Rivendosja e energjisë në qytetin Kherson të çliruar së fundmi është “detyra numër një”, sipas një zyrtari ukrainas, ndërsa Norvegjia ka rënë dakord të sigurojë 200 milionë dollarë fonde për të ndihmuar Ukrainën të blejë gaz natyror këtë dimër.

Nëse vetëm sapo na bashkoheni, këta janë titujt kryesor sa i përket luftës në Ukrainë:

Një i plagosur nga bombardimet në Nikopol: Një burrë 78-vjeçar u plagos kur granatimet ruse goditën lagjen jugore të Ukrainës, Nikopol, gjatë natës së të hënës, sipas një zyrtari ushtarak ukrainas.

Kherson mbetet pa energji elektrike: Qyteti i Khersonit është ende pa energji elektrike, tha të hënën një zyrtar nga zyra e presidentit. “Nuk ka energji elektrike në qytetin Kherson. Ne po punojmë për këtë”, tha Kyrylo Tymoshenko, nënkryetar i Zyrës së Presidentit të Ukrainës.

Norvegjia do të financojë blerjet e gazit ukrainas: Norvegjia ka nënshkruar një marrëveshje për të siguruar financim prej gati 200 milionë dollarësh për të ndihmuar Ukrainën të blejë gaz natyror këtë dimër, sipas një deklarate të qeverisë norvegjeze të hënën.

Austria redukton importet e gazit rus: Kjo sipas ministrit për klimën. Pjesa e Rusisë në furnizimet totale të gazit në Austri ra nga 79% në shkurt në 21% në shtator, tha Leonore Gewessler.

Spanja do të dërgojë policinë në Ukrainë: Policia spanjolle do të vendoset në Ukrainë për të mbështetur autoritetet e vendit “në hetimin e krimeve të mundshme të luftës dhe krimeve kundër njerëzimit”, njoftoi të hënën kryeministri spanjoll Pedro Sánchez.

Rusia do të bëjë “çdo gjë të mundshme” për të gjetur ata që janë përgjegjës për ekzekutimin e supozuar të ushtarit: Zëdhënësi i Kremlinit, Dimitri Peskov, u tha gazetarëve të hënën se përgjegjësit duhet të “dënohen”. Të shtunën, Rusia akuzoi Ukrainën për krime lufte pasi një video u shfaq në mediat sociale, e cila thotë se tregon ushtarë rusë të vrarë pasi u dorëzuan në forcat ukrainase, por zyrtarët ukrainas e kanë kundërshtuar këtë akuzë.

Peskov: Rusia nuk synon të rrëzojë qeverinë Zelensky: Një ndryshim i qeverisë ukrainase nuk është një nga qëllimet e “operacionit special” të Rusisë, sipas zëdhënësit të Kremlinit, Dmitry Peskov. Një senator i lartë rus kishte thënë më herët se çdo normalizim i lidhjeve midis Moskës dhe Kievit mund të ndodhë “vetëm pas një ndryshimi në udhëheqjen e Ukrainës”.

Sekretari amerikan i mbrojtjes nënvizon mbështetjen për Ukrainën: Uashingtoni është i përkushtuar të mbështesë Kievin “për aq kohë sa duhet”, tha të hënën Sekretari i Mbrojtjes i SHBA-së, Lloyd Austin. Është “e vështirë të parashikohet se si do të evoluojnë gjërat dhe në çfarë afati kohor, por ne jemi në këtë mbështetje për Ukrainën për aq kohë sa duhet”, tha ai./UBTNews/