Aktorja Zendaya është përfshirë në një debat kulturor pasi mbajti një palë vathë me origjinë nga artefakte të lashta iraniane gjatë turneut promovues të filmit të ri “The Odyssey” të regjisorit Christopher Nolan, ka shkruar The Guardian.

Gjatë një eventi në Londër, Zendaya, e cila në film interpreton perëndeshën Athena, u shfaq me vathë prej ari që datojnë rreth 700 vjet para erës sonë. Bizhuteritë lidhen me thesarin e Ziwiye, një koleksion objektesh të lashta të zbuluara në veriperëndim të Iranit në vitet 1940.

Përdorimi i tyre ka nxitur reagime nga arkeologë dhe historianë, të cilët kritikuan shfaqjen e objekteve me rëndësi të madhe kulturore si aksesorë mode për një promovim filmik.

Historiania e artit me origjinë iraniane, profesoresha Sussan Babaie, e ka cilësuar situatën shqetësuese, duke thënë se këto objekte nuk duhet të trajtohen thjesht si stoli.

“Këto janë objekte që nuk janë krijuar për t’u shfaqur si aksesorë. Ato janë trashëgimi njerëzore, trashëgimi botërore, jo thjesht stoli”, ka deklaruar Babaie.

Sipas saj, përdorimi i tyre në këtë mënyrë ua humb kuptimin historik dhe shpirtëror, duke e cilësuar si “përvetësim dhe thjeshtim të kontributeve kulturore të Iranit ndaj njerëzimit”.

Vathët i përkasin galerisë “Barron London”, e cila ka deklaruar se objektet janë ruajtur në përputhje me dokumentacionin e origjinës dhe kërkesat ligjore. Sipas galerisë, huazimi nuk kishte qëllim komercial, por synonte të nderonte mjeshtërinë e argjendarëve të lashtë persë.

Thesari i Ziwiye përfshinte objekte prej ari, argjendi, bronzi dhe terrakote. Shumë prej tyre u grabitën pas zbulimit dhe më pas përfunduan në tregjet e antikuarëve, muze dhe koleksione private në vende të ndryshme.

Arkeologia Annelise Baer ka thënë se shqetësimi kryesor etik lidhet me historinë e ndërlikuar të origjinës së disa prej këtyre objekteve.

“Çështja kryesore është se vetë vathët janë të lidhur me antikitete të grabitura. Fakti që Zendaya i mbajti ato është dytësor, por paraqitja e tyre në një premierë të madhe ndërkombëtare i solli këtë çështje në vëmendjen e publikut”, ka thënë ajo./A.K/

Jennifer Garner është shfaqur elegante me një fustan me motive lulesh, teksa ka nisur xhirimet e para të ribërjes nga Netflix të komedisë romantike të vitit 2004, “13 Going on 30”, në Santa Monica të Kalifornisë.

Aktorja 54-vjeçare, e cila në këtë projekt mban edhe rolin e producenteve ekzekutive, u shoqërua në sheshxhirim nga Judy Greer dhe Emily Bader.

Kanë kaluar 22 vjet që kur Garner dhe Greer luajtën personazhet Jenna Rink dhe Lucy Wyman në filmin origjinal të regjisorit Gary Winick. Filmi kishte arkëtuar 96 milionë dollarë në mbarë botën, me një buxhet prej 37 milionë dollarësh.

Ende nuk është e qartë nëse Garner dhe Greer do të rikthehen në rolet e tyre ikonike si punonjëse rivale të revistës “Poise”, apo do të luajnë personazhe të lidhura me protagonisten e re, Emily Bader.

Ndryshe nga filmi origjinal, ku ngjarja zhvillohej në vitin 1987, versioni i ri pritet të vendoset në vitin 2009 dhe do të drejtohet nga regjisori Brett Haley.

Kasti i ri përfshin emra si Adeline Rudolph, Logan Lerman, Jessica Alba, Taylor Ortega, Tim Meadows dhe Dan Bucatinsky, ndërsa filmi origjinal kishte në kast edhe Mark Ruffalo, Andy Serkis, Brie Larson, Ashley Benson, Jim Gaffigan dhe Kathy Baker.

Regjisori Brett Haley e ka cilësuar “13 Going on 30” si një film “qesharak, emocional dhe thellësisht njerëzor”, duke thënë se përfshirja e Jennifer Garner si producente ekzekutive ka një rëndësi të veçantë për këtë ribërje./A.K/

Këngëtari britanik Harry Styles ka anuluar koncertin e planifikuar në stadiumin MorumBIS në São Paulo të Brazilit, vetëm pak orë para nisjes së tij, për shkak të një problemi shëndetësor.

Lajmi është konfirmuar nga organizatori Live Nation Brasil, i cili bëri të ditur se të gjitha biletat do t’u rimbursohen fansave, ndërsa koncerti i radhës në Brazil pritet të mbahet sipas planit.

Ky nuk është incidenti i parë gjatë turneut të tij “Together, Together”. Muajin e kaluar, Styles u rrëzua në skenë gjatë një koncerti në stadiumin Wembley në Londër, ku qëndroi për disa sekonda i shtrirë duke u përpjekur të rimerrte frymën, përpara se të largohej nga skena.

Pavarësisht këtyre vështirësive, artisti 32-vjeçar ka vazhduar turneun, ndërsa së fundmi emocionoi publikun në Londër duke falënderuar ish-anëtarët e grupit “One Direction” – Niall Horan, Louis Tomlinson, Zayn Malik dhe të ndjerin Liam Payne – për ndikimin e tyre në karrierën e tij.

Pak ditë më vonë, Styles u bë sërish viral në rrjetet sociale për një moment humoristik gjatë një performance, kur vuri re se zinxhiri i pantallonave i kishte mbetur hapur dhe e mbylli mes brohoritjeve dhe të qeshurave të publikut./A.K/