Lajmet

Dëshmitari i gjashtë në rastin ndaj Mustafës thotë se është rrahur për shkak të bindjeve politike

Fillimisht ai ka thënë se është mbajtur në një ahur dhe është marrë në pyetje, pastaj sipas tij është rrahur në një tjetër vend.

Published

5 years ago

November 10, 2021

Betim Gashi

Dëshmitari i gjashtë i Zyrës së Prokurorit të Specializuar(ZPS) në gjykimin ndaj Salih Mustafës, ka thënë se është rrahur e keqtrajtuar nga disa persona gjatë kohës që ai thotë se është mbajtur në një ahur. Dëshmitari pretendon se është rrahur nga disa persona me arsyetimin se i njëjti ishte spiun, por para trupit gjykues ai ka thënë se keqtrajtimi i është bërë për shkak të bindjeve të tij politike e ushtarake. Gjatë dëshmisë së tij ai ka thënë se personat që i mbanin i urdhëronin të thoshin”vdekje tradhtarëve, vdekje hajnave dhe lavdi Ushtrisë Çlirimtare të Kosovës”.

Dëshmitari që mban kodin 4669 dhe po dëgjohet në gjykimin ndaj ish-pjesëtarit të Ushtrisë Çlirimtare të Kosovës (UÇK), në Dhomat e Specializuara në Hagë është përgjigjur në pyetjet e prokurorit Cezar Michalzuk, ku ndër të tjera ka thënë se ka mbajtur një ditar me shënime, për çka sipas tij, nga personat që thotë se është rrahur i është thënë se po e përdor për të spiunuar.

Pjesa ku dëshmitari ka treguar si është dërguar në një objekt të mbajtjes është zhvilluar në seancë të mbyllur dhe dëshmia ka vazhduar prej periudhës ku dëshmitari pretendon se ka qëndruar në një ahur me dy persona të tjera që ka thënë se mbaheshin aty.

Fillimisht ai ka thënë se është mbajtur në një ahur dhe është marrë në pyetje, pastaj sipas tij është rrahur në një tjetër vend.

“Më morën në mbrëmje me vete, mi kanë mbyll sytë mos me pa ku po shkojmë, kur kemi shku atje mi kanë heq, pa duar të lidhura pa asgjë, vetëm në përcjellje të dy personave edhe dy kanë qenë anash tyre, edhe më thanë pjesën e sipërme me u zhvesh krejt, prej belit e lart me u zhvesh krejt edhe pastaj më pyesnin më thoshin pse ti ke marrë shënime në atë bllokun, si ditar që e kam pasur, është e shënuar me stilolaps, se atëherë kam shënuar me stilolaps ditarin jo me kimik në mënyrë që vetëm me i qitë ujë në rast rreziku fshihet ajo, dhe i kam thënë që kam marrë shënime që nuk më duket se janë të palejueshme askush nuk më ka thënë se janë të palejueshme ditari me marrë me vete. ‘Ti po spiunon, jo thash unë nuk kam të bëjë, nëse ke ti ndonjë dokument si provë që po spiunoj’. Ka filluar pastaj ‘përkulu, kam qenë në këmbë, tha kështu qëndro me rroba të hequra’ dhe më kanë goditur në shpinë, më kanë goditur me një shufër të gomës, sikur shufra e milicisë serbe, ka qenë shufër e tyre si duket, shufër e gomës jo shufër metalike, shufër e gomës policore”, ka thënë dëshmitari i mbrojtur.

Ai ka thënë se është marrë në pyetje nga dy persona të ri në moshë, rreth 17 dhe 18 vjeç, ndërsa dy të tjerë më të rritur ka thënë se rrinin në gjendje gatishmërie.

“Më vonë pasi kam analizuar gjërat e kam vërejtur, që mua nuk ma merr mendja që ka qenë ai qëllimi i rrahjes sime, por ka qenë më tepër çështje e bindjeve tona çfarë kemi pasur politike, ushtarake, shkaku i tyre, sikurse që u ka ndodhur shumë të tjerëve, nuk ka qenë çështja që ne kemi qenë spiunë fare, nuk ka pasur të bëjë me atë çështje fare, më vonë e kam menduar këtë jo për kohën që po më pyesni ju”, ka thënë dëshmitari i ZPS-së.

