt Serbia ta njohë Kosovën, aq më mirë do të jetë për Serbinë dhe për të gjithë”, ka thënë kryeministri i Shqipërisë. /KOHA/

Continue Reading

Vendi

Ndalohet një zyrtar i Gjykatës së Prishtinës, dyshohet për keqpërdorim detyre

Published

on

By

Prokuroria Themelore në Prishtinë, në bashkëpunim me Drejtorinë për Hetimin e Krimeve Ekonomike dhe Korrupsionit (DHKEK) në Policinë e Kosovës, ka ndaluar sot për 48 orë personin me inicialet A.B., udhëheqës i Zyrës për Menaxhimin e Lëndëve në Gjykatën Themelore në Prishtinë.

Sipas njoftimit të Prokurorisë, ndalimi është bërë pas hetimeve disamujore, nën dyshimin se A.B. ka kryer veprën penale “Keqpërdorimi i pozitës apo autoritetit zyrtar”. Ai dyshohet se gjatë ushtrimit të detyrës, me qëllim të përfitimit të kundërligjshëm pasuror për vete dhe persona të tjerë, ka krijuar dosje fiktive duke vendosur vulën e vërtetësisë në kopjen e një kontrate të falsifikuar të shitblerjes.

Përmes këtyre veprimeve, shtetasit të Serbisë me inicialet M.B. — i cili aktualisht ndodhet në arrati — i është mundësuar regjistrimi i kundërligjshëm i një banese me sipërfaqe prej 55.89 m² në Zonën Kadastrale në Matiçan, pranë Zyrës Kadastrale në Prishtinë.

Prokurori i Shtetit ka paralajmëruar se brenda afatit ligjor do të paraqesë kërkesë në gjykatën kompetente për caktimin e masës së paraburgimit ndaj të pandehurit. /E.A/

Continue Reading

Të kërkuara