Lajmet

Zvicra zbut masat, vendet fqinje vendosin bllokime drastike

Published

5 years ago

April 15, 2021

Betim Gashi

Në Gjermani, takimet private janë rreptësisht të kufizuara.

Mbyllje dhe bllokime gjithandej, orë policore, shkolla të mbyllura: Këto masa të ashpra zbatohen në vendet fqinje të Zvicrës, disa prej të cilave madje pritet të ashpërsohen edhe më. Ndërkohë, Qeveria e Zvicrës ka bërë të ditur dje një lehtësim mjaft “zemërgjerë” të masave…

Në vazhdim, gjendja në vendet fqinje me Zvicrën.

Gjermania

Në Gjermani, takimet private janë rreptësisht të kufizuara. Takimet në shtëpitë (familjet) janë të mundshme me maksimum një person nga familja tjetër. Në përgjithësi, jo më shumë se pesë njerëz mund të bëhen bashkë. Kjo rregullore zbatohet jo vetëm për takimet në ambiente të mbyllura, por edhe për takimet publike, transmeton albinfo.ch. Restorantet janë të mbyllura me përjashtim të disa projekteve të përkohshme.

Shumë politikanë, përfshirë Kancelarën Angela Merkel, këmbëngulin në orën policore rajonale nga ora 21:00. Kjo ndalesë duhet të zbatohet nëse numri i rasteve të reja të koronës tejkalon pragun prej 100 për 100,000 banorë brenda një jave. Të martën, Qeveria e Gjermanisë ka futur ndryshimin përkatës në ligj. Për krahasim: Në Zvicër ka pasur 175.4 infeksione të reja për 100,000 banorë në shtatë ditët e fundit.

Franca

Franca ndodhet në një bllokim të ashpër që nga 3 prilli. Ky bllokim duhet të zgjasë katër javë, shkollat, si dhe të gjitha dyqanet dhe restorantet janë të mbyllura. Ka një shtetrrethim (orë policore) brenda natës nga ora 19 e mbrëmjes.

Situata në spitale, në disa rajone, është jashtëzakonisht e tensionuar dhe numri i rasteve po rritet. Autoritetet franceze aktualisht rekomandojnë kundër udhëtimit në Francë për njerëz nga Zvicra dhe vendet e tjera evropiane.

Italia

Restorantet janë të mbyllura edhe në Itali, me një bllokim të fortë që do të zgjasë deri të paktën më 30 prill. Italia ka disa muaj që po përdor një “sistem semafori”: Në varësi të situatës epidemiologjike, rajonet ndahen në: zona të gjelbërta, portokalli dhe të kuqe. Aktualisht nuk ka asnjë rajon të vetëm të gjelbër në hartë, shumica janë zona portokalli, përcjell albinfo.ch. Në zonat portokalli, më së shumti dy persona mund të vizitojnë një apartament të vetëm privat një herë në ditë. Ndërsa në zonat e kuqe, vizitat te miqtë dhe të afërmit janë të ndaluara.

Austri

Në Austri, masat e koronës kanë qenë të ndryshme, sipas rajoneve ose landeve, për javë të tëra. Në Vjenë dhe Austrinë e Poshtme, mbretëron një bllokim i ashpër deri më 2 maj: shitoret, gastronomia dhe ngjarjet kulturore janë të mbyllura ose të ndaluara, mësimi me prani fizike në shkolla nuk është i mundur. Shumë rajone janë në bllokime të pjesshme me gastronomi dhe objekte kulturore të mbyllura, transmeton albinfo.ch. Në landin Vorarlberg kufizimet janë më të butat.

Anglia

Këshilli Federal i Zvicrës nuk është i vetmuar sa i përket hapjes së tarracëve. Në Angli, Kryeministri Boris Johnson ka hapur “pubet” të hënën – tash për tash, si në Zvicër, vetëm zonat e jashtme të tyre (tarracat).

Gjatë mbylljes aktuale, numri i rasteve në ishull ka rënë ndjeshëm, gjë që i atribuohet shkallës së lartë të vaksinimit, përcjell albinfo.ch. Më shumë se 31 milionë njerëz kanë marrë tashmë dozën e parë të një vaksine, ose, gjashtë në dhjetë të rritur.

Por, Anglia ka raportuar pothuajse 127,000 vdekje nga korona, që nga fillimi i pandemisë – niveli më i lartë i vdekjeve në Evropë.

Lajmet

Nënshkruhet koalicioni PDK-AAK, Tahiri: Mitrovica është mbi partitë politike

Published

17 minutes ago

November 3, 2025

UBTnews

Kandidati i PDK-së për kryetar të Mitrovicës së Jugut, Arian Tahiri ka nënshkruar marrëveshje për koalicion me AAK-në.

Këtë e ka bërë të ditur Tahiri.

“Sot, zyrtarisht edhe AAK-ja i është bashkuar rrugëtimit dhe vizionit tonë për Mitrovicën. Faleminderit kryetarit z. Qazim Nimani dhe strukturave të AAK-së për besimin dhe mbështetjen! Mitrovicën e kemi shtëpi dhe së bashku do ta ndërtojmë kapitullin e ri të bashkëpunimit, punës dhe shpresës”, ka shkruar ai.

