Konsumatorët në Evropën Juglindore kanë nisur një valë bojkotesh ndaj supermarketeve për shkak të rritjes së çmimeve, një fenomen që ka nisur në Kroaci dhe është përhapur në Bosnje dhe Hercegovinë, Mal të Zi, Maqedoninë e Veriut, Bullgari dhe Serbi. Kjo lëvizje është organizuar kryesisht përmes rrjeteve sociale dhe është mbështetur nga sindikatat, grupet e mbrojtjes së konsumatorëve dhe disa politikanë.

Protestat filluan në Kroaci në fund të janarit me një bojkot të zinxhirëve të mëdhenj si Lidl, Eurospin dhe Konzum. Fushata u përhap shpejt në rajon, duke shkaktuar një ulje të qarkullimit në dyqane, veçanërisht në datat e bojkotit të koordinuar, si 7-8 shkurt dhe 31 janar.

Në Bosnje dhe Hercegovinë, Maqedoninë e Veriut dhe Serbi, bojkotet u shoqëruan me rënie të ndjeshme të trafikut në supermarkete. Organizata serbe e konsumatorëve “Efektiva” organizoi një bojkot pesëditor nga 10 shkurti, duke synuar rrjetet kryesore të shitjes me pakicë. Në Mal të Zi, bojkotet u mbështetën nga kryeministri Milojko Spajiq dhe disa OJQ.

Konsumatorët ankohen se çmimet e ushqimeve janë rritur në nivele të papërballueshme, ndërsa pagat kanë mbetur të ulëta. Në Kroaci, çmimet e ushqimeve janë mbi mesataren evropiane, duke arritur në 148.7 pikë sipas Indeksit të Harmonizuar të Çmimeve të Konsumit (HICP). Në Bullgari, çmimet janë më të larta, me 174.4 pikë. Inflacioni në Kroaci ka arritur në 5%, duke qenë më i larti në eurozonë.

Disa zinxhirë supermarketesh kanë tentuar të reduktojnë çmimet ose të ofrojnë zbritje për të zbutur efektin e bojkotit. Megjithatë, qytetarët mbeten të ndarë mbi efektivitetin afatgjatë të kësaj lëvizjeje.

Në Shqipëri, nuk është regjistruar ndonjë bojkot i organizuar, pavarësisht thirrjeve sporadike në rrjetet sociale. Qeveria ka rritur pagat dhe pensionet, ndërsa ka ulur çmimin e energjisë elektrike, çka ka zbutur efektin e krizës. Në Slloveni, çmimet e ushqimeve janë stabilizuar në vitin 2024, por qytetarët kroatë kanë zgjedhur të bëjnë blerje në Slloveni gjatë bojkotit në vendin e tyre.

Bojkotet vazhdojnë, por mbetet e paqartë nëse ato do të kenë ndikim afatgjatë në uljen e çmimeve./UBTNews/

Bashkimi Evropian ka përkrahur punën e Prokurorisë së Posaçme kundër Korrupsionit (SPAK) në Shqipëri, pas kritikave që ka marrë kjo e fundit shkaku i arrestimit të kryebashkiakut të Tiranës, Erion Veliajt.

Zëdhënësi i Komisionit Evropian ka thënë se roli i SPAK-ut në Shqipëri ka rëndësi kyçe dhe se reforma në drejtësi dhe sundimi i ligjit janë elemente kyçe të procesit të anëtarësimit të Shqipërisë në BE.

Veliaj u arrestua të hënën shkaku i akuzave për korrupsion, që përfshijnë të paktën 1.1 milion euro fonde publike. Ai akuzohet se u kishte dhënë para publike bizneseve të cilat në këmbim i jepnin familjes së tij fitime të paligjshme.

Derisa Veliaj doli para gjykatës të mërkurën, kryeministri dhe kreu i Partisë Socialiste në pushtet, Edi Rama, tha para deputetëve se “nuk ka prova” ndaj Veliajt dhe e cilësoi dosjen e prokurorisë si “një roman prej 400 faqesh, me shumë personazhe, por pa fakte”.

Ai theksoi se qëndrimi i Qeverisë dhe partisë që drejton për të mbështetur drejtësinë dhe luftën ndaj korrupsionit nuk ndryshon, por tha se “mungon një palë konstruktive që të jetë garantuese e pavarësisë së drejtësisë”.

Edhe pse zëdhënësi i Komisionit Evropian ka thënë se BE-ja nuk mund t’i komentojnë proceset gjyqësore që janë në proces e sipër, ai tha se BE-ja po i ndjek së afërmi zhvillimet e fundit.

