Lajmet

Zemërim në PE për shkak të skandalit për korrupsion

“Një hetim është duke u zhvilluar dhe ne po e ndjekim atë”, tha Borrell.

Published

3 years ago

December 12, 2022

UBT news

Arrestimi dhe akuzimi i katër personave në lidhje me një hetim kundër korrupsionit që përfshin anëtarë të Parlamentit Evropian dhe një shtet të Gjirit, që thuhet se është Katari, mund të tronditë Brukselin në thelb.

Disa eurodeputetë, duke përfshirë një nga nënkryetaret e parlamentit Eva Kaili, e cila u mbajt në paraburgim të dielën, janë akuzuar se kanë pranuar shuma të mëdha parash nga një vend i Gjirit që raportohet se është nikoqir i Kupës së Botës, Katari. Megjithëse, Doha i ka mohuar akuzat.

Shefi i politikës së jashtme të BE-së, Josep Borrell, i përshkroi zhvillimet e fundit si “shumë shqetësuese” teksa mbërriti të hënën në një takim të ministrave të jashtëm të BE-së në Bruksel.

“Një hetim është duke u zhvilluar dhe ne po e ndjekim atë”, tha ai. “Këto janë akuza shumë të rënda”.

Ministrja e Jashtme gjermane, Annalena Baerbock tha se në këtë rast duhej të zbatohej “fuqia e plotë e ligjit”. “Kjo ka të bëjë me besueshmërinë e Evropës, kështu që kjo duhet të shkaktojë pasoja në fusha të ndryshme”, tha ajo.

“Ky është një skandal që ne duhet ta arrijmë në fund, në mënyrë që të sigurohemi që të mos ndodhë më”, tha ministri i Jashtëm irlandez, Simon Coveney, duke bërë thirrje për një “hetim të plotë dhe transparent”.

Qeveria greke të hënën ngriu asetet e Kailit, raportoi AFP. Ajo është suspenduar gjithashtu nga Socialistët dhe Demokratët e Parlamentit Evropian dhe është përjashtuar nga partia e qendrës së majtë PASOK të Greqisë.

Niels Fuglsang, një eurodeputet me Partinë Social Demokratike Daneze, vuri në dukje efektin e dëmshëm që ky skandal mund të ketë në bllok.

“Nëse ne mund të blihemi, nëse anëtarët e Parlamentit Evropian dhe politikanë të tjerë mund të blihen për të thënë gjëra të caktuara, për të votuar në mënyra të caktuara… është një turp dhe e bën Evropën më të dobët”, tha ai për Euronews.

“Pra, është në interesin e të gjithëve që të arrijmë deri në fund të kësaj dhe të miratojmë rregulla për t’u siguruar që gjëra të tilla nuk duhet të ndodhin kurrë [më]… Kjo [ajo që ndodhi] është shumë e gabuar dhe ne kemi një punë të madhe dëmshpërblimi për të bërë”.

Kjo aferë është “e turpshme dhe e patolerueshme” dhe dëmton “shumë seriozisht” reputacionin e Parlamentit, tha të dielën komisioneri i ekonomisë së BE-së Paolo Gentiloni.

Politikanët francezë të krahut të majtë kanë kritikuar “skandalin shumë të rëndë”, me eurodeputetin Manon Aubry (E majta) duke kërkuar një debat mbi këtë çështje dhe duke kritikuar “lobimin agresiv” nga Katari./UBTNews/

Lajmet

KQZ hap periudhën për ndërrimin e Qendrës së Votimit për zgjedhjet lokale

Published

11 hours ago

June 28, 2025

UBTNews

Komisioni Qendror i Zgjedhjeve (KQZ) ka njoftuar se më 28 qershor ka nisur periudha për ndërrimin e Qendrës së Votimit brenda komunës për Zgjedhjet Lokale, e cila do të zgjasë deri më 29 gusht 2025.

Gjatë kësaj periudhe 63-ditore, të gjithë qytetarët me të drejtë vote kanë mundësi të kontrollojnë qendrën e tyre aktuale të votimit dhe, nëse dëshirojnë, të kërkojnë ndërrimin e saj, duke zgjedhur një lokacion më të afërt me vendbanimin e tyre brenda të njëjtës komunë.

Ndërrimi i Qendrës së Votimit mund të bëhet në dy mënyra:

përmes platformës elektronike të KQZ-së në https://qv.kqz-ks.org
ose duke paraqitur kërkesën në Komisionin Komunal të Zgjedhjeve të komunës ku është i regjistruar votuesi.