Tahiri ka thënë se “9 nëntori do të jetë dita e bashkimit të qytetarëve, sepse Mitrovica është mbi partitë politike!”/EO

Lajmet

Kallas: Koha për të përfunduar mbikëqyrjen ndërkombëtare në Bosnje

Published

29 minutes ago

November 3, 2025

UBTnews

Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, tha në Sarajevë se ka ardhur koha që mbikëqyrja ndërkombëtare në Bosnje dhe Hercegovinë të përfundojë, por shtoi se kjo mund të ndodhë vetëm kur vendi t’i ketë kapacitetet e nevojshme për të marrë vendime vetë.

Kallas ndodhet në një vizitë zyrtare në Bosnje dhe Hercegovinë, gjatë së cilës vizitoi kampin Butmir pranë Sarajevës, ku janë të vendosur pjesëtarët e Misionit të BE-së për Paqe, EUFOR.

EUFOR-i ka mandat edhe për të përdorur forcën, në rast se “mjedisi i sigurt dhe i qëndrueshëm kërcënohet seriozisht” apo “strukturat ekzistuese të sigurisë janë në rrezik të shemben”.

Kallas tha se ngjarjet e fundit në Kuvendin Popullor të Republikës Sërpska paraqesin një mundësi të re për të qetësuar tensionet politike.

“Zgjedhjet e lira dhe të ndershme mund të rivendosin besimin tek autoritetet lokale. Qytetarët e Bosnje dhe Hercegovinës meritojnë një shans për stabilitet dhe një shans për të marrë frymë lirshëm”, tha Kallas.

Kuvendi i Republikës Sërpska miratoi më 18 tetor Ligjin për shfuqizimin e ligjeve që Gjykata Kushtetuese e Bosnje dhe Hercegovinës i kishte shpallur të pavlefshme.

Bëhet fjalë për Ligjin për pasurinë e paluajtshme që përdoret për funksionimin e pushtetit publik, Ligjin për moszbatimin e vendimeve të Gjykatës Kushtetuese të Bosnje dhe Hercegovinës, Ligjin zgjedhor të Republikës Sërpska, Ligjin për ndalimin e veprimtarisë së institucioneve jashtëkushtetuese të Bosnje dhe Hercegovinës, Ligjin për plotësimin e Kodit Penal të Republikës Sërpska, si dhe Ligjin për Këshillin e Lartë Gjyqësor dhe Prokurorial të Republikës Sërpska, shkruan Radio Evropa e Lirë

Kallas tha se Bashkimi Evropian iu përgjigj kërcënimeve ndaj rendit kushtetues të Bosnje dhe Hercegovinës në mars, duke forcuar trupat evropiane në këtë vend.

Ajo iu referua edhe zgjatjes së mandatit të EUFOR-it më 31 tetor, për ç’gjë votoi Këshilli i Sigurimit i OKB-së.

“Bota e ka pranuar se ata e bëjnë Bosnje dhe Hercegovinën të sigurt, dhe se BE-ja ka bërë gjithçka që nga Dejtoni deri më sot për ta bërë Bosnje dhe Hercegovinën të sigurt”, shtoi ajo.

Kallas foli edhe për Programin e Reformave që ka miratuar Këshilli i Ministrave të Bosnje dhe Hercegovinës dhe që duhet t’i sigurojë këtij vendi mbi një miliard euro nga Plani i Rritjes i BE-së.

Bosnje dhe Hercegovina ishte e vetmja në rajon që vonoi gati dy vjet me miratimin e këtij dokumenti, dhe për shkak të kësaj vonese, shuma e parashikuar prej një miliard eurosh u ul për 108.5 milionë./EO

Lajmet

Policia në Prizren sekuestron tre patentë shoferi për tejkalim të shpejtësisë

Published

31 minutes ago

November 3, 2025

UBTnews

Policia e Kosovës në Prizren ka njoftuar se gjatë realizimit të detyrave me vetura inteligjente, radarë mobil dhe radarë statik, më datat 29.10.2025 dhe 31.10.2025 kanë identifikuar disa kundërvajtës të cilët kanë tejkaluar ndjeshëm kufirin e lejuar të shpejtësisë.

“Gjatë kontrollit në zonën 50 km/h, janë regjistruar shpejtësi prej: 104 km/h, 107 km/h, 140 km/h“, thuhet në njoftim.

Sipas njoftimit personat e përfshirë janë ndaluar nga njësitet përkatëse dhe ndaj tyre janë ndërmarrë masa ligjore. Dy kundërvajtës janë ndëshkuar me: Gjobë prej 500 euro, 5 pikë negative, ndalim i drejtimit të mjetit motorik për 6 muaj; Një kundërvajtës është ndëshkuar me: Gjobë prej 300 euro, 3 pikë negative, ndalim i drejtimit të mjetit motorik për 3 muaj./KP

Lajmet

Sot fillon zyrtarisht fushata elektorale për balotazh

Published

47 minutes ago

November 3, 2025

UBTnews

Sot ka nisur edhe zyrtarisht fushata elektorale për raundin e dytë të zgjedhjeve lokale në Kosovë.

Pas përfundimit të raundit të parë të zgjedhjeve me 12 tetor, shumica e komunave të Kosovës mësuan kryetarin e ardhshëm të tyre, kurse në 18 komuna do të votohet në balotazh për të përcaktuar kryetarin e ri.

Fushata elektorale përfundon të dielën në ora 06:59, teksa qendrat e votimit zyrtarisht pritet të hapen nga ora 07:00.

Kujtojmë se LVV është në balotazh në 12 komuna të Kosovës, LDK në 9 komuna, PDK në 6 komuna teksa AAK në 5 komuna./KP