Derisa është pyetur rreth dy personave për të cilët thotë të kenë qëndruar në mbajtje me të, dhe moshave të tyre, seanca ka vijuar e mbyllur për publikun. Sipas tij, dy personat e tjerë ishin dërguar në atë ahur disa ditë përpara tij.

“Kur ka filluar marrja në pyetje, na kanë marrë secilin një nga një, na kanë dërguar prej vendit ku kemi qenë në një vend tjetër, edhe na kanë mbuluar fytyrën dhe kur kemi shkuar në atë vend na kanë hequr prej syve atë të fytyrës dhe e kemi parë vetën që jemi në një vend tjetër, por ajo ka qenë aty afër nuk ka qenë diku larg, ka qenë kapur objekti me objektin nuk më kujtohet saktë por shumë afër ka qenë në bazë të asaj që kemi ecë shumë pak. Marrja në pyetje ka qenë në mbrëmje vonë, ajo më kujtohet se ka qenë aty një dritë elektrike”, ka thënë dëshmitari.

4669 ka thënë se nga bisedat që ka dëgjuar nga sy personat që thotë se janë mbajtur aty, ka mësuar se ata janë rrahur gjatë marrjes në pyetje por sipas tij nuk e di se çka i kanë pyetur ata ose arsyen pse janë mbajtur.

Personat që sipas dëshmitarit kanë qëndruar aty, kanë marrë në pyetje dhe kanë ushtruar dhunë fizike ndaj tyre, ishin me rroba të zeza dhe vetëm disa me pantallona ushtarake.

Gjatë dëshmisë së tij, 4669 ka thënë se aty ku pretendon se ka qëndruar me dy persona, më vonë është sjellur edhe një tjetër person, që sipas tij, kishte duart e lidhura dhe ishte i nxirë në fytyrë nga rrahja.

“Kur e kanë sjellë herën e dytë ka qenë në gjendje gati i vdekur, ka qenë i shtrirë duke gjëmuar, ka qenë edhe më i enjtur se që ka qenë, hundët i ka pasur pak si gjak dhe nuk ka qenë në gjendje as të flas as kurrgjë, vetëm rënkonte. Kjo ka ndodhur herën e dytë, ne e kemi dëgjuar herën e parë kur e kanë pru, pastaj e kanë marrë e kanë mbajtur jashtë, nuk më kujtohet atë ditë apo të nesërmen, mirëpo herën e dytë përpara se me pru brenda kur e kanë marrë e kanë lënë jashtë e kanë rrahur aq shumë sa që dëgjoheshin të rrahurat e tij pastaj e shihnim nga vrimat që e godisnin me tepër se pesë-gjashtë veta, me çkado që kishin në duar, e vërenim prej vrimave, dhe pasi që e kanë përfunduar rrahjen e kanë pru të ne, dhe pasi që e kanë pru herën e dytë edhe herën e parë, sa herë e kanë pru të ne na kanë urdhëruar me thënë vdekje tradhtarëve, vdekje hajnave edhe lavdi Ushtrisë Çlirimtare të Kosovës. Këto kanë qenë sa herë e kanë pru brenda që ne është dashtë e i thënë, secili prej neve të treve”, ka thënë dëshmitari i ZPS-së.

Sipas tij, rrahja ka ndodhur jashtë ahurit dhe ai ka mundur të shoh nga disa vrima që sipas tij ishin në dhomën ku mbaheshin.

Personin për të cilin ka folur, dëshmitari e përshkruan me rreth 100 kilogramë dhe gjatësi deri në 2 metra.

“Ai i ka pasur duart e lidhura me tel, edhe i ka pasur të shtrënguara shumë, tel, tel i bakrit të bardhë apo se di si me quajt, a ka qenë i bardhë apo i zi nuk më kujtohet, por tel. Ajo ka qenë e palogjikshme… Kur e kanë marrë herën e dytë brenda një nate, ose atë natë e kanë marrë ose të nesërmen dhe më nuk e kemi parë asnjëherë, kjo është ajo përgjigja që më kujtohet, jo në bazë të thashethemeve por unë çka kam parë vet”, ka thënë dëshmitari.