Lajmet

Serbët festojnë Vidovdanin mes masave të shtuara të Policisë së Kosovës

Published

11 hours ago

June 28, 2025

UBTNews

Grupe serbësh janë drejtuar për në Graçanicë për të nisur festimet e atij që njihet si Vidovdan. Festimet nisën në mëngjes në Manastirin e Graçanicës dhe po vazhdojnë në Gazimestan, ku janë paralajmëruar edhe ardhje të tjera gjatë ditës.

Për të siguruar mbarëvajtjen e aktivitetit, Policia e Kosovës ka ndërmarrë masa të rrepta sigurie. Në hyrje të Gazimestanit, po zhvillohen kontrolle për të gjithë të pranishmit, ndërkohë që njësi të shumta policore janë të vendosura në terren, bashkë me forcat e KFOR-it.

Policia ka njoftuar se masat planifikuese dhe operative janë ndërmarrë për ruajtjen e rendit publik, menaxhimin e trafikut dhe sigurinë kufitare. PK ka apeluar për një manifestim të qetë, duke kërkuar nga qytetarët të shmangin provokimet dhe të respektojnë ligjet dhe udhëzimet e organeve të sigurisë.

Në fillim të këtij muaji, Gjykata Themelore në Prishtinë anuloi vendimin e mëparshëm të komunës së Graçanicës që lejonte shfaqjen e flamurit serb për këtë rast, duke vlerësuar se një veprim i tillë ishte në kundërshtim me legjislacionin në fuqi, pasi Vidovdani nuk është festë zyrtare në Kosovë.

Vidovdani lidhet me Betejën e Kosovës të vitit 1389, ku princi serb Lazar humbi jetën. Në diskursin historik serb, kjo betejë përshkruhet si një humbje ushtarake por një fitore shpirtërore.

Gazimestani është gjithashtu një vend me ngarkesë historike dhe politike, pasi aty presidenti i atëhershëm i Serbisë, Slobodan Millosheviq, mbajti një fjalim të njohur në vitin 1989, i cili shpesh shihet si paralajmërim i konflikteve që pasuan në Ballkan.

Lajmet

PDK me kërkesë të qartë, zhbllokimi i Kuvendit sipas Kushtetueses

Published

11 hours ago

June 28, 2025

UBTNews

Deputeti i Partisë Demokratike të Kosovës, Përparim Gruda tha se në takimin e sotëm të partive politike me kryeministrin në detyrë, Albin Kurti do të diskutohet dalja nga situata e krijuar në Kuvendin e Kosovës.

Gruda tha se kryetari i PDK-së, Memli Krasniqi do të shpreh qëndrimet e kësaj partie se si të zhbllokohet Kuvendi i Kosovës, bazuar në aktgjykimin e Gjykatës Kushtetuese.

Ndërkaq, se a do të arrihet ndonjë marrëveshje apo çështje të tjera siç tha Gruda, do të përgjigjet vetë Krasniqi.

Këtë deklarim Gruda e bëri pas pyetjeve të gazetarëve në konferencën e thirrur nga PDK.

Lajmet

Trump flet sërish për Kosovën e Serbinë: Ishin gati për luftë të madhe, unë e ndala

Published

14 hours ago

June 28, 2025

UBTnews

Presidenti Amerikan Donald Trump për të tretën herë në vetëm një javë është rikthyer të flasë për çështjen e raporteve të tensionuara midis Kosovës dhe Serbisë, teksa bën pasqyrën e konflikteve globale që ai pretendon se ka zgjidhur.

Gjatë një konference për shtyp në Shtëpinë e Bardhë, Trump sërish tha se Serbia dhe Kosova ishin gati të përplaseshin ushtarakisht, madje sipas tij në një luftë të madhe.

“Serbia dhe Kosova ishin gati të përplaseshin. Po shkonin drejt një lufte të madhe”, tha Trump.

Më tej ai zbuloi formulën e tij të suksesit, me të cilën e ndali shpërthimin e një lufte mes dy shteteve në Ballkan, shkruan A2 CNN.

Trump vazhdimisht gjatë javës së fundit, nga momenti kur vendosi armëpushimin midis Izraelit e deri tek samiti i NATO-s në Hagë, i është referuar marrëveshjes Kosovë-Serbi, të arritur në Uashington më 2020 si histori suksesi e ndërmjetësimit të tij.

“Ne e ndalëm Serbinë, e cila ishte gati të fillonte një përplasje”, deklaroi dy ditë më parë Trump.

Ai i referohet marrëveshjes së nënshkruar nga Presidenti i Serbisë, Aleksandër Vuçiq dhe kryeministri i Kosovës, Avdullah Hoti në Zyrën Ovale, më 04.09.2020 të ndërmjetësuar nga Donald Trump.