“Roli specifik i SPAK-ut ,si dhe pavarësia e tij në hetimin dhe procedimin e rasteve të korupsionit në nivel të lartë, të lirë nga çdo përpjekje për ndërhyrje politike apo presion të panevojshëm, është me rëndësi kyçe për sundimin e ligjit në Shqipëri”, tha zëdhënësi i Komisionit Evropian.

Në muajt e fundit, Shqipëria kishte shënuar një progres domethënës në procesin e negociatave të anëtarësimit me BE-në duke hapur kapitujt e parë negociues.

Reforma në drejtësi dhe progresi në sundimin e ligjit ishin vlerësuar nga BE-ja dhe vendet anëtare si elemente që kishin ndihmuar në këtë progres të Shqipërisë./REL/

Kuvendi i Shqipërisë zhvillon sot seancë plenare ku në rend të ditës është një interpelancë me ministrin e Brendshëm, Ervin Hoxha, kërkuar nga deputeti Asllan Dogjani.

Më pas do të shqyrtohet projektligji “Për disa shtesa dhe ndryshime në ligjin nr. 10 019, datë 29.12.2008, “Kodi Zgjedhor i Republikës së Shqipërisë””, i ndryshuar si dhe projektligji “Për disa shtesa dhe ndryshime në ligjin nr. 10 019, datë 29.12.2008, “Kodi Zgjedhor i Republikës së Shqipërisë”, i ndryshuar, raporton ATSH.

Në rendin e ditës në Kuvend është edhe projektligji “Për ratifikimin e vendimit nr.1/2024 të Komitetit të Përbashkët të Konventës Rajonale për Rregullat Preferenciale të Origjinës Pan-Euro-Mediteriane të 12 dhjetorit 2024, për ndryshimin e vendimit nr.1/2023 të Komitetit të Përbashkët, miratuar me ligjin nr.59/2024, në lidhje me përdorimin e certifikatave të qarkullimit të lëshuara në mënyrë elektronike, në kuadrin e kësaj konvente, të zbatueshme që nga 1 janari 2025”.

Më pas do të diskutohet projektligji “Për disa ndryshime në ligjin nr. 133/2015, “Për trajtimin e pronës dhe përfundimin e procesit të kompensimit të pronave”, të ndryshuar.

Kuvendi do të shqyrtojë edhe dy projektvendime për zgjedhjen e kryetarit dhe një anëtari të Këshillit Drejtues të Autoritetit të Komunikimeve Elektronike dhe Postare.

Gjithashtu nesër Kuvendi do të shqyrtojë edhe projektvendimin “Për zgjedhjen e Avokatit të Popullit”.

Në seancën e nesërme pritet të shqyrtohet edhe projektvendimi “Për emërimin e anëtarit të Bordit të Autoritetit të Mbikëqyrjes Financiare, që do mbajë funksionin e Kryetarit të Bordit”.

Gjithashtu do të shqyrtohet edhe projektvendimi “Për miratimin e fondit për financimin e partive pjesëmarrëse në zgjedhjet e vitit 2025”.

Kuvendi gjithashtu do të shqyrtojë projektvendimet për lirimin e Gëzim Podgoricës dhe Genc Përmetit nga detyra e anëtarit të Këshillit Drejtues të Radiotelevizionit Shqiptar si dhe projektvendimet për shkarkimin e Leka Bungos nga detyra e kryetarit të Këshillit Drejtues të Radio Televizionit Shqiptar si dhe shkarkimin nga detyra e anëtarëve të Këshillit Drejtues të Radiotelevizionit Shqiptar, Albert Minga, Ardita Reçi, Dionis Papadhimitri, Edmond Tullumani, Engjëll Ndocaj, Ilir Keko, Mevlan Shanaj dhe Milena Selimi.

Komisioni Qendror i Zgjedhjeve ka procesuar 99.72 për qind të vendvotimeve.

Sipas rezultateve preliminare deri të mërkurën në ora 22:12 janë procesuar 2 mijë e 526 vendvotime nga 2 mijë e 533 që janë në total. Deri më tani edhe shtatë vendvotime kanë mbetur të paprocesura për të përfunduar procesi i numërimit të votave të rregullta për zgjedhjet.

Sipas këtyre të dhënave preliminare të KQZ-së del se Lëvizja Vetëvendosje ka 40.84 për qind të votave, Partia Demokratike e Kosovës ka marrë 22.05 për qind, Lidhja Demokratike e Kosovës me 17.67 për qind, Koalicioni AAK-Nisma, konservatorët dhe intelektualët ka marrë 7.45 për qind.

Rezultatet preliminare nuk përfshijnë votat me kusht, votat e personave me nevoja të veçanta dhe votat jashtë Kosovës.

Komisioni Qendror i Zgjedhjeve ka filluar edhe numërimin e votave të kandidatëve për deputetë në disa komuna.