Sipas dëshmitarit, gjendja e personit, të cilin e përshkruan, i ka frikësuar atë dhe personat e tjerë që mbaheshin.

“Unë e kam kuptuar që më të vërtetë jemi në rrezik për shkak që mund të na ndodh sikurse ajo që i ka ndodhur atij, dhe çështja sa i përket pse e kanë pru, ata thoshin që ai ka vjedhur gjatë luftës, sidomos një person e përmendin një grua shtatzënë që i ka vjedh të hollat të tregu thoshin dhe po ashtu që bashkëpunonte me serbët. Ashtu kam dëgjuar, ashtu kanë thënë”, ka thënë dëshmitari i mbrojtur.

Ky është dëshmitari i gjashtë i ZPS-së dhe gjatë pjesës së parë të seancës ai ka thënë se në shkurt të vitit 1999 ka qëndruar dhjetë ditë në fshatin Zllashë ku sipas tij ka kryer stërvitje në mënyrë që të bëhet pjesë e UÇK-së.

Në gjykimin ndaj Mustafës deri tani janë dëgjuar pesë dëshmitarë, të gjithë të mbrojtur, identiteti i të cilëve nuk është bërë i ditur për publikun.

Gjykimi ka filluar më 15 shtator 2021 dhe është i pari në Dhomat e Specializuara të Kosovës në Hagë, e Salih Mustafa është i arrestuari i parë nga Specialja.

Aktakuza ndaj Mustafës është konfirmuar më 12 qershor të vitit 2020 ndërsa ai u arrestua më 24 shtator të vitit të kaluar, me pretendimin për krime lufte. Ai po qëndron në qendrën e paraburgimit në Hagë ndërsa në deklarimin e tij para trupit gjykues, Salih Mustafa është deklaruar i pafajshëm.

Vendi

“Liria ka Emër” paralajmëron “Marshin për Liri” më 12 shtator në Prishtinë

Published

36 minutes ago

August 21, 2026

UBT News

Platforma qytetare “Liria ka Emër” do të organizojë më 12 shtator në Prishtinë “Marshin për Liri”, nën moton “Kosova po pret”.

Marshi do të mbahet katër ditë para 16 shtatorit, datë kur pritet të zhvillohet seanca përmbyllëse e procesit në Dhomat e Specializuara të Kosovës në Hagë ndaj ish-drejtuesve të Ushtrisë Çlirimtare të Kosovës.

Në një konferencë për media, përfaqësuesit e platformës, Eliza Hoxha dhe Ismail Tasholli, kanë prezantuar aktivitetet që do t’i paraprijnë dhe do ta pasojnë marshin.

Hoxha ka thënë se platforma, së bashku me qytetarët, për gjashtë vjet ka kërkuar një proces të drejtë gjyqësor për ish-krerët e UÇK-së. Ajo ka theksuar se mbështetja do të vazhdojë pa paragjykuar vendimin e drejtësisë dhe pa ndërhyrë në procesin gjyqësor.

Sipas saj, aktivitetet nisin me një numërim mbrapsht deri më 16 shtator, i cili do të vendoset në Prishtinë dhe do të shtrihet edhe në komunat e tjera të Kosovës.

Platforma ka paralajmëruar edhe aktivitetin “Netët e Lirisë”, i cili do të organizohet në shtatë zonat e UÇK-së dhe do t’i kushtohet kujtesës, historisë dhe sakrificave për liri.

Ndërkohë, Ismail Tasholli u ka bërë thirrje liderëve të katër partive kryesore shqiptare që t’i bashkohen marshit. Ai ka përmendur Albin Kurtin, Bedri Hamzën, Lumir Abdixhikun dhe Ardian Gjinin, duke kërkuar që të marrin pjesë jo në funksion të fushatës partiake, por “për Kosovën, për lirinë, për të ardhmen”.

“Liria ka Emër” ka paralajmëruar gjithashtu një aktivitet në Hagë më 16 shtator, në bashkëpunim me diasporën shqiptare.

Sipas organizatorëve, mesazhi i aktiviteteve në Prishtinë dhe Hagë do të jetë i njëjtë: “Kosova po pret”./A.K/

Vendi

Përfundojnë gërmimet në Kalludër dhe Jabukë, mbetje mortore të 23 personave

Published

44 minutes ago

August 21, 2026

UBT News

Kanë përfunduar të premten gërmimet disa javore në lokacionet Kalludër i Vogël dhe Jabukë të Zubin-Potokut, ku janë zbuluar mbetje mortore që dyshohet se u përkasin 23 personave të zhdukur me forcë.

Kushtrim Gara nga Komisioni Qeveritar për Persona të Zhdukur ka konfirmuar përfundimin e procesit katërjavor të gërmimeve, vlerësimit dhe zhvarrosjes së mbetjeve mortore.

Sipas të dhënave të Komisionit, në një nga lokacionet e Kalludrit të Vogël janë gjetur mbetje mortore të 13 personave, në Jabukë të 4 personave, ndërsa në një lokacion tjetër në Kalludër të Vogël janë gjetur mbetje të 6 personave.

Gara ka thënë se tash pritet që mbetjet të kalojnë në ekzaminime mjekoligjore dhe procesin e identifikimit përmes analizës së ADN-së.

Ndërkohë, ministri në detyrë i Punëve të Brendshme, Xhelal Sveçla, ka bërë të ditur se armatimi i konfiskuar në zonën përreth Kalludrit do të ekzaminohet, për të verifikuar nëse mund të ketë lidhje me vrasjen e 23 personave, mbetjet e të cilëve janë gjetur në këto lokacione.

Gërmimet në këtë zonë paraqesin një tjetër etapë në përpjekjet për zbardhjen e fatit të personave të zhdukur dhe identifikimin e tyre./A.K/

Vendi

Tahiri: Vdekjet e punëtorëve në KEK, dëshmi e dështimit institucional

Published

1 hour ago

August 21, 2026

UBT News

Deputeti i Partisë Demokratike të Kosovës (PDK), Arian Tahiri, ka akuzuar Qeverinë në detyrë për mungesë reagimi dhe mbikëqyrjeje të kushteve të punës në institucionet dhe ndërmarrjet publike, pasi dy punëtorë të KEK-ut humbën jetën brenda tri ditësh, si pasojë e lëndimeve të marra në vendin e punës, raporton Ekonomia Online.

Tahiri kërkoi që organet përgjegjëse të ndërmarrin veprime konkrete menjëherë.

“Më 20 gusht, Arbenit Ahmeti humbi jetën duke transportuar kabllot 6 kV. Më 16 gusht, vetëm katër ditë më herët, Haxhi Gojnovci, teknik i xehtarisë, mbeti i vdekur pranë ekskavatorit. Më 15 korrik, Milazim Binaku ndërroi jetë në QKUK, si pasojë e lëndimeve të marra më 8 korrik në Fabrikën e Pajimeve Xehtare në Palaj. Më 27 shkurt, Migjen Sadiku ndërroi jetë në hapësirat e Termocentralit “Kosova B”. Pas secilit prej këtyre emrave është një nënë që pret, një bashkëshorte që mbetet vetëm, fëmijë që pyesin pse babai i tyre nuk u kthye më. Janë punëtorë që shkuan në punë për të siguruar bukën e gojës për familjet e tyre dhe humbën jetën duke bërë punën e tyre”, shtoi ai.

Tahiri theksoi se kabineti qeveritar po sillet “sikur nuk ka asnjë përgjegjësi”.

“Qeveria nuk mund të jetë njëkohësisht menaxhuese dhe mbikëqyrëse e ndërmarrjeve publike dhe, në fund, të sillet sikur nuk ka asnjë përgjegjësi. Si është e mundur që kur flitet për rritje të prodhimit apo për progres, dalin dhe shprehin krenari, ndërsa në raste të tilla fshihen nëpër xhipa të zinj e prapa perdeve të pushtetit? Kur këto vdekje ndodhin në një ndërmarrje publike, nën kontrollin e drejtpërdrejtë të shtetit, ato bëhen dëshmi e një dështimi institucional. Nëse shteti nuk arrin të mbrojë jetën e punëtorëve të vet, si mund të pretendojë se mbron jetën dhe të drejtat e punëtorëve në sektorin privat?”, tha Tahiri.

Tahiri bëri thirrje për inspektim, identifikim dhe eliminim të rreziqeve në vendet e punës, rritjen e masave të sigurisë dhe mbrojtjes për punëtorët./A.K/

Lajmet

Gjermani: Mbyllja më e fortë e bizneseve në gati 20 vjet

Published

3 hours ago

August 21, 2026

UBT News

Energjia e shtrenjtë, mungesa e fuqisë punëtore të kualifikuar dhe mungesa e pasardhësve për biznesin po çojnë në shtimin numrit të mbylljeve të bizneseve dhe falimentimeve në Gjermani.

187.744 sipërmarrje në Gjermanindërprenë gjatë vitit të kaluar aktivitetin e tyre, duke shënuar numrin më të lartë të mbylljevenë pothuajse 20 vjet. Krahasuar me vitin pararendës, ky numër u rrit me gati 10 për qind. Këto janë të dhënat e analizës së përbashkët vjetore të agjencisë së informacionit ekonomik Creditreform dhe Qendrës Leibniz për Kërkime Ekonomike Evropiane (ZEW) në Mannheim.

Sipas analizës dinamika e krizës po përhapet tashmë në të gjitha fushat, përfshirë edhe gastronominë apo sektorin e shëndetësisë. Dhe ndryshe nga vitet e mëparshme tani po e ndërpresin aktivitetin e tyre edhe kompani që, në fakt, janë ekonomikisht të shëndosha dhe të qëndrueshme.

Gastronomia dhe hoteleria

Në analizë thuhet se rritja më e fortë e numrit të mbylljeve të bizneseve u regjistrua në sektorin e gastronomisë dhe të hotelerisë. Në vitin 2025 mbyllën aktivitetin e tyre rreth 15.000 restorante, kafene dhe sipërmarrje akomoduese, që përbën 15 për qind më shumë krahasuar me vitin 2024.

Që nga 1 janari 2026 në gastronominë gjermane zbatohet një normë e reduktuar TVSH-je prej 7 për qind për ushqimet. Por “ulja e TVSH-së për të mbështetur sektorin e gastronomisë në krahasim me degët e tjera, duket se nuk ka arritur ta zbusë gjendjen e vështirë në këtë sektor”, thuhet në analizë.

Përkeqësim i gjendjes në sektorin e shëndetësisë

Në sektorin e shëndetësisë vazhdoi prirja negative që po vërehet prej rreth dhjetë vitesh: numri i mbylljeve të sipërmarrjeve në këtë fushë, arriti në rreth 11.000 raste, dhe është tashmë rreth dy herë më i lartë se në vitin 2008.

Vetëm gjatë vitit të kaluar mbyllën aktivitetin e tyre afërsisht 5.500 klinika mjekësore, pra rreth 23 për qind më shumë krahasuar me vitin 2024. Shpesh arsyeja është se mjekët dalin në pension dhe nuk arrijnë të gjejnë dikë që të marrë përsipër dhe të vazhdojë drejtimin e klinikës së tyre.

Edhe industria u godit rëndë

Në sektorin industrial ndërprenë aktivitetin e tyre rreth 11.000 ndërmarrje, që do të thotë 10 për qind më shumë mbyllje krahasuar me një vit më parë.

Eksperti i Creditreform, Patrik-Ludwig Hantzsch, e quajti rritjen e numrit të falimentimeve si një “darë krize” që po e “kap dhe dëmton ekonominë gjermane nga dy anë”: nga njëra anë trazirat gjeopolitike, si lufta me Iranin ose tarifat doganore amerikane, dhe nga ana tjetër çmimet e larta të energjisë dhe burokracia e madhe brenda vendit.

Studiuesja e ZEW-së, Sandra Gottschalk, thekson se vetëm 13 për qind e afro 190.000 mbylljeve të regjistruara gjatë vitit të kaluar ishin si pasojë falimentimi. Sipas saj shumica e bizneseve mbyllen pothuajse pa u vënë re, pa procedura formale falimentimi dhe pa tërhequr vëmendje të madhe publike./A.K/

Burimi